Kulandzisa KwaMatewu
7 “Yekelani kwehlulela+ labanye, kuze nani ningatowehlulelwa, 2 ngobe ngendlela lenehlulela ngayo labanye, nani nitakwehlulelwa ngayo,+ futsi ngendlela lenibaphatsa ngayo labanye nani nitawuphatfwa ngayo.*+ 3 Ulunakeni lutsi lolusesweni lalomunye umuntfu, kodvwa ube ungalunaki lugodvo lolusesweni lakho?+ 4 Nobe-ke ungasho kanjani kulomunye umuntfu utsi: ‘Ngicela kukukhipha nalu lutsi lolusesweni lakho,’ kube kunelugodvo nakulelakho liso? 5 Wena mtentisi! Cale ukhiphe lolugodvo lolusesweni lakho, khona utobona kahle kutsi ungalukhipha njani lutsi lolusesweni lalomunye umuntfu.
6 “Ningatsatsi lokukwaNkulunkulu nikunike tinja, futsi ningawatsatsi ematje enu laligugu niwajike etingulubeni,+ kute tingetuwagcobagcoba, ticedze tinilimate.
7 “Chubekani nicela, nitawuphiwa;+ chubekani nifuna, nitawutfola; chubekani ninconcotsa, nitawuvulelwa;+ 8 ngobe wonkhe umuntfu locelako uyaphiwa,+ nawo wonkhe umuntfu lofunako uyatfola, futsi wonkhe umuntfu lonconcotsako utawuvulelwa. 9 Kodvwa-ke ukhona yini lapha kini lokutsi indvodzana yakhe nayicela sinkhwa ayinike litje? 10 Nobe nayicela inhlanti ayinike inyoka? 11 Ngako nangabe nine nanobe nitoni, kepha nibanika tipho letinhle bantfwana benu, kakhulu kangakanani-ke ngaBabe wenu losemazulwini! Yena ubanika tintfo letinhle+ labo labamcelako.+
12 “Tonkhe tintfo lenifuna bantfu batente kini, nani tenteni kubo.+ Ecinisweni nguloko lokushiwo nguMtsetfo nebaPhrofethi.+
13 “Ngenani ngelisango lelincane,+ ngobe indlela leya ekubhujisweni ivulekile futsi lisango layo libanti, banyenti labangena kulo; 14 kantsi indlela leya ekuphileni yincane futsi nelisango layo lincane, bambalwa labayitfolako.+
15 “Caphelani baphrofethi bemanga+ labeta kini bente shengatsi batimvu+ kantsi ngekhatsi babukhali njengetimphisi.+ 16 Labo nitawubabona ngetitselo tabo. Angitsi bantfu abawakhi emagilebisi esihlahleni semanyeva, futsi abawakhi nemakhiwa elukhuleni.+ 17 Ngendlela lefanako, tonkhe tihlahla letinhle titsela titselo letinhle, kantsi tonkhe tihlahla letimbi titsela titselo letimbi.+ 18 Ngeke kwenteke kutsi sihlahla lesihle sitsele titselo letimbi; nesihlahla lesibi ngeke kwenteke sitsele titselo letinhle.+ 19 Tonkhe tihlahla letitsela titselo letimbi tiyajutjwa, tijikwe emlilweni.+ 20 Ngako-ke, labo bantfu nitawubabona ngetitselo tabo.+
21 “Akusibo bonkhe labatsi kimi: ‘Nkhosi, Nkhosi,’ labatawungena eMbusweni wemazulu, kodvwa nguloyo lowenta intsandvo yaBabe losemazulwini lotawungena.+ 22 Ngalelolanga, labanyenti bayawutsi kimi: ‘Nkhosi, Nkhosi,+ asiphrofethanga yini ngelibito lakho, sakhipha nemadimoni ngelibito lakho, saphindze senta netimangaliso letinyenti ngelibito lakho?’+ 23 Ngako ngitawutsi kubo: ‘Anginati! Sukani kimi, nine benti balokubi!’+
24 “Ngako-ke wonkhe umuntfu lova lamavi ami futsi awente, ufana nendvodza lehlakaniphile, leyakha indlu yayo etikwelidvwala.+ 25 Kwase kufika imvula lenkhulu kanye netikhukhula, kwaba nesiphepho lesikhulu, kodvwa ayizange iwe ngobe beyakhiwe etikwelidvwala. 26 Kantsi wonkhe umuntfu lova lamavi ami kodvwa angawenti, ufana nendvodza lesilima, leyakha indlu yayo esihlabatsini.+ 27 Kwase kufika imvula lenkhulu kanye netikhukhula, kwaba nesiphepho lesikhulu,+ yavele yawa yabhidlika yonkhe.”
28 Ngesikhatsi Jesu asacedzile kukhuluma ngaletintfo, lesicumbi sebantfu sabamba wangentansi ngendlela labefundzisa ngayo,+ 29 ngobe abefundzisa njengemuntfu loneligunya,+ hhayi njengetati tabo temtsetfo.