‘Hloniphani Labo Labasebenta Kamatima Emkhatsini Wenu’
“Nihloniphe labo labasebenta kamatima emkhatsini wenu, labanengamele eNkhosini, futsi labaniyala ngemphilo yebuKhristu.”—1 THES. 5:12, NW.
1, 2. (a) Besinjani simo ebandleni laseThesalonika ngesikhatsi Pawula abhala incwadzi yakhe yekucala leya kulo? (b) Pawula wakhutsata emaKhristu aseThesalonika kutsi enteni?
ASEWUTICABANGE ulilunga lelibandla laseThesalonika langelikhulu lekucala, lokungulelinye lemabandla ekucala lamiswa eYurophu. Umphostoli Pawula abesacitse sikhatsi lesidze akhutsata bazalwane balapho. Kungenteka kutsi abemise nemadvodza lamadzala kute ahole, njengobe bekunjalo nakulamanye emabandla. (Imis. 14:23) Nanobe kunjalo, ngemuva kwekumiswa kwalelibandla, emaJuda ahlela kutsi sicuku sebantfu lesitfukutsele sicoshe boPawula naSilasi. Kungenteka kutsi lamaKhristu labesasele odvwa ativa alahliwe futsi esaba.
2 Kuliciniso kutsi ngemuva kwekuhamba eThesalonika, Pawula abekhatsatekile ngalelibandla leliselisha. Wetama kubuyela kulo, kodvwa ‘Sathane wamvimbela.’ Ngako-ke, watfumela Thimothi kutsi ayewulikhutsata. (1 Thes. 2:18; 3:2) Ngesikhatsi Thimothi abuya nembiko lomuhle, Pawula wakhutsateka kutsi abhalele lelibandla laseThesalonika incwadzi. Lenye yetintfo Pawula labakhutsata ngayo, kutsi ‘bahloniphe labo lababengamele.’—Fundza 1 Thesalonika 5:12, 13.
3. Ngutiphi tizatfu emaKhristu aseThesalonika labenato tekuhlonipha labadzala ngelutsandvo lolukhulu?
3 Bazalwane labebahola ebandleni laseThesalonika bebete lokuhlangenwe nako njengaPawula kanye nalabo labehamba nabo, futsi bebangafanani nalabadzala baseJerusalema labebanesikhatsi lesidze bangemaKhristu. Ngetulu kwaloko, lelibandla belinesikhatsi lesingaphansi kwemnyaka limisiwe. Nanobe kunjalo, emaKhristu akulelo bandla abenesizatfu sekuwabonga emadvodza lamadzala ‘labesebenta kamatima emkhatsini wawo, abengamele,’ futsi ‘abayala.’ LamaKhristu abenesizatfu ‘sekuhlonipha [labadzala] ngelutsandvo lolukhulu.’ Lesicelo besilandzelwa seluleko saPawula ‘sekuhlalisana ngekuthula.’ Kube nawe bewukhona kulelibandla laseThesalonika, bewutawukuveta yini kubonga lokukhulu ngemsebenti lowentiwa ngulabadzala? Utitsatsa njani ‘tipho letibantfu’ Nkulunkulu lasinikete tona ebandleni ngaKhristu?—Ef. 4:8.
‘Labasebenta Kamatima’
4, 5. Kungani kwakungumsebenti lomatima ngalabadzala bangesikhatsi saPawula kutsi bafundzise libandla, futsi kungani kusafanana nalamuhla?
4 Labadzala baseThesalonika ‘bebasebenta njani kamatima’ ngemuva kwekutfunyelwa kwaboPawula naSilasi eBheriya? Ngesizatfu sekutsi bebalingisa Pawula, bafundzisa libandla basebentisa imiBhalo. Mhlawumbe ungase utibute: ‘EmaKhristu aseThesalonika abelitsandza yini liVi laNkulunkulu?’ Angitsi neliBhayibheli litsi baseBheriya “babencono kakhulu kunebaseThesalonika. . . . Onkhe emalanga babephenyisisa imiBhalo.” (Imis. 17:11) Lokucatsanisa lokuvetwe lapha kwakucondziswe kuwo onkhe emaJuda aseThesalonika, hhayi kumaKhristu. Labo lababa ngemakholwa bemukela liVi laNkulunkulu “hhayi njengelivi lemuntfu nje kodvwa njengobe linjalo lilivi laNkulunkulu.” (1 Thes. 2:13) Kusebaleni-ke kutsi labadzala baseThesalonika basebenta kamatima kute bafundzise libandla.
