Fundza EVini LaNkulunkulu

Kungani Kufanele Ufundze KuNkulunkulu?

Lesihloko siphakamisa imibuto lokungenteka kutsi uke watibuta yona futsi siveta nekutsi ungatitfolaphi timphendvulo eBhayibhelini lakho. BoFakazi BaJehova bangakujabulela kucoca nawe ngaletimphendvulo.

 1. Kungani kufanele ufundze kuNkulunkulu?

Nkulunkulu unetindzaba letinhle letimayelana nentfo lencono kubantfu. Usitjela ngayo eBhayibhelini. LiBhayibheli lifanana nencwadzi levela kuBabe wetfu wasezulwini lonelutsandvo.—Fundza Jeremiya 29:11.

 2. Tiyini tindzaba letinhle?

Bantfu badzinga hulumende lomuhle. Kute umbusi longumuntfu loke wasita bantfu ebudloveni, ekubeni bete kulunga, etifweni, nobe ekufeni. Kodvwa tikhona tindzaba letinhle. Nkulunkulu utawuniketa bantfu hulumende lomuhle lotawusiletsela kukhululeka kuto tonkhe tintfo letisibangela kuhlupheka.—Fundza Danyela 2:44.

 3. Kungani kubalulekile kufundza kuNkulunkulu?

Madvutane, Nkulunkulu utawubasusa emhlabeni bonkhe bantfu lababangela kuhlupheka. Kwanyalo, ufundzisa tigidzi tebantfu labalungile kutsi tijabulele indlela lencono yekuphila, lesekelwe elutsandvweni. Ngekusebentisa liBhayibheli, bantfu labanyenti bafundza indlela yekubeketelela tinkinga tekuphila, yekutfola injabulo yeliciniso, kanye neyekujabulisa Nkulunkulu.—Fundza Zefaniya 2:3.

 4. Ngubani uMbhali weliBhayibheli?

LiBhayibheli lakhiwa tincwadzi letincane letingu-66. Labhalwa ngemadvodza langu-40. Tincwadzi tekucala letisihlanu tabhalwa nguMosi eminyakeni lengaba ngu-3 500 leyengcile. Yekugcina yabhalwa ngumphostoli Johane eminyakeni lengetulu kwa-1 900 leyengcile. Nanobe kunjalo, babhali beliBhayibheli babhala imicondvo yaNkulunkulu hhayi yabo. Ngesizatfu saloko, nguNkulunkulu longuMbhali weliBhayibheli.—Fundza 2 Thimothi 3:16; 2 Phetro 1:21.

Siyati kutsi liBhayibheli livela kuNkulunkulu ngobe libiketela likusasa ngalokunembile. Kute umuntfu longakwati kwenta kanjalo. (Isaya 46:9, 10) LiBhayibheli liphindze lisitjele ngebuntfu baNkulunkulu belutsandvo. Linemandla ekwenta bantfu bagucule kuphila kwabo kube ncono. Lamaciniso ente tigidzi tebantfu taciniseka kutsi liBhayibheli liliVi laNkulunkulu.—Fundza Joshuwa 23:14; 1 Thesalonika 2:13.

 5. Ungalicondza njani liBhayibheli?

Jesu bekatiwa kakhulu njengemfundzisi weliVi laNkulunkulu. Nanobe bantfu labanyenti labecoca nabo bebaletayele liBhayibheli, bebadzinga lusito kute balicondze. Kute abasite, Jesu wakhuluma ngemiBhalo leminyenti futsi wabachazela yona kute “bacondzisise imiBhalo.” Lesihloko lesitsi: “Fundza EVini LaNkulunkulu,” naso sitawusebentisa indlela lefananako kute sikusite.—Fundza Lukha 24:27, 45.

Timbalwa tintfo letijabulisa njengekufundza kuNkulunkulu mayelana nenjongo yekuphila. Nanobe kunjalo, labanye bantfu angeke bajabule nabakubona ufundza liBhayibheli. Ungakuvumeli loko kukucedze emandla. Litsemba lakho lekutfola kuphila lokuphakadze lisekelwe ekwatini kwakho Nkulunkulu.—Fundza Matewu 5:10-12; Johane 17:3.

Kute utfole kwatiswa lokubanti, fundza sehluko 2 salencwadzi Lifundzisani Mbambambamba LiBhayibheli?, leshicilelwa boFakazi BaJehova.