Kulandzisa KwaLukha

11 Jesu bekasendzaweni letsite athantaza, futsi nasekacedzile, lomunye webafundzi bakhe watsi kuye: “Nkhosi, sifundzise indlela yekuthantaza njengobe nje naJohane afundzisa bafundzi bakhe.”

2 Ngako watsi kubo: “Nanithantaza nibotsi: ‘Babe, alingcweliswe* libito lakho.+ UMbuso wakho awute.+ 3 Sicela usiphe lamuhla sinkhwa setfu kuye ngetidzingo tetfu telilanga nelilanga.+ 4 Usitsetselele tono tetfu,+ njengobe natsi sibatsetselela bonkhe labasonako,*+ futsi ungasingenisi ekulingweni.’”+

5 Ngemuva kwaloko watsi kubo: “Asesitsi lomunye wenu unemngani, bese uya kuye ekhatsi nebusuku afike atsi: ‘Mngani, ngicela unginanisele tinkhwa letintsatfu, 6 ngobe ngivakashelwe ngumngani wami losuka khashane, futsi ngite lutfo lengingamupha lona.’ 7 Kodvwa loyo longekhatsi aphendvule atsi: ‘Yekela kungiphatamisa, ngobe umnyango sewukhiyiwe, futsi mine nebantfwana bami sesilele. Ngeke ngikhone kuvuka ngikunike lolokufunako.’ 8 Ngiyanitjela ngitsi: Utawuvuka amnike loko lakudzingako, hhayi ngobe nje angumngani wakhe, kodvwa ngenca yekutsi uyabelesela.+ 9 Ngako-ke ngitsi kini: Chubekani nicela,+ nitawuphiwa; chubekani nifuna, nitawutfola; chubekani ninconcotsa, nitawuvulelwa.+ 10 Wonkhe umuntfu locelako uyaphiwa,+ nawo wonkhe umuntfu lofunako uyatfola, futsi wonkhe umuntfu lonconcotsako utawuvulelwa. 11 Kodvwa-ke ukhona yini babe emkhatsini wenu lokutsi indvodzana yakhe nayicela inhlanti, ayiphe inyoka esikhundleni senhlanti?+ 12 Nobe nangabe icela licandza, ayiphe fecela? 13 Ngako nangabe nine nanobe nitoni, kepha nibanika tipho letinhle bantfwana benu, kakhulu kangakanani-ke ngaBabe wenu losezulwini! Yena ubapha umoya longcwele labo labamcelako.”+

14 Ngekuhamba kwesikhatsi wakhipha lidimoni lebelenta lenye indvodza ingakhulumi.+ Latsi naseliphumile, lomuntfu wacala kukhuluma futsi sicumbi sebantfu samangala.+ 15 Kodvwa labanye kuso batsi: “Lomuntfu ukhipha emadimoni ngaBhelzebhule* inkhosi yemadimoni.”+ 16 Labanye bebafuna kutsi abakhombise sibonakaliso+ lesivela ezulwini kuze batfole liphutsa kuye. 17 Jesu bekakwati loko lebebakucabanga,+ ngako watsi kubo: “Nobe ngumuphi umbuso lowehlukene ekhatsi uyawa, nanobe nguyiphi indlu leyehlukene ekhatsi ngeke ime. 18 Ngendlela lefanako, nangabe Sathane ehlukene ekhatsi, umbuso wakhe ungema kanjani? Kodvwa nine nitsi ngikhipha emadimoni ngaBhelzebhule. 19 Nangabe ngikhipha emadimoni ngaBhelzebhule, balandzeli benu bawakhipha ngabani? Kungako-ke batawunehlulela. 20 Kodvwa nangabe ngikhipha emadimoni ngesandla* saNkulunkulu,+ kusho kutsi uMbuso waKhe nisengakawuboni.+ 21 Nangabe indvodza lenemandla futsi lehlomile igadza indlu yayo, tintfo tayo tihlala tiphephile. 22 Kodvwa nangabe kufika umuntfu lonemandla kunayo futsi ayincobe, loyo muntfu utsatsa tonkhe tikhali lebeyetsembele kuto bese wehlukaniselana nalabanye letintfo latitsetse kuyo. 23 Longekho ngakimi umelene nami, nalongagcogci bantfu kanye nami uyabasakata.+

24 “Nangabe lidimoni liphuma kumuntfu, lihamba etindzaweni letomile lifuna indzawo yekuhlala, nalingayitfoli litsi: ‘Ngitawubuyela endlini yami lengaphuma kuyo.’+ 25 Litsi nalifika khona liyitfole ihlobile futsi ihlotjisiwe. 26 Ngemuva kwaloko liyahamba lilandze lamanye emadimoni langu-7 lamabi kakhulu kunalo, futsi atsi angangena kulomuntfu bese ahlala khona. Simo sakhe siba sibi kakhulu kunasekucaleni.”

