Sembulo Lesembulelwa Johane
7 Ngemuva kwaloko ngabona tingilosi letine time emagumbini lamane emhlaba, tibambisise imimoya lemine yemhlaba, kuze kube bete umoya lohhusha emhlabeni, naselwandle nakunobe ngusiphi sihlahla. 2 Ngabona lenye ingilosi yenyuka ivela emphumalanga ineluphawu lwaNkulunkulu lophilako; yatimemeta ngelivi lelikhulu letingilosi letine lebetinikwe ligunya lekulimata umhlaba kanye nelwandle, 3 yatsi: “Ningawulimati umhlaba, nelwandle kanye netihlahla, kuze kube ngulapho tinceku taNkulunkulu wetfu sesitibeke luphawu+ emabuntini ato.”+
4 Ngeva kutsi labo lebebabekwe luphawu bebangu-144 000,+ futsi bebavela kuto tonkhe tive temadvodzana a-Israyeli:+
5 Lababekwa luphawu esiveni sakaJuda bebangu-12 000;
esiveni sakaRubeni bebangu-12 000;
esiveni sakaGadi bebangu-12 000;
6 esiveni saka-Asheri bebangu-12 000;
esiveni sakaNaftali bebangu-12 000;
esiveni sakaManase+ bebangu-12 000;
7 esiveni sakaSimeyoni bebangu-12 000;
esiveni sakaLevi bebangu-12 000;
esiveni saka-Isakhari bebangu-12 000;
8 esiveni sakaZebuloni bebangu-12 000;
esiveni sakaJosefa bebangu-12 000;
nasesiveni sakaBhenjamini bebangu-12 000 lababekwa luphawu.
9 Ngemuva kwaloko ngatsi ngiyabuka, ngabona sicumbi lesikhulu sebantfu lokute muntfu lowakhona kusibala, siphuma kuto tonkhe tive, tinhlanga, bantfu, kanye netilwimi+ sime embikwesihlalo sebukhosi nasembikweliWundlu, sigcoke tingubo letindze letimhlophe;+ nasetandleni taso siphetse emagala elusundvu,+ 10 futsi sichubeka simemeta ngelivi lelikhulu sitsi: “Insindziso ivela kuNkulunkulu wetfu lohleti esihlalweni sebukhosi,+ nakulo liWundlu.”+
11 Tonkhe tingilosi betime titungelete sihlalo sebukhosi, nalabadzala+ kanye netidalwa letine letiphilako, futsi takhotsama embikwesihlalo sebukhosi, takhonta Nkulunkulu, 12 tatsi: “Amen! Ludvumo, inkhatimulo, kuhlakanipha, kubongwa, kuhlonishwa, emandla, netikhwepha akube kwaNkulunkulu wetfu phakadze naphakadze.+ Amen.”
13 Lomunye walabadzala watsi kimi: “Laba labagcoke tingubo letindze letimhlophe+ babobani futsi bavelaphi?” 14 Masinyane ngatsi kuye: “Nkhosi yami nguwe lowatiko.” Yena watsi kimi: “Laba ngulabaphume ekuhluphekeni lokukhulu,+ labahlante tingubo tabo batenta taba mhlophe engatini yeliWundlu.+ 15 Kungako beme embikwesihlalo sebukhosi saNkulunkulu, futsi bamentela umsebenti longcwele busuku nemini ethempelini lakhe; Loyo lohleti esihlalweni sebukhosi+ utawumisa lithende lakhe etikwabo.+ 16 Ngeke basalamba nobe bome, futsi angeke basashiswa lilanga kanye nanobe ngukuphi kushisa lokuhlabako,+ 17 ngobe liWundlu+ lelisemkhatsini lapho kunesihlalo sebukhosi khona litawubelusa,+ libaholele emitfonjeni yemanti ekuphila.+ Nkulunkulu utawesula tonkhe tinyembeti emehlweni abo.”+