Sikolwa Semsebenti WemaKhristu Sa-2015 Sisisita Kutsi Sitfutfukise Indlela Lesifundzisa Ngayo

¹ Umhlabeli Davide wabhala: “Emavi emlomo wami netizindlo tenhlitiyo yami atemukeleke kuwe, Simakadze, Dvwala lami, neMkhululi wami.” (Hla. 19:14) Natsi sifuna kutsi emavi etfu amjabulise Jehova, ngobe silitsatsa njengalelibalulekile lilungelo letfu lekukhuluma ngeliciniso ebandleni kanye nasemsebentini wekushumayela. Sikolwa Semsebenti WemaKhristu singulenye indlela Jehova lasicecesha ngayo kuze sente umsebenti wekushumayela. Lokuceceshwa kutfolakala maviki onkhe emabandleni langetulu kwa-111 000 emhlabeni wonkhe. Kusita bazalwane nabodzadze labasemhlabeni wonkhe futsi labavela etindzaweni letehlukehlukene kutsi babe tikhonti letikufanela kahle kumemetela tindzaba letimnandzi, bakwati nekufundzisa ngendlela lebatsintsako labanye, futsi bafundzise ngelikhono kanye nangesibindzi.​—Imis. 19:8; Khol. 4:6.

² Loluhlelo lwesikolwa sa-2015 lutawube lunekwatiswa lokutfolakala kubhukwana lotsi Setfulo SeliVi LaNkulunkulu kanye nasencenyeni letsi “Glossary of Bible Terms” letfolakala ku-“New World Translation” lebuketiwe, kanye nalokunye lokuku-“Insight on the Scriptures,” Umculu 1. Ngetulu kwaloko, kunelushintjo lolwentiwe esikhatsini semaphuzu lagcamile eliBhayibheli kanye neseSabelo No. 1. Lolushintjo kanye neticondziso tendlela yekusingatsa tincenye talesikolwa kutawucocwa ngako kuletigaba letilandzelako.

³ Emaphuzu Lagcamile Ekufundvwa KweliBhayibheli: Bazalwane lababelwe lencenye batawuba nemizuzu lemibili yekukhulumela liphuzu linye lelijabulisako kanye nalelisebentako ebandleni lelitfolakala kulokufundvwa kweliBhayibheli kwalelo viki. Lomzalwane nakalungiselele kahle utawukhona kuveta liphuzu lelitawuzuzisa libandla, futsi loko akwente ngesikhatsi lanikwe sona. Ngemuva kwaloko libandla litawuba nemizuzu lesitfupha yekusho emaphuzu lajabulisako leliwatfole ekufundvweni kweliBhayibheli kwalelo viki, ngemizuzwana lengu-30 nobe ngephansi. Kuze liphuzu lolitfolile ulisho ngemizuzwana lengu-30 kudzingeka ulungiselele uphindze utekhute, futsi loko kuyasicecesha. Loku kwenta kutsi nalabanye babe nelitfuba lekusho loko labakufundzile nabasaticwaningela.

⁴ Sabelo No. 1: Sikhatsi sekufundvwa kweliBhayibheli sesincishisiwe saba yimizuzu lemitsatfu nobe ngephansi futsi atawuba mbalwa emavesi lafundvwako. Labo labatfola lesabelo sekufundza kufanele baphrakthize tikhatsi letinyentana ngekutsi bafundze ngalokuvakalako futsi banake kakhulu indlela yekubita kahle emagama kanye nekufundza ngekushelela kuze bakhone kwendlulisela imicondvo ngendlela lefanele. Bonkhe bantfu baJehova kufanele batimisele kutsi bafundze kahle, ngobe kufundza kudlala indzima lebalulekile ekukhonteni kwetfu Nkulunkulu. Kusijabulisa kakhulu kutsi bantfwana betfu labanyenti bafundza kahle! Batali kufanele babongwe ngemetamo yabo yekusita bantfwana kutsi bakwati kufundza kahle.

⁵ Sabelo No. 2: Lena kutawuba yinkhulumo yemizuzu lesihlanu letawabelwa dzadze. Kufanele asebentise sihloko lasabelwe. Nangabe inkhulumo isekelwe ku-“New World Translation” lebuketiwe, kufanele ihambisane nendlela letsite yekushumayela lengasetjentiswa ensimini yelibandla. Nangabe isekelwe esibonelweni semuntfu lotsite lokukhulunywa ngaye eBhayibhelini lesitfolakala ku-“Insight on the Scriptures,” Umculu 1, umfundzi kufanele afundze leyo ndzaba, akhetse imibhalo lefanele latayisebentisa, futsi akhombise kutsi yini lesingayifundza kuleso sibonelo. Leminye imiBhalo lehlangana nesihloko nayo ingasetjentiswa. Umbonisi wesikolwa utawabela umfundzi umsiti munye.