27 Watsi Jesu asakhuluma, lomunye umfati lobekakulesicumbi wamemeta watsi: “Siyajabula sisu lesakwetfwala, kanye nemabele lakumunyisa!”+ 28 Yena watsi: “Cha, bayajabula labo labeva livi laNkulunkulu futsi baligcine!”+

29 Njengobe sicumbi sebantfu besibutsana ndzawonye, watsi: “Lesitukulwane sibi, futsi sifuna kubona sibonakaliso, kodvwa kute sibonakaliso lesitawunikwa sona ngaphandle kwesibonakaliso saJona.+ 30 Ngobe njengobe Jona+ aba sibonakaliso kubantfu baseNineve, neNdvodzana yemuntfu itawuba sibonakaliso kulesitukulwane. 31 Indlovukazi yaseningizimu+ itawuvuka kanye nalesitukulwane nasekwehlulelwa futsi isibeke licala, ngobe yesuka eveni lelikhashane yayolalela emavi lahlakaniphile aSolomoni. Kodvwa lapha kukhona lomkhulu kunaSolomoni.+ 32 Bantfu baseNineve batawuvuka nalesitukulwane nasekwehlulelwa. Batasibeka licala ngobe bona baphendvuka nabeva Jona ashumayela.+ Kodvwa lapha kukhona lomkhulu kunaJona. 33 Umuntfu nakakhanyisa sibane akasibeki endzaweni lebhacile nobe ngephansi kwabhasikidi,* kodvwa usibeka elutsini lwesibane+ kuze sikhanyisele labo labangenako. 34 Sibane semtimba wakho liso. Nangabe liso lakho libuke intfo yinye,* umtimba wakho wonkhe utawukhanya,* kodvwa nangabe libukhali,* umtimba wakho ngeke ukhanye.+ 35 Ngako-ke cinisekani kutsi kukhanya lokukini akubi bumnyama. 36 Nangabe umtimba wakho wonkhe ukhanya futsi ute nalobuncane bumnyama, utawukhanya njengalapho sibane sinikhanyisela ngekukhanya kwaso.”

37 Watsi nakacedza kukhuluma, umFarisi lotsite wamcela kutsi ayodla naye. Ngako wangena wahlala etafuleni. 38 Kodvwa lomFarisi wamangala nakabona kutsi Jesu akatigezi* tandla ngaphambi kwekutsi adle.+ 39 INkhosi yatsi kuye: “Nine baFarisi nigeza lingephandle lendzebe nelesitja, kodvwa ngekhatsi nigcwele bukhali nebubi.+ 40 Nine lenite ingcondvo! Angitsi loyo lowenta lingephandle nguye lowenta nelingekhatsi? 41 Kodvwa-ke phanini labanye* ngalokusuka enhlitiyweni futsi nitawuhlanteka kuto tonkhe tintfo. 42 Maye kini nine baFarisi, ngobe nikhipha kwelishumi kweminti, kweruwe, nekwato tonkhe tibhidvo,+ kodvwa anikunaki kulunga nekutsandza Nkulunkulu! Kona letintfo bekufanele nitente, kodvwa hhayi kutsi ningasatinaki leti letinye.+ 43 Maye kini nine baFarisi, ngobe nitsandza tihlalo letingembili* emasinagogeni kanye nekubingelelwa etimakethe!+ 44 Maye kini, ngobe nifana nemathuna langabonakali kahle,*+ kangangekutsi bantfu baze bahambe etikwawo bangati!”

45 Lomunye lobekati uMtsetfo wamphendvula watsi: “Mfundzisi, natsi uyasetfuka nawusho njalo.” 46 Yena watsi: “Maye kini nine lenati uMtsetfo, ngobe netfwesa bantfu imitfwalo leyesindzako, kodvwa nine aniyitsintsi ngisho nangemuno!+

47 “Maye kini ngobe nakha emathuna ebaphrofethi, lababulawa bokhokho benu!+ 48 Nitibonele nine imisebenti yabokhokho benu, kodvwa nivumelana nabo. Bona babulala baphrofethi,+ nine senakha emathuna abo. 49 Ngekuhlakanipha kwakhe Nkulunkulu watsi: ‘Ngitawutfumela baphrofethi nebaphostoli, futsi bantfu batawubabulala baphindze babaphatse kabi labanye babo, 50 ngako lesitukulwane sitawuba nelicala* lengati yabo bonkhe baphrofethi lababulawa kusukela kwasekelwa live,*+ 51 kusukela engatini ya-Abela+ kuye engatini yaZakhariya, lowabulawa emkhatsini weli-al’thare nendzawo lengcwele.’*+ Ngitsi kini: Lesitukulwane sitawuba nelicala* lengati.

52 “Maye kini nine lenati uMtsetfo, ngobe nivalela bantfu ematfuba* ekutfola lwati. Nine aningeni eMbusweni waNkulunkulu, nalabo labangenako niyabavimbela!”+

53 Watsi nakaphuma lapho, tati temtsetfo nebaFarisi bacala kumcindzetela futsi bambuta leminye imibuto leminyenti, 54 bagadze kumgiba ngalokutsite lebekatakusho.+