Kulandzisa KwaMatewu
12 Ngaleso sikhatsi, Jesu wahamba emasimini ngeliSabatha. Bafundzi bakhe besebalambile, ngako babese bachulula kolo badla.+ 2 BaFarisi nababona loku, batsi kuye: “Asewubuke! Bafundzi bakho benta intfo lengakavumeleki kutsi yentiwe ngeliSabatha.”+ 3 Jesu watsi kubo: “Anizange nifundze yini ngaloko Davide lakwenta ngesikhatsi yena nemadvodza labehamba nawo balambile?+ 4 Wangena endlini yaNkulunkulu watsatsa tinkhwa letinikelwe kuNkulunkulu,+ futsi watidla nalamadvodza. Bebangakavumeleki kutsi batidle letinkhwa, kodvwa bekubaphristi kuphela lebebavumelekile.+ 5 Anizange nifundze yini eMtsetfweni kutsi baphristi lebebasethempelini bebasebenta ngeliSabatha, kodvwa bangabi nelicala?+ 6 Ngiyanitjela ngitsi, lapha kukhona lomkhulu kunelithempeli.+ 7 Kube benikucondza loko lokushiwo ngulamavi latsi: ‘Angifuni imihlatjelo,+ kodvwa ngifuna kutsi bantfu babe nemusa,’+ beningeke nibalahle ngelicala labo labamsulwa. 8 Ngobe iNdvodzana yemuntfu iyiNkhosi yeliSabatha.”+
9 Watsi nakesuka lapho waya esinagogeni labo, 10 futsi bekunendvodza lebeyinesandla lesikhubatekile.*+ BaFarisi bambuta batsi: “Kuvumelekile yini kwelapha ngeliSabatha?” Bambuta loku ngoba bafuna kummangalela.+ 11 Watsi kubo: “Ukhona yini lapha kini longatsi anemvu yinye bese nayigcumkela emgodzini ngeliSabatha angayikhiphi?+ 12 Umuntfu akakabaluleki yini kunemvu? Ngako-ke kuvumelekile kwenta intfo lenhle ngeliSabatha.” 13 Wase utsi kulendvodza: “Yelula sandla sakho.” Yaselula, sase siyelapheka saba njengalesi lesinye. 14 Kodvwa baFarisi baphuma bakha lisu lekumbulala. 15 Watsi Jesu nasekati ngalo, wesuka lapho. Bantfu labanyenti bamlandzela+ futsi welapha bonkhe lebebagula, 16 kodvwa wabecwayisa watsi bangatjeli muntfu ngaye,+ 17 kuze kutogcwaliseka loko lokwashiwo ngumphrofethi Isaya, nakatsi:
18 “Lena yinceku yami+ lengiyikhetsile, lengiyitsandzako nalengiyemukele.+ Ngitayinika umoya wami,+ futsi itawukwenta tive tati kutsi kuyini kulunga mbamba. 19 Angeke ibangisane+ namuntfu nobe imemete; kute nemuntfu lotawukuva livi layo emigwacweni lemikhulu. 20 Ngeke iwufohlote umhlanga lofafabukile, ngeke iyicime nentsambo yesibane lelotitako,+ kuze kube ngulapho ilungisa konkhe lokungakalungi. 21 Tive titawetsembela egameni layo.”+
22 Base baletsa indvodza lebeyinelidimoni, ingaboni emehlweni, futsi ingakhoni kukhuluma. Wayelapha, yase iyabona futsi yakhuluma. 23 Sicumbi sebantfu samangala, satsi: “Kungenteka yini kutsi lomuntfu uyiNdvodzana yaDavide?” 24 Nabeva loku, baFarisi batsi: “Lomuntfu ukhipha emadimoni ngaBhelzebhule* inkhosi yemadimoni.”+ 25 Akwati loko lebebakucabanga, watsi kubo: “Nobe ngumuphi umbuso lowehlukene ekhatsi uyawa, futsi nobe nguliphi lidolobha nobe indlu leyehlukene ekhatsi ngeke ime. 26 Ngendlela lefanako, nangabe Sathane akhipha Sathane, usuke ehlukene ekhatsi; ngako-ke umbuso wakhe ungema kanjani? 27 Ngetulu kwaloko, nangabe ngikhipha emadimoni ngaBhelzebhule, balandzeli benu bawakhipha ngabani? Kungako-ke batawunehlulela. 28 Kodvwa nangabe ngikhipha emadimoni ngemoya waNkulunkulu, kusho kutsi uMbuso waKhe nisengakawuboni.+ 29 Umuntfu angayihlasela njani indlu yendvodza lenemandla futsi atsatse imphahla yayo, nangabe angacali ngekubopha lendvodza khona atewukwati kugcekeza lendlu? 30 Longekho ngakimi umelene nami, nalongagcogci bantfu kanye nami, uyabasakata.+
