“Kudzingeka Nicinisele”

NGESIKHATSI Anita aba ngulomunye waBoFakazi BaJehova, indvodza yakhe yatfukutsela kakhulu.a (Fundza umbhalo longentansi.) Yetama kumvimbela kutsi aye esifundvweni futsi yatsi angacali abite ligama laNkulunkulu. Yayitfukutsela igane lunwabu nayimuva asho libito laJehova.

Ngetulu kwaloko, indvodza ya-Anita beyingafuni kutsi afundzise bantfwana babo ngaJehova nekutsi aye nabo esifundvweni. Loku bekumatima kakhulu ngobe bekufanele etame kusita bantfwana babo ngansense.

Lotsite emndenini wakho angase etame kukuyekelisa kukhonta Jehova, njengobe loko lokwenteka ku-Anita kuveta. Mhlawumbe ungabhekana nalesinye simo lesimatima. Kungenteka sewugule sikhatsi lesidze. Mhlawumbe ushonelwe ngumntfwana wakho, yindvodza nobe ngumfati. Kungenteka lilunga lemndeni lolitsandzako liyekele kukhonta Jehova. Kuletimo lesisandza kutibala, yini longayenta kute uhlale wetsembekile kuJehova?

Umphostoli Pawula watsi: “Kudzingeka nicinisele.” (Hebheru 10:36) Ngako yini lengakusita kuze ucinisele?

Nawucindzetelekile, khumbula kutsi kufanele wetsembele kuJehova kute akusite ucinisele. Thantaza kuye ucele lusito. Nguloko lokwentiwa ngu-Ana ngesikhatsi indvodza yakhe ishona ngekutumeka lokukhulu. Besekuphele iminyaka lengu-30 bashadile. Ana utsi: “Akazange abuye ekhaya nakashayisa emsebentini. Abeneminyaka lengu-52 nje kuphela budzala.”

Umsebenti wa-Ana wawumenta ahlale amatasatasa, kodvwa loko akuzange kubucedze buhlungu bakhe. Yini layenta? Utsi: “Ngathantaza kuJehova ngamtjela konkhe lokusenhlitiyweni yami futsi ngamcela kutsi angisite.” Ana uyati kutsi Jehova wamsita ngobe ngemuva kwekuthantaza, abetiva anekuthula futsi angakakhatsateki. Uchubeka atsi: “Angingabati kutsi Jehova utayivusa indvodza yami.”​—Filiphi 4:6, 7.

Jehova wetsembisa tinceku takhe kutsi utayilalela imithantazo yato. (Tihlabelelo 65:2) Utatinika konkhe letikudzingako kute tichubeke timkhonta. Jehova utakusita kutsi wetsembeke kuye ngisho nobe ubhekene netimo letimatima.

Kunalenye indlela Jehova lasisita ngayo kute sicinisele. Wente kutsi sibe nebazalwane nabodzadze ebandleni. Singafundza endleleni bazalwane baseThesalonika labasitana ngayo ngesikhatsi baphatfwa kabuhlungu. Ngaleso sikhatsi, bebadzinga kukhutsatana. (1 Thesalonika 2:14; 5:11) Basita bazalwane nabodzadze kutsi bahlale betsembekile kuJehova ngekutsi bahlangane ndzawonye futsi babe bangani labasedvute. Yini lesingayenta kute sihlale setsembekile njengalabazalwane baseThesalonika?

Kufanele sibe nebangani ebandleni futsi sikhutsatane, ikakhulukati nasibhekene nebumatima. (Roma 14:19) Umphostoli Pawula wahlupheka ngenca yekuphatfwa kabi nangenca yekubhekana naletinye tinkinga, kodvwa Jehova wamnika emandla ekucinisela. Wenta kutsi kube nebazalwane nabodzadze labamkhutsata. Nakakhuluma ngebangani bakhe, Pawula watsi: “Babe yindvudvuto lenkhulu kimi.” (Kholose 4:10, 11) Labazalwane bebamtsandza Pawula. Nakadzinga lusito, bebamdvudvuta baphindze bamkhutsate. Mhlawumbe ungacabanga ngetikhatsi lapho bazalwane nabodzadze ebandleni lokulo basho emavi nobe benta lokutsite lokukukhutsatile.

