Kukholwa—Buntfu Lobusenta Sicine

KUKHOLWA kusenta sibe nemandla kakhulu. Nasi sibonelo, ngisho nobe Sathane afuna kulimata buhlobo betfu naJehova, kukholwa kusenta sikhone ‘kucima tonkhe tikhali letivutsako talomubi.’ (Ef. 6:16) Nasinekukholwa, singakhona kumelana netinkinga letimatima kakhulu. Jesu watsi kubafundzi bakhe: “Kube kukholwa kwenu bekungangenhlanyelo yesinaphi, benitawutsi kulentsaba: ‘Suka lana uye lapha,’ ivele isuke, futsi kute lebekunganehlula.” (Mat. 17:20) Njengobe kukholwa kwenta buhlobo betfu naNkulunkulu bucine, kubalulekile kucabanga nganayi imibuto lelandzelako: Kuyini kukholwa? Kutsandza liciniso kukutsintsa njani kukholwa kwetfu? Singakucinisa njani kukholwa kwetfu? Ngubani lokufanele sikholwe kuye?—Rom. 4:3.

Kukholwa kungetulu kwekumane wetsembe nobe wemukele liciniso leliseBhayibhelini, ngobe ngisho “nemadimoni nawo ayakholwa [kutsi Nkulunkulu ukhona] futsi achachatele.” (Jak. 2:19) Ngako-ke, kuyini kukholwa?

LiBhayibheli lichaza kukholwa ngekutsi kunetincenye letimbili. Kwekucala, “kukholwa kukutilindzela ngekuciniseka tintfo letetsenjwako.” (Heb. 11:1a) Nawunekukholwa, usuke wetsemba ngalokucinile kutsi konkhe Jehova lakushoko kuliciniso futsi kutawenteka. Nasi sibonelo, Jehova watsi kuma-Israyeli: “Naningephula sivumelwane sami nelilanga, nesivumelwane sami nebusuku, kuze kutsi lilanga nebusuku kungabe kusasebenta ngesikhatsi sako, ngako sivumelwane sami naDavide, inceku yami . . . naso-ke siyakwephulwa.” (Jer. 33:20, 21) Kuke kwenteke yini wesabe kutsi lilanga lingahle lingaphumi futsi lingashoni, lokungenta kutsi ingasabi khona imini kanye nebusuku? Nangabe uyetsemba imitsetfo legcina umhlaba ujikeleta futsi utungeleta lilanga, angeke umetsembe yini uMdali walemitsetfo kutsi angatifeza tetsembiso takhe? Liciniso likutsi ungametsemba!—Isa. 55:10, 11; Mat. 5:18.

Kwesibili, kukholwa “kubufakazi bekuciniseka ngetintfo letikhona mbamba letingakabonwa.” Kukholwa “kubufakazi bekuciniseka” ngetintfo letikhona kodvwa letingabonakali. (Heb. 11:1b) Ngayiphi indlela? Ase sitsi umntfwana uyakubuta utsi: ‘Wati ngani kutsi umoya ukhona?’ Ngisho nobe ungakaze wawubona umoya, ungetama kusita lomntfwana kutsi acabange ngetintfo lesitibonako letibufakazi bekutsi umoya ukhona, njengekuphefumula, kunyakata kwetintfo nakunemoya, kanye naletinye nje tintfo. Lomntfwana utsi angakucondza konkhe loku, bese uyakholwa ngisho nobe angakawuboni. Ngendlela lefanako, kukholwa kusekelwe etintfweni letiniketa bufakazi lobucinile.—Rom. 1:20.

