Ngubani Lobaluleke Kakhulu Ekuphileni Kwakho?

“Nguwe wedvwa  . . . Losetikwako Konkhe, lophakeme abuse umhlaba wonkhe.”—HLA. 83:18.

1, 2. Endzabeni yekusindziswa kwetfu, kungani kungakeneli kutsi simane sati libito laJehova?

MHLAWUMBE bewucala kubona libito laJehova ngesikhatsi bakukhombisa lona emBhalweni weTihlabelelo 83:18. Kungenteka kutsi wamangala nawufundza lamavi latsi: “Shangatsi bantfu bangati kutsi nguwe wedvwa lolibito lakhe [linguJehova, NW], nguwe Losetikwako Konkhe, lophakeme abuse umhlaba wonkhe.” Kusukela ngaleso sikhatsi, akungabateki kutsi nawe uye walisebentisa lelivesi kute usite labanye bati Nkulunkulu wetfu lonelutsandvo, Jehova.—Rom. 10:12, 13.

² Ngisho nobe kubalulekile kutsi bantfu balati libito laJehova, kodvwa akukeneli kutsi bagcine ngaloko kuphela. Naka indlela umhlabeli layigcizelela ngayo lenye intfo lebalulekile kute sisindziswe, nakatsi: “Nguwe wedvwa  . . . Losetikwako Konkhe, lophakeme abuse umhlaba wonkhe.” NguJehova lobaluleke kakhulu endzaweni yonkhe. Njengobe anguMdali wato tonkhe tintfo, unelilungelo lekulindzela kutsi tonkhe tidalwa takhe timtfobele ngalokuphelele. (Semb. 4:11) Ngako-ke, sinesizatfu lesihle sekutibuta nangumbuto: ‘Ngubani lobaluleke kakhulu ekuphileni kwami?’ Kubalulekile nekutsi ngamunye wetfu ayihlolisise imphendvulo yakhe kulombuto.

Imphikiswane Leyaphakanyiswa Ensimini Yase-Edeni

3, 4. Sathane wakwati njani kukhohlisa Eva, futsi waba yini umphumela?

³ Kubaluleka kwalombuto kubonakala kahle nasihlola loko lokwenteka ensimini yase-Edeni. Sathane Develi, loyingilosi lesihlubuki, wayenga Eva, umfati wekucala kutsi anake tifiso takhe kunekunaka umyalo waJehova wekungadli sitselo sesihlahla lesitsite. (Gen. 2:17; 2 Khor. 11:3) Lesilingo samncoba Eva, futsi ngaleyo ndlela waveta kutsi akabuhloniphi bukhosi baJehova. Akazange atsatse Jehova njengeMuntfu lobaluleke kakhulu ekuphileni kwakhe. Kodvwa-ke, Sathane wakwati njani kukhohlisa Eva?

⁴ Sathane wasebentisa emachinga lamanyenti langabonakali ngesikhatsi akhuluma na-Eva. (Fundza Genesisi 3:1-5, NW.) Kwekucala, Sathane akazange alisebentise libito laJehova. Wamane watsi “Nkulunkulu.” Ngalokwehlukile, umbhali wencwadzi yaGenesisi wasebentisa libito laJehova evesini lekucala laleso sehluko. Kwesibili, kunekutsi akhulume ‘ngemyalo’ waNkulunkulu, Sathane wamane wabuta ngaloko Nkulunkulu ‘labekushito.’ (Gen. 2:16) Ngalendlela, Sathane abetama kwenta kubonakale shengatsi lomyalo bewungakabaluleki. Kwesitsatfu, nanobe abekhuluma na-Eva kuphela, wasebentisa ligama lelisebunyentini lelitsi “ningadli.” Ngalendlela, kungenteka abetama kwenta kutsi Eva acale kutigabatisa, futsi atibone abalulekile—kube shengatsi angatikhulumela yena kanye nendvodza yakhe. Waba yini umphumela? Kuyacaca kutsi Eva wagabadzela, futsi wakhulumela nendvodza yakhe ngekuphendvula lenyoka atsi: “Singatidla titselo tetihlahla letisensimini.”