31 “Ngako ngiyanitjela ngitsi: Bantfu batawutsetselelwa tonkhe tono labatentako nekuhlambalata, kodvwa umuntfu lohlambalata umoya ngeke atsetselelwe.+ 32 Nobe ngubani lokhuluma kabi ngeNdvodzana yemuntfu utawutsetselelwa,+ kodvwa nobe ngubani lokhuluma kabi ngemoya longcwele ngeke atsetselelwe kulesikhatsi sanyalo* ngisho nakuleso lesitako.+
33 “Nangabe nine nisihlahla lesihle nitawutsela titselo letinhle, kepha nangabe nisihlahla lesibi nitawutsela titselo letimbi, ngobe sihlahla satiwa ngetitselo taso.+ 34 Ntalelwane yetinyoka,+ ningatikhuluma njani tintfo letinhle nangabe nibabi? Ngobe umlomo ukhuluma loko lokugcwele enhlitiyweni.+ 35 Umuntfu lolungile ukhipha lokuhle enhlitiyweni yakhe, kantsi umuntfu lomubi ukhipha lokubi enhlitiyweni yakhe.+ 36 Ngiyanitjela ngitsi: NgeLilanga Lekwehlulelwa bantfu batawulandzisa+ ngenca yawo onkhe emavi langakhi labawakhulumako, 37 ngobe ngemavi akho kutawutsiwa ulungile, futsi ngemavi akho utawulahlwa ngelicala.”
38 Ngemuva kwaloko, letinye tati temtsetfo kanye nebaFarisi batsi kuye: “Mfundzisi, sifuna kubona sibonakaliso lesivela kuwe.”+ 39 Wabaphendvula watsi: “Lesitukulwane lesibi futsi lesingaketsembeki* sihlale sifuna kubona sibonakaliso, kodvwa kute sibonakaliso lesitawunikwa sona ngaphandle kwesibonakaliso semphrofethi Jona.+ 40 Ngobe njengobe Jona abesesiswini senhlanti lenkhulu emalanga lamatsatfu nebusuku lobutsatfu,+ neNdvodzana yemuntfu itawuba sematfunjini emhlaba emalanga lamatsatfu nebusuku lobutsatfu.+ 41 Bantfu baseNineve batawuvuka kanye nalesitukulwane nasekwehlulelwa, futsi batasibeka licala ngobe bona baphendvuka nabeva Jona ashumayela.+ Kodvwa lapha kukhona lomkhulu kunaJona.+ 42 Indlovukazi yaseningizimu itawuvuka kanye nalesitukulwane nasekwehlulelwa futsi itawusibeka licala, ngobe yesuka eveni lelikhashane yayolalela emavi lahlakaniphile aSolomoni.+ Kodvwa lapha kukhona lomkhulu kunaSolomoni.+
43 “Nangabe lidimoni liphuma kumuntfu, lihamba etindzaweni letomile lifuna indzawo yekuhlala kodvwa lingayitfoli.+ 44 Libese litsi: ‘Ngitawubuyela endlini yami lengaphuma kuyo.’ Litsi nalifika khona liyitfole ite lutfo kodvwa ihlobile futsi ihlotjisiwe. 45 Ngemuva kwaloko liyahamba lilandze lamanye emadimoni langu-7 lamabi kakhulu kunalo, futsi atsi angangena kulomuntfu abese ahlala khona.+ Simo salomuntfu siba sibi kakhulu kunasekucaleni. Kutawuba njalo-ke nangalesitukulwane lesibi.”
46 Ngesikhatsi Jesu asakhuluma nalesicumbi sebantfu, make wakhe nabomnakabo+ bebeme ngephandle, futsi bebafuna kukhuluma naye.+ 47 Ngako lomunye wambikela watsi: “Make wakho nabomnakenu beme ngephandle bafuna kukhuluma nawe.” 48 Jesu wamphendvula watsi: “Ngubani make wami, bobani bomnaketfu?” 49 Wase welula sandla wakhomba bafundzi bakhe, watsi: “Nangu make wami nabomnaketfu!+ 50 Ngobe nobe ngubani lowenta intsandvo yaBabe losezulwini nguye longumnaketfu, dzadzewetfu kanye namake.”+