Jehova Akazange Amkhohlwe Josefa

Ngesikhatsi Josefa asejele, Faro waba nemaphupho futsi kute lowakhona kuwachaza. Lesinye setisebenti taFaro samtjela kutsi nguJosefa longakhona kuchaza lamaphupho. Ngekushesha Faro watsi akulandvwe Josefa.

Faro wambuta watsi: ‘Ngingangilandzisela yini leliphupho lami bese uyalichaza?’ Josefa watjela Faro watsi: ‘Kutawuba neminyaka lesikhombisa yenala lenkhulu kulo lonkhe live laseGibhithe, Kodvwa ngemuva kwaleminyaka lesikhombisa kutawuba neminyaka lesikhombisa yendlala. Funa indvodza lehlakaniphile, uyibeke kutsi yengamele bantfu bakho kuze bangacedvwa ngulendlala.’ Faro waphendvula watsi: ‘Ngikhetsa wena! Ngikubeka kutsi wengamele lonkhe lelive laseGibhithe.’ Josefa wayati njani inchazelo yemaphupho aFaro? NguJehova lowasita Josefa.

Eminyakeni lesikhombisa leyalandzela Josefa wacongelela kudla. Kwabese kuba nendlala emhlabeni wonkhe njengobe Josefa abeshito. Bantfu bebachamuka etindzaweni letehlukene kute batewutsenga kudla kuJosefa. Babe wakhe Jakobe weva kutsi bekunekudla lokunyenti eGibhithe, ngako watfuma emadvodzana akhe lalishumi kutsi ayotsenga kudla.

Lamadvodzana aJakobe aya kuJosefa futsi wawabona kucala. Kodvwa labomnakabo abazange babone kutsi nguJosefa. Baguca embikwakhe njengobe bekwentekile kuleliphupho. Josefa abefuna kubona kutsi bomnakabo basenayo yini inhlitiyo lembi. Ngako watsi kubo: ‘Nine nitinhloli! Nitewuhlola kutsi ngutiphi tindzawo leningatihlasela melula kulelive!’ Batsi: ‘Chake! Tsine singemajaha lalishumi nakubili, latalwa ngubabe munye lohlala eveni laseKhenani. Umnaketfu lomncane usele nababe, kantsi lomunye akasekho.’ Josefa wase utsi: ‘Landzani lomnakenu, ngitawubona kutsi nikhuluma liciniso yini.’ Ngako babuyela emuva ekhaya.

Kwatsi lapho sebete kudla, Jakobe waphindze wabatfuma eGibhithe. Bahamba naBhenjamini umnakabo lomncane. Kuze avivinye bomnakabo, Josefa wafihla indzebe yakhe yesiliva esakeni laBhenjamini wase usola bomnakabo ngekutsi bayebile. Ngesikhatsi sisebenti saJosefa sitfola lendzebe esakeni laBhenjamini, bomnakabo betfuka. Bancenga Josefa kutsi amane ajezise bona esikhundleni saBhenjamini.

Josefa wase uyabona kutsi bomnakabo sebashintjile. Ngako akazange akhone kutibamba. Wakhala tinyembeti watsi: ‘Mine nginguJosefa. Usaphila yini babe?’ Bomnakabo bamangala kakhulu. Wase utsi kubo: ‘Ngicela ningaphatseki kabi futsi ningasolani ngekutsi nangitsengisa lapha, ngobe nguNkulunkulu lowangitfuma kutsi nginendvulele ngekuta lapha kuze ngisindzise kuphila kwebantfu. Phangisani nilandze babe nite naye lapha.’

Baya ekhaya bayotjela babe wabo letindzaba letimnandzi futsi babuyela naye eGibhithe. Ngemuva kweminyaka leminyenti Josefa nababe wakhe base bahlala ndzawonye.