Hezekeli
11 Umoya wase uyangiphakamisa ungiyisa egedeni lelingasemphumalanga yendlu yaJehova, lokuligede lelibuke emphumalanga.+ Kulelogede ngabona emadvodza langu-25, emkhatsini wawo bekunaJazaniya indvodzana ya-Azuri, naPhelatiya indvodzana yaBhenaya, lebebatindvuna talesive.+ 2 Nkulunkulu wabese utsi kimi: “Ndvodzana yemuntfu, ngulawa lamadvodza lakha licebo lelibi aphindze anike bantfu bakulelidolobha seluleko lesibi. 3 Atsi: ‘Lesi akusiso yini sikhatsi sekwakha tindlu?+ Lelidolobha lilibhodo lekupheka,*+ tsine siyinyama.’
4 “Ngako phrofetha tintfo letimelene nawo. Phrofetha ndvodzana yemuntfu.”+
5 Umoya waJehova wabese wehlela kimi,+ yena wase utsi: “Ubotsi: ‘Naku lokushiwo nguJehova: “Awu nine bantfu baka-Israyeli, loku lenikushito kuliciniso, futsi ngiyati kutsi nicabangani. 6 Nibangele kutsi bantfu labanyenti bafe kulelidolobha, naphindze nagcwalisa titaladi talo ngetidvumbu.”’”+ 7 “Ngako-ke naku lokushiwo yiNkhosi Lephakeme Jehova: ‘Letidvumbu lenitisakate kulo lonkhe lelidolobha tingulenyama, futsi lelidolobha lingulelibhodo lekupheka.+ Kodvwa nine lucobo lwenu, nitawukhishwa kulo.’”
8 “INkhosi Lephakeme Jehova itsi: ‘Niyayesaba inkemba+ kodvwa ngitayiletsa kini. 9 Ngitanikhipha kulelidolobha, ngininikele etandleni tebantfu bakuletinye tive bese ngiyanehlulela.+ 10 Niyawubulawa ngenkemba.+ Ngitanehlulela emnceleni welive laka-Israyeli+ futsi niyawukwati kutsi mine nginguJehova.+ 11 Lelidolobha angeke libe libhodo lenitawuphekelwa kulo futsi nine angeke nibe yinyama kulo; ngitanehlulela emnceleni welive laka-Israyeli, 12 futsi niyawukwati kutsi mine nginguJehova. Ngesizatfu sekutsi anikahambi ngetimiso tami futsi anikayigcini imitsetfo* yami,+ kodvwa nine nigcine imitsetfo yetive letibomakhelwane benu.’”+
13 Ngatsi nje nangicedza kuphrofetha, Phelatiya indvodzana yaBhenaya wafa. Ngase ngiyaguca ngatsintsa ngebuso phansi, ngakhala kakhulu ngatsi: “Awu Nkhosi Lephakeme Jehova! Utabacotfula bonkhe yini labantfu labasele baka-Israyeli?”+
14 Livi laJehova laphindze lefika kimi latsi: 15 “Ndvodzana yemuntfu, bomnakenu, lokungulabo labanelilungelo lekunihlenga kanye nabo bonkhe bantfu baka-Israyeli batjelwe bantfu baseJerusalema batsi: ‘Khweshani kakhulu kuJehova. Lelive ngeletfu; sesinikwe lona kutsi libe letfu.’ 16 Ngako-ke khuluma utsi: ‘Naku lokushiwo yiNkhosi Lephakeme Jehova: “Nanobe ngibayise etiveni letikhashane futsi ngabasakatela etiveni,+ ngitawuba siphephelo sabo kwesikhashana emaveni labaye kuwo.”’+
17 “Ngako-ke khuluma utsi: ‘INkhosi Lephakeme Jehova itsi: “Ngitanilandza kulabantfu, nginilandze nakuletive lenihlakatekele kuto, bese ngininika live laka-Israyeli.+ 18 Batawubuyela kulelive, bafike basuse tonkhe tintfo takhona letenyanyekako, bacedze nemikhuba yakhona lemibi.+ 19 Ngitawubanika inhlitiyo yinye+ bese ngibafaka umoya lomusha;+ ngitawukhipha inhlitiyo yelitje kubo+ ngifake inhlitiyo yenyama,*+ 20 kuze bagcine imiyalo yami nemitsetfo* yami. Nabenta kanjalo bayawuba bantfu bami, nami ngibe nguNkulunkulu wabo.”’
21 “‘INkhosi Lephakeme Jehova itsi: “Kodvwa ngitayehlisela etinhloko tabo imiphumela yetindlela talabo labanetinhlitiyo letitimisele kuchubeka nekwenta tintfo letenyanyekako, kanye nalabo labachubeka nekwenta tintfo letimbi.”’”
22 Lamakherubhi abese aphakamisa timphiko tawo futsi lamasondvo bekaseceleni kwawo.+ Inkhatimulo yaNkulunkulu wema-Israyeli beyingetulu kwawo.+ 23 Inkhatimulo yaJehova+ yabese iyesuka kulelidolobha yafike yema etikwentsaba lengasemphumalanga nalelidolobha.+ 24 Umoya wabese uyangiphakamisa, ngembono lengawunikwa ngemandla aNkulunkulu, wangiyisa kubantfu labatfunjiwe labaseveni lemaKhaledi. Lombono lebengiwubona wanyamalala. 25 Ngabese ngitjela labantfu labatfunjiwe tonkhe letintfo Jehova bekangikhombise tona.