Emagama Abitwe Ngalokucacile

KUZE uvakale nawukhuluma, kufanele ukhulume ngendlela lecacile. Lofuna kukusho kungase kutsandzeke kubantfu futsi kube mcoka, kodvwa lokunyenti kwako kungalahleka nangabe emagama lowasebentisako angacondzakali melula.

Bantfu abatsintseki nangabe bangakucondzi kahle loko lokukhulunywako. Ngisho nome umuntfu anelivi lelikhulu futsi evakala melula nakakhuluma, nangabe emagama lawasebentisako angevakali kahle, ngeke abaholele esentweni bantfu. Kungafanana nekutsi ukhuluma lulwimi labangalwati nalabangalucondzi. (Jer. 5:15) LiBhayibheli liyasikhumbuta litsi: “Nangabe licilongo likhipha umsindvo longacaci, ngubani lotawulungela kuya emphini? Ngendlela lefanako, ngaphandle kwekutsi nikhulume emavi levakala melula, umuntfu angakwati njani loko lenikhuluma ngako? Ecinisweni, nitawube nikhuluma emoyeni.”​—1 Khor. 14:8, 9.

Yini Leyenta Lokushoko Kungevakali? Kungase kube kwehluleka kuvula umlomo wakho ngalokwenele. Imihlatsi lengavuleki kahle kanye netindzebe letinganyakati melula tingase tibangele kutsi ukhulumele phansi.

Kukhuluma uphangise kungase kwente kutsi lokushoko kungacondzakali melula. Loko kungase kufanane nekudlala intfo letsetjuliwe ngelitubane lelisetulu kunalelo lelifanele. Onkhe emagama asuke akhona kodvwa kuncane longakuva.

Kuletinye timo, kukhuluma ngendlela lengevakali kahle kubangelwa kungasebenti kahle kwetitfo letisetjentiselwa kukhuluma. Ngisho nalabo labanalenkinga, bangatfutfuka ngekutsi basebentise emaphuzu lakulesifundvo.

Etikhatsini letinyenti, kungevakali kahle kwemuntfu nakakhuluma kubangelwa kungawabiti kahle emagama, kukhuluma aphangise ahlanganise emagama, lokwenta kube lukhuni kutsi acondzakale emavi lawashoko. Lenkinga ingase ihlanganise kweca lamanye emalunga eligama nobe tinhlavu letibalulekile nobe kujuba emagama. Nangabe umuntfu abita emagama ngekunganaki awahlanganisa, labo labamlalele bangase bayitfole imicondvo kanye nemisho letsite, kodvwa kulokunye kungadzingeka kutsi bacagele. Kwehluleka kubita kahle emagama kungenta umuntfu angakhoni kufundzisa ngemphumelelo.

Indlela Yekukhuluma Ngalokucacile. Lokunye lokungakusita kutsi uwabite ngalokucacile emagama, kutsi wati indlela emagama lakhiwa ngayo elulwimini lwakho. Etilwimini letinyenti emagama akhiwa ngemalunga lehlukehlukene. Emalunga eligama akhiwa luhlavu lunye nome tinhlavu letinyenti, letibitwa njengencenye yinye yeligama. Etilwimini letinjalo lilunga ngalinye livame kuvakala nawukhuluma, nanobe angagcami ngelizinga lelifanako onkhe. Nawufuna kutsi kucace kahle loko lokushoko, ungasheshisi nawukhuluma futsi yetama kubita lilunga ngalinye. Nawusacala kungase kuvakale shengatsi ugcizelela kakhulu kodvwa njengobe kuchubeka sikhatsi, utawugcina sewukhuluma kahle. Nawetama kushelela nawukhuluma kungenteka uwahlanganise lamanye emagama, kodvwa loko kufanele ukubalekele nangabe kutawubangela kutsi imicondvo yemagama ingevakali.

Secwayiso: Kuze ufundze kuwabita kahle emagama ungase uphrakthize kukhuluma kanye nekugcamisa tinhlavu temagama nawufundza, kodvwa ungakuvumeli loko kutsi kube yindlela yakho yekukhuluma. Kungase kuvakale kungesiyo indlela levamile yekukhuluma.