 5. (a) Sathane wenta kutsi Eva anake ini? (b) Yini Eva layiveta ngekudla lesitselo lebekutsiwe angasidli?

⁵ Sathane waphindze wagucula emaciniso. Watsi bekungakalungi ngaNkulunkulu kutsi alindzele bo-Adamu na-Eva kutsi ‘bangadli kunome ngusinye nje sitselo setihlahla letisensimini.’ Ngemuva kwaloko, Sathane wenta kutsi Eva aticabangele yena kanye nendlela labengakutfutfukisa ngayo kuphila kwakhe bese ‘afanana naNkulunkulu.’ Ekugcineni, wamenta wanaka lesihlahla kanye nesitselo saso kunekutsi acabange ngebuhlobo bakhe naLoyo lobekamnikete konkhe labenako. (Fundza Genesisi 3:6.) Ngekudla lesitselo, Eva waveta kutsi Jehova abengakabaluleki kakhulu ekuphileni kwakhe.

Imphikiswane Leyaphakanyiswa Esikhatsini SaJobe

 6. Sathane wabungabata njani bucotfo baJobe, futsi loko kwamniketa liphi litfuba Jobe?

⁶ Emakhulwini eminyaka lalandzela, Jobe, indvodza leyetsembekile, waba nelitfuba lekuveta kutsi ngubani lobekabaluleke kakhulu ekuphileni kwakhe. Ngesikhatsi Jehova abuta ngebucotfo baJobe, Sathane waphendvula: “Usho kutsi Jobe abengakukhonta yini, kube abengatfoli lutfo kuwe?” (Fundza Jobe 1:7-10.) Sathane akazange aphike kutsi Jobe abemlalela Nkulunkulu, kunaloko wangabata tisusa takhe. Ngebucili, watsi Jobe abekhonta Jehova ngebugovu, hhayi ngobe amtsandza. NguJobe kuphela lobekangaveta kutsi loko kungemanga, ngako waniketwa litfuba lekwenta njalo.

7, 8. Nguluphi luvivinyo lokwadzingeka kutsi Jobe alubeketelele, futsi yini layiveta ngekubeketela ngekwetsembeka?

⁷ Jehova wamvumela Sathane kutsi ehlisele Jobe tinkinga letinyenti ngekulandzelana. (Jobe 1:12-19) Yini Jobe layenta lapho timo takhe tishintja? “Akazange one ngekutsi asole Nkulunkulu.” (Jobe 1:22) Nanobe kunjalo, Sathane akazange aphele emandla. Wachubeka watsi: “Sikhumba esikhunjeni! Umuntfu angalahlekelwa nguko konkhe lanako ngenca yemphilo yakhe.”a (Jobe 2:4) Sathane abesho kutsi Jobe nakangahlupheka, abetawuyekela kutsatsa Jehova njengeMuntfu lobaluleke kakhulu ekuphileni kwakhe.

⁸ Jobe wahlaselwa sifo lesenyanyekako, futsi umfati wakhe wamcindzetela kutsi etfuke Nkulunkulu afe. Ngemuva kwaloko, bangani bakhe mbumbulu labatsatfu bamsola ngekutsi abetiphatse ngendlela lengakafaneli. (Jobe 2:11-13; 8:2-6; 22:2, 3) Nanobe kunjalo, kuko konkhe lokuhlupheka, Jobe akazange abephule bucotfo bakhe. (Fundza Jobe 2:9, 10.) Ngekubeketela ngekwetsembeka, waveta kutsi Jehova abebaluleke kakhulu ekuphileni kwakhe. Jobe waphindze waveta kutsi umuntfu lonesono angakwati kuphendvula tinsolo taDeveli, ngisho nangelizinga lelincane.—Catsanisa neTaga 27:11.

Imphendvulo Lenhle Jesu Layiniketa

 9. (a) Sathane wetama njani kulinga Jesu asebentisa sifiso senyama? (b) Yini Jesu layenta ngesikhatsi alingwa?

