‘Umtsandza Njengobe Utitsandza Wena Yini Makhelwane Wakho’?

1, 2. ImiBhalo ikuveta njani kubaluleka kwekuba nelutsandvo?

LUTSANDVO lubunguye baJehova lobuhamba embili. (1 Johane 4:16) Jesu Khristu loyindalo yakhe yekucala wacitsa tigidzigidzi teminyaka asezulwini neYise, futsi wafundza kutsi Jehova unguNkulunkulu lonelutsandvo. (Kholose 1:15) Jesu wabonisa lutsandvo lolufanako kuko konkhe kuphila kwakhe ngesikhatsi asezulwini nangalesikhatsi alamhlabeni. Ngako singaciniseka kutsi Jehova naJesu batawuhlala babusa ngendlela lekhombisa lutsandvo.

² Ngesikhatsi lomunye abuta Jesu kutsi ngumuphi umyalo lomkhulu kunayo yonkhe, Jesu watsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo lomkhulu newekucala. Wesibili lofana nawo utsi: ‘Kufanele utsandze makhelwane wakho njengobe utitsandza wena.’”​—Matewu 22:37-39.

 3. Ngubani “makhelwane” wetfu?

³ Kubalulekile kukhombisa bonkhe bantfu lesinebudlelwane nabo kutsi siyabatsandza. Jesu watsi kufanele sitsandze Jehova kanye nabomakhelwane betfu. Kodvwa ngubani “makhelwane” wetfu? Nangabe sishadile, makhelwane losedvute natsi bayeni betfu nobe bafati betfu. Bomakhelwane betfu baphindze bafake ekhatsi bazalwane betfu ebandleni, kanye nebantfu lesibashumayelako. Kulesihloko, sitawufundza ngekutsi singakhombisa njani kutsi siyabatsandza bomakhelwane betfu.

 4. Nanobe sinesono, umshado ungaphumelela njani?

⁴ Jehova wadala Adamu na-Eva, futsi wabahlanganisa. Loyo bekungumshado wekucala. Nkulunkulu bekafuna babe nemshado lojabulile futsi bagcwalise umhlaba ngebantfwana babo. (Genesisi 1:27, 28) Nobe kunjalo, ngemuva kwekungamlaleli Jehova, umshado wabo wonakala futsi sono kanye nekufa kwendlulela kitsi sonkhe. (Roma 5:12) Nobe kunjalo, umshado ungaphumelela lamuhla. EBhayibhelini, Jehova longuMdali wemshado unikete indvodza nemfati seluleko lesincono kakhulu labangasisebentisa.​—Fundza 2 Thimothi 3:16, 17.

 5. Lubaluleke kangakanani lutsandvo kubantfu labashadene?

⁵ LiBhayibheli liveta kutsi lutsandvo lolunemusa lubalulekile kute budlelwane bujabulise. Loku kubaluleke kakhulu kubantfu labashadene. Umphostoli Pawula wachaza lutsandvo sibili ngalesikhatsi atsi: “Lutsandvo luyabeketela futsi lunemusa. Lute umona, alutigabatisi, alutikhukhumeti, alutiphatsi ngendlela lehlazisako, alutifuneli kwalo, alucansuki. Lute emagcubu. Alujatjuliswa kungalungi, kodvwa lujatjuliswa liciniso. Lucinisela kuto tonkhe tintfo, lukholwa ngito tonkhe tintfo, lwetsemba tonkhe tintfo, lubeketelela tonkhe tintfo. Lutsandvo aluyoke luphele.” (1 Khorinte 13:4-8) Nasicabanga ngemavi aPawula futsi siwasebentisa, sitawujabula emishadweni yetfu.

6, 7. (a) Litsini liBhayibheli ngebunhloko? (b) Indvodza lengumKhristu kufanele imphatse njani umfati wayo?

⁶ Jehova wancuma kutsi ngubani lokufanele abe yinhloko yemndeni. Pawula wachaza watsi: “Ngifuna nati kutsi inhloko yawo onkhe emadvodza nguKhristu; inhloko yemfati yindvodza; nenhloko yaKhristu nguNkulunkulu.” (1 Khorinte 11:3) Jehova ufuna indvodza ibe yinhloko lenelutsandvo, ingabi sidlova. Jehova uyiNhloko lenemusa nalete bugovu. Ngenca yaloