Kulandzisa KwaLukha
10 Ngemuva kwaloko, iNkhosi yakhetsa labanye bafundzi labangu-70, yabatfuma ngababili+ kutsi bahambe embikwayo baye kuwo onkhe emadolobha nakuto tonkhe tindzawo lebeyitawuya kuto. 2 Yatsi kubo: “Umsebenti wekuvuna mkhulu, kodvwa tisebenti timbalwa. Ngako ncengani iNkhosi yekuvuna kutsi yengete tisebenti ekuvuneni kwayo.+ 3 Hambani, nginitfuma njengetimvu emkhatsini wetimphisi.+ 4 Ningaphatsi sikhwama semali nobe sekudla, nobe tincabule,+ futsi ningacitsi sikhatsi solo nibingelela bantfu lenihlangana nabo emgwacweni. 5 Kunobe nguyiphi indlu leningena kuyo nibocale nitsi: ‘Shengatsi lendlu ingaba nekuthula.’+ 6 Nangabe kulendlu kunemuntfu lotsandza kuthula, kuthula kwenu akwehlele kuye. Kodvwa nakute, kuthula kwenu akubuyele kini. 7 Hlalani kuleyondlu,+ nidle futsi ninatse loko labaninika kona,+ ngobe sisebenti sifanelwe ngumholo waso.+ Ningacocomi nisuke kulomunye umuti niye kulomunye.
8 “Kunobe nguliphi lidolobha leningena kulo futsi banemukele, nibodla tintfo labaninika tona, 9 nelaphe labagulako labalapho, niphindze nitsi: ‘UMbuso waNkulunkulu sewusondzele.’+ 10 Kodvwa kunobe nguliphi lidolobha leningena kulo futsi banganemukeli, nibophuma niye emigwacweni yalo lemikhulu nifike nitsi: 11 ‘Nelutfuli lwakulelidolobha lenu lolusetinyaweni tetfu siyalutsintsitsa kuze kube bufakazi kini.+ Kodvwa-ke khumbulani kutsi uMbuso waNkulunkulu sewusondzele.’ 12 Ngiyanitjela ngitsi sehlulelo lesitawutfolwa yiSodoma sitawuba ncono kakhulu kunalesitawutfolwa ngulelodolobha ngalelolanga.+
13 “Maye kuwe Khorazini nawe Bhethsayida! Ngobe kube letimangaliso letentiwe kini betentiwe eThire naseSidoni, ngabe kadze bantfu bakhona baphendvuka, batitsela ngemlotsa futsi bembatsa tindvwangu temasaka.+ 14 Sehlulelo lesitawutfolwa yiThire neSidoni sitawuba ncono kakhulu kunalesitawutfolwa ngini nakwehlulelwa. 15 Nawe Khaphanawume, ucabanga kutsi utawuphakanyiselwa ezulwini yini? Ngeke, utawehliselwa eThuneni!*
16 “Loyo lonilalelako, ulalela mine,+ nalonganemukeli, akemukeli mine. Loyo longangemukeli mine, akamemukeli naloyo longitfumile.”+
17 Ngako labafundzi labangu-70 babuya bajabulile, batsi: “Nkhosi, ngisho nemadimoni ayasilalela nasiwekhuta sisebentisa libito lakho.”+ 18 Jesu wabaphendvula watsi: “Ngibone Sathane sekavele awile+ njengembane ezulwini. 19 Ngininike emandla ekunyatsela tinyoka nabofecela kanye nemandla ekuncoba titsa tenu,+ futsi kute lokutanilimata. 20 Kodvwa-ke ningajatjuliswa kutsi emadimoni ayanilalela, kunaloko jabulani ngenca yekutsi emabito enu abhaliwe emazulwini.”+ 21 Ngaso leso sikhatsi, wajabula kakhulu futsi wagcwala umoya longcwele, watsi: “Ngikudvumisa embikwebantfu Babe, Nkhosi yemazulu nemhlaba, ngobe letintfo utifihlile kulabahlakaniphile nakulabafundzile,+ watembulela bantfwana. Kwaba kuhle kuwe Babe kutsi kube njalo.+ 22 Tonkhe tintfo ngitinikwe nguBabe, futsi kute loyati kahle iNdvodzana ngaphandle kwaBabe; kute nalomati kahle Babe ngaphandle kweNdvodzana+ kanye nanobe ngubani iNdvodzana lefuna kumembula kuye.”+
23 Jesu wagucukela ngakubafundzi bakhe wakhuluma nabo babodvwa watsi: “Bayajabula labo lababona letintfo lenitibonako.+ 24 Ngobe ngiyanitjela ngitsi: Baphrofethi nemakhosi lamanyenti bebafisa kutibona letintfo lenitibonako, kodvwa abazange batibone,+ bebafisa nekutiva letintfo lenitivako, kodvwa abazange bative.”