5 Lamuhla, sisebenti lesetsembekile nalesihlakaniphile sipha umhlambi waNkulunkulu “kudla ngesikhatsi lesifanele.” (Mat. 24:45) Njengobe bacondziswa ngulesisebenti, labadzala bemabandla basebenta kamatima kute bondle bazalwane babo ngekwakamoya. Bamemeteli banetincwadzi letinyenti letisekelwe eBhayibhelini, futsi kuletinye tilwimi kuphindze kube khona nemathulusi lanjenge-“Watch Tower Publications Index” kanye ne-“Watchtower Library” letfolakala ku-CD. Kute benetise tidzingo takamoya telibandla, labadzala bacitsa ema-awa lamanyenti balungiselela imihlangano, khona batewetfula tincenye lababelwe tona ngendlela lezuzisako. Uke wacabanga yini ngekutsi singakanani sikhatsi labadzala labasicitsa balungiselela tinkhulumo labatawutetfula ebandleni, nasemihlanganweni lemincane kanye nalemikhulu?
6, 7. (a) Ngusiphi sibonelo labadzala baseThesalonika labasifundza kuPawula? (b) Kungani kungase kube matima ngalabadzala lamuhla kutsi balingise Pawula?
6 Labadzala baseThesalonika bebasikhumbula sibonelo lesihle Pawula lababekela sona sekwelusa umhlambi. Lena kwakungasiyo nje indzaba yekugcina licala, kodvwa kwakufanele kwentiwe ngelutsandvo futsi kunakekelwe tidzingo telibandla. Njengobe kuvetiwe esihlokweni lesengcile, Pawula waba “mnene . . . njengemfati anakekela bantfwabakhe.” (Fundza 1 Thesalonika 2:7, 8.) Abetimisele ngisho ‘nekuhlephunelana nabo imphilo yakhe lucobo.’ Labadzala nabo bekufanele bamlingise lapho benta umsebenti wekwelusa.
7 Lamuhla, belusi labangemaKhristu balingisa Pawula ngekutsi bawuphatse kahle umhlambi. Letinye timvu tingase tingabi nawo umusa kanye nebungani ngekwemvelo. Nasesimeni lesinjalo, labadzala betama kuba ngulabacondzako, kanye ‘nekutfola lokuhle’ kuto. (Taga 16:20, NW.) Kuliciniso kutsi ngesizatfu sekuba nesono, lomdzala angase akutfole kumatima kubuka lokuhle kulabanye. Nanobe kunjalo, nangabe enta konkhe lokusemandleni akhe kute abe nemusa kubo bonkhe, akukafaneli yini advunyiswe ngemetamo layentako yekuba ngumelusi lomuhle loholwa nguKhristu?
8, 9. Ngutiphi letinye tetindlela labadzala basesikhatsini setfu ‘labayilindza ngayo imiphefumulo yetfu’?
8 Sonkhe sinesizatfu ‘sekubahlonipha’ labadzala. Njengobe nje naPawula abhala: ‘Balindza imiphefumulo yetfu.’ (Heb. 13:17) Lenchazelo isikhumbuta ngemelusi lodzela butfongo bakhe kute avikele umhlambi wakhe. Ngendlela lefananako nalamuhla, labadzala bangase bangalali lapho banakekela tidzingo talabo labanemphilo lebutsakatsaka, tinkinga temivelo, nobe labehluleka kusebentisa simiso lesitsite seliBhayibheli. Nasi sibonelo: Bazalwane labasemaKomidini Ekubonisana Netibhedlela bavame kuvuswa ebutfongweni kute basingatse tindzaba letitsintsa temphilo. Nanobe kunjalo, nasihlangabetana netimo letinjalo sijabula kakhulu ngemsebenti wabo.
