Ingilosi Gabhriyeli Ivakashela Mariya

Elizabethe abenesihlobo sakhe Mariya lebesihlala edolobheni laseNazaretha lebeliseGalile. Mariya abetoshada naJosepha longumbati. Ngesikhatsi Elizabethe anetinyanga letingu-6 akhulelwe, ingilosi Gabhriyeli yavakashela Mariya. Yatsi: ‘Sawubona Mariya wena lobusiseke kakhulu, Jehova unawe.’ Abengati kutsi Gabhriyeli ucondze kutsini. Lengilosi yatsi kuye: ‘Utawutetfwala, ubeleke indvodzana, futsi kufanele uyetse utsi nguJesu. Itawuba yiNkhosi. UMbuso wayo utawuhlala kuzekube phakadze.’

Mariya watsi: ‘Ngingaba kanjani nemntfwana ngingakase ngilale nendvodza?’ Gabhriyeli watsi: ‘KuJehova konkhe kungenteka. Umoya longcwele utakwehlela kuwe futsi utawutfola indvodzana. Na-Elizabethe sihlobo sakho sewutetfwele.’ Mariya wabese utsi: “Mine ngiyincekukati yaJehova! Shengatsi kungenteka njengobe ushito.”

Mariya wahamba wayovakashela Elizabethe. Mariya nakavusela Elizabethe, umntfwana losesiswini wakhahlela. Agcwele umoya longcwele watsi: ‘Mariya, Jehova ukubusisile. Kulilungelo kuba namake weNkhosi emtini wami.’ Mariya watsi: ‘Ngidvumisa Jehova ngenhlitiyo yami yonkhe.’ Mariya wahlala na-Elizabethe tinyanga letintsatfu wase ubuyela emuva eNazaretha.

Ngesikhatsi Josefa eva kutsi Mariya ukhulelwe, wabese ufuna kuhlukana naye. Kodvwa ingilosi yefika kuye ephusheni yatsi: ‘Ungesabi kushada naMariya. Kute lokubi lakwentile.’ Ngako Josefa washada naMariya base bahlala kanyekanye.