⁹ Ngemuva nje kwekutsi Jesu abhajatiswe, Sathane wetama kumlinga kutsi anake tifiso tebugovu kunekutsi ahlale atsatsa Jehova njengeMuntfu lobaluleke kakhulu kuye. Develi walinga Jesu tikhatsi letintsatfu. Kwekucala, wetama kusebentisa sifiso senyama, ngekulinga Jesu kutsi agucule ematje abe sinkhwa. (Mat. 4:2, 3) Jesu abesandza kuzila emalanga langu-40 futsi abesalambe kakhulu. Ngako-ke, Develi wamkhutsata kutsi awasebentise kabi emandla akhe ekwenta timangaliso kute nje atfole kudla. Yini Jesu layenta? Ngalokungafanani na-Eva, Jesu wanakisisa liVi laJehova futsi wamelana nalesilingo ngekushesha.—Fundza Matewu 4:4.

10. Ngesikhatsi basesicongweni selithempeli, kungani Sathane atsi kuJesu akatijike phansi?

¹⁰ Sathane waphindze wetama kulinga Jesu kutsi abe nebugovu. Basesicongweni selithempeli, watsi kuJesu akatijike phansi. (Mat. 4:5, 6) Yini Sathane labefuna kuyifeza? Watsi nangabe Jesu angalimali, loko bekutawufakazela kutsi ‘uyindvodzana yaNkulunkulu.’ Kuyacaca kutsi Develi abefuna kutsi Jesu akhatsateke kakhulu ngekutsi labanye bacabangani ngaye, ate abukise ngemandla akhe. Sathane bekati kutsi bantfu baye bavume kwenta intfo lematima ngobe batigabatisa nobe bafuna kutsi labanye bachubeke babahlonipha. Wasebentisa kabi umbhalo lotsite, kodvwa Jesu waveta kutsi yena abelicondza kahle liVi laJehova. (Fundza Matewu 4:7.) Ngekumelana nalesilingo, Jesu waphindze waveta kutsi Jehova abebaluleke kakhulu ekuphileni kwakhe.

11. Kungani Jesu angazange ayemukele imibuso yelive Develi labemkhombisa yona?

¹¹ Ekwetameni kwakhe kwekugcina kulinga Jesu, Sathane wamkhombisa yonkhe imibuso yalelive. (Mat. 4:8, 9) Jesu akazange ayemukele. Wacaphela kutsi kuyemukela bekutawusho kutsi akabemukeli bukhosi baJehova—lokulilungelo laNkulunkulu lekuba nguLosetikwako Konkhe. (Fundza Matewu 4:10.) Kuto tonkhe letimo, Jesu waphendvula Sathane ngekucaphuna imibhalo leveta libito laJehova.

12. Ngusiphi sincumo lesimatima Jesu lahlangabetana naso njengobe besekusondzela kufa kwakhe, futsi yini lesiyifundzako kuloko lakwenta?

¹² Njengobe besekusedvute kutsi Jesu afe, wahlangabetana nesincumo lebesimatima kakhulu. Kuwo wonkhe umsebenti wakhe, abehlale asho kutsi ukulungele kunikela ngekuphila kwakhe njengemhlatjelo. (Mat. 20:17-19, 28; Luk. 12:50; Joh. 16:28) Nanobe kunjalo, Jesu abecaphela kutsi abetawumangalelwa, alahlwe ngumtsetfo wemaJuda futsi abulawe njengemhlambalati. Loku bekumkhatsata kakhulu. Wathandaza: “Babe, nakungenteka, yendlulise kimi lendzebe yelusizi.” Nanobe kunjalo, wachubeka watsi: “Kepha hhayi ngekufisa kwami, kodvwa kuye ngentsandvo yakho.” (Mat. 26:39) Kwetsembeka kwaJesu kute kube sekufeni kwakhe kwakwenta kwacaca kutsi bekungubani lobekabaluleke kakhulu ekuphileni kwakhe.

