Kulandzisa KwaLukha

1 Labanyenti betamile kubhala ngetintfo lesitikholelwa mbamba,+ 2 njengobe nje satitjelwa ngulabo labatibonela ngewabo,+ futsi baba tikhonti letimemetela lomlayeto,+ 3 ngako nami ngikubone kufanele mhlonishwa Tiyofilusi kutsi letintfo ngitihlolisise ngekucophelela kusukela ekucaleni, futsi ngitibhale ngekulandzelana kwato,+ 4 kuze wati kutsi letintfo lowafundziswa tona tiliciniso.+

5 Emalangeni aHerodi*+ inkhosi yaseJudiya, bekunemphristi lobekabitwa ngekutsi nguZakhariya, awelicembu la-Abiya,+ futsi umkakhe bekavela emndenini wa-Aroni, libito lakhe kungu-Elizabethe. 6 Bobabili bebalungile embikwaNkulunkulu, bebangasoleki ngobe bebayigcina yonkhe imitsetfo yaJehova* kanye netimiso takhe. 7 Kodvwa bebete umntfwana ngobe Elizabethe bekangabatfoli bantfwana, futsi bobabili besebakhule kakhulu.

8 Ngesikhatsi Zakhariya angumphristi futsi enta umsebenti wakhe+ embikwaNkulunkulu, 9 besekuligema lakhe lekutsi anikele imphepho+ nakangena ethempelini laJehova*+ njengobe nje bekuyinchubo* yebaphristi. 10 Bonkhe bantfu bebathantaza ngephandle ngesikhatsi kunikelwa imphepho. 11 Zakhariya wabona ingilosi yaJehova* ime ngesekudla seli-al’thare lokushiselwa kulo imphepho. 12 Wetfuka nakayibona, futsi wesaba kakhulu. 13 Kodvwa lengilosi yatsi kuye: “Ungesabi Zakhariya, ngobe kuncusa kwakho kuvakele, Elizabethe umkakho utakutalela indvodzana, futsi kufanele uyetse utsi nguJohane.+ 14 Wena utawujabula kakhulu, nebantfu labanyenti batawujabula ngekutalwa kwayo,+ 15 ngobe lomntfwana utawuba mkhulu emehlweni aJehova.*+ Akukafaneli anatse liwayini netjwala,+ futsi utawugcwala umoya longcwele asengakatalwa.*+ 16 Yena utawugucula emadvodzana lamanyenti aka-Israyeli kutsi abuyele kuJehova* Nkulunkulu wawo.+ 17 Utawuhamba embikwaNkulunkulu anemoya nemandla lafana newa-Elija.+ Utawenta tinhlitiyo tabobabe tifanane netebantfwana,+ ente nalabo labangalaleli babe nekuhlakanipha lokufana nekwalabalungile. Loko utakwenta kuze bantfu balungele kukhonta Jehova.”*+

18 Zakhariya watsi kulengilosi: “Ngitawuciniseka ngani? Ngobe sengigugile, nemfati wami sewukhulile.” 19 Lengilosi yamphendvula yatsi: “NginguGabhriyeli,+ lohlala asembikwaNkulunkulu,+ futsi ngitfunywe kutsi ngitokhuluma nawe, kuze ngikutjele letindzaba letimnandzi. 20 Kodvwa-ke, utawuthula ungasakhoni kukhuluma tize tenteke letintfo, ngobe awukawakholwa emavi ami latawugcwaliseka ngesikhatsi lesibekiwe.” 21 Bantfu bebasolo balindze Zakhariya, futsi kwabamangalisa kutsi bekasolo angaphumi ethempelini. 22 Nakaphuma, bekangasakwati kukhuluma nabo, ngako kwavele kwabakhanyela kutsi ubone umbono ethempelini. Ngenca yekutsi bekasolo angakhoni kukhokha livi, wakhuluma nabo ngetandla. 23 Atsi nasekaphelile emalanga ekwenta umsebenti wakhe longcwele, wabuyela ekhaya lakhe.