9 Labadzala labasemaKomidini Ekwakhiwa KwemaHholwa EMbuso kanye nalabasemakomidini etehlakalo, basebenta kamatima kute basite labanye. Kufanele sibasekele ngenhlitiyo yetfu yonkhe. Cabanga ngelusito lolwaniketwa ngemuva kwekutsi eMyanmar nga-2008, kugadle siphepho lesibitwa ngekutsi nguNargis. Kute bazalwane balelikomidi letehlakalo bakwati kufika ebandleni laseBothingone esifundzeni sase-Irrawaddy Delta, kwadzingeka bendlule endzaweni lebeyinenhlekelele futsi igcwele tidvumbu tebantfu. Ngesikhatsi bazalwane bendzawo babona kutsi kulelicembu lelafika kucala eBothingone bekukhona nembonisi wabo wesifundza, bamemeta batsi: “Bukani! Nembonisi wetfu wesifundza ukhona! Jehova usisindzisile!” Uyakuveta yini kubonga kwakho ngemsebenti labadzala labawenta imini nebusuku? Labanye labadzala babelwa kutsi bakhonte emakomidini lakhetsekile kute bacatulule tinkinga tekwehlulela letimatima. Laba labadzala abatigabatisi ngaloko labakufezile; nanobe kunjalo, labo labazuza emsebentini labawentako banekubonga lokukhulu.—Mat. 6:2-4.
10. Ngumuphi umsebenti lesivame kungawunaki lowentiwa ngulabadzala?
10 Linyenti lalabadzala lamuhla liphindze libe nemsebenti wekubhala lokufanele liwente. Sibonelo saloko kutsi umchumanisi wesigungu salabadzala wenta luhlelo lwemihlangano yamaviki onkhe. Mabhalane welibandla uhlanganisa imibiko yemsebenti wekushumayela, yenyanga kanye neyemnyaka. Umbonisi wesikolwa kufanele alucabangisise kahle luhlelo lwesikolwa. Njalo ngemuva kwetinyanga letintsatfu, emarekhodi etimali telibandla ayahlolwa. Labadzala bafundza tincwadzi letibuya ehhovisini leligatja bese basebentisa sicondziso lesibasita balondvolote ‘bunye bekukholwa.’ (Ef. 4:3, 13) Ngesizatfu semsebenti lowentiwa ngulabadzala labakhutsele, ‘konkhe kwenteka kahle ngenhlelembiso.’—1 Khor. 14:40.
‘Labo Labanengamele’
11, 12. Bobani labengamela libandla, futsi loko kuhlanganisani?
11 Pawula wabita emadvodza lamadzala aseThesalonika labesebenta kamatima ngekutsi ‘engamele’ libandla. Ngelulwimi lwekucala, leligama lisho “kuma embili” futsi lichazwa ngekutsi “kucondzisa; nobe kuhola.” (1 Thes. 5:12; umbhalo longentansi we-NW.) Pawula waphindze watsi laba labadzala ‘basebenta kamatima.’ Lapha abengakhulumi “ngembonisi lowengamele” loyedvwa kuphela, kodvwa abekhuluma ngawo onkhe emadvodza lamadzala elibandla. Lamuhla, labadzala labanyenti bema embikwelibandla kute bachube imihlangano. Lushintjo lolusandza kwentiwa lwekusebentisa ligama lelitsi “umchumanisi wesigungu salabadzala,” lusisita kutsi sitsatse bonkhe labadzala njengesigungu lesinebunye.
