Ungaluvumeli Lutsandvo Lwakho Luphole

1, 2. (a) Ekucaleni, Jesu abewabhekisele kubobani lamavi lakuMatewu 24:12? (b) Incwadzi yeMisebenti ikhombisa njani kutsi emaKhristu lamanyenti angelikhulu lekucala achubeka abonisa kutsi anelutsandvo? (Buka sitfombe lesisekucaleni.)

LOKUNYE lokwashiwo nguJesu mayelana nesibonakaliso “sekuphela kwalelive” kutsi “lutsandvo lwalabanyenti luyawuphola.” (Mat. 24:3, 12) Ngelikhulu lekucala, emaJuda lebekatitjela kutsi abantfu baNkulunkulu, avumela kutsi lutsandvo lwawo ngaNkulunkulu luphole.

² Ngakulolunye luhlangotsi, emaKhristu lamanyenti angaleso sikhatsi bekahlala amatasa ngekumemetela “tindzaba letimnandzi ngaKhristu” futsi akhombisa kutsi ayamtsandza Nkulunkulu, nemaKhristu lakanye nawo kanye nalabo labangesiwo emaKhristu. (Imis. 2:44-47; 5:42) Noma kunjalo, labanye bafundzi baJesu bangelikhulu lekucala bavumela kutsi lutsandvo lwabo luphole.

 3. Yini lokungenteka yabangela kutsi lutsandvo lwalamanye emaKhristu luphole?

³ Ngemva kwekuvuswa kwakhe, Jesu Khristu wakhuluma ngemaKhristu angelikhulu lekucala lebekahlala e-Efesu, watsi: “Nginaloku ngawe, kutsi sewute lutsandvo lobewunalo ekucaleni.” (Semb. 2:4) Ngusiphi sizatfu lokungenteka senta Jesu washo lamavi? Kungenteka labafundzi baJesu bekucala bebaphatanyiswa bantfu lebebanake kakhulu tintfo tenyama. (Ef. 2:2, 3) Njengetindzawo letinyenti talamuhla, indzawo yase-Efesu beyigcwele bantfu labenta tintfo letimbi. Bekulidolobha leliphucukile, leligcwele bantfu labakhutsata tintfo takanokusho, tekutijabulisa, kanye nemphilo lentofontofo. Kutifunela tintfo letisezingeni lelisetulu kwenta bantfu baphelelwa lutsandvo. Ngetulu kwaloko, kuticabangela kanye nekutiphatsa lokubi bekuyintfo levamile.

 4. (a) Ngutiphi tindlela lutsandvo loluphole ngato esikhatsini setfu? (b) Ngutiphi tindlela letintsatfu lapho lutsandvo lwetfu lungavivinyeka khona?

⁴ Siphrofetho saJesu lesimayelana nekuphela kwelutsandvo sichubeka sigcwaliseka nasesikhatsini setfu. Lamuhla, lutsandvo lwebantfu ngaNkulunkulu luyehla kancane kancane. Tigidzi tebantfu tiye tamshiya Nkulunkulu futsi tetsembela etinhlanganweni tebantfu kute ticatulule tinkinga tato. Kubantfu labangamkhulekeli Jehova Nkulunkulu, lutsandvo lwabo luchubeka luphola. Njengobe bekunjalo ngelibandla lase-Efesu langelikhulu lekucala, nalamuhla emaKhristu angahle atigabatise futsi avumele lutsandvo lwawo kutsi luphole. Asesicoce ngetintfo letintsatfu lapho lutsandvo lwetfu lungavivinyeka khona: (1) Lutsandvo ngaJehova, (2) lutsandvo ngeliciniso leliseBhayibhelini, (3) kanye nelutsandvo ngebazalwane betfu.

 5. Kungani kufanele sitsandze Nkulunkulu?

⁵ Ngalelilanga Jesu lacwayisa ngalo ngekuphola kwelutsandvo, wagcizelela kutsi lutsandvo belubaluleke kakhulu. Jesu watsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo lomkhulu newekucala.” (Mat. 22:37, 38) Kuba nelutsandvo lolujulile ngaNkulunkulu kutasisita kutsi silalele imiyalo yaJehova, sikhutsatele, futsi sitondze lokubi. (Fundza Tihlabelelo 97:10.) Noma kunjalo, Sathane nelive lakhe bafuna kutsi lutsandvo lwetfu ngaNkulunkulu lube butsakatsaka.