Jehova ukunike labadzala ebandleni. Lamadvodza angakukhutsata futsi akunikete seluleko lesihle lesiseBhayibhelini. Afanana “nesiphephelo emoyeni, abe ngumkhoselisi kuso sivunguvungu, abe njengemifula yemanti ehlane, afanane nelitfunti lelidvwala lelikhulu eveni lelomele emanti.” (Isaya 32:2) Kuyasidvudvuta kwati kutsi labazalwane bakulungele kusisita. Ngako-ke, nawubhekene nebumatima, yani kulabadzala belibandla. Bangakusita kutsi uchubeke ukhonta Jehova.

Kuliciniso kutsi labadzala ngeke baticatulule tonkhe tinkinga takho, futsi banesono njengawe. (Imisebenti 14:15) Kodvwa ungabancono nawuya kulomdzala futsi umuve athantaza kuJehova ngenkinga yakho. (Jakobe 5:14, 15) Sibonelo saloku kutsi labadzala eveni laseTaliyane bakhutsata umzalwane lebesekuphele iminyaka leminyenti agula. Lomzalwane utsi: “Lutsandvo lwalabazalwane nekusondzela kwabo kimi nekungivakashela emahlandla, kungisite ngacinisela.” Nangabe ucindzetelekile, Jehova ufuna kutsi ucele labadzala bakusite.

Nasinake kukhonta Jehova, sitayibona indlela lasisita ngayo. Nguloko John lakwenta. Ngesikhatsi aneminyaka lengu-39 budzala, watfola kutsi unesifo semdlavuza. Wabona shengatsi akumfaneli kuphatfwa ngulesifo ngobe abesemncane kakhulu. Abekhatsateke ngemfati wakhe nendvodzana yabo lebeyineminyaka lemitsatfu nje kuphela budzala. Watsi: “Umfati wami bekungadzingeki anakekele indvodzana yetfu nje kuphela kodvwa bekufanele anakekele nami, aphindze angisite nakufanele ngiyobona bodokotela.” Indlela labekelashwa ngayo beyimenta adzinwe kakhulu futsi abulawe sisu. Akuphelelanga lapho. John weva kutsi uyise abegula abangwa netibi futsi adzinga lotsite lotamnakekela.

Yini leyasita John nemndeni wakhe nababhekene nalesimo lesimatima? Ngisho nobe John abehlala adziniwe, abeciniseka kutsi umndeni wakhe uchubeka ukhonta Jehova. Utsi: “Sasiya kuyo yonkhe imihlangano, siya maviki onkhe ensimini futsi siba nekukhonta kwemndeni ngisho nobe sibhekene nebumatima.” John wakubona kubaluleka kwekugcina buhlobo bakhe naJehova bucinile. Ngisho nobe ekucaleni abemangele futsi akhatsatekile, ngekushesha wativa sekancono kakhulu. Bekati kutsi Jehova uyamtsandza futsi wamnika emandla labewadzinga. Jehova angakusita ngendlela lefanako nawukhatsatekile nobe wesaba. John utsi: “Jehova angakucinisa njengobe nami angicinisile.”

Nangabe ucindzetelekile, khumbula emavi aPawula latsi: “Kudzingeka nicinisele.” Yetsembela kuJehova ngekutsi uthantaze kuye. Hlala usondzelene nebazalwane ebandleni, cela lusito kulabadzala futsi uchubeke unake kukhonta Jehova. Utakusita kunome nguyiphi inkinga longahle ube nayo nyalo nobe bumatima longahle uhlangabentane nabo esikhatsini lesitako.