Hezekeli
21 Livi laJehova laphindze lefika kimi latsi: 2 “Ndvodzana yemuntfu, bhekisa buso bakho ngaseJerusalema, bese ukhipha simemetelo lesimelene netindzawo letingcwele futsi uphrofethe ngalokumelene nelive laka-Israyeli. 3 Khuluma nelive laka-Israyeli utsi: ‘Naku lokushiwo nguJehova: “Ngimelene nawe, futsi ngitawuhoshula inkemba yami emgodleni wayo+ bese ngicotfula kuwe labalungile nalababi. 4 Ngenca yekutsi ngitawucotfula kuwe lolungile nalomubi, inkemba yami ngitayihoshula emgodleni wayo imelane nabo bonkhe bantfu,* kusukela eningizimu kuya enyakatfo. 5 Wonkhe umuntfu utawukwati kutsi mine Jehova lucobo lwami, ngihoshule inkemba yami emgodleni wayo. Angeke isabuyela kuwo.”’+
6 “Wena ndvodzana yemuntfu, lila ube* uchachateliswa kwesaba, khala kabuhlungu embikwabo.+ 7 Nangabe batsi kuwe: ‘Kungani ulila?’ ubotsi: ‘Kungenca yembiko.’ Ngobe uyeta nakanjani, futsi tonkhe tinhlitiyo titawuncibilika ngenca yekwesaba, nato tonkhe tandla titawucega. Wonkhe umuntfu utawudvumala futsi onkhe emadvolo atawugeleta emanti.*+ ‘Nakanjani lenhlekelele iyeta futsi itakwenteka,’ kusho iNkhosi Lephakeme Jehova.”
8 Livi laJehova laphindze lefika kimi latsi: 9 “Ndvodzana yemuntfu, phrofetha utsi: ‘Naku lokushiwo nguJehova: “Tsani: ‘Inkemba! Inkemba+ ilotiwe futsi iyamanyatela! 10 Ilolelwe kubulala bantfu labanyenti; yentiwe yamanyatela kuze itokhanya njengembane.’”’”
“Akukafaneli yini sijabule?”
“‘Itawuyala* yini indvuku yebukhosi yendvodzana yami,+ njengobe yenta kuto tonkhe tihlahla?
11 “‘Iniketwe lotsite kutsi ayimanyatelise futsi ayibambe ngesandla sinye kuze abulale bantfu. Lenkemba iloliwe yamanyateliswa kuze iniketwe lotawubulala.+
12 “‘Khala ulile+ ndvodzana yemuntfu, ngobe lenkemba imelene nebantfu bami; imelene nabo bonkhe baholi baka-Israyeli.+ Labaholi batawubulawa ngiyo bakanye nebantfu bami. Ngako-ke yetfwala tandla enhloko ngenca yelusizi. 13 Ngobe luhlolo selwentiwe,+ futsi kutawentekani nangabe lenkemba ingayifuni lendvuku yebukhosi? Angeke iphindze* ibe khona,’+ kusho iNkhosi Lephakeme Jehova.
14 “Wena ndvodzana yemuntfu, phrofetha futsi ushaye tandla bese usho katsatfu utsi: ‘Inkemba!’ Yinkemba yalababulewe, yinkemba lebulele bantfu labanyenti lelebatungeletile.+ 15 Tinhlitiyo tabo titawuncibilika ngenca yekwesaba+ futsi labanyenti babo batakuwa emagedeni elidolobha lakubo; ngitawubangela kutsi kufe bantfu ngenkemba. Imanyatela njengembane futsi ilotelwe kubulala! 16 Geca ngesekudla! Ujikele ngesencele! Yani nome ngukuphi lapho inkemba yakho ibheke khona! 17 Nami ngitawushaya tandla futsi ngenetise intfukutselo yami.+ Mine Jehova lucobo lwami ngikhulumile.”
18 Livi laJehova laphindze lefika kimi latsi: 19 “Ndvodzana yemuntfu, bekisa tindlela letimbili lapho kutawuhamba khona inkemba yenkhosi yaseBhabhulona nayita. Totimbili letindlela titawusuka eveni linye, futsi luphawu* lwato kufanele lumiswe lapho kwehlukana khona lomgwaco loya kulamadolobha lamabili. 20 Indlela yinye kufanele uyibeke luphawu lwenkemba letawumelana neRabha+ yema-Amoni, lelenye uyibeke luphawu lwenkemba letawumelana nelidolobha lelivikelekile laseJerusalema+ lelikaJuda. 21 Ngobe inkhosi yaseBhabhulona itawufike ime lakuhlukana khona lomgwaco bese iyaphengula, lapho khona lemigwaco lemibili ihlukana khona. Itawunyakatisa imicibisholo yayo. Ibuta etithicweni tayo;* ihlolisise kulesibindzi.* 22 Loku kwekuphengula lokusesandleni sayo sangesekudla kukhombe eJerusalema, kuze imise imigcala yekubhidlita, ikhiphe livi lekutsi kubulawe bantfu, ishaye inhlabamkhosi yemphi, imise imigcala lemikhulu yekubhidlita emagedeni, ibeke indvundvuma yekuvimbetela kanye nelubondza lwekuvimbetela.+ 23 Kodvwa labo* labente sifungo nabo+ batawucabanga kutsi lokuphengula kungemanga. Kodvwa lenkhosi yaseBhabhulona iyalikhumbula licala labo futsi itawubatfumba.+
24 “Ngako-ke naku lokushiwo yiNkhosi Lephakeme Jehova: ‘Nibangele kutsi licala lenu likhunjulwe ngekutsi nembule emaphutsa enu, futsi nibangele kutsi tono tenu tibonakale ngato tonkhe tento lenitentile. Njengobe senikhunjuliwe-ke, nyalo senitawutsatfwa ngenkhani.’*
25 “Awu wena lolimele kakhulu, wena mholi lokhohlakele waka-Israyeli,+ lilanga lakho selifikile, lokulilanga lekujeziswa kwakho kwekugcina. 26 Naku lokushiwo yiNkhosi Lephakeme Jehova: ‘Susa umshuculo, ususe nemchele.+ Letintfo ngeke tihlale tinjalo.+ Phakamisa lophansi+ futsi wehlise lophakeme.+ 27 Imbhubhiso! Imbhubhiso! Lobukhosi* ngitabubhubhisa! Angeke bube banome ngubani kuze kufike loyo lonelilungelo lelisemtsetfweni,+ futsi ngitabuniketa yena.’+
28 “Wena ndvodzana yemuntfu, phrofetha utsi: ‘Naku lokushiwo yiNkhosi Lephakeme Jehova mayelana nema-Amoni netinhlamba tawo. Inkemba! Inkemba ihoshuliwe kuze icotfule; ilotiwe kuze ishwabadzele futsi imanyatela njengembane. 29 Ngetulu kwalemibono lengemanga nekuphengula lokungemanga ngawe, utawubutsiselwa endvundvumeni yebantfu labafile,* lifikile lilanga lalababi lekutsi batfole sijeziso sekugcina. 30 Yibuyisele emgodleni wayo. Ngitakwehlulela endzaweni lowadalelwa kuyo, eveni lenkhaba yakho. 31 Ngitakujezisa ngobe ngitfukutsele. Intfukutselo yami itakushisa njengemlilo futsi ngikunikele kubantfu labanesibhuku, labo labanelikhono lekubhubhisa bantfu.+ 32 Utawuba tinkhuni tekubasa umlilo;+ ingati yakho itawucitseka eveni lakho futsi angeke uphindze ukhunjulwe, ngoba mine Jehova lucobo lwami ngikhulumile.’”