 6. Kuphola kwelutsandvo ngaNkulunkulu kuletse miphi imiphumela?

⁶ Live lesiphila kulo linembono longasiwo ngelutsandvo. Kunekutsi batsandze uMdali, bantfu ‘batitsandza bona.’ (2 Thim. 3:2) Lelive lelibuswa nguSathane likhutsata bantfu kutsi babe nesifiso “senyama, sifiso semehlo kanye nekugabisa ngetintfo umuntfu lanato.” (1 Joh. 2:16) Umphostoli Pawula wecwayisa emaKhristu lebekanawo mayelana nekufuna tintfo letifunwa yinyama, ngekutsi atsi: “Kunaka tintfo tenyama kuletsa kufa . . . ngobe kunaka tintfo tenyama kubangela umuntfu kutsi abe sitsa naNkulunkulu.” (Rom. 8:6, 7) Labo labacitsa sikhatsi sabo bafuna kuba netintfo letinyenti noma bafuna kwenetisa tifiso tabo tekuya ecansini, bagcine badvumatekile futsi balimele kakhulu.​—1 Khor. 6:18; 1 Thim. 6:9, 10.

 7. Ngutiphi tingoti balandzeli baKhristu lababhekene nato lamuhla?

⁷ Kuletinye tindzawo, bantfu labangakholelwa sanhlobo kuNkulunkulu, nebantfu labangakholelwa kutsi Nkulunkulu ukhona, kanye nalabo labangabatako kutsi ukhona abakhutsati nje kuphela kutsi bantfu bangamtsandzi Nkulunkulu kodvwa baphindze bakhutsate nekutsi bangakholelwa kuye. Baye benta bantfu bakholelwa kutsi uma ukholelwa kuMdali usuke ute lwati noma usilima. Ngakulolunye luhlangotsi, bososayensi bahlonishwa kakhulu, lokwente bantfu bangamnaki uMdali futsi bakhwesha kuye. (Rom. 1:25) Nasilalela timfundziso letinje, sitawukhwesha kuJehova, futsi lutsandvo lwetfu ngaye lutawuphola.​—Heb. 3:12.

 8. (a) Bantfu baJehova babhekana natiphi timo letidvumatako? (b) Ngumaphi emavi lasicinisekisako lesiwatfola kuTihlabelelo 136?

⁸ Kuvumela kudvumateka kungabangela kukholwa kwetfu kutsi kube butsakatsaka futsi kwente lutsandvo lwetfu ngaNkulunkulu kutsi luphole. Kulelive lelibi lelibuswa nguSathane, ngaletinye tikhatsi siye sibhekane netimo letidvumatako. (1 Joh. 5:19) Kungenteka sibhekene netinkinga letibangelwa kuguga, imphilo lebutsakatsaka, noma timo temnotfo leticindzetelako. Mhlawumbe kungenteka silwisana nemiva yekutsi site emandla ekubhekana netinkinga, tintfo lesitilindzele solo atenteki noma sibhekene nemiva yekuba tehluleki. Noma kunjalo, asingalokotsi sivumele timo letitsite noma imiva letsite isente sikholelwe kutsi Jehova usishiyile. Kunaloko, kufanele sizindle ngemavi lasicinisekisa kutsi Jehova uyasitsandza. Tihlabelelo 136:23, titsi: “Nguye lowasikhumbula ekwehlulekeni kwetfu, ngobe umusa wakhe ume kuze kube phakadze.” Ngako siyaciniseka ngekutsi lutsandvo lwaJehova ngetinceku takhe angeke luphele. Siyaciniseka nekutsi uyakulalela ‘kuncusa kwetfu’ futsi atiphendvule ticelo tetfu.​—Hla. 116:1; 136:24-26.

 9. Yini leyasita Pawula kutsi achubeke amtsandza Jehova?

⁹ Njengemhlabeleli, Pawula watfola emandla ngekutsi acabange ngendlela Jehova lebekachubeka amsekela ngayo. Pawula wabhala watsi: “Jehova ungumsiti wami; ngeke ngesabe. Umuntfu angangentani?” (Heb. 13:6) Kwetsembela kwaPawula ngalokucinile elutsandvweni lwaJehova, kwamsita kutsi akhone kubhekana netinkinga ekuphileni. Akazange avumele kutsi timo letibuhlungu timcedze emandla. Ecinisweni, ngalesikhatsi asejele, Pawula wabhala tincwadzi letinyenti leticinisanako. (Ef. 4:1; Fil. 1:7; Flm. 1) Ngisho nangesikhatsi Pawula avivinywa kabuhlungu, wachubeka amtsandza Nkulunkulu. Yini leyamniketa emandla ekwenta njalo? Wachubeka nekwetsembela kuNkulunkulu “wayo yonkhe indvudvuto, losidvudvuta kuko konkhe kuhlupheka kwetfu.” (2 Khor. 1:3, 4) Singasilingisa njani sibonelo saPawula, futsi sente lutsandvo lwetfu ngaJehova luhlale lucinile?

10. Yini lesingayenta kute lutsandvo lwetfu ngaJehova luhlale lucinile?

¹⁰ Lenye indlela lengasisita kutsi sihlale sinelutsandvo lolucinile ngaJehova nguleyo leyashiwo nguPawula. Wabhalela lamanye emaKhristu lebekanawo watsi: “Hlalani nithantaza.” Kamuva, wawabhalela watsi: “Phikelelani emthantazweni.” (1 Thes. 5:17; Rom. 12:12) Kuchumana naNkulunkulu ngemthantazo kubalulekile kute sakhe buhlobo lobucinile naye. (Hla. 86:3) Nangabe sitinika sikhatsi sekutfulula sifuba setfu kuJehova ngendlela lesitiva ngayo, singativa sisondzelene naBabe wetfu wasezulwini, ‘longuMuvi wemithantazo.’ (Hla. 65:2) Ngetulu kwaloko, nangabe sicondza kutsi Jehova uyayiphendvula imithantazo yetfu, lutsandvo lwetfu ngaye lutawukhula. Siphindze sicondze nekutsi Jehova “usedvute nabo bonkhe labambitako.” (Hla. 145:18) Nangabe siciniseka kutsi Jehova uyasisekela ngelutsandvo lwakhe, sitawukhona kubhekana netintfo letivivinya kukholwa kwetfu.

11, 12. Singaluhlakulela njani lutsandvo lolujulile leliciniso leliseBhayibhelini?

¹¹ NjengemaKhristu, siyalitsandza liciniso. LiVi laNkulunkulu lingumtfombo weliciniso. Ngesikhatsi Jesu athantaza kuBabe wakhe, watsi: “Livi lakho liliciniso.” (Joh. 17:17) Ngako, lutsandvo ngeliciniso lucala ngekungenisa lwati lolungulonalona leliseVini laNkulunkulu. (Khol. 1:10) Noma kunjalo, kunyenti lokuhilelekile lokufanele sikwente kunekumane singenise lwati. Naka kutsi emavi laphefumulelwe lakuTihlabelelo 119 asisita njani sicondze kutsi kusho kutsini kutsandza emaciniso laseBhayibhelini. (Fundza Tihlabelelo 119:97-100.) Siyatinika yini sikhatsi sekucabangisisa noma sekuzindla ngetincenyana letitsite letiseBhayibhelini lilanga nelilanga? Nangabe sizindla ngetindlela lesisitakala ngato nangabe sikusebentisa loko lesikufundzile ekuphileni kwetfu, lutsandvo lwetfu ngeliciniso leliBhayibheli lutawukhula.

¹² Umhlabeleli wachubeka watsi: “Maye, timnandzi tetsembiso takho kimi! Tinongotela kwengca luju lwetinyosi emlonyeni wami.” (Hla. 119:103) Ngendlela lefanako, natsi singayijabulela lemfundvo levela kuNkulunkulu lesekelwe eBhayibhelini lesiyitfola ngenhlangano yakhe. Singawajabulela ‘lamavi lamnandzi’ eliciniso nangabe sizindla ngawo kute siwakhumbule kamelula futsi siphindze siwacocele nalabanye.​—Shu. 12:10.

13. Yini leyasita Jeremiya kutsi atsandze liciniso leliseBhayibhelini, futsi loku kwamtsintsa njani?

¹³ Umphrofethi Jeremiya bekalitsandza liciniso leliseBhayibhelini. Naka kutsi emavi laseVini laNkulunkulu ayitsintsa njani inhlitiyo yakhe. Jeremiya watsi: “Emavi akho atsi nakefika kimi, ngawadla, aba yinjabulo yami nentfokoto yenhlitiyo yami, ngobe ngibitwa ngeLibito lakho, awu, Simakadze Nkulunkulu longuSomandla.” (Jer. 15:16) Jeremiya nakazindla ngalamavi lamnandzi aNkulunkulu kwafana nekutsi uyawadla futsi uyawagaya esiswini sakhe. Ngekwenta kwakhe kanjalo, wakujabulela ngalokusuka enhlitiyweni kutfola lilungelo lekubitwa ngeligama laNkulunkulu. Lutsandvo lwetfu ngeliciniso leliseBhayibhelini lusenta sibone yini kutsi sinelilungelo lekudvumisa libito laNkulunkulu futsi siphindze simemetele uMbuso wakhe kulesikhatsi sekugcina?

