Imisebenti Yebaphostoli
28 Satsi nasesifike ngekuphepha elugwini, seva kutsi lesihlenge bekutsiwa yiMaltha.+ 2 Bantfu bakhona* basiphatsa kahle kakhulu. Basibasela umlilo baphindze basemukela ngetandla letifutfumele njengobe litulu belina futsi kubandza. 3 Kodvwa ngesikhatsi Pawula atsatsa tinkhuni atifaka emlilweni, kwaphuma inyoka icoshwa kushisa, yanamatsela esandleni sakhe. 4 Nababona lenyoka ilenga esandleni sakhe, labantfu bakhuluma bodvwa batsi: “Lomuntfu ungumbulali, futsi nanobe asindzile elwandle, nyalo nkulunkulukati wekulunga* ngeke amvumele kutsi aphile.” 5 Nome kunjalo, Pawula wayitsintsitsela emlilweni lenyoka futsi akazange alimale. 6 Labantfu bebalindzele kutsi avuvuke nobe avele aganklateke phansi afe. Kodvwa nasebalindze sikhatsi lesidze, sebabona nekutsi kute lokwentekile kuye, bashintja tingcondvo tabo, base batsi ungunkulunkulu.
7 Kuleyo ndzawo bekunemasimu endvodza lokutsiwa nguPhupliyuse, lebeyingumholi kulesihlenge futsi yasemukela ngemusa, yasiphatsa kahle emalanga lamatsatfu. 8 Kodvwa babe waPhupliyuse bekalele phansi, aphetfwe ngumkhuhlane futsi ahanjiswa sisu. Ngako Pawula waya kuye wamthantazela, wambeka tandla, futsi wamelapha.+ 9 Ngemuva kwaloko, bonkhe bantfu lebebagula kulesihlenge beta kuye, nabo belashwa.+ 10 Basipha tipho letinyenti, satsi nasesihamba basinika tintfo lebesitatidzinga.
11 Ngemuva kwetinyanga letintsatfu sagibela umkhumbi lobewuneluphawu lolutsi “Emadvodzana AZeyusi.” Lomkhumbi bewuchamuke e-Alekzandriya futsi bewuhleli busika bonkhe kulesihlenge. 12 Sema esikhumulweni semikhumbi saseSirakhusi, sahlala khona emalanga lamatsatfu, 13 nasisuka lapho sahamba saze sefika eRigiyumu. Ngakusasa kwaba nemoya lovela eningizimu, ngako sefika ePhutheyoli ngelilanga lelilandzelako. 14 Kuleyo ndzawo, safike satfola bazalwane futsi basincenga kutsi sihlale nabo emalanga langu-7; ngemuva kwaloko sabashiya saya eRoma. 15 Ngesikhatsi bazalwane baseRoma beva kutsi siyeta, basihlangabeta baze befika eMakethe yase-Aphiyusi kanye nasendzaweni lokutsiwa Tindlu Letintsatfu.* Ngesikhatsi Pawula ababona, wabonga Nkulunkulu wase uba nesibindzi.+ 16 Nasesifikile eRoma, Pawula wavunyelwa kutsi ahlale yedvwa agadvwe lisotja.
17 Nanobe kunjalo, ngemuva kwemalanga lamatsatfu wabitela ndzawonye baholi bemaJuda. Nasebahlangene, watsi kubo: “Banaketfu, nanobe kute lokubi lengikwentile kubantfu futsi kute lokubi lengikwentile lokumelene nemasiko abokhokho betfu,+ ngasuswa eJerusalema ngisiboshwa nganikelwa etandleni temaRoma.+ 18 Ngemuva kwekungiphenya,+ emaRoma bekafuna kungikhulula ngobe bekute sizatfu lebesenta ngifanelwe kubulawa.+ 19 Kodvwa njengobe emaJuda bekasolo akuphikisa loku, ngabona kukuhle kutsi ngendlulisele licala kuKhesari.+ Kepha loko angikwentelanga kumangalela sive sakitsi. 20 Kungaleso sizatfu ngicele kunibona kuze ngitokhuluma nani, ngobe ngiboshwe ngenca yelitsemba lema-Israyeli.”+ 21 Labaholi batsi kuye: “Asikatitfoli tincwadzi letivela eJudiya letimayelana nawe, futsi kute namunye kubomnaketfu losuka lapho lofike wasibikela ngawe, nobe wakhuluma kabi ngawe. 22 Kodvwa sikubona kukuhle kutsi sikulalele, sive loko lokushoko, ngobe siyati kutsi lelihlelo+ kukhulunywa kabi ngalo kuyo yonkhe indzawo.”+
23 Ngako babeka lilanga lekuhlangana naye, base beta ngebunyenti endzaweni labehlala kuyo. Kusukela ekuseni kwaze kwaba nguntsambama, wabachazela letintfo ngekutsi afakaze ngalokuphelele ngeMbuso waNkulunkulu, etama kubenta bakholwe nguJesu,+ asebentisa loko lokushiwo eMtsetfweni waMosi+ nasemibhalweni yebaPhrofethi.+ 24 Labanye batikholwa letintfo lebekatisho, kodvwa labanye abazange batikholwe. 25 Ngenca yekutsi bebaphikisana, batsi nasebahamba Pawula watsi:
“Umoya longcwele bewucinisile ngesikhatsi ukhuluma nabokhokho benu usebentisa umphrofethi Isaya, 26 utsi: ‘Hamba ufike utsi kulabantfu: “Nitawuva kodvwa ngeke nicondze, futsi nitawubuka kodvwa ngeke nibone.+ 27 Ngobe tinhlitiyo talabantfu setibe lukhuni, tindlebe tabo tiyeva kodvwa abenti, futsi bacimetile, ababoni ngemehlo abo, abeva ngetindlebe tabo, tinhlitiyo tabo aticondzi futsi abagucuki kuze mine ngibaphilise.”’+ 28 Yatini kutsi tindzaba letimayelana nendlela Nkulunkulu lasindzisa ngayo bantfu setiyamenyetelwa nakubantfu betive,+ futsi nakanjani batawutilalela.”+ 29 *——
30 Pawula wahlala iminyaka lemibili endlini yakhe lebekayicashile,+ futsi bekabemukela ngetandla letifutfumele labo lebebeta kuye, 31 ashumayela kubo ngeMbuso waNkulunkulu, abafundzisa ngesibindzi+ ngetintfo letimayelana neNkhosi lenguJesu Khristu, futsi kute lobekumphatamisa.