Kulandzisa KwaJohane
1 Ekucaleni bekunaLivi,+ Livi bekanaNkulunkulu+ futsi Livi bekangunkulunkulu.*+ 2 Ekucaleni lona bekanaNkulunkulu. 3 Nkulunkulu wamsebentisa ekwenteni tonkhe tintfo,+ futsi konkhe lokukhona kwadalwa ngaye.
4 Ngaye, Nkulunkulu waletsa kuphila, futsi kuphila kwaba kukhanya kwebantfu.+ 5 Lokukhanya kukhanya ebumnyameni,+ kodvwa bumnyama abukakwehluli.
6 Kwefika umuntfu lobekatfunywe nguNkulunkulu, libito lakhe bekunguJohane.+ 7 Weta njengafakazi atofakazela kukhanya,+ kuze tonkhe tinhlobo tebantfu titewukholwa ngenca yakhe. 8 Bekangasiko loko kukhanya,+ kodvwa bekafakaza ngako.
9 Kukhanya kweliciniso lokukhanyisela tonkhe tinhlobo tebantfu besekutawufika emkhatsini webantfu.*+ 10 Yena* bekasemkhatsini webantfu,*+ naNkulunkulu wamsebentisa ekubadaleni,+ kodvwa bantfu* bebangamati. 11 Wefika kubantfu bakubo kodvwa abazange bamemukele. 12 Nanobe kunjalo, bonkhe labamemukela wabavulela litfuba lekutsi babe bantfwana baNkulunkulu+ ngobe bebakholwa egameni lakhe.+ 13 Abazange batalwe batali lababantfu* nobe ngentsandvo yabo* nobe ngentsandvo yebantfu, kodvwa batalwa ngentsandvo yaNkulunkulu.+
14 Livi waba ngumuntfu,+ wahlala emkhatsini wetfu, sayibona nenkhatimulo yakhe, lokuyinkhatimulo yendvodzana letelwe yodvwa+ kubabe wayo. Bekagcwele umusa waNkulunkulu futsi bekahlale akhuluma liciniso. 15 (Johane wafakaza ngaye, wamemeta watsi: “Loyo lota emvakwami sewungengcile, ngobe waba khona mine ngisengekho.”)+ 16 Kuye, sonkhe sawemukela ngalokugcwele umusa lomkhulu, ngobe naye ugcwele wona. 17 Njengobe uMtsetfo wanikwa Mosi,+ umusa lomkhulu+ neliciniso kwefika ngaJesu Khristu.+ 18 Kute umuntfu lowake wabona Nkulunkulu.+ Indvodzana lekuphela kwayo lenjengaNkulunkulu*+ futsi lehlala eceleni kwaBabe*+ ngiyo lemchazile kutsi ungubani.+
19 Ngulobu bufakazi Johane labusho ngesikhatsi emaJuda atfuma baphristi nemaLevi besuka eJerusalema kutsi bafike bambute batsi: “Ungubani?”+ 20 Wabaphendvula ngesibindzi watsi: “Angisuye Khristu.” 21 Bambuta batsi: “Ungubani-ke? Ungu-Elija?”+ Yena watsi: “Angisuye.” “UngumPhrofethi+ lebesisolo simlindzile?” Wabaphendvula watsi: “Cha!” 22 Ngako batsi kuye: “Sitjele kutsi ungubani kuze sitokhona kuphendvula labo labasitfumile. Kantsi vele ungubani?” 23 Watsi kubo: “Ngilivi lalotsite lomemeta ehlane atsi: ‘Yentani indlela yaJehova* icondze,’+ njengobe nje umphrofethi Isaya asho.”+ 24 Labantfu lebebabuta lemibuto bebatfunywe baFarisi. 25 Ngako bambuta batsi: “Ubhabhatiselani-ke nangabe ungasuye Khristu, nobe Elija nobe lomPhrofethi lebesisolo simlindzile?” 26 Johane wabaphendvula watsi: “Mine ngibhabhatisa ngemanti. Emkhatsini wenu kunaloyo leningamati, 27 yena uta emvakwami, kodvwa tintsambo tetincabule takhe akungifaneli kutikhumula.”+ 28 Letintfo tenteka eBhetani ngesheya kweJordane, lapho Johane bekabhabhatisela khona.+
