Sembulo Lesembulelwa Johane

4 Ngemuva kwaloko, ngatsi ngiyabuka ngabona umnyango lovulekile ezulwini, futsi livi lekucala lengaliva belinjengelekukhala kwelicilongo, likhuluma nami litsi: “Yenyukela lapha ngitokukhombisa tintfo lokufanele tenteke.” 2 Ngekushesha ngemuva kwaloko umoya waNkulunkulu wehlela kimi, ngabona sihlalo sebukhosi sisendzaweni yaso ezulwini, futsi bekunalohleti kuso.+ 3 Loyo lobekahleti kuso bekafanana nelitje lejasiphi,+ nelitje lelibovu leliligugu,* futsi lesihlalo sebukhosi besitungeletwe ngumushi wenkosazana lonjengesimaragidu.*+

4 Lesihlalo sebukhosi besitungeletwe tihlalo tebukhosi letingu-24, nakuto ngabona kuhleti labadzala labangu-24+ bagcoke tingubo letimhlophe, nasetinhloko tabo kunemichele yeligolide. 5 Kulesihlalo sebukhosi bekuphuma imibane,+ emavi kanye nekudvuma kwelitulu;+ embikwaso bekunetibane temlilo letingu-7 letivutsako, futsi timelela imimoya lengu-7 yaNkulunkulu.+ 6 Embikwalesihlalo sebukhosi bekunalokutsite lokufana nelwandle loluyingilazi,+ kunjengekristalu.

Emkhatsini lapho kunalesihlalo sebukhosi* khona nasemaceleni aso, bekunetidalwa letine letiphilako+ letigcwele emehlo ngembili nangemuva. 7 Sidalwa lesiphilako sekucala besinjengelibhubesi,+ sesibili besinjengenkunzana,+ sesitsatfu+ besinebuso lobufana nebemuntfu, kantsi sesine+ besinjengelusweti lolundizako.+ 8 Ngasinye saletidalwa letine letiphilako besinetimphiko letisitfupha, futsi betigcwele emehlo yonkhe indzawo ngisho nangephansi.+ Busuku nemini tihlale titsi: “Ungcwele, ungcwele, ungcwele Jehova*+ Nkulunkulu Somandla, lobekakhona, lokhona, futsi lotako.”+

9 Nobe kunini lapho letidalwa letiphilako tikhatimulisa Loyo lohleti esihlalweni sebukhosi, Loyo lophila phakadze naphakadze, nanatimdvumisa, futsi timbonga,+ 10 labadzala labangu-24+ baguca embikwaLoyo lohleti kulesihlalo sebukhosi, bakhotsamele Loyo lophila phakadze naphakadze, betfule nemichele yabo bayibeke embikwalesihlalo sebukhosi, batsi: 11 “Kukufanele Jehova* Nkulunkulu wetfu kwemukela inkhatimulo,+ ludvumo+ nemandla,+ ngobe wadala tonkhe tintfo,+ nangentsandvo yakho taba khona futsi tadalwa.”