24 Ngemuva kwemalanga lambalwa, Elizabethe umkakhe watetfwala, futsi wahlala endlini tinyanga letisihlanu, atsi: 25 “Nguloku Jehova* lasangentele kona. Unginakile, walisusa lihlazo lebengingilo.”+

26 Enyangeni yesitfupha Elizabethe atetfwele, Nkulunkulu watfuma ingilosi Gabhriyeli+ edolobheni laseGalile lokutsiwa yiNazaretha, 27 kutsi iye entfombini+ lebeyitawushada* nendvodza lokutsiwa nguJosefa yasemndenini waDavide, futsi libito lalentfombi bekunguMariya.+ 28 Gabhriyeli wefika watsi kuyo: “Sawubona wena lobusiseke kakhulu, Jehova* unawe.” 29 Lamavi amkhatsata kakhulu Mariya, wacala nekutibuta kutsi asho kutsini. 30 Ngako lengilosi yatsi kuye: “Ungesabi Mariya, ngobe utfole umusa kuNkulunkulu. 31 Utawutetfwala, ubeleke indvodzana,+ futsi kufanele uyetse utsi nguJesu.+ 32 Itawuba ngumuntfu lomkhulu,+ ibitwe ngekutsi yiNdvodzana yaLosetikwako Konkhe,+ futsi Jehova* Nkulunkulu utayinika sihlalo sebukhosi sababe wayo Davide,+ 33 itawuba yiNkhosi endlini yaJakobe kuze kube phakadze, neMbuso wayo ngeke uphele.”+

34 Kodvwa Mariya watsi kulengilosi: “Loku kutawenteka njani, ngobe angikaze ngilale nendvodza?”+ 35 Lengilosi yamphendvula yatsi: “Umoya longcwele utawehlela kuwe,+ futsi emandla aLosetikwako Konkhe atakusibekela. Ngaleso sizatfu, loyo lotamtala kutawutsiwa ungcwele+ futsi uyiNdvodzana yaNkulunkulu.+ 36 Na-Elizabethe sihlobo sakho, lobekatiwa ngekutsi akabatfoli bantfwana, sewutetfwele. Utawutala indvodzana ngisho nobe asagugile, futsi lena seyinyanga yakhe yesitfupha. 37 Loko lokushiwo nguNkulunkulu kuyagcwaliseka.”+ 38 Ngako Mariya watsi: “Mine ngiyincekukati yaJehova!* Shengatsi kungenteka njengobe ushito.” Ngemuva kwaloko, lengilosi yamshiya.

39 Ngalawo malanga, Mariya wahamba ngekushesha waya edolobheni lakaJuda, lokulive lebelinetintsaba, 40 wafike wangena ekhaya laZakhariya wabingelela Elizabethe. 41 Ngesikhatsi Elizabethe eva Mariya ambingelela, lomntfwana lobekasesiswini sakhe wagcuma, futsi Elizabethe wagcwala umoya longcwele, 42 wamemeta kakhulu watsi: “Wena ubusisiwe kulabanye bafati, futsi ubusisiwe nalomntfwana lotamtala! 43 Ngingubani nje mine kutsi ngingavakashelwa ngumake weNkhosi yami? 44 Ngobe ngalesikhatsi ngiva ungibingelela, lomntfwana losesiswini sami uvele wagcuma ngenjabulo. 45 Uyajabula naloyo lobe nekukholwa, ngobe tonkhe letintfo letikhulunywe nguJehova* titawenteka.”

46 Mariya watsi: “Ngiyamdvumisa* Jehova,*+ 47 nemoya wami ujabule kakhulu ngaNkulunkulu longuMsindzisi wami,+ 48 ngobe uyikhumbulile incekukati yakhe, ngisho nobe iphansi.+ Kusukela nyalo, tonkhe titukulwane titawutsi ngiyajabula,+ 49 ngobe Loyo lonemandla ungentele tintfo letinkhulu, futsi libito lakhe lingcwele,+ 50 kuto tonkhe titukulwane, ubentela umusa labo labamesabako.+ 51 Wente tintfo letinkhulu ngesandla sakhe; wabasakata labo labatigcabhako.+ 52 Bantfu labanemagunya ubehlisile etihlalweni,+ waphakamisa lababukelwa phansi;+ 53 labalambile ubesutsise ngetintfo letinhle,+ futsi labo lebebanjingile ubente bahamba balengisa tandla. 54 Uyisitile inceku yakhe Israyeli, wayentela umusa+ 55 kuze kube phakadze, njengobe asho kubokhokho betfu, ku-Abrahama nakubantfwana* bakhe.”+ 56 Mariya wahlala naye sikhatsi lesingaba tinyanga letintsatfu, wase ubuyela ekhaya.

