Kulandzisa KwaMakho
7 BaFarisi naletinye tati temtsetfo lebebasuka eJerusalema beta babutsana kuJesu.+ 2 Babona labanye bebafundzi bakhe badla ngetandla letingcolile, lokusho tandla letingakagezwa.* 3 (BaFarisi nawo onkhe emaJuda bebangadli bangakatigezi tandla kuze kufike engcoseni, ngobe bebabambelele emasikweni abokhokho babo, 4 futsi nababuya emakethe bebangadli bangakagezi. Bekunalamanye emasiko lamanyenti lebebabambelele kuwo, njengekugezwa kwetindzebe, tindziwo kanye netitja telitfusi.)+ 5 Ngako labaFarisi naletati temtsetfo bambuta batsi: “Kwentiwa yini kutsi bafundzi bakho bangalihloniphi lisiko labokhokho, futsi badle ngetandla letingcolile?”+ 6 Jesu watsi kubo: “Isaya waphrofetha kufanele ngani nine batentisi njengobe kubhaliwe kutsi: ‘Labantfu bangidvumisa ngemilomo yabo, kodvwa tinhlitiyo tabo tikhashane nami.+ 7 Kungikhonta kwabo kulite ngobe bafundzisa timfundziso tebantfu.’+ 8 Aniyigcini imitsetfo yaNkulunkulu, kodvwa nibambelele emasikweni ebantfu.”+
9 Ngetulu kwaloko watsi kubo: “Nihlale nifuna tindlela letibucili tekulahla imitsetfo yaNkulunkulu kute nigcine emasiko enu.+ 10 Ngobe Mosi watsi: ‘Hlonipha babe wakho namake wakho,’+ waphindze watsi: ‘Umuntfu lokhuluma kabi* ngababe wakhe nobe ngamake wakhe kufanele abulawe.’+ 11 Kodvwa nine nitsi: ‘Nangabe umuntfu atsi kubabe wakhe nobe kumake wakhe: “Konkhe lenginako lebengingakunakekela ngako sekuyikhobhani (lokusho sipho lesinikelwe kuNkulunkulu),”’ 12 akusadzingeki loyo muntfu abentele lutfo batali bakhe.+ 13 Ngako nilenta lite livi laNkulunkulu ngenca yemasiko enu leniwafundzisa labanye.+ Futsi nenta naletinye tintfo letinyenti letifana naleti.”+ 14 Waphindze wabita sicumbi sebantfu, watsi kuso: “Ngilaleleni, futsi nikucondze loko lengikushoko.+ 15 Kute intfo lengena ngekhatsi kumuntfu lengamngcolisa, kodvwa tintfo letiphuma kuye ngito letimngcolisako.”+ 16 *——
17 Ngako watsi nasekangene endlini, sekasukile kulesicumbi, bafundzi bakhe bambuta ngalomfanekiso.+ 18 Watsi kubo: “Kantsi nani anicondzi, nifana nalabantfu? Anati yini kutsi kute intfo lengena kumuntfu lengamngcolisa? 19 Ngobe leyontfo ayiyi enhlitiyweni, kodvwa ingena esiswini, nakhona ifike yendlule bese iyaphuma.” Ngako-ke watsi konkhe kudla kuhlantekile. 20 Wachubeka watsi: “Lokuphuma kumuntfu ngiko lokumngcolisako.+ 21 Ngobe enhlitiyweni yemuntfu+ kuphuma imicabango lemibi: bugwadla,* kweba, kubulala, 22 kuphinga, bukhali, bubi, kukhohlisa, kona lokuhambisana nekwedzelela,* umona, kuhlambalata, kutiphakamisa kanye nekungacabangeli. 23 Tonkhe letintfo letimbi tivela ngekhatsi kumuntfu futsi tiyamngcolisa.”
24 Jesu wesuka lapho waya esifundzeni saseThire naseSidoni.+ Wafike wangena endlini futsi bekangafuni kutsi bantfu bati ngaloko, kodvwa wehluleka kutifihla. 25 Ngekushesha lomunye umfati lobekanendvodzakati lencane lebeyinelidimoni weva ngaye, wase uyeta wafike waguca embikwakhe.+ 26 Lomfati abengumGriki, avela* eFenikhe leseSiriya, futsi abesolo acela Jesu kutsi akhiphe lelidimoni kulendvodzakati yakhe. 27 Kodvwa Jesu watsi kuye: “Asekucale kwenele bantfwana kucala, ngobe akukalungi kutsatsa sinkhwa sabo usijikele tinja letisetincane.”+ 28 Kodvwa lomfati wamphendvula watsi: “Kona kunjalo Nkhosi, kodvwa netinja letisetincane letingephansi kwelitafula tidla timvutfu letiwa kulabantfwanyana.” 29 Jesu watsi kuye: “Ukhulume kahle, sewungahamba ngobe lelidimoni seliphumile kulendvodzakati yakho.”+ 30 Ngako wahamba waya ekhaya, watfola lomntfwana alele embhedzeni, nalelidimoni seliphumile.+
31 Watsi Jesu nakabuya esifundzeni saseThire, wadzabula eSidoni waya eLwandle LwaseGalile, wendlula esifundzeni saseDekhapholi.*+ 32 Bantfu baletsa kuye indvodza lebeyingeva etindlebeni futsi inenkinga yekukhuluma,+ bamncenga kutsi ayibeke tandla. 33 Ngako wayitsatsa wayisusa kulesicumbi baba bodvwa. Wase ufaka iminwe yakhe etindlebeni tayo futsi ngemuva kwekukhafula watsintsa lulwimi lwayo.+ 34 Wase ubuka ezulwini, wadvonsa umoya watsi kuyo: “Efatha,” lokusho kutsi “Vuleka.” 35 Tindlebe tayo tavuleka,+ nalenkinga yayo yekukhuluma yaphela, yase icala kukhuluma kahle. 36 Jesu wabecwayisa watsi bangatjeli muntfu,+ kodvwa bekatsi nakasho njalo kube shengatsi ubabangile.+ 37 Labantfu bamangala kakhulu+ baze batsi: “Tonkhe letintfo latentako tiyamangalisa. Ngisho nalabangeva etindlebeni ubenta beve, nalabangakhoni kukhuluma ubenta bakhulume.”+