Hezekeli

26 Ngemnyaka wesi-11, ngelilanga lekucala kuleyo nyanga, livi laJehova lefika kimi latsi: 2 “Ndvodzana yemuntfu, ngenca yekutsi iThire ikhulume ngeJerusalema yatsi:+ ‘Awuva-ke! Ligede lebantfu lephuliwe!+ Konkhe sekutawuba kwami, futsi nyalo sengitawunjinga njengobe seyibhujisiwe’; 3 ngako-ke naku lokushiwo yiNkhosi Lephakeme Jehova: ‘Ngimelene nawe wena Thire, futsi ngitawuletsa tive letinyenti kuze timelane nawe, kuhle kwelwandle luphakamisa emagagasi alo. 4 Titawubhidlita lubondza lwaseThire, tiphihlite nemibhoshongo yakhona+ futsi ngitawukhukhula umhlabatsi, ngiyente isale ilidvwala lelimanyatelako lelingenalutfo. 5 Itawuba libala lekomisa emanethi ekudweba ekhatsi elwandle.’+

“INkhosi Lephakeme Jehova itsi: ‘Ngobe mine lucobo lwami ngikhulumile, futsi tive titawutsatsa tintfo tayo. 6 Bantfu labahlala emadolobheni lasemaphandleni ayo batawubulawa ngenkemba, futsi bantfu batawukwati kutsi mine nginguJehova.’

7 “Ngobe naku lokushiwo yiNkhosi Lephakeme Jehova: ‘Ngiletsa iNkhosi Nebukhadnezari* yaseBhabhulona kutsi imelane neThire ivela enyakatfo;+ iyinkhosi yemakhosi,+ inemahhashi,+ tincola temphi,+ bagibeli bemahhashi kanye nelibutfo lelinemasotja lamanyenti.* 8 Itawubhubhisa ngenkemba bantfu labahlala emadolobheni akho lasemaphandleni, futsi itawukwakha lubondza lwekukuvimbetela nendvundvuma yekukuvimbetela, futsi itakuphakamisela lihawu lelikhulu. 9 Yona itawubhidlita lubondza lwakho ngemgcala* wayo lomkhulu wekubhidlita, ibhidlite nemibhoshongo yakho ngemazembe ayo.* 10 Emahhashi ayo atawube amanyenti kakhulu kangangekutsi atakumbonya ngelutfuli, futsi umsindvo webagibeli bemahhashi, wemasondvo, newetincola utakwenta tibondza takho tinyakate nayingena emagedeni akho, njengebantfu nabangena edolobheni lelinetibondza letibhidlikile. 11 Tinselo temahhashi ayo titawugcobagcoba tonkhe titaladi takho;+ itawubulala bantfu bakho ngenkemba futsi tinsika takho letinkhulu titawuphihlikela emhlabatsini. 12 Batakweba umcebo wakho, batsatse tintfo takho,+ babhidlite tibondza takho, babhidlite netindlu takho letinhle; batawubese bajikijela ematje akho emantini, kanye netintfo takho letibatiwe nemhlabatsi wakho.’

13 “‘Ngitawucedza nya umsindvo wetingoma takho, futsi umsindvo wemahabhu akho angeke uphindze uvakale.+ 14 Ngitakwenta ube lidvwala lelimanyatelako lelingenalutfo futsi utawuba libala lekomisa emanethi ekudweba.+ Angeke uphindze wakhiwe kabusha, ngobe mine Jehova lucobo lwami sengikhulumile,’ kusho iNkhosi Lephakeme Jehova.

15 “Naku lokushiwo yiNkhosi Lephakeme Jehova kuwe wena Thire: ‘Ngemsindvo wekuwa kwakho, ngesikhatsi labo labafako bakhala, nakubulawa bantfu labanyenti embikwakho, angeke yini tichingi tichachateliswe kwesaba?+ 16 Tonkhe tindvuna taselwandle titawehla etihlalweni tato futsi titawukhumula tingubo tato,* tikhumule netembatfo tato letihlotjisiwe, bese tichachateliswe* kwesaba. Titawuhlala phansi emhlabatsini, tichubeke tichachatela futsi tikubuke timangele.+ 17 Titakuhlabelela ingoma yekulila,+ futsi titawutsi kuwe:

19 “Ngobe naku lokushiwo yiNkhosi Lephakeme Jehova: ‘Nangikubhubhisa njengemadolobha langahlali muntfu, ngibangela kutsi wetfuswe ngemanti lamanyenti futsi nemanti lanemandla sekakumbonyile,+ 20 ngitawubangela kutsi nawe wehlele emgodzini* njengobe ngehlisa nalabanye kadzeni; ngitawubangela kutsi uhlale endzaweni lephansi kakhulu kanye naletinye tindzawo takadzeni letabhujiswa, kanye nabo bonkhe labehlela emgodzini,+ kuze kungahlalwa kuwe. Ngitawubese-ke ngikhatimulisa* live lalabaphilako.

21 “‘Utawufikelwa yinhlekelele ungakayilindzeli, futsi angeke uphindze ube khona.+ Batakufuna kodvwa angeke utfolakale,’ kusho iNkhosi Lephakeme Jehova.”