Dina Ungena Enkingeni

UYABONA yini kutsi Dina uvakashela bobani? Uvakashela lamanye emantfombatana lahlala eveni laseKhenani. Ucabanga kutsi Jakobe utawujabula yini nakeva ngaloku? Kuze ukwati kuphendvula lombuto, kufanele ukhumbule kutsi Abrahama na-Isaka bebativa njani ngemadvodzakati aseKhenani.

Abrahama abefuna yini kutsi indvodzana yakhe Isaka ishade nentfombi yase Khenani? Cha, abengafuni. Bo-Isaka naRebheka, bebafuna yini kutsi indvodzana yabo Jakobe ishade nentfombi lengumKhenani? Cha, nabo bebangafuni. Uyati kutsi kungani?

Kungoba bantfu baseKhenani bebakhonta bonkulunkulu bemanga. Kwakungeke kube yintfo lelungile kushada nabo, ngoba bebangesibo bantfu labakahle longabenta bangani labasedvute. Singaciniseka kutsi Jakobe abengeke akujabulele kwati kutsi indvodzakati yakhe beyakha bungani nemadvodzakati aseKhenani.

Ngekwenta loko, Dina wagcina angene enkingeni. Uyayibona yini lendvodza yaseKhenani lebuka Dina kulesitfombe? Ligama layo nguShekhemu. Ngalelinye lilanga Dina avakashile, Shekhemu wamtsatsa walala naye ngenkhani. Loko lakwenta kwakukubi ngoba bantfu labashadile kuphela labangalala ndzawonye. Lentfo lembi leyentiwa nguShekhemu yabangela tinkinga letinyenti.

BomnakaboDina batfukutsela nabeva ngaloko lokwakwentekile. Lababili kubo boSimeyoni naLevi, batfukutsela kakhulu kangangekutsi baze batsatsa tinkemba baya kulelidolobha. Bawefikela angakalindzi emadvodza akuleyondzawo. Bona nabomnakabo bawabulala onkhe ngisho naShekhemu. Jakobe kwamphatsa kabi kakhulu loko lobekwentiwe ngemadvodzana akhe.

Lenkinga yacala kanjani? Yacala ngekutsi Dina akhe bungani nebantfu lebebangawulaleli umtsetfo waNkulunkulu. Natsi asifuni kuba nebangani labanjalo.