Incwadzi Lebuya Esigungwini Lesibusako

Mfundzi Lotsandza Jehova:

Jesu watsi: “Niyawulati liciniso, neliciniso liyawunikhulula.” (Johane 8:32) Lawo mavi akhutsata sibili! Yebo, singakhona kulati liciniso ngisho ‘nakuletikhatsi letimatima’ lapho kugcwele khona emanga. (2 Thimothi 3:1) Usasikhumbula yini sikhatsi lapho wacala khona kucaphela emaciniso labechazwa eVini laNkulunkulu? Usakhumbula kutsi wajabula njani?

Kepha, njengobe kubalulekile kungenisa lwati lweliciniso futsi sihlanganyele njalo ekutjeleni labanye ngalo, kufanele siphindze sitiphatse ngendlela levumelana neliciniso. Kodvwa kute sikwati kwenta njalo, kufanele sitigcine elutsandvweni lwaNkulunkulu. Kuhlanganisani loku? Emavi aJesu lawasho ngebusuku lobendvulela kufa kwakhe, ayawuphendvula lombuto. Watjela baphostoli bakhe labetsembekile: “Nanigcina imiyalo yami, niyawuhlala elutsandvweni lwami, njengobe nami ngigcina imiyalo yaBabe, ngihlala elutsandvweni lwakhe.”​—Johane 15:10.

Caphela kutsi Jesu wahlala elutsandvweni lwaNkulunkulu ngekugcina imiyalo yaBabe wakhe. Loku kuyasebenta nakitsi lamuhla. Kute sihlale elutsandvweni lwaNkulunkulu, kufanele ngaso sonkhe sikhatsi kuphila kwetfu kuvumelane neliciniso. Ngabo bona lobo busuku, Jesu watsi: “Nanitati-ke letintfo futsi nitenta, nibusisiwe.”​—Johane 13:17.

Setsemba kutsi lencwadzi itakusita uchubeke uphila ngeliciniso ngaso sonkhe sikhatsi, futsi kanjalo utigcine ‘elutsandvweni lwaNkulunkulu ngesikhatsi usalindzele . . . kutsi ngemusa wayo ikunike kuphila lokuphakadze.’​—Juda 21.