Njengobe kukholwa kusekelwe etintfweni letiniketa bufakazi, kuze umuntfu abe nekukholwa kufanele acale abe “nelwati lolungulonalona lweliciniso.” (1 Thim. 2:4) Kodvwa lolwati alukeneli. Umphostoli Pawula wabhala watsi: “Ngenhlitiyo umuntfu ubonisa kukholwa.” (Rom. 10:10) Umuntfu akukafaneli agcine ngekuletsemba liciniso kodvwa kufanele alitsandze. Nakenta njalo utawukhutsateka kutsi abe nekukholwa, lokusho kuphila ngendlela lejabulisa Nkulunkulu. (Jak. 2:20) Umuntfu longalitsandzi liciniso angeke abemukele ngisho nebufakazi lobucacile ngenca yekutsi akafuni kushintja loko lakukholelwako nobe ufuna kwenta lakufunako. (2 Phet. 3:3, 4; Juda 18) Kungako ngetikhatsi tekubhalwa kweliBhayibheli kungasibo bonkhe lababona timangaliso lababa nekukholwa. (Num. 14:11; Joh. 12:37) Umoya longcwele waNkulunkulu wenta bantfu labalitsandza mbamba liciniso kutsi babe nekukholwa.—Gal. 5:22; 2 Thes. 2:10, 11.

INkhosi Davide ingulomunye webantfu lababa nekukholwa lokucinile. (Heb. 11:32, 33) Nobe kunjalo, akusibo bonkhe emndenini waDavide lababa nekukholwa lokucinile. Nasi sibonelo, ngalelinye lilanga Eliyabe umnakabo Davide lomdzala wakhombisa kutsi ute kukholwa lokucinile ngesikhatsi ekhuta Davide ngenca yekukhatsateka ngaloko lobekushiwo nguGoliyathi. (1 Sam. 17:26-28) Kute umuntfu lotalwa anekukholwa, nobe lokutfola njengelifa kubatali bakhe, ngako-ke kukholwa kwaDavide kwaba ngumphumela webuhlobo lobuhle lebekanabo naNkulunkulu.

EmBhalweni weTihlabelelo 27, Davide uveta kutsi waba nako kanjani kukholwa lokucinile. (Vesi 1) Davide wazindla ngetintfo lebetenteke ekuphileni kwakhe nangendlela Jehova lebekamvikele ngayo etitseni takhe. (Emavesi 2, 3) Bekalitsandza mbamba lilungiselelo laJehova lekumkhonta. (Vesi 4) Davide bekakhonta Nkulunkulu akanye naletinye tinceku taNkulunkulu ethendeni lekukhontela. (Vesi 6) Bekahlale athantaza kuJehova ngalokusuka enhlitiyweni. (Emavesi 7, 8) Davide bekafuna kufundziswa tindlela taNkulunkulu. (Vesi 11) Kukholwa bekubaluleke kakhulu kuDavide kangangekutsi waze wabuta watsi: “Ngabe ngikuphi kube bengite kukholwa?”—Vesi 13, NW.

Ungaba nako kukholwa lokufana nekwaDavide nangabe uba nesimo lesihle sengcondvo nemikhuba lemihle lechazwe emBhalweni weTihlabelelo 27. Njengobe kukholwa kusekelwe elwatini lolungulonalona, nawuchubeka ufundza lokwengetiwe eVini laNkulunkulu kanye nasetincwadzini letisekelwe eBhayibhelini, kutawuba melula kuba nekukholwa lokuyincenye yetitselo temoya waNkulunkulu. (Hla. 1:2, 3) Tinike sikhatsi sekuzindla nawudadisha. Nangabe uzindla ngalokufundzako, indlela lombonga ngayo Jehova itawukhula. Njengobe kumbonga kwakho Jehova kukhula, nesifiso sakho sekukhombisa kukholwa sitawukhula ngekutsi ube khona emihlanganweni yelibandla nangekushumayela ngelitsemba lonalo. (Heb. 10:23-25) Sisuke sikhombisa kukholwa nasichubeka ‘sithantaza ngaso sonkhe sikhatsi singayekeli.’ (Luk. 18:1-8) Ngako-ke ‘asihlale sithantaza’ kuJehova, setsembe kutsi ‘yena uyasikhatsalela.’ (1 Thes. 5:17; 1 Phet. 5:7) Kukholwa kwenta kutsi sente tintfo letikahle, futsi nasenta lokuhle, kukholwa kwetfu kuyacina.—Jak. 2:22.