25 Indvodza letsite lebeyati uMtsetfo yeta kuJesu kuze itfole liphutsa kuye, yatsi: “Mfundzisi, yini lokufanele ngiyente kuze ngitfole kuphila lokuphakadze?”+ 26 Watsi kuyo: “Kantsi uMtsetfo utsini? Uwufundza njani?” 27 Yaphendvula yatsi: “‘Kufanele utsandze Jehova* Nkulunkulu wakho ngayo yonkhe inhlitiyo yakho, nangawo wonkhe umphefumulo* wakho, nangawo onkhe emandla akho, nangayo yonkhe ingcondvo yakho,’+ futsi ‘kufanele utsandze makhelwane wakho njengobe utitsandza wena.’”+ 28 Watsi kuyo: “Uphendvule kahle; ngako chubeka wenta letintfo futsi utawutfola kuphila.”+
29 Lendvodza beyifuna kutiveta ilungile,+ ngako yatsi kuJesu: “Ngubani vele longumakhelwane wami?” 30 Jesu wayiphendvula watsi: “Indvodza letsite beyihamba isuka eJerusalema iya eJerikho futsi yahlaselwa tigebengu tayikhumula, tayishaya, tahamba tayishiya seyitakufa. 31 Bekunemphristi lobekahamba ngaleyo ndlela, watsi nakayibona, wendlula wayigega. 32 Kanjalo nemLevi nakefika kuleyo ndzawo futsi ayibona, wendlula wayigega. 33 Kodvwa bekunemSamariya+ lobekahamba kulendlela. Wefika ngakuyo, futsi watsi nakayibona wayihawukela. 34 Wasondzela kulendvodza, wayibopha emanceba, awagcobisa ngemafutsa nangeliwayini. Wabese uyayitsatsa uyigibelisa embongolweni yakhe wayiyisa endlini yetivakashi wayinakekela. 35 Ngelilanga lelilandzelako watsatsa bodenariyo* lababili wabanika umnikati walendlu, wase utsi: ‘Ngibonele lomuntfu, nangibuya ngitakubhadala konkhe lokukwakho.’ 36 Ucabanga kutsi ngubani kulaba labatsatfu lowaba ngumakhelwane+ walendvodza lebeyihlaselwe tigebengu?” 37 Lendvodza yatsi: “Ngulona lowaba nemusa kulomuntfu.”+ Ngako Jesu watsi kuyo: “Nawe hamba wente kanjalo.”+
38 Ngesikhatsi Jesu nebafundzi bakhe bachubeka nendlela yabo, wangena kulelinye lidolobhana. Kuleyo ndzawo bekunemfati lobitwa ngekutsi nguMata,+ futsi wamngenisa endlini yakhe. 39 Bekanadzadzewabo lobitwa ngekutsi nguMariya, lobekasolo ahleti eceleni kweNkhosi alalela loko lebeyikusho.* 40 Kodvwa Mata yena bekamatasatasa asebenta. Ngako weta watsi: “Nkhosi, awunandzaba yini nekutsi dzadzewetfu ungishiye ngedvwa ngisebenta? Mtjele ete atongisita.” 41 Jesu wamphendvula watsi: “Mata, Mata, ukhatsateka ngetintfo letinyenti. 42 Timbalwa tintfo letidzingekako, mhlawumbe yinye nje yenele. Mariya yena ukhetse lokuncono kakhulu,+ futsi ngeke emukwe kona.”