Isaya
66 Naku lokushiwo nguJehova:
“Emazulu asihlalo sami sebukhosi futsi umhlaba usenabelo setinyawo tami.+
2 “Sandla sami ngiso lesente tonkhe letintfo,
Futsi lena ngiyo indlela letaba khona ngayo,” kusho Jehova.+
“Loyo lengitamnaka
Ngumuntfu lotfobekile, lowephukile emoyeni futsi lolihloniphako livi lami.+
3 Umuntfu lohlaba inkunzi ufana nemuntfu lobulala lomunye.+
Umuntfu lowenta umhlatjelo ngemvu, ufanana nemuntfu lowephula intsamo yenja.+
Umuntfu lonikela ngesipho ufana nemuntfu lonikela ngengati yengulube.+
Umuntfu lowenta umnikelo wesikhumbuto ngemakha esihlahla semphepho,+ ufana nemuntfu lokhuluma emavi lamnandzi.*+
Bakhetse tindlela tabo,
Futsi bajatjuliswa* tintfo letenyanyekako.
4 Ngako ngitawukhetsa tindlela tekubajezisa,+
Ngibaletsele tintfo labatesabako
Ngobe ngesikhatsi ngibabita, kute lowangiphendvula;
Nangalesikhatsi ngikhuluma nabo, kute lowangilalela.+
Bebachubeka benta tintfo letimbi emehlweni ami,
Futsi bakhetsa kwenta tintfo lengitenyanyako.”+
5 Lalelani naku lokushiwo nguJehova nine lenihlonipha livi lakhe:
“Bomnakenu labanitondzako nalabanicwayako ngenca yelibito lami batsite, ‘Shengatsi Jehova angangcweliswa!’+
Kodvwa yena utativeta kini, futsi aniletsele injabulo,
Futsi ngibo labatawubese bayahlazeka.”+
6 Kunemsindvo lomkhulu lovela kulelidolobha, umsindvo lovela ethempelini.
Lona ngumsindvo lovela kuJehova lohambisana nekutiphindziselela etitseni takhe.
7 Ngaphambi kwekutsi afikelwe ngumhelo, watala.+
Ngaphambi kwekutsi afikelwe tinhlungu tekutala, wabeleka umntfwana longumfana.
8 Ngubani loke weva ngentfo lenjena?
Ngubani loke wabona tintfo letinjena?
Live lingatalwa yini ngelilanga linye?
Sive singatalwa yini ngasikhatsi sinye?
Kodvwa iSiyoni yatsi nje nayicalwa ngumhelo yatala emadvodzana ayo.
9 Jehova utsi: “Kungenteka yini ngiletse sikhatsi sekubeleka, bese ngenta umntfwana angasaphumi?”
“Kungenteka yini kutsi ngivimbe kubelekwa kwemntfwana kani vele sewusemnyango?” kusho Nkulunkulu wakho.
10 Jabulani kanye neJerusalema futsi nitfokote kanye nayo,+ nonkhe nine leniyitsandzako.+
Jabulani kakhulu kanye nayo nonkhe nine leniyililelako,
11 Ngobe nitawumunya lubisi lwayo nenele, nenetiswe libele layo lendvudvuto,
Nitalunatsa kakhulu futsi nijabule ngebukhatikhati bayo lobukhulu.
12 Naku lokushiwo nguJehova:
Nitayimunya niphindze nibekwe esifubeni,
Futsi niyawudlaliselwa emadvolweni.
13 Njengamake lodvudvuta indvodzana yakhe,
Nami ngitawuchubeka nginidvudvuta;+
Futsi nitawudvudvutwa ngenca yeJerusalema.+
14 Nitakubona loku, futsi tinhlitiyo tenu titawujabula,
Ematsambo enu atawuhluma kuhle kwetjani lobusandza kumila.
15 “Ngobe Jehova utawufika njengemlilo,+
Netincola takhe tifanana nemoya lomkhulu,+
Kuze aphindzisele ngekutfukutsela lokukhulu,
Futsi utabekhuta ngemalangabi emlilo.+
16 Ngobe Jehova uyawukhipha sehlulelo ngemlilo,
Uyawumelana nabo bonkhe bantfu ngenkemba yakhe;
Futsi bantfu labayobe babulewe nguJehova, bayawuba banyenti.
17 Jehova utsi: “Bonkhe labo labatingcwelisako nalabatihlambululako kuze bangene emasimini*+ balandzela loyo losemkhatsini, labo labadla inyama yetingulube,+ netintfo letingcolile kanye nemagundvwane,+ batawuphela nya. 18 Njengobe ngiyati imisebenti yabo nalabakucabangako, ngiyeta kuze ngibutsanise bantfu bato tonkhe tive netilwimi, futsi bayawukuta batewubona inkhatimulo yami.”
19 “Ngitawubeka luphawu emkhatsini wabo, futsi labanye balabo labaphunyukile ngitawubatfumela etiveni, ngitabayisa etiveni talabo labanelikhono lekusebentisa butjoki, lokuyiThashishi,+ iPhuli neLudi.+ Ngitawubatfumela naseThubali, eJavani+ kanye nasetichingini letikhashane, lokutindzawo letingakaze titfole umbiko lomayelana nami nobe tibone inkhatimulo yami; futsi batawumemetela inkhatimulo yami etiveni.+ 20 Tiyawubuyisa bonkhe bomnakenu labakuto tonkhe letive,+ babe sipho kuJehova. Bayawufika ngemahhashi, ngetincola, ngetinkalishi letimbonyiwe, ngeminyuzi nangemakamela lanematubane. Bayawukhuphukela entsabeni yami lengcwele, iJerusalema. Kuyawuba njengalapho bantfu baka-Israyeli baletsa sipho sabo endlini yaJehova ngesitja lesihlobile,” kusho Jehova.
21 “Labanye babo ngiyawubenta baphristi, labanye ngibente emaLevi,” kusho Jehova.
22 “Njengobe nje emazulu lamasha nemhlaba lomusha+ lengikudalako kuyawuchubeka kumile embikwami, kanjalo nentalelwane* yakho neligama lakho kuyawuhlala njalo,” kusho Jehova.+