57 Sefika sikhatsi sekutsi Elizabethe abeleke, futsi watala indvodzana. 58 Bomakhelwane netihlobo takhe beva kutsi Jehova* umentele umusa lomkhulu, ngako bajabula kanye naye.+ 59 Ngelilanga lesi⁠-⁠8, beta batewusoka lomntfwana+ futsi bebafuna kumetsa libito lababe wakhe lelitsi Zakhariya. 60 Kodvwa make walomntfwana watsi: “Cha, utawubitwa ngekutsi nguJohane.” 61 Nabeva loku, batsi kuye: “Kute mosi sihlobo senu lesibitwa ngalelibito.” 62 Babese baya kubabe walomntfwana, bakhuluma naye ngetandla bambuta kutsi ufuna lomntfwana etsiwe liphi libito. 63 Wacela kwekubhala wase uyabhala utsi: “Libito lakhe nguJohane.”+ Bonkhe bamangala ngaloku. 64 Ngekushesha umlomo wakhe wavuleka, nelulwimi lwakhe lwalunga, wase ucala kukhuluma+ wadvumisa Nkulunkulu. 65 Bonkhe bantfu lebebahlala kuleyo ndzawo besaba, futsi tonkhe letintfo kwakhulunywa ngato kulo lonkhe laseJudiya, lokulive lebelinetintsaba. 66 Bonkhe labeva ngaloku bacabangisisa ngako, batsi: “Kahle kahle lomntfwana utawuba yini?” Loku bakusho ngobe Jehova* bekanalomntfwana.*

67 Babe wakhe Zakhariya wagcwala umoya longcwele, futsi waphrofetha watsi: 68 “Akadvunyiswe Jehova,* Nkulunkulu waka-Israyeli,+ ngobe ubanakile bantfu bakhe, wabaletsela insindziso.+ 69 Usivetele umsindzisi lonemandla*+ endlini yaDavide inceku yakhe,+ 70 njengobe nje akhuluma asebentisa baphrofethi labangcwele basendvulo.+ 71 Wakhuluma mayelana nekusisindzisa etitseni tetfu nakubo bonkhe labasitondzako,+ 72 kuze asentele umusa ngenca yabokhokho betfu futsi akhumbule sivumelwane sakhe lesingcwele.+ 73 Lesi sifungo lasenta kukhokho wetfu Abrahama,+ 74 kuze kutsi ngemuva kwekusikhulula etandleni tetitsa tetfu, asinike lilungelo lekutsi simentele umsebenti longcwele singesabi, 75 siwente ngekwetsembeka, nangekulunga onkhe emalanga ekuphila kwetfu. 76 Ngako wena Mntfwanami, utawubitwa ngekutsi ungumphrofethi waLosetikwako Konkhe, ngobe utawuhamba embikwaJehova* umlungisele indlela,+ 77 kuze wente bantfu bakhe bati kutsi batawusindziswa ngekutsetselelwa tono,+ 78 ngenca yemusa waNkulunkulu wetfu. Ngalomusa lovela ezulwini kutawuba nekukhanya lokukhanya njengekwentsatsakusa, 79 kuze kutokhanyisela labo labasebumnyameni nalabasetfuntini lekufa,+ kucondzise netinyawo tetfu endleleni yekuthula.”

80 Lomntfwana wakhula futsi waba nemandla. Wachubeka ahleti ehlane kwaze kwaba lilanga lapho ativeta khona ku-Israyeli.