Yesibili Leya KubaseThesalonika

1 Mine Pawula ngikanye naSilvanosi* naThimothi,+ ngibhalela libandla laseThesalonika lelisebunyeni naNkulunkulu longuBabe wetfu kanye neNkhosi Jesu Khristu:

2 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini Jesu Khristu.

3 Bazalwane, sihlale sinesibopho sekunibongela kuNkulunkulu. Loku kufanele ngobe kukholwa kwenu kukhula kakhulu, nendlela lenitsandzana ngayo iyakhula.+ 4 Ngako siyatigcabha ngani+ emabandleni aNkulunkulu ngenca yekubeketela nekukholwa kwenu kuko konkhe kuphatfwa kabi nekuhlupheka lenibhekana nako.*+ 5 Loku kubufakazi bekutsi Nkulunkulu wehlulela ngekulunga, futsi kutawuholela ekutseni niwufanele uMbuso wakhe lenihlupheka ngenca yawo.+

6 Ecinisweni, kulungile ngaNkulunkulu kutsi abuyisele kuhlupheka kulabo labanibangela kuhlupheka.+ 7 Kodvwa nine lenihluphekako nitawuphumula kanye natsi ekwembulweni kweNkhosi Jesu+ ivela ezulwini, ikanye netingilosi tayo letinemandla+ 8 emlilweni lovutsa emalangabi, njengobe kutawube kuphindziselwa kulabo labangamati Nkulunkulu nakulabangatilaleli tindzaba letimnandzi letimayelana neNkhosi yetfu Jesu.+ 9 Laba batawutfola sijeziso sekubhujiswa kwaphakadze+ basuke embikweNkhosi nasenkhatimulweni yemandla ayo, 10 naseyingcweliswa kanye nalabangcwele bayo, futsi bonkhe labanekukholwa batayibuka ngekumangala ngalelolanga, njengobe nine nabukholwa bufakazi lesaninika bona.

11 Kuze kube nguleso sikhatsi, sihlale sinithantazela kutsi Nkulunkulu wetfu anitsatse njengalabalufanele lubito lwakhe,+ futsi ngemandla akhe akwente konkhe lokulungile lafuna kukwenta, ente nemsebenti wenu wekukholwa uphumelele. 12 Loku kutawenteka kuze libito leNkhosi yetfu Jesu lingcweliswe kini, nani ningcweliswe ebunyeni nayo, ngekuvumelana nemusa lomkhulu waNkulunkulu wetfu neweNkhosi Jesu Khristu.