Nangabe livi lakho lingevakali kahle, yetama kucondzisa inhloko ususe nesilevu esifubeni. Nawufundza liBhayibheli libambe liphakame ngalokwenele kuze ukhone kulifundza uphindze ubuke labakulalele. Loko kutawukwenta kutsi emagama lowashoko avakale kahle.

Kukhulula imisipha kungakusita kutsi utfutfukise indlela lokhuluma ngayo. Bantfu labanyenti batsi kungakhululeki kwemisipha lesebusweni nobe lesebenta nawuphefumula kungayiphazamisa kakhulu indlela lokhuluma ngayo. Loku kuphazamisa kuchumana lokuhle lokufanele kube khona nalokufanele kwenteke ngekushelela emkhatsini wengcondvo, titfo lotisebentisa nawukhuluma kanye nendlela lophefumula ngayo.

Imisipha yemihlatsi idzinga kukhululeka kuze ikhone kubambisana nengcondvo. Tindzebe temlomo nato kufanele tikhululeke. Kufanele tihlale tikulungele kuvuleka kuze tikhokhe umsindvo lochamuka emlonyeni kanye nasemphinjeni. Nangabe umhlatsi kanye netindzebe temlomo kucinene, umlomo angeke ukhone kuvuleka kahle futsi imisindvo itawuphoceleka kutsi iphume ematinyweni. Loko kutawubangela kutsi kungevakali lokukhulumako. Kukhulula imihlatsi kanye netindzebe temlomo akusho kutsi sekufanele uvilaphe nawukhuluma. Loko kufanele kwentiwe ngelizinga lelifanele, kuhambisane nemisindvo, kuze kucace loko lokushoko.

Kungaba lusito kutsi ufundze ngalokuvakalako, kuye ngekutsi sinjani simo sakho. Nakisisa indlela losebentisa ngayo titfo takho tekukhuluma. Umlomo wakho uwuvula ngalokwenele yini kuze livi liphume ngephandle kwekuphazamiseka? Khumbula kutsi lulwimi akusilo lodvwa lolusebenta nawukhuluma nanobe kungilo lolusebenta kakhulu. Intsamo, umhlatsi longephansi, tindzebe, imisipha lesebusweni nasemphinjeni, konkhe kunendzima yako ekukhulumeni. Awubunyakatisa yini buso nawukhuluma? Nangabe kunjalo, makhulu ematfuba ekutsi lokukhulumako kungevakali.

Nangabe unemshini wekutsebula, wusebentise utitsebule imizuzu leminyentana ukhuluma ngendlela levamile, leyo longakhuluma ngayo nemuntfu nawusensimini. Kulalela loko lokutsebulile kungakusita kutsi ubone emagama longakhoni kuwabita kahle. Nakisisa tindzawo lokhuluma uphangise kuto, lapho ungevakali kahle khona nome emagama lowagwinyako, bese wetama kubona kutsi loko kubangelwa yini. Inkinga yekungakhulumi kahle ingalungiswa ngekusebentisa lamaphuzu lesisandza kucoca ngawo.

Unenkinga yekukhuluma yini? Phrakthiza kuvula umlomo kakhudlwana nawukhuluma kunendlela lovamise kwenta ngayo, futsi yetama kunaka nawubita emagama. Nawuphefumula dvonsa umoya kakhudlwana futsi ungajaki nawukhuluma. Kwenta njalo kubasitile labanyenti kutsi bakhone khuluma ngendlela levakala kancono. Nangabe unemalwimi, yetama kukhweshisa lulwimi lwakho ematinyweni angembili nawubita emagama lanelunhlavu s na-z. Ngisho nobe inkinga yakho ingapheli, ungaphelelwa ngemandla. Khumbula kutsi Jehova wakhetsa Mosi, indvodza lokungenteka beyinenkinga yekukhuluma, kutsi amikise imilayeto lebalulekile eGibhithe, kuma-Israyeli nakuFaro. (Eks. 4:10-12) Nangabe unaso sifiso, Jehova utakusebentisa nawe futsi utakubusisa emsebentini wekushumayela.