Sembulo Lesembulelwa Johane
5 Ngesekudla saLoyo lohleti esihlalweni sebukhosi,+ ngabona umculu lobhalwe ngala nangala,* uvalwe wacina futsi wananyatsiselwa ngetimphawu* letingu-7. 2 Ngabese ngibona ingilosi lenemandla imemeta ngelivi lelikhulu itsi: “Ngubani lokumfanele kuvula lomculu, nekuchacha timphawu tawo?” 3 Kodvwa bekute umuntfu ezulwini nobe emhlabeni, nobe ngephansi kwemhlaba lowakwati kuvula lomculu nobe kuwufundza. 4 Ngakhala kakhulu ngobe bekute umuntfu lobekumfanele kuwuvula nobe kuwufundza. 5 Kodvwa lomunye walabadzala watsi kimi: “Yekela kukhala. INgwenyama levela esiveni sakaJuda,+ leyimphandze+ yaDavide,+ incobile+ kuze ivule lomculu netimphawu tawo letingu-7.”
6 Emkhatsini, lapho kunalesihlalo sebukhosi khona nasemkhatsini wetidalwa letine letiphilako nasemkhatsini walabadzala,+ ngabona kume liwundlu+ lebelibonakala shengatsi lihlatjiwe,+ belinetimphondvo letingu-7 kanye nemehlo langu-7, futsi lamehlo amelela imimoya yaNkulunkulu lengu-7+ leyatfunyelwa kuwo wonkhe umhlaba. 7 Leliwundlu lasondzela ngaso leso sikhatsi, futsi lawutsatsa esandleni sangesekudla saLoyo lohleti esihlalweni sebukhosi.+ 8 Nalitsatsa lomculu, letidalwa letine letiphilako kanye nalabadzala labangu-24+ bakhotsama embikwaleliWundlu, ngamunye wabo bekanelihabhu netitja teligolide letigcwele imphepho. (Lemphepho imelela imithantazo yalabangcwele.)+ 9 Bebahlabela ingoma lensha+ batsi: “Kukufanele kutsatsa lomculu nekuvula timphawu tawo, ngobe wahlatjwa, nangengati yakho watsengela Nkulunkulu+ bantfu kuto tonkhe tinhlanga, tilwimi, bantfu netive,+ 10 wabenta baba ngumbuso+ nebaphristi kuNkulunkulu wetfu,+ futsi batawuba ngemakhosi+ etikwemhlaba.”
11 Ngabona futsi ngeva livi letingilosi letinyenti titungelete lesihlalo sebukhosi, netidalwa letiphilako, kanye nalabadzala, linani lato belitigidzi tetigidzi netinkhulungwane tetinkhulungwane,+ 12 timemeta titsi: “LiWundlu lelahlatjwa+ likufanele kutfola emandla, umcebo, kuhlakanipha, tikhwepha, ludvumo, inkhatimulo nesibusiso.”+
13 Ngeva tonkhe tidalwa letisezulwini, letisemhlabeni, letingephansi kwawo,+ letiselwandle, kanye nako konkhe lokukuko, kutsi: “KuLoyo lohleti esihlalweni sebukhosi+ nakulo liWundlu+ akube sibusiso, ludvumo,+ inkhatimulo nemandla phakadze naphakadze.”+ 14 Letidalwa letine letiphilako betitsi: “Amen!” labadzala bona bakhotsama futsi bakhonta Nkulunkulu.