Imphendvulo Yalombuto

13. Ngutiphi tifundvo lesitifundzile esibonelweni sa-Eva, Jobe, kanye naJesu Khristu?

¹³ Yini lesiyifundzile kute kube ngunyalo? Endzabeni ya-Eva, sifundza kutsi labo labayengwa tifiso tebugovu nobe labo labatibona babalulekile, bakhombisa kutsi Jehova akakabaluleki ekuphileni kwabo. Ngalokwehlukile kuloku, esibonelweni saJobe sebucotfo, sifundza kutsi ngisho nebantfu labanesono bangakhombisa kutsi Jehova bambeka kucala ekuphileni kwabo, ngekubeketelela tinkinga ngekwetsembeka—ngisho nobe imbangela yaleto tinkinga bangayicondzi kahle. (Jak. 5:11) Kwekugcina, sibonelo saJesu sisifundzisa kutsi kufanele sikulungele kuhlaziswa futsi singatikhatsaleli tsine kakhulu. (Heb. 12:2) Kodvwa-ke singatisebentisa njani letifundvo?

14, 15. Loko lokwentiwa nguJesu nakalingwa kwehluke njani kuloko lokwentiwa ngu-Eva, futsi tsine singamlingisa njani? (Khulumela sitfombe lesisekhasini 21.)

¹⁴ Ungalokotsi uvumele tilingo tikwente ukhohlwe Jehova. Eva wavumela ingcondvo yakhe yahlala kuloko lokwakusilingo embikwakhe. Wabona kutsi lesihlahla “sasifanelwe kudliwa, nekutsi sasibukeka kahle.” (Gen. 3:6) Loku kwehluke kakhulu kuloko lokwentiwa nguJesu ngesikhatsi alingwa. Esikhatsini ngasinye, abengacabangi ngaleso silingo labehlangabetana naso kuphela, kodvwa abecabanga nangemiphumela yaloko labetawukwenta ngaphansi kwaleso silingo. Wetsembela eVini laNkulunkulu, futsi waphindze wasebentisa libito laJehova.

¹⁵ Yini tingcondvo tetfu letiyinaka kakhulu nasilingelwa ekwenteni tintfo letingamjabulisi Jehova? Nangabe tingcondvo tetfu tinaka leso silingo, kuba melula kutsi siwele esifisweni lesibi. (Jak. 1:14, 15) Kufanele sitsatse sinyatselo ngekushesha kute sisuse leso sifiso, ngisho nobe leso sinyatselo simatima njengekususa lilunga lemtimba. (Mat. 5:29, 30) NjengaJesu, kufanele sinake imiphumela yetinyatselo lesitawutitsatsa—kutsi titawubutsintsa njani buhlobo betfu naJehova. Kufanele sikhumbule loko lokushiwo liVi lakhe liBhayibheli. Nguleyo kuphela indlela lesingaveta ngayo kutsi Jehova unguMuntfu lobaluleke kakhulu ekuphileni kwetfu.

16-18. (a) Yini lengabangela tinhlitiyo tetfu kutsi tikhatsateke? (b) Yini lengasisita kute sikhutsatelele timo letisicedza emandla?

¹⁶ Ungalokotsi uvumele tinhlekelele tikwente usole Jehova. (Taga 19:3) Njengobe sisondzela ekupheleni kwalelive lelibi, bantfu baJehova labanyenti bahlaselwa tehlakalo kanye netinhlekelele. Lamuhla, asikalindzeli kutsi sivikelwe ngalokusimangaliso. Nanobe kunjalo, njengaJobe, singase sitive siphelelwa ngemandla nasishonelwa ngumuntfu lesimtsandzako nobe sihlangabetana nebumatima.

¹⁷ Jobe bekangacondzi kutsi kungani Jehova avumela tintfo letitsite tenteke. Natsi ngaletinye tikhatsi kungenteka singacondzi kutsi kungani tintfo letimbi tenteka. Kungenteka sike seva ngebazalwane lababulawa kutamatama kwemhlaba, njengaseHaiti, nobe lababulawa nguletinye tehlakalo. Nobe kungenteka kukhona umzalwane lesimatiko loye wahlushwa ngebudlova nobe wafa engotini lebuhlungu. Ngaletinye tikhatsi singase sitikhandze sihlushwa simo lesicindzetelako nobe kungalungi lokutsite. Ngekukhatsateka singase sitibute: ‘Jehova, kungani loku kwenteka kimi? Ngoneni?’ (Hab. 1:2, 3) Yini lengasisita kutsi sibeketele ngetikhatsi letinjalo?