12 ‘Kwengamela’ libandla kusho lokungetulu kwekumane nje ufundzise. Emavi lafananako asetjentisiwe naku-1 Thimothi 3:4. Pawula watsi umbonisi kufanele abe “[ngulowengamele] kahle umuti wakhe, afundzise ngekuhlonipheka konkhe kutsi bantfwabakhe batfobeke.” Lamavi latsi ‘kwengamela’ awasho kufundzisa bantfwana nje kuphela, kodvwa asho nekuhola emndenini kanye nekwenta ‘bantfwana kutsi batfobeke.’ Labadzala bahola libandla, futsi basita bonkhe ebandleni kutsi batitfobe kuJehova.—1 Thim. 3:5.
13. Kungani kungase kubatsatse sikhatsi lesidze labadzala kutsi bente sincumo nabanemhlangano?
13 Kute bawengamele kahle umhlambi, labadzala bayahlangana futsi bacoce ngekutsi bangatisingatsa njani tidzingo telibandla. Kungase kubonakale kwenele kutsi tonkhe tincumo tentiwe ngulomdzala loyedvwa. Kodvwa ngekulandzela sibonelo sesigungu lesibusako sangelikhulu lekucala, sigungu salabadzala lamuhla sicoca ngetintfo ngekukhululeka, futsi sifune nesicondziso lesisemiBhalweni. Umgomo waso kusebentisa timiso teliBhayibheli nasicoca ngetidzingo telibandla. Loku kuphumelela kahle kakhulu nangabe lomdzala welibandla awulungiselela kahle umhlangano walabadzala, acabangela loko lokushiwo yimiBhalo kanye neticondziso letivela esisebentini lesetsembekile nalesihlakaniphile. Kuliciniso kutsi loku kutsatsa sikhatsi lesinyenti. Nangabe kuba nemibono lengafanani, njengobe kwenteka lapho sigungu lesibusako sangelikhulu lekucala sicoca ngendzaba yekusoka, kutawudzingeka sikhatsi lesinyenti kanye nekucwaninga kute kufinyelelwe esivumelwaneni lesisekelwe emiBhalweni.—Imis. 15:2, 6, 7, 12-14, 28.
14. Uyakujabulela yini kusebenta ngebunye kwesigungu salabadzala? Kungani utiva ngaleyo ndlela?
14 Yini lengenteka nangabe lomdzala aphocelela kutsi kusetjentiswe loko lakushoko nobe etama kuhambisa embili imibono yakhe? Kutsiwani nangabe lomunye njengaDiyotrefesi wangelikhulu lekucala ahlanyela kungevani? (3 Joh. 9, 10) Lonkhe libandla lingalimala. Nangabe Sathane etama kwehlukanisa libandla langelikhulu lekucala, natsi singaciniseka kutsi nalamuhla uyafuna kucedza kuthula kwelibandla. Angasenta sibe nebugovu, sifune kuvelela. Ngako-ke, labadzala kufanele batfobeke futsi basebente ndzawonye ngebunye. Siyakujabulela kutfobeka kwalabadzala lababambisanako.
‘Labo Labaniyalako’
15. Labadzala kufanele babe nasiphi sisusa lapho bayala labanye?
15 Pawula wagcizelela umsebenti lomatima kodvwa lobalulekile lowentiwa ngulabadzala, lokungumsebenti wekuyala umhlambi. EmiBhalweni yemaKhristu yesiGriki, nguPawula kuphela losebentisa leligama lesiGriki lelihunyushwa ngekutsi ‘kuyala.’ Leligama lingase lisho kukhipha seluleko lesicinile, kodvwa alisho kungacabangeli. (Imis. 20:31; 2 Thes. 3:15) Sibonelo saloku sibonakala kuloko Pawula lakubhalela libandla laseKhorinte. Watsi: “Anginibhaleli loku ngobe ngicondze kunidlisa emahloni, kodvwa ngiyaneluleka njengebantfwabami lengibatsandzako.” (1 Khor. 4:14) Lokwenta Pawula wakhipha leseluleko kutsi abebakhatsalela futsi abatsandza labanye.