Kusihlwa ngaphambi kwekufa kwakhe, Jesu watjela bafundzi bakhe: “Kholwani nguNkulunkulu, nikholwe nangimi.” (Joh. 14:1) Ngako kufanele sikholwe kuNkulunkulu nakuJesu. Yini lesingayenta kute sikhombise kutsi siyakholwa kuJesu? Ase sicoce nganati tindlela letintsatfu.

Kwekucala, inhlawulo yitsatse njengesipho sakho lesiligugu lesivela kuNkulunkulu. Umphostoli Pawula watsi: “Ngiphila ngekukholwa eNdvodzaneni yaNkulunkulu, leyangitsandza futsi yatinikela ngenca yami.” (Gal. 2:20) Nangabe ukholwa kuJesu, usuke wetsemba mbamba kutsi inhlawulo ingakusita kute tono takho titsetselelwe, ikuniketa litsemba lekuphila lokuphakadze, futsi isicinisekiso lesikhulu sekutsi Nkulunkulu uyakutsandza. (Rom. 8:32, 38, 39; Ef. 1:7) Loko kutakucinisa futsi kukusite uncobe kutikhobosa.—2 Thes. 2:16, 17.

Kwesibili, sondzela kuNkulunkulu ngemthantazo ngesisekelo semhlatjelo waJesu. Ngenca yenhlawulo, singakhona kuthantaza kuJehova “ngenkhululeko yekukhuluma, sisondzele esihlalweni sebukhosi semusa waNkulunkulu, kuze sitfole sihawu nemusa wakhe lotasisita ngesikhatsi lesifanele.” (Heb. 4:15, 16; 10:19-22) Umthantazo uyasicinisa futsi usenta sitimisele kumelana netilingo.—Luk. 22:40.

Kwesitsatfu, lalela Jesu. Umphostoli Johane watsi: “Lokholwa yiNdvodzana utawutfola kuphila lokuphakadze; longayilaleli iNdvodzana ngeke akutfole kuphila, kodvwa lulaka lwaNkulunkulu lusetikwakhe.” (Joh. 3:36) Naka kutsi Johane wacatsanisa kuba nekukholwa nekungalaleli. Ngako usuke ukhombisa kutsi unekukholwa kuJesu nangabe umlalela. Kulalela “umtsetfo waKhristu,” kusho kulandzela tonkhe timfundziso takhe kanye nemiyalo yakhe. (Gal. 6:2) Siphindze silalele Jesu ngekutsi silalele sicondziso lasiniketa ‘ngesisebenti lesetsembekile nalesihlakaniphile.’ (Mat. 24:45) Nangabe silalela Jesu, sitawutfola emandla ekubeketelela nobe ngubuphi bumatima lobufananiswa nesangcotfo.—Luk. 6:47, 48.

Lenye indvodza yakhala kuJesu yatsi: “Ngiyakholwa! Kepha ngisite ngicinise kukholwa kwami!” (Mak. 9:24) Beyinako kukholwa, kodvwa lendvodza beyitfobekile futsi beyibona kutsi kudzingeka ikucinise. Njengalendvodza, natsi ngalesinye sikhatsi kutawudzingeka sikucinise kukholwa kwetfu futsi loko singakhona kukwenta ngisho kwanyalo. Njengobe sibonile, kukholwa kwetfu singakucinisa ngekutsi sidadishe liVi laNkulunkulu, sizindle ngalo futsi loko kutawusenta simtsandze kakhulu Jehova. Kukholwa kwetfu kutawuphindze kucine nangabe sikhonta Jehova sikanye nebazalwane betfu, sicocela labanye ngelitsemba letfu futsi siphikelela emthantazweni. Ngetulu kwaloko, nangabe sicinisa kukholwa kwetfu, sitawutfola umvuzo lomkhulu kunayo yonkhe. LiVi laNkulunkulu lisikhutsata litsi: “Bazalwane labatsandzekako takheni ekukholweni kwenu lokungcwele  . . . kuze nitigcine elutsandvweni lwaNkulunkulu.”—Juda 20, 21.