Johane Wekucala
4 Bazalwane labatsandzekako, ningabowakholwa onkhe emavi laphefumulelwe,*+ kodvwa nibowahlola kuze nibone kutsi avela kuNkulunkulu yini,+ ngobe eveni sekugcwele baphrofethi bemanga.+
2 Naku lenitawabona ngako emavi laphefumulelwe lavela kuNkulunkulu: Onkhe emavi laphefumulelwe lavuma kutsi Jesu Khristu weta emhlabeni angumuntfu, avela kuNkulunkulu.+ 3 Kodvwa onkhe emavi laphefumulelwe langamvumi Jesu akaveli kuNkulunkulu.+ Ngetulu kwaloko, lawa ngemavi emphikikhristu, loyo leneva kutsi uyeta,+ nalosavele akhona eveni.+
4 Bantfwana, nine nivela kuNkulunkulu, futsi nibancobile labo bantfu,+ ngobe loyo losebunyeni nani+ mkhulu kunaloyo losebunyeni nelive.+ 5 Bona bavela eveni;+ kungako bakhuluma lokuvela kulo, nelive liyabalalela.+ 6 Tsine sivela kuNkulunkulu. Umuntfu lofundza ngaNkulunkulu uyasilalela,+ kantsi loyo longaveli kuNkulunkulu akasilaleli.+ Ngaleyo ndlela siyakhona kwehlukanisa emavi laphefumulelwe laliciniso kulawo langemanga.+
7 Bazalwane labatsandzekako, asichubekeni sitsandzana,+ ngobe lutsandvo luvela kuNkulunkulu, wonkhe umuntfu lonelutsandvo ungumntfwana waNkulunkulu futsi uyamati Nkulunkulu.+ 8 Nobe ngubani lote lutsandvo akamati Nkulunkulu, ngobe Nkulunkulu ulutsandvo.+ 9 Nayi indlela Nkulunkulu lakhombise ngayo kutsi uyasitsandza: Nkulunkulu watfumela iNdvodzana yakhe lekuphela kwayo+ eveni kuze sitfole kuphila ngayo.+ 10 Ngulolo-ke lutsandvo, hhayi kutsi ngitsi lesitsandze Nkulunkulu, kodvwa nguye lowasitsandza, watfumela iNdvodzana yakhe kutsi ibe ngumhlatjelo+ wekuhlawulela tono tetfu.*+
11 Bazalwane labatsandzekako, nangabe Nkulunkulu asitsandze ngalendlela, natsi sibophekile kutsi sitsandzane.+ 12 Kute lowake wabona Nkulunkulu.+ Nangabe sichubeka sitsandzana, Nkulunkulu uhlale anatsi, nelutsandvo lwakhe luyapheleliswa kitsi.+ 13 Ngesizatfu sekutsi usiphe umoya wakhe, siyati kutsi sihlale sisebunyeni naye, nekutsi naye usebunyeni natsi. 14 Ngetulu kwaloko, tsine sibonile futsi siyafakaza kutsi Babe utfumele iNdvodzana yakhe kuze ibe nguMsindzisi welive.+ 15 Nobe ngubani lovumako kutsi Jesu uyiNdvodzana yaNkulunkulu,+ Nkulunkulu uhlale asebunyeni naye, kantsi naloyo muntfu uhlale asebunyeni naNkulunkulu.+ 16 Tsine siyati kutsi Nkulunkulu uyasitsandza futsi siyakukholelwa loko.+
Nkulunkulu ulutsandvo,+ naloyo lochubeka akhombisa lutsandvo uhlale asebunyeni naye, naNkulunkulu uhlale asebunyeni naloyo muntfu.+ 17 Ngaleyo ndlela, lutsandvo luphelelisiwe kitsi kuze sibe nenkhululeko yekukhuluma*+ ngelilanga lekwehlulelwa, ngobe njengobe nje yena anjalo, natsi sinjalo kulelive. 18 Lutsandvo lute kwesaba,+ kodvwa lutsandvo loluphelelisiwe luyakucosha* kwesaba, ngobe kwesaba kuyasivimbela. Ecinisweni, loyo lowesabako akakapheleliswa elutsandvweni.+ 19 Tsine sinelutsandvo, ngobe yena wasitsandza kucala.+
20 Nangabe umuntfu atsi: “Ngiyamtsandza Nkulunkulu,” kodvwa abe atondza umzalwane wakhe, ungumcambimanga.+ Ngobe loyo longamtsandzi umzalwane wakhe+ lambonile, ngeke amtsandze Nkulunkulu langakamboni.+ 21 Sinalomyalo lovela kuye, kutsi loyo lotsandza Nkulunkulu kufanele atsandze nemzalwane wakhe.+