Kulandzisa KwaJohane
15 “Mine ngisihlahla semagilebisi sibili, futsi Babe ungumlimi. 2 Onkhe emagala lakimi langatseli uyawajuba, kodvwa onkhe latselako uyawatsena,* kuze atsele titselo letinyenti.+ 3 Nine senivele nihlobile ngenca yelivi lengilikhulume kini.+ 4 Hlalani nimunye nami, nami ngitawuhlala ngimunye nani. Njengobe neligala lingeke likhone kutsela nangabe lingekho esicwini sesihlahla semagilebisi, nani ngeke nitsele nangabe ningasimunye nami.+ 5 Mine ngisihlahla semagilebisi; nine ningemagala. Loyo lohlala amunye nami futsi nami ngimunye naye, utsela titselo letinyenti;+ ngobe ngaphandle kwami ngeke nitsele lutfo. 6 Nangabe umuntfu angahlali amunye nami, utawuba njengeligala lelijutjiwe lase liyoma; bantfu bayawabutsa emagala lanjalo bawajike emlilweni, bese ayashiswa. 7 Nangabe nihlala nimunye nami nemavi ami ahlale asetinhlitiyweni tenu, nibocela nobe yini leniyifunako futsi nitawunikwa yona.+ 8 Babe uyakhatinyuliswa ngekutsi nichubeke nitsela titselo letinyenti futsi nitivete nibafundzi bami.+ 9 Njengobe Babe angitsandzile,+ nami nginitsandzile, chubekani nibantfu labatsandvwa ngimi. 10 Nangabe nigcina imiyalo yami ngitawuhlale nginitsandza, njengobe nami ngiyigcinile imiyalo yaBabe futsi wachubeka angitsandza.
11 “Letintfo ngitikhulume kini kuze nani nibe nenjabulo lenginayo, futsi iphelele.+ 12 Nginiyala kutsi nitsandzane njengobe nami nginitsandzile.+ 13 Kute umuntfu lonelutsandvo lolukhulu kunalolu, kutsi anganikela ngekuphila kwakhe ngenca yebangani bakhe.+ 14 Nangabe nigcina imiyalo yami nitawuba bangani bami.+ 15 Angisanibiti ngekutsi nitigcili, ngobe sigcili asikwati lokwentiwa yinkhosi yaso. Kodvwa nginibita ngekutsi nibangani bami ngobe nginitjele tonkhe tintfo lengitive kuBabe. 16 Anizange ningikhetse kodvwa ngimi lenginikhetsile, futsi nganitfuma kutsi nichubeke nitsela titselo nekutsi titselo tenu tihlale tikhona; kuze kutsi nobe yini leniyicela kuBabe egameni lami aniphe yona.+
17 “Nginitjela letintfo kuze nitsandzane.+ 18 Nangabe live linitondza, yatini kutsi licale ngekutondza mine lisengakanitondzi nine.+ 19 Kube beniyincenye yelive, live belitanitsandza ngobe nibalo. Kodvwa njengobe ningasiyo incenye yelive,+ futsi mine nginikhetsile kulo, kungako linitondza.+ 20 Khumbulani livi lengalisho kini, kutsi sisebenti asisikhulu kunenkhosi yaso. Nangabe bangiphetse kabi mine, bataniphatsa kabi nani;+ nangabe balilalele livi lami, batalilalela nelenu. 21 Kodvwa batawukwenta tonkhe letintfo kini ngenca yelibito lami, ngobe abamati Loyo longitfumile.+ 22 Kube angizange ngite futsi ngikhulume nabo, bebangeke babe nesono,+ kodvwa nyalo sebete taba ngesono sabo.+ 23 Loyo lotondza mine utondza naBabe.+ 24 Kube angizange ngibentele imisebenti lokute umuntfu lowake wayenta, bebangeke babe nesono,+ kodvwa bangibonile bangitondza, futsi batondza naBabe. 25 Loku kwenteke kuze kugcwaliseke livi lelibhalwe eMtsetfweni wabo, lelitsi: ‘Bangenyanyele lite.’+ 26 Nasekafikile umsiti lengitanitfumelela yena avela kuBabe, lokungumoya lowembula liciniso,+ utawufakaza ngami;+ 27 nani kufanele nifakaze ngami+ ngobe beninami kusukela ekucaleni.