Hezekeli
3 Wase utsi kimi: “Ndvodzana yemuntfu, dlani naku lokusembikwakho.* Dlani lomculu bese uyahamba uyokhuluma nebantfu baka-Israyeli.”+
2 Ngako ngavula umlomo wami futsi wangenta ngadla lomculu. 3 Wachubeka watsi kimi: “Ndvodzana yemuntfu, dlani lomculu lengikunika wona futsi ugcwalise sisu sakho ngawo.” Ngako ngawudla futsi bewunongotela njengeluju emlonyeni wami.+
4 Watsi kimi: “Ndvodzana yemuntfu, hamba uye kubantfu baka-Israyeli ufike ukhulume emavi ami kubo. 5 Ngobe awutfunywa esiveni lesikhuluma lulwimi lolungevakali nome lolungatiwa, kodvwa utfunywa kubantfu baka-Israyeli. 6 Awutfunywa etiveni letikhuluma lulwimi lolungevakali nome lolungatiwa, lolunemagama longeke uwacondze. Kube bengingakutfuma etiveni letinjalo, betitakulalela.+ 7 Kodvwa bantfu baka-Israyeli ngeke bavume kukulalela ngobe abafuni kungilalela.+ Bonkhe bantfu baka-Israyeli banengcondvo lelukhuni nenhlitiyo lelukhuni.+ 8 Ngente buso bakho bacina njengebuso babo, ngenta nelibunti lakho lacina njengemabunti abo.+ 9 Ngente libunti lakho lafanana nedayimane, lacina kwendlula litje lelicinile.+ Ungabesabi nobe wetfuswe buso babo+ ngobe babantfu labavukelako.”
10 Wachubeka watsi kimi: “Ndvodzana yemuntfu, lalela onkhe emavi lengikutjela wona futsi uwafake enhlitiyweni yakho. 11 Hamba uye kubantfu bakini*+ labatfunjiwe futsi ukhulume nabo. Ubotsi kubo: ‘Naku lokushiwo yiNkhosi Lephakeme Jehova,’ ngisho nome bakulalela nome bangakulaleli.”+
12 Umoya wangetfwala+ futsi ngemuva kwami ngeva umsindvo lodvumako lebewutsi: “Shengatsi inkhatimulo yaJehova ingadvunyiswa endzaweni yakhe.” 13 Bekunemsindvo wetimphiko taletidalwa letiphilako njengobe betitsintsana,+ nemsindvo wemasondvo laseceleni kwato+ kanye nemsindvo wekudvuma lokukhulu. 14 Umoya wangitsatsa wase uyangetfwala, ngahamba ngibuhlungu futsi ngitfukutsele emoyeni wami, emandla aJehova asebenta ngelizinga lelikhulu kimi. 15 Ngako ngahamba ngaya kubantfu labatfunjiwe eTheli-abibi lebebahlala ngasemfuleni iKhebari+ futsi ngahlala lapho bebahlala khona; bengididekile,+ ngahlala nabo emalanga langu-7.
16 Ekupheleni kwalamalanga langu-7, livi laJehova lefika kimi latsi:
17 “Ndvodzana yemuntfu, sengikubeke kutsi ube ngugadzi webantfu baka-Israyeli;+ futsi nawuva livi leliphuma emlonyeni wami kufanele ungecwayisele bona.+ 18 Nangabe ngitsi kulomubi: ‘Nakanjani utawufa,’ kodvwa wena ungamecwayisi futsi wehluleke kukhuluma kuze wecwayise lomubi kutsi ayekele tindlela takhe letimbi khona atewuphila,+ lomuntfu lomubi utawufa ngenca yesono sakhe ngobe mubi+ kodvwa ingati yakhe ngitayibuta kuwe.*+ 19 Kodvwa nangabe wecwayisa lomubi, futsi yena angaphendvuki endleleni yakhe lembi, lomuntfu utawufela sono sakhe kodvwa nakanjani wena utawube ukusindzisile kuphila* kwakho.+ 20 Kepha nangabe umuntfu lolungile ashiya indlela lelungile bese wenta lokubi,* ngitawubeka lugibe embikwakhe futsi utawufa.+ Nangabe ungakamecwayisi, yena utawufela sono sakhe futsi imisebenti yakhe lelungile angeke ikhunjulwe kodvwa ingati yakhe ngitayibuta kuwe.*+ 21 Kepha nangabe umecwayisile lolungile kutsi angoni, futsi naye angoni, nakanjani utawuchubeka aphila ngobe wecwayisiwe,+ futsi nawe utawube usindzise kuphila* kwakho.”
22 Sandla saJehova sefika kimi ngilapho, wase utsi kimi: “Sukuma uye esihosheni, ngitawubese ngikhuluma nawe nasewulapho.” 23 Ngako ngasukuma ngaya esihosheni futsi lapho bekunenkhatimulo yaJehova+ ifanana nenkhatimulo lengayibona ngasemfuleni iKhebari,+ ngaguca ngatsintsa ngebuso phansi. 24 Umoya waNkulunkulu wabese uyangena kimi wangisukumisa ngema ngetinyawo,+ yena wase ukhuluma nami watsi:
“Hamba uyotivalela endlini yakho. 25 Wena ndvodzana yemuntfu, batakukhunga ngetintsambo kuze ungakhoni kuphuma uhambe emkhatsini wabo. 26 Ngitawubese ngenta lulwimi lwakho lunamatsele elwangeni lwakho, angeke ukhone kukhuluma, futsi angeke ukhone kubekhuta ngobe babantfu labavukelako. 27 Kodvwa nangikhuluma nawe ngitawuvula umlomo wakho, futsi kufanele utsi kubo:+ ‘Naku lokushiwo yiNkhosi Lephakeme Jehova.’ Loyo lolalelako, akalalele+ futsi loyo longafuni akangalaleli, ngobe babantfu labavukelako.+