29 Ngakusasa wabona Jesu eta kuye, wase utsi: “Bukani, nalo liWundlu+ laNkulunkulu lelisusa sono+ selive!+ 30 Lona nguloyo lengatsi ngaye: ‘Emvakwami kuta umuntfu losangengcile, ngobe waba khona mine ngisengekho.’+ 31 Ngisho nami bengingamati, kodvwa ngeta ngatobhabhatisa ngemanti kuze atowatiwa ka-Israyeli.”+ 32 Johane waphindze wafakaza watsi: “Ngabona umoya wehla uvela ezulwini unjengelituba, futsi wahlala etikwakhe.+ 33 Nami bengingamati, kodvwa Loyo lowangitfuma kutsi ngibhabhatise ngemanti watsi kimi: ‘Loyo lokutawehlela kuye umoya futsi uhlale etikwakhe,+ nguye lobhabhatisa ngemoya longcwele.’+ 34 Loko ngikubonile, futsi ngafakaza ngekutsi lena yiNdvodzana yaNkulunkulu.”+
35 Kwatsi ngakusasa, Johane eme nebafundzi bakhe lababili, 36 wabuka Jesu ahamba, futsi watsi: “Bukani, nalo liWundlu+ laNkulunkulu!” 37 Labafundzi lababili bamuva nakakhuluma base balandzela Jesu. 38 Watsi Jesu nakagucuka wababona bamlandzela, wase utsi kubo: “Nifunani?” Bona batsi: “Rabi (lokusho kutsi “Mfundzisi”), uhlalaphi?” 39 Yena watsi kubo: “Wotani nitobona.” Ngako bamlandzela babona kutsi uhlalaphi, base bahlala naye ngalelolanga; besekusondzela insimbi yesine ntsambama.* 40 Andreya+ umnakabo Simoni Phetro bekangulomunye walabafundzi lababili labeva loko Johane lakusho base balandzela Jesu. 41 Wacale watfola Simoni umnakabo, watsi kuye: “Simtfolile Mesiya”+ (lokusho kutsi “Khristu”), 42 futsi wase uya naye kuJesu. Ngesikhatsi Jesu ambona watsi kuye: “Wena unguSimoni+ indvodzana yaJohane; utawubitwa ngekutsi unguKhefase” (lokusho kutsi “Phetro”).+
43 Ngakusasa, Jesu bekafuna kuya eGalile. Wase ubona Filiphu+ watsi kuye: “Ngilandzele.” 44 Filiphu bekawaseBhethsayida, edolobheni lakubo-Andreya naPhetro. 45 Filiphu watfola Nathanayeli+ futsi watsi kuye: “Simtfolile loyo Mosi labhala ngaye eMtsetfweni, loyo nebaPhrofethi lababhala ngaye, lokunguJesu waseNazaretha, indvodzana yaJosefa.”+ 46 Kodvwa Nathanayeli watsi kuye: “Kukhona yini lokuhle lokungavela eNazaretha?” Filiphu wamphendvula watsi: “Wota utobona.” 47 Jesu wabona Nathanayeli eta ngakuye watsi: “Lona ngum-Israyeli lokute bucili kuye.”+ 48 Nathanayeli watsi kuye: “Ungatelaphi?” Jesu wamphendvula watsi: “Ngikubone asengakakubiti Filiphu, ngalesikhatsi ume ngephansi kwesihlahla semkhiwa.” 49 Nathanayeli wamphendvula watsi: “Rabi, uyiNdvodzana yaNkulunkulu futsi uyiNkhosi yaka-Israyeli.”+ 50 Jesu watsi kuye: “Sewukholwa ngobe ngikutjele kutsi ngikubone ngephansi kwesihlahla semkhiwa? Utawubona tintfo letinkhulu kakhulu kunaloku.” 51 Wabese utsi kuye: “Ngicinisile, ngicinisile ngitsi kini: Nitawubona lizulu livuleka, nibone netingilosi taNkulunkulu tikhuphuka futsi tehla tiya eNdvodzaneni yemuntfu.”+