¹⁸ Kufanele sicaphele singacabangi kutsi leto tintfo tikhombisa kutsi Jehova akasitsandzi. Jesu waligcizelela leliphuzu ngesikhatsi akhuluma ngetinhlekelele letimbili letenteka ngesikhatsi sakhe. (Fundza Lukha 13:1-5.) Tinhlekelele letinyenti tibangelwa “sikhatsi nematfuba.” (Shu. 9:11) Nobe kungatsiwa iyini imbangela yekukhatsateka, singakhona kukubeketelela nasihlale sinake Nkulunkulu, “longumtfombo wayo yonkhe indvudvuto.” Utawusinika emandla kute sibeketele ngekwetsembeka.—2 Khor. 1:3-6.

19, 20. Yini leyasita Jesu kutsi akhutsatelele timo letimatima, futsi yini lengasisita natsi kutsi sente lokufananako?

¹⁹ Ungalokotsi uvumele kutikhukhumeta nobe kwesaba kuhlazeka kube yintfo loyinaka kakhulu. Kutfobeka kwaJesu kwamenta “watidzela, watsatsa simo senceku.” (Fil. 2:5-8) Wakhona kukhutsatelela timo letimatima ngobe abetsembele kuJehova. (1 Phet. 2:23, 24) Ngekwenta kanjalo, Jesu wabeka intsandvo yaJehova kucala ekuphileni kwakhe, futsi loko kwenta kutsi aphakanyiselwe esikhundleni lesisetulu. (Fil. 2:9) Jesu wakhutsata bafundzi bakhe kutsi nabo bente lokufananako.—Mat. 23:11, 12; Luk. 9:26.

²⁰ Ngaletinye tikhatsi, kuvivinywa kwekukholwa kwetfu kungase kusidvumate. Nanobe kunjalo, kufanele sibe nesibindzi njengemphostoli Pawula, lowatsi: “Kungako nje ngihlupheka nanyalo. Kodvwa ngite emahloni, ngobe ngiyamati lengetsembele kuye, futsi ngineliciniso kutsi yena unawo emandla ekukulondvolota loko lakubeke kimi, kuze kube ngalelo langa.”—2 Thim. 1:12.

21. Nangetulu kwemoya welive webugovu, yini wena lotimisele kuyenta?

²¹ LiBhayibheli labiketela kutsi etikhatsini tekugcina bantfu “bayawutitsandza.” (2 Thim. 3:2) Akumangalisi-ke kutsi siphila nebantfu labaticabangela bona nobe labangamtsatsi Jehova njengeMuntfu lobalulekile. Asingalokotsi siyengwe nguloyo moya lomubi! Kunaloko, ngisho nobe silingwa, nobe sehlelwe tinhlekelele nobe tintfo letisidvumatako, ngamunye wetfu kufanele atimisele kutsi akhombise kutsi Jehova unguMuntfu lobalulekile emphilweni yakhe.

[Umbhalo longentansi]

Yini Lesiyifundzako . . . 

• endleleni Sathane layenga ngayo Eva?

• kuloko Jobe lakwenta nakehlelwa tinhlekelele?

• kuloko lobekubaluleke kakhulu kuJesu?

[Emavi lahambisana nesitfombe ekhasini 21]

Jesu wamelana netilingo taSathane futsi wanaka kwenta intsandvo yaJehova

[Emavi lahambisana nesitfombe ekhasini 22]

Kushumayela emathendeni ngemuva kwekutamatama kwemhlaba eHaiti

Nasicindzetelekile, kufanele siye kuNkulunkulu “longumtfombo wayo yonkhe indvudvuto”