16. Yini labadzala lokufanele bayinake nabayala labanye?
16 Labadzala belibandla bayakunaka kubaluleka kwendlela lababayala ngayo labanye. Balwela kulingisa Pawula ngekutsi babe nemusa, lutsandvo, futsi babe lusito. (Fundza 1 Thesalonika 2:11, 12.) Labadzala kufanele ‘babambelele evini leletsembekile kute batekwati kuyala ngemfundziso lephilile.’—Thit. 1:5-9.
17, 18. Yini lokufanele uyikhumbule nangabe labadzala bakuyala?
17 Kuliciniso kutsi labadzala belibandla nabo banesono, futsi bangasho tintfo ngekuhamba kwesikhatsi labangatisola ngato. (1 Khos. 8:46; Jak. 3:8) Labadzala bayati kutsi bazalwane kanye nabodzadze bavame kukutfola ‘kubuhlungu futsi kungajabulisi’ kuyalwa. (Heb. 12:11) Ngako-ke, nangabe umzalwane aya kumuntfu ngesizatfu sekumyala, kufanele acabangisise futsi athandaze. Nangabe uyalwa, uyakubonga yini kukhatsalela kanye nekuba nelutsandvo kwalomzalwane?
18 Asesitsi uyagula futsi awati kutsi uphetfwe yini. Dokotela lotsite uyakutjela kutsi yini lena lekuphetse, kodvwa akusimelula ngawe kukwemukela loko lakutjela kona. Utawumtfukutselela yini lodokotela? Cha angeke. Ngisho nobe angatsi kufanele uhlindvwe, utawukwemukela loko ngobe unelitsemba lekutsi kutawukuzuzisa. Indlela lodokotela lakwendlulise ngayo lokwatiswa ingakuvisa buhlungu, kodvwa utawukuvumela yini loko kutsi kulawule tincumo takho? Angeke ukuvumele. Ngendlela lefananako, ungayivumeli indlela loyalwa ngayo ikwente ungabalaleli labo labasetjentiswa nguJehova kanye naJesu, nabakutjela kutsi ungabutfutfukisa nobe ubuvikele njani buhlobo bakho naJehova.
Mbonge Jehova Ngekusilungiselela Labadzala Belibandla
19, 20. Ungakuveta njani kubonga kwakho ‘ngetipho letibantfu’?
19 Yini lobewungayenta kube bewungatfola sipho lesentelwe wena ngalokukhetsekile? Bewungakuveta yini kubonga kwakho ngekutsi usisebentise? Asebentisa Jesu Khristu, Jehova ukuphe ‘tipho letibantfu.’ Lenye indlela longaveta ngayo kubonga ngalesipho, kulalelisisa tinkhulumo letetfulwa ngulabadzala bese wetama kukusebentisa loko labakushoko. Ungaphindze uvete kubonga kwakho ngekuphendvula ngendlela lezuzisako emihlanganweni. Sekela yonkhe imisebenti labadzala belibandla labasihola kuyo, lefaka ekhatsi umsebenti wekushumayela. Nangabe sikuzuzisile siyalo lositfole kulomunye walabadzala, kungani ungamtjeli? Ngetulu kwaloko, kungani ungayibongi imindeni yalabadzala belibandla? Khumbula kutsi kute lona lomdzala akwati kusebenta kamatima ebandleni, umndeni wakhe udzela sikhatsi lokufanele usicitse naye.
20 Sinetizatfu letinyenti tekubonga labadzala belibandla labasebenta kamatima, labasengamele, futsi labasiyalako. Nembala ‘letipho letibantfu’ tisipho selutsandvo lesivela kuJehova!
Usakhumbula?
• Ngutiphi tizatfu emaKhristu aseThesalonika labenato tekubonga labo labaholako?
• Labadzala belibandla lakini bakusebentela kamatima ngayiphi indlela?
• Uzuza njani kulabadzala labakwengamelako?
• Nangabe labadzala bakuniketa seluleko, yini lokufanele uyikhumbule?
[Sitfombe ekhasini 31]
Uyatijabulela yini tindlela labadzala labalihola ngato libandla?