14. Singalujulisa njani lutsandvo lwetfu ngeliciniso leliseBhayibhelini?

¹⁴ Ngaphandle kwekufundza liBhayibheli kanye netincwadzi letisekelwe kulo, yini lenye lengasisita kutsi sijulise lutsandvo lwetfu ngeliciniso leliseBhayibhelini? Singalukhulisa lutsandvo lwetfu ngeliciniso leliseBhayibhelini ngekutsi sibe khona njalo emihlanganweni yelibandla. Kutadisha liBhayibheli sisitwa Sicongosekulindza lesifundvwa onkhe emaviki, kuyindlela lehamba embili lesifundziswa ngayo. Kute sisicondze kahle sihloko lokucocwa ngaso kuleloviki, kufanele sisilungiselele kahle lesoSicongosekulindza lesifundvwako. Lenye indlela lesingakwenta ngayo loku, kutsi sifundze yonkhe imiBhalo lekhonjiwe kuleso sihloko. Kulamalanga, sesingakhona kutitsatsela Sicongosekulindza engosini yetfu i-jw.org noma sisibuke ku-JW Library app ngetilwimi letehlukene. Tintfo tebuchwephesha tisisita kutsi sisheshe siyitfole imiBhalo lekhonjiwe esihlokweni ngasinye. Kungakhatsaliseki kutsi nguyiphi indlela lesiyisebentisako, kuyifundza ngekucophelela lemiBhalo siphindze sizindle ngayo, kutasisita kutsi sijulise lutsandvo lwetfu ngeliciniso leliseBhayibhelini.​—Fundza Tihlabelelo 1:2.

15, 16. (a) UmBhalo waJohane 13:34, 35, utsi kufanele senteni? (b) Lutsandvo lwetfu ngebazalwane luhlobene njani nelutsandvo ngaNkulunkulu kanye nangeliBhayibheli?

¹⁵ Ngebusuku bekugcina baJesu alapha emhlabeni, watsi kubafundzi bakhe: “Ngininika umtsetfo lomusha, wekutsi nitsandzane; njengobe nje nami nginitsandzile, nani tsandzanani. Nangabe nitsandzana, bonkhe batawukwati kutsi nibafundzi bami.”​—Joh. 13:34, 35.

¹⁶ Kutsandza bazalwane betfu nabodzadze kuhlobene nelutsandvo lesinalo ngaJehova. Ecinisweni ngeke kwenteke kutsi sitsandze Jehova kodvwa sibe singabatsandzi labanye. Umphostoli Johane watsi: “Loyo longamtsandzi umnakabo lambonile, ngeke amtsandze Nkulunkulu, langakamboni.” (1 Joh. 4:20) Ngetulu kwaloko, lutsandvo lwetfu ngaJehova kanye nebazalwane betfu luhlobene nelutsandvo lwetfu ngeliBhayibheli. Kungani? Sizatfu kutsi lutsandvo ngeliBhayibheli lusenta siyilalele ngalokusuka enhlitiyweni imitsetfo leseBhayibhelini yekutsi sitsandze Nkulunkulu kanye nebazalwane betfu.​—1 Phet. 1:22; 1 Joh. 4:21.

17. Ngutiphi letinye tindlela lesingakhombisa ngato kutsi siyabatsandza labanye?

¹⁷ Fundza 1 Thesalonika 4:9, 10. Ngutiphi letinye tindlela lesingakhombisa ngato lutsandvo lwetfu ebandleli? Umzalwane losakhulile noma dzadze angase adzinge kwekuhamba nakaya emihlanganweni yebuKhristu. Umfelokati angase adzinge lusito lekulungiselwa tintfo letitsite ekhaya lakhe. (Jak. 1:27) Kungakhatsaliseki kutsi usemusha nobe sewukhulile, bazalwane nabodzadze labacindzetelekile, labadvumatekile, noma lababhekene neluvivinyo, bonkhe badzinga kutsi sibanake, sibakhutsate siphindze sibadvudvute. (Taga 12:25; Khol. 4:11) Sisuke sikhombisa kutsi sibatsandza mbamba bazalwane betfu nangabe sikhombisa ngemavi nangetento kutsi siyabakhatsalela labo “labahlobene natsi ekukholweni.”​—Gal. 6:10.

18. Yini lengasisita kutsi silungise kungevani nalabo lesikholwa nabo?

¹⁸ LiBhayibheli labiketela kutsi ‘emalanga ekugcina’ alelive lelibi abetawubonakala ngekutsi bantfu babe nemoya wekuticabangela bona kanye nemona. (2 Thim. 3:1, 2) NjengemaKhristu, kufanele silwe kamatima kute sikhulise lutsandvo lwetfu ngaNkulunkulu, ngeliciniso leliseBhayibhelini kanye nangebazalwane betfu nabodzadzewetfu. Kuliciniso kutsi ngaletinye tikhatsi singase singavumelani nalabo lesikholwa nabo. Noma kunjalo, kusibusiso lesikhulu nangabe sonkhe ebandleni sishukunyiswa lutsandvo kutsi silungise nome ngukuphi kungevani ngendlela yelutsandvo! (Ef. 4:32; Khol. 3:14) Ngako-ke, asingalokotsi sivumele lutsandvo lwetfu kutsi luphole! Kunaloko, kwangatsi singachubeka sihlakulela lutsandvo lolujulile ngaJehova, ngeliVi lakhe, kanye nangebazalwane betfu.