Incwadzi Yekucala YeTikhronike

11 Ngekuhamba kwesikhatsi onkhe ema-Israyeli eta kuDavide eHebroni,+ afike atsi: “Tsine sitihlobo takho tengati.+ 2 Esikhatsini lesengcile, Sawula nakaseyinkhosi, nguwe lowawuhola ema-Israyeli nakaya etimphini.*+ Jehova Nkulunkulu wakho watsi kuwe: ‘Wena utakwelusa bantfu bami ema-Israyeli, futsi utawuba ngumholi wabo.’”+ 3 Ngako onkhe emadvodza lamadzala aka-Israyeli aya enkhosini eHebroni, futsi Davide wenta sivumelwane nawo khona lapho, embikwaJehova. Ase agcoba Davide kutsi abe yinkhosi yema-Israyeli+ njengobe Jehova bekashito asebentisa Samuweli.+

4 Ngekuhamba kwesikhatsi, Davide nawo onkhe ema-Israyeli bahamba baya eJerusalema, lokuyiJebhusi,+ lapho emaJebhusi+ bekahlala khona. 5 Bantfu lebebahlala eJebhusi bahlambalata Davide batsi: “Awuyoze ungene la!”+ Nobe kunjalo, Davide watsatsa indzawo levikelekile yaseSiyoni,+ leseyatiwa ngekutsi liDolobha laDavide.+ 6 Ngako Davide watsi: “Nobe ngubani lotawuba wekucala ekubulaleni emaJebhusi, ngitambeka abe yindvuna* nesikhulu.” Jowabe+ indvodzana yaSeruya wakhuphuka kucala futsi nguye lowaba yindvuna. 7 Davide wase uhlala kulendzawo levikelekile. Kungako bayibita ngekutsi liDolobha laDavide. 8 Wacala kwakha lelidolobha kuyo yonkhe leyondzawo kusukela eGcumeni* kuyofika etindzaweni letilitungeletile, futsi Jowabe wavuselela letinye tincenye talo. 9 Ngaleyondlela Davide waba nemandla kakhulu,+ futsi Jehova wemabutfo abenaye.

10 Leti tinhloko temasotja aDavide langemachawe letamsekela kakhulu ebukhosini bakhe kanye nawo onkhe ema-Israyeli kuze timbeke abe yinkhosi njengobe Jehova bekakhulumile mayelana nema-Israyeli.+ 11 Lolu luhla lwemasotja aDavide langemachawe: Jashobeyamu+ indvodzana yemHakhamoni, umphatsi wemachawe lamatsatfu.+ Ngalesinye sikhatsi wake wabulala bantfu labangu-300 ngesikhali sakhe.+ 12 Lolandzela yena bekungu-Eliyezeri+ indvodzana yaDodo, um-Ahoha.+ Bekasekhatsi kwemasotja lamatsatfu langemachawe. 13 BekanaDavide ePhasi-damimu+ lapho emaFilisti bekahlangene khona kuze alwe imphi. Bekunendzawo lebeyigcwele ibhali futsi bantfu bebabalekile ngenca yemaFilisti. 14 Kodvwa yena wema emkhatsini walensimu futsi wayivikela, waphindze wachubeka nekubulala emaFilisti. Ngaleyo ndlela Jehova wenta kutsi kube nekuncoba lokukhulu.*+

15 Emadvodza lamatsatfu kulawa langu-30 lebekaphetse, ehlela edvwaleni kuDavide lobekasemhumeni wase-Adulamu+ ngesikhatsi libutfo lemaFilisti limise emathende eSihosheni* semaRefa.+ 16 Ngaleso sikhatsi Davide abesendzaweni yekubhaca, futsi emasotja emaFilisti bekaseBhetlehema. 17 Davide wabese uveta sifiso lebekanaso, watsi: “Ngifisa shengatsi nginganatsa emanti emtfombo longasegedeni laseBhetlehema!”+ 18 Nakeva loko, lamasotja lamatsatfu langemachawe abhidla emasotja emaFilisti ngenkhani aphumela ngale, afike akha emanti kulomtfombo longasegedeni laseBhetlehema abuya nawo awanika Davide; kodvwa yena akavumanga kuwanatsa, wawacitsa embikwaJehova. 19 Davide watsi: “Kuyintfo lengingacabangi kuyenta lena ngobe ngesaba Nkulunkulu. Kufanele yini nginatse ingati yalamadvodza labeke kuphila* kwawo engotini?+ Ngobe abeke kuphila* kwawo engotini kuze awaletse.” Ngako wala kuwanatsa. Nguleti tintfo letentiwa ngulamasotja akhe lamatsatfu langemachawe.

