Incwadzi Levela Esigungwini Lesibusako

Mmemeteli WeMbuso Lotsandzekako:

Ticabange ungulomunye webaphostoli futsi ume eNtsabeni Yemincumo. Jesu ume embikwakho. Ngaphambi nje kwekutsi enyukele ezulwini, utsi: “Nitawutfola emandla nawufika kini umoya longcwele, futsi nitawuba bofakazi bami eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8) Bewungenta njani?

Mhlawumbe ungativa wenganywa ngulomsebenti lomkhulu lakunikete wona. Ungase utibute, ‘Njengobe silicembu lelincane lebafundzi, singakhona njani kufakaza kuto “tonkhe tincenye temhlaba”?’ Ungase ukhumbule secwayiso Jesu lasiniketa ngebusuku bangaphambi kwekufa kwakhe: “Sisebenti asisikhulu kunenkhosi yaso. Nangabe bangiphetse kabi mine, bataniphatsa kabi nani; nangabe balilalele livi lami, batalilalela nelenu. Kodvwa batawukwenta tonkhe letintfo kini ngenca yelibito lami, ngobe abamati Loyo longitfumile.” (Joh. 15:20, 21) Nawucabanga ngalamavi, kungenteka utibute, ‘Ngingafakaza njani ngalokuphelele ngibhekene nekuphikiswa kanye nekuhlushwa lokukhulu kangaka?’

Nalamuhla, sitibuta imibuto lefanako. Umsebenti wetfu njengobe siBoFakazi BaJehova udzinga kutsi sifakaze ngalokuphelele kuto “tonkhe tincenye temhlaba” kanye nakubantfu “bato tonkhe tive” njengobe bekunjalo nakucala. (Mat. 28:19, 20) Lomsebenti ungentiwa njani, ikakhulukati nasibuka lokuphikiswa lokwaphrofethwa ngako?

Incwadzi yeMisebenti YebaPhostoli isiniketa kulandzisa lokujabulisako ngendlela baphostoli kanye nemaKhristu angelikhulu lekucala labakhona ngayo kufeza sabelo sabo ngelusito lwaJehova. Lencwadzi loyifundzako yentelwe kukusita uhlole lokulandzisa, futsi utfole injabulo kuletentakalo letijabulisako letibhalwe kuyo. Itakumangalisa indlela bantfu baNkulunkulu bangelikhulu lekucala labafana ngayo nebantfu baNkulunkulu bangesikhatsi salamuhla. Utawubona kutsi lokufana akufaki indlela lesisebenta ngayo nje kuphela, kodvwa kufaka ekhatsi nendlela lesihlelwe ngayo kuze sente lomsebenti. Siyaciniseka kutsi kucabanga ngalokufana kutawucinisa kukholwa kwakho kutsi Jehova Nkulunkulu uyachubeka acondzisa incenye yenhlangano yakhe lesemhlabeni.

Siyetsemba futsi siyathantaza kutsi njengobe uhlolisisa lencwadzi yeMisebenti, kukholwa kwakho ekutseni Jehova utakusita kutawucina, nekutsi emandla emoya wakhe longcwele atawuba nawe. Shengatsi ungakhutsateka futsi uchubeke ‘ufakaza ngalokuphelele’ ngeMbuso waNkulunkulu, futsi usite labanye bahambe kulendlela leholela ensindzisweni.​—Imis. 28:23; 1 Thim. 4:16.