⁶ Sabelo No. 3: Lena kutawuba yinkhulumo yemizuzu lesihlanu letawabelwa umzalwane nobe dzadze. Nangabe lenkhulumo yabelwe dzadze, kufanele yetfulwe ngendlela lechazwe eSabelweni No. 2. Nangabe yabelwe umzalwane futsi isekelwe ku-“Insight,” kufanele ayetfule njengenkhulumo abe acabanga ngalabo labatawube balalele. Umfundzi kufanele achaze leso sihloko, akhetse imibhalo lefanele latayisebentisa, futsi akhombise kutsi yini lesingayifundza esibonelweni saloyo muntfu lokukhulunywa ngaye eBhayibhelini.

⁷ Lokusha Lokutawentiwa Bazalwane ESabelweni No. 3: Nangabe lenkhulumo isekelwe ku-“New World Translation” lebuketiwe, kufanele yentiwe ibe ngumboniso lokhombisa kukhonta kwemndeni nobe indlela yekushumayela. Esikhatsini lesinyenti umbonisi wesikolwa nguye lotawabela umzalwane umsiti kanye nekuhlelwa kwenkhulumo. Umsiti walomzalwane kufanele kube lilunga lemndeni wakhe nobe lomunye umzalwane ebandleni. Leminye imiBhalo legcizelela timiso teliBhayibheli letivumelana nesihloko ingasetjentiswa. Ngaletinye tikhatsi labadzala nabo batawuhle babelwa kutsi betfule lencenye. Umzalwane longulomdzala angatikhetsela umsiti kanye nekuhlelwa kwenkhulumo. Asingabati kutsi kutalikhutsata libandla kubona labadzala bakhombisa likhono lekufundzisa bakanye nelilunga lemndeni nobe lomunye umzalwane.

⁸ Kunika Seluleko: Ngemuva kwenkhulumo ngayinye, umbonisi wesikolwa utawusebentisa imizuzu lemibili kuze ancome futsi anikete seluleko lesakhako lesisekelwe encwadzini letsi Zuza Emfundvweni YeSikolwa Semsebenti WemaKhristu. Naketfula inkhulumo lelandzelako, umbonisi wesikolwa ngeke asho kutsi umfundzi usebentela kuliphi liphuzu. Ngemuva kwenkhulumo, umbonisi wesikolwa kufanele amncome ngalokusuka enhlitiyweni umfundzi, asho kutsi bekabelwe liphi liphuzu nekutsi kungani lomfundzi alente kahle lelophuzu, nobe achaze ngemusa kutsi kungani kungazuzisa kutsi umfundzi aphindze alinake.

⁹ Lifomu leseluleko lemfundzi ngamunye litfolakala emakhasini 79 kuya ku-81 lencwadzi yakhe letsi Sikolwa Semsebenti. Umfundzi nasekasentile sabelo sakhe, umbonisi wesikolwa utawubhala encwadzini yemfundzi futsi utambuta ngasese kutsi usentile yini sivivinyo lesihambisana neliphuzu labekabelwe lona. Umbonisi wesikolwa angase amncome futsi amnike nalamanye emaphuzu langaba lusito ngemuva kwemihlangano nobe ngalesinye sikhatsi. Kunakwa umfundzi ngamunye lakutfolako kulesikolwa kufanele akutsatse njengelitfuba lekumsita kutsi atfutfuke etintfweni letimayelana naNkulunkulu.​—1 Thim. 4:15.

¹⁰ Nangabe inkhulumo yemfundzi seyengca sikhatsi lesibekiwe, umbonisi wesikolwa nobe umsiti wakhe kufanele akuphaphamele kwenta lokutsite lokutawukhombisa kutsi sikhatsi sesiphelile, njengekutsi kube khona lakukhalisako nobe ashaye intfo letsite. Umfundzi kufanele akhombise kutsi uyakuva loko ngekutsi acedzele lowo musho bese uyesuka endzaweni yesikhulumi.​—Fundza incwadzi letsi Sikolwa Semsebenti, likh. 282, sig. 4.

¹¹ Bonkhe labenta ngekuvumelana naloko lokulindzelekile bakhutsatwa kutsi babhalise kuleSikolwa Semsebenti WemaKhristu. (Fundza incwadzi letsi Sikolwa Semsebenti, likh. 282, sig. 6.) Lemfundvo letfolakala kulesikolwa isite bantfu baJehova kutsi bashumayele futsi bafundzise bantfu tindzaba letimnandzi teMbuso ngekuciniseka, ngenhlonipho kanye nangelutsandvo. Asingabati kutsi Jehova uyajabula ngekudvunyiswa ngibo bonkhe labazuza kulemfundvo levela kuye!​—Hla. 148:12, 13; Isa. 50:4.