2 Tikhronike

33 Manase+ bekaneminyaka lengu-12 budzala nakaba yinkhosi futsi wabusa iminyaka lengu-55 eJerusalema.+

2 Wenta lokubi emehlweni aJehova, walandzela imikhuba leyenyanyekako yetive lebeticoshwe nguJehova embikwema-Israyeli.+ 3 Wakha kabusha tindzawo letiphakeme lebetibhidlitwe ngubabe wakhe Hezekiya,+ wentela boBhali ema-al’thare kanye netinsika letingcwele* waphindze wakhotsamela lonkhe libutfo lemazulu futsi walikhonta.+ 4 Waphindze wakha ema-al’thare endlini yaJehova,+ leyo Jehova bekatsite ngayo: “Libito lami litawuhlala eJerusalema kuze kube phakadze.”+ 5 Wakhela lonkhe libutfo lasemazulwini ema-al’thare emabaleni lamabili endlu yaJehova.+ 6 Waphindze washisa emadvodzana akhe emlilweni*+ eSigodzini Sendvodzana yaHinomu;+ wenta imilingo,+ waphengula, wenta butsakatsi futsi wabeka tangoma nalababhulako.+ Wenta lokubi emehlweni aJehova ngelizinga lelikhulu kuze amvise buhlungu.

7 Wabeka sithico lesibatiwe endlini yaNkulunkulu weliciniso,+ leyo Nkulunkulu lebekakhulume ngayo kuDavide kanye nakuSolomoni indvodzana yakhe watsi: “Kulendlu naseJerusalema lengiyikhetsile kuto tonkhe tive taka-Israyeli, ngitalibeka khona libito lami kuze kube phakadze.+ 8 Angeke ngiphindze ngiwacoshe ema-Israyeli eveni lengetsembisa kulinika bokhokho bawo, kuphela nje nakangakugcina ngekucophelela konkhe lengiwayale ngako, wonkhe uMtsetfo, imiyalo netehlulelo lengawanika kona ngisebentisa Mosi.” 9 Manase wachubeka aphambukisa emaJuda kanye nebantfu baseJerusalema, wabangela kutsi bente tintfo letimbi kwendlula leto lebetentiwa tive lebeticotfulwe nguJehova embikwema-Israyeli.+

10 Jehova abesolo akhuluma naye Manase kanye nebantfu bakhe, kodvwa abazange bamlalele.+ 11 Ngako Jehova waletsa tindvuna telibutfo lemphi tenkhosi yase-Asiriya kutsi titobahlasela. Tabamba Manase ngemahhuka tase timkhunga ngetinketane letimbili telitfusi, tahamba naye taya eBhabhulona. 12 Manase wamncenga Jehova Nkulunkulu wakhe, asekuhluphekeni kwakhe, wacela umusa futsi wachubeka atitfoba kakhulu kuNkulunkulu wabokhokho bakhe. 13 Manase abesolo athantaza kuNkulunkulu futsi kwamtsintsa Nkulunkulu lokuncusa kwakhe, wasiva lesicelo sakhe semusa. Wase umbuyisela eJerusalema kute achubeke nekuba yinkhosi.+ Ngemuva kwaloko, Manase wati kutsi Jehova unguNkulunkulu weliciniso.+

14 Wabese wakha lubondza lwangaphandle lweliDolobha laDavide+ enshonalanga neGihoni+ kulesihosha futsi lwaze lwayofika eSangweni Lenhlanti,+ lwachubeka lutungeleta lwaze lwayofika e-Ofeli,+ futsi walwenta lwaphakama kakhulu. Ngetulu kwaloko, Manase wabeka tindvuna telibutfo kuwo onkhe emadolobha labiyelwe akaJuda. 15 Wabese ususa bonkulunkulu baletinye tive nalesithico lebesisendlini yaJehova,+ nawo onkhe ema-al’thare lebekawakhile entsabeni yendlu yaJehova+ naseJerusalema futsi watsi akuyolahlwa ngaphandle kwelidolobha. 16 Waphindze walungisa li-al’thare laJehova,+ wacala kwenta imihlatjelo yekuthula+ neyekubonga+ futsi watjela sive semaJuda kutsi sikhonte Jehova Nkulunkulu wema-Israyeli. 17 Nome kunjalo, bantfu bebasachubeka benta imihlatjelo etindzaweni letiphakeme, kodvwa bebayentela Jehova Nkulunkulu wabo kuphela.

18 Lomunye umlandvo waManase, umthantazo wakhe kuNkulunkulu kanye nemavi ebaboni bemibono labakhuluma naye egameni laJehova Nkulunkulu wema-Israyeli, kubhaliwe emlandvweni wemakhosi aka-Israyeli. 19 Nemthantazo wakhe,+ nendlela kuncusa kwakhe lokwaphendvulwa ngayo, tonkhe tono takhe nekungetsembeki kwakhe,+ lapho akha khona tindzawo letiphakeme waphindze wamisa tinsika letingcwele*+ kanye netithico letibatiwe ngaphambi kwekutsi atitfobe, kubhaliwe emavini ebaboni bakhe bemibono. 20 Manase wabese uyafa, wangcwatjwa lapho kwangcwatjwa khona bokhokho bakhe, bamngcwaba eceleni kwendlu yakhe; indvodzana yakhe Amoni yaba yinkhosi ngemuva kwakhe.+

21 Amoni+ bekaneminyaka lengu-22 budzala nakaba yinkhosi, futsi wabusa iminyaka lemibili eJerusalema.+ 22 Wachubeka nekwenta lokubi emehlweni aJehova njengobe babe wakhe Manase bekentile,+ futsi wenta umhlatjelo kuto tonkhe tithico lebetibatiwe, leto babe wakhe Manase bekatentile+ futsi Amoni wachubeka atikhonta. 23 Kodvwa Amoni akazange atitfobe kuJehova+ njengobe babe wakhe Manase bekatitfobile;+ esikhundleni saloko, Amoni wachubeka enta lokubi kakhulu. 24 Ekugcineni, tinceku takhe takha lisu+ lekumbulala futsi tambulalela endlini yakhe. 25 Kodvwa bantfu bakuleyo ndzawo bababulala bonkhe labantfu lebebakhe lelisu lekubulala iNkhosi Amoni+ futsi babeka Josaya+ indvodzana yayo waba yinkhosi esikhundleni sayo.