20 Abishayi+ umnakaboJowabe+ wabese uba ngumphatsi walamanye emasotja lamatsatfu langemachawe; ngesikhali sakhe wabulala bantfu labangetulu kwa-300 futsi bekadvume njengalamasotja lamatsatfu langemachawe.+ 21 Kulawa lamatsatfu, bekadvume kakhulu kwendlula lamabili awo futsi bekayindvuna yawo; kodvwa akazange aniketwe sigaba lesifana nesalawa ekucala lamatsatfu.

22 Bhenaya+ indvodzana yaJehoyada bekayindvodza lenesibindzi* leyenta tintfo letinyenti letimangalisako eKhabsiyeli.+ Wabulala emadvodzana lamabili a-Ariyeli wakaMowabi futsi wangena emgodzini lonemanti ngelilanga lebelinesitfwatfwa, futsi wabulala libhubesi.+ 23 Waphindze wabulala indvodza lengumGibhithe lebeyisidlakela, ingemamitha langetulu kwalamabili* budze.+ Ngisho nome lendvodza lengumGibhithe beyiphetse sikhali lesinjengelugodvo lwembongolo yekweluka,+ waya kuyo aphetse indvuku wafike wayemuka lesikhali sayo wase uyibulala ngaso.+ 24 Letintfo leti tentiwa nguBhenaya indvodzana yaJehoyada, futsi bekadvume njengalamasotja lamatsatfu langemachawe. 25 Ngisho nobe bekasesikhundleni lesisetulu kwendlula emasotja langu-30, kodvwa akazange aniketwe sigaba lesifana nesalawa lamatsatfu.+ Nobe kunjalo, Davide wambeka kutsi aphatse bogadzi bakhe.

26 Emasotja langemachawe emabutfo emphi bekubo-Asaheli+ umnakaboJowabe, Eli-hanani indvodzana yaDodo waseBhetlehema,+ 27 Shamothi umHarori, Helesi umPheloni, 28 Ira+ indvodzana ya-Ikheshi umThekhowa, Abiyezeri+ um-Anathothi, 29 Sibhekayi+ umHusha, Ilayi um-Ahoha, 30 Maharayi+ umNethofa, Heledi+ indvodzana yaBhana umNethofa, 31 Ithayi indvodzana yaRibayi waseGibeya umBhenjamini,+ Bhenaya umPhirathoni, 32 Hurayi wasetihosheni taseGashi,+ Abiyeli um-Abha, 33 Azmavethi umBhahurimu, Eliyaba umShalbimu, 34 emadvodzana aHashemu umGizoni, Jonathani indvodzana yaShage umHarari, 35 Ahiyamu indvodzana yaSakhari umHarari, Elifali indvodzana ya-Uri, 36 Heferi umMekhera, Ahiya umPheloni, 37 Hesro umKhameli, Narayi indvodzana ya-Ezbayi, 38 Joweli umnakaboNathani, Mibhari indvodzana yaHagri, 39 Seleki um-Amoni, Naharayi umBherothi, umphatsi tikhali waJowabe indvodzana yaSeruya; 40 Ira um-Ithire, Garebi um-Ithire, 41 Uriya+ umHethi, Zabadi indvodzana ya-Ahilayi, 42 Adina indvodzana yaShiza wakaRubeni, inhloko yebakaRubeni, nalabanye labangu-30 lebebakanye naye; 43 Hanana indvodzana yaMakha, Josafati umMitheni, 44 Uzaya um-Ashtarothe, Shama naJeyiyeli, emadvodzana aHothami um-Aroyeri; 45 Jediyayeli indvodzana yaShimri naJoha umnakabo longumThisi; 46 Eliyeli umMahavi, Jeribayi naJoshaviya emadvodzana a-Elnamu naJithma umMowabi; 47 Eliyeli, Obedi naJasiyeli umMezobayithe.