Kulandzisa KwaJohane

19 Pilatu wabese utsi Jesu akatsatfwe ayoshaywa.+ 2 Emasotja eluka umchele wemanyeva amfaka wona enhloko, amembatsisa nengubo lebukhwebeletane;*+ 3 futsi bekasolo eta kuye atsi: “Sawubona, wena Nkhosi yemaJuda!” Bekachubeka amshaya nangetimphama ebusweni.+ 4 Pilatu waphindze waphuma watsi kulamaJuda: “Mbukeni, ngimkhiphela kini kuze nati kutsi kute licala lengilitfola kuye.”+ 5 Jesu wase uyaphuma, afake lomchele wemanyeva nalengubo lebukhwebeletane. Pilatu watsi kuwo: “Nangu-ke lomuntfu!” 6 Kodvwa ngesikhatsi baphristi labakhulu nabogadzi bambona, bamemeta batsi: “Akayiswe elugodvweni!+ Akayiswe elugodvweni!”* Pilatu watsi kubo: “Mtsatseni nine niyombulala,* ngobe kute licala lengilitfola kulomuntfu.”+ 7 LamaJuda amphendvula atsi: “Tsine sinemtsetfo, futsi ngekusho kwawo, lomuntfu kufanele afe+ ngobe utenta indvodzana yaNkulunkulu.”+

8 Ngesikhatsi Pilatu sekakuvile loko lebekushiwo ngulamaJuda, wesaba kakhulu, 9 futsi wabuyela ngekhatsi, watsi kuJesu: “Kodvwa uwakuphi wena?” Jesu akazange amphendvule.+ 10 Pilatu watsi kuye: “Ubindzeleni? Awati yini kutsi ngineligunya lekukukhulula nelekukubulala?”* 11 Jesu wamphendvula watsi: “Ngabe ute nhlobo ligunya kimi kube Nkulunkulu akakunikanga lona. Kungako loyo longinikele kuwe anesono lesikhulu.”

12 Ngenca yaloko Pilatu bekasolo afuna indlela yekumkhulula. Kodvwa emaJuda amemeta atsi: “Nawukhulula lomuntfu utawube awusuye umngani waKhesari. Wonkhe umuntfu lotenta inkhosi usuke amelene naKhesari.”+ 13 Nasekakuvile loko, Pilatu wakhiphela Jesu ngephandle, wahlala esihlalweni sekwehlulela, endzaweni lebitwa ngekutsi Yindzawo Leyilwe Ngematje, futsi lokutsiwa yi-Gabhatha ngesiHebheru. 14 Besekulilanga Lekulungiselela+ liPhasika; sekusondzela insimbi yelishumi nakubili emini.* Ngako watsi kulamaJuda: “Nayi-ke inkhosi yenu!” 15 Kodvwa wona amemeta atsi: “Msuse! Msuse! Akayiswe elugodvweni!”* Pilatu watsi kuwo: “Nisho kutsi ngibulale inkhosi yenu?” Baphristi labakhulu bamphendvula batsi: “Site lenye inkhosi ngaphandle kwaKhesari.” 16 Ngemuva kwaloko wabanika yena kuze bambulalele elugodvweni.+

Ngako base bayamtsatsa. 17 Jesu watetfwalela lugodvo* lebekatawubulawelwa kulo, wahamba waya endzaweni lokutsiwa Yindzawo YeSikobho,+ ngesiHebheru lebitwa ngekutsi yi-Golgotha.+ 18 Befika lapho bambetsela elugodvweni+ eceleni kwemadvodza lamabili, yena waba semkhatsini.+ 19 Pilatu wabhala emavi futsi watsi akashayelwe kulolugodvo* lebekubetselwe kulo Jesu. Lamavi bekatsi: “Jesu WaseNazaretha, INkhosi YemaJuda.”+ 20 Ngako emaJuda lamanyenti awafundza lamavi, ngobe lendzawo Jesu lebekabetselwe kuyo beyisedvute nelidolobha, futsi bekabhalwe ngesiHebheru, ngesiLathini, nangesiGriki. 21 Kodvwa-ke baphristi labakhulu bemaJuda batsi kuPilatu: “Ungabhali kutsi ‘INkhosi YemaJuda,’ kodvwa bhala kutsi watsi: ‘NgiyiNkhosi YemaJuda.’” 22 Pilatu watsi kubo: “Loko lengikubhalile, sengivele ngikubhalile.”

23 Ngesikhatsi emasotja sekabetsele Jesu elugodvweni, atsatsa tingubo takhe tangetulu atehlukanisa taba tincenye letine, ngulelo latsatsa incenye yinye, futsi atsatsa nengubo yakhe yangephansi. Lengubo yangephansi beyite umtfungo, kodvwa beyelukiwe kusuka etulu kuya phansi. 24 Lamasotja akhuluma odvwa atsi: “Asingayidzabuli, kodvwa asenteni inkatho sitewubona kutsi ngubani lokufanele ayitsatse.”+ Loku kwenteka kuze kugcwaliseke umbhalo lotsi: “Tehlukaniselana timphahla tami, futsi tenta inkatho ngengubo yami.”+ Ngako lamasotja akwenta loko.

25 Eceleni kwalolugodvo* lebekabetselwe kulo Jesu, bekume make wakhe,+ nadzadze wabomake wakhe, naMariya umfati waKlophase, kanye naMariya waseMagdala.+ 26 Ngesikhatsi Jesu abona make wakhe kanye nalomfundzi lebekamtsandza+ beme lapho, watsi kumake wakhe: “Buka, nayi indvodzana yakho!” 27 Wase utsi kulomfundzi: “Buka, nangu make wakho!” Kusukela ngaleso sikhatsi lomfundzi watsatsa make waJesu waya naye ekhaya lakhe.

28 Ngesikhatsi Jesu sekati kutsi konkhe sekufezekile, watsi: “Ngomile.” Loku wakusho kuze kugcwaliseke umbhalo.+ 29 Bekunembita yemanti lebeyigcwele liwayini lelimunyu. Ngako batsatsa sipontji lebesigcwele leliwayini basihloma endvukwini yehisophu,* base basiphakamisela emlonyeni wakhe.+ 30 Nasekalemukele leliwayini, Jesu watsi: “Sekufezekile!”+ Ngemuva kwaloko wagobisa inhloko, wafa.*+

31 Kuze letidvumbu tingahlali ngelilanga leliSabatha kuletingodvo lebetilenga kuto,+ njengobe bekulilanga Lekulungiselela+ lomkhosi (ngobe leloSabatha belilikhulu),+ emaJuda acela kuPilatu kutsi tephulwe imilente bese tiyatsatfwa. 32 Ngako lamasotja efika ephula imilente yalamadvodza lebekalengiswe naJesu etigodvweni, acala ngeyekucala eta nakuyesibili. 33 Kodvwa atsi nakefika kuJesu amkhandza sekavele afile, ngako akazange amephule imilente. 34 Lelinye lalamasotja lamgwaza ngesikhali emhlubulweni,+ masinyane kwaphuma ingati nemanti. 35 Loyo lowakubona loku wafakaza ngako, naloko lakusho kuliciniso, futsi loyo muntfu bekati kutsi letintfo latisho tiliciniso, kuze nani nikholwe.+ 36 Ecinisweni, letintfo tenteka kuze kugcwaliseke umbhalo lotsi: “Kute ngisho nalinye litsambo lakhe lelitawephulwa.”*+ 37 Kunalomunye umbhalo lotsi: “Batambuka loyo labamgwaza.”+

38 Ngemuva kwaloko Josefa wase-Arimathiya lobekangumfundzi waJesu, kodvwa atifihla ngobe esaba emaJuda,+ wabuta kuPilatu kutsi angasitsatsa yini sidvumbu saJesu, futsi Pilatu wamvumela. Ngako wefika wasitsatsa.+ 39 Nikhodemu,+ lendvodza lebeyike yefika kuye ebusuku, naye weta aphetse emakha emure newenhlaba lebekanesisindvo lesingaba ngemakhilogremu langu⁠-⁠30.*+ 40 Ngako basitsatsa lesidvumbu saJesu basigocotela ngetindvwangu telineni kanye nemakha,+ njengobe nje emaJuda bekavame kwenta nakalungiselela tidvumbu kutsi tiyongcwatjwa. 41 Kulendzawo Jesu lebekabulawelwe kuyo* bekunengadze, futsi kuyo bekunelithuna lelisha,+ lebekungazange sekungcwatjwe umuntfu kulo. 42 Ngako Jesu bamngcwaba kulo, ngenca yekutsi bekulilanga lemaJuda Lekulungiselela+ umkhosi, kantsi nalelithuna belisedvute.