Sifundvo 1

Indlela Lewungakutfola Ngayo Lokufunwa NguNkulunkulu

Kunaluphi lwati lolubalulekile eBhayibhelini? (1)

Ngubani lowabhala liBhayibheli? (2)

Kudzingeke ngani kutsi udadishe liBhayibheli? (3)

1. LiBhayibheli lisipho lesiligugu lesibuya kuNkulunkulu. Lifana nencwadzi lebuya kubabe lonelutsandvo leya kubantfwana bakhe. Lisitjela liciniso ngaNkulunkulu—kutsi ungubani nekutsi yini lakayibona ilungile nalakayibona iyimbi. Lichaza kutsi singatibeketelela njani tinkinga, nendlela yekutfola injabulo sibili. LiBhayibheli kuphela lelisitjela loko lokufuneka sikwente kute sijabulise Nkulunkulu.—Tihlabelelo 1:1-3; Isaya 48:17, 18.

2. LiBhayibheli labhalwa bantfu labangaba ngu-40, emkhatsini kweminyaka lengu-1 600, leyacala nga-1513 B.C.E. Lakhiwa tincwadzi letincane letingu-66. Labo lababhala liBhayibheli bebaphefumulelwe nguNkulunkulu. Babhala imicabango yakhe, hhayi yabo. Ngaloko-ke, umBhali weliBhayibheli nguNkulunkulu losezulwini, hhayi umuntfu walapha emhlabeni.—2 Thimothi 3:16, 17; 2 Phetro 1:20, 21.

3. Nkulunkulu wabangela kutsi liBhayibheli likopeke kahle futsi lilondvolotwe. Kushicilelwe emaBhayibheli lamanyenti kunaletinye tincwadzi. Ngeke kube ngabo bonkhe bantfu labatawujabula nabakubona udadisha liBhayibheli. Kepha ungakuvumeli kukuyekelise. Likusasa lakho lelingunaphakadze lisekutseni umati Nkulunkulu, nekutsi wente intsandvo yakhe nobe uphikiswa kanjani.—Matewu 5:10-12; Johane 17:3.