Taga
1 Leti taga taSolomoni+ inkhosi yaka-Israyeli, indvodzana yaDavide:+
2 Letaga tibhalelwe kutsi umuntfu abe nekuhlakanipha+ futsi emukele kuyalwa;
Kuze acondze emavi lagcwele kuhlakanipha;
3 Kuze atfole siyalo+ lesitamenta abe nekucondza,
Abe ngumuntfu lolungile,+ lowehlulela kahle+ nalocotfo;
4 Tenta umuntfu lote lwati ahlakaniphe;+
Tenta umuntfu lomusha abe nelwati futsi asebentise kahle ingcondvo.+
5 Umuntfu lohlakaniphile uyalalela futsi engete lwati lwakhe;+
Umuntfu lonekucondza wemukela sicondziso lesihlakaniphile,+
6 Kuze acondze saga nemfanekiso,
Acondze emavi alabahlakaniphile kanye netiphicwaphicwano tabo.+
7 Kwesaba* Jehova kusicalo sekuhlakanipha.+
Bantfu labatilima ngibo labenyanya kuhlakanipha nekuyalwa.+
9 Ngobe loko kutawuba ngumchele lomuhle enhloko yakho,+
Kube ngumhlobiso lomuhle lotawugaba entsanyeni.+
10 Ndvodzana yami, nangabe toni tikuyenga, ungavumi.+
11 Nangabe titsi: “Asambe,
Asambe siyobhaca kuze sibulale bantfu.
Sitawubhaca kuze sihlasele bantfu labangenacala.
12 Sitabagwinya baphila kuhle kweliThuna,*
Sibagwinye singashiyi lutfo, sibente bafane nebantfu labehlela emgodzini.
13 Asibemuke tonkhe tintfo tabo letiligugu;
Tindlu tetfu sitatigcwalisa ngetintfo lesitebile.
14 Wota utihlanganise natsi,
Futsi tintfo lesitateba sitawehlukaniselana tona ngekulingana.”
15 Ndvodzana yami, ungahambi nabo.
Ungalubeki lunyawo lwakho endleleni yabo,+
16 Ngobe bagijimela* kuyokwenta lokubi;
Bagijimele nekubulala bantfu.+
17 Akusiti ngalutfo kubekela inyoni linethi ibe ikubona.
18 Kungako bantfu lababi babhaca kuze babulale labangenacala;
Bayabhaca kuze babulale labanye bantfu.
19 Nguloko-ke lokwentiwa bantfu labafuna kutfola tintfo ngendlela lengakalungi,
Kodvwa ekugcineni leto tintfo tibuye tibulale bona.+
20 Kuhlakanipha lokungiko+ kumemeta esitaladini.+
Kuhlale kumemeta etimakethe.+
21 Kumemeta emakoneni etitaladi letiphitsitelako.
Kukhuluma nasemagedeni elidolobha kutsi:+
22 “Nine bantfu labete lwati, kutawuze kube ngunini nikutsandza kuba bete lwati?
Nine labaphukutanako, kutawuze kube ngunini nitsandza kuphukuta labanye?
Nani nine tilima, kutawuze kube ngunini nilutondza lwati?+
23 Ngilaleleni nanginekhuta+ futsi nishintje tindlela tenu.
Ngitawubese nginitfululela umoya wami;
Nginente niwati emavi ami.+
24 Ngobe nganimemeta, kodvwa nachubeka nangangilaleli,
Ngelula sandla sami, kodvwa kwaba bete longinakako.+
25 Nachubeka nangatilaleli tonkhe teluleko tami
Futsi anizange ningilalele nanginekhuta.
26 Nami ngitawuhleka nanehlelwa yinhlekelele;
Ngitawuhlekisa ngani nanehlelwa nguloko lebenikwesaba,+
27 Lapho loko benikwesaba kunifikela njengesiphepho,
Lapho inhlekelele inifikela njengesivunguvungu,
Nalapho nehlelwa kuhlupheka netinkinga.
28 Ngaleso sikhatsi batawuchubeka bangibita, kepha angeke ngisabele;
Batawuchubeka bangifuna, kepha angeke bangitfole,+
29 Ngobe balutondzile lwati,+
Futsi bakhetse kungamesabi Jehova.+
30 Abasilalelanga seluleko sami;
Futsi bebahlale basedzelela nesiyalo lengibanika sona.
31 Ngako batawuvuna loko labakuhlanyele,+
Futsi batawubhekana nayo yonkhe imiphumela lebuhlungu yemacebo abo.
32 Bantfu labete lwati batawubulawa kungalaleli kwabo,
Netilima titawubulawa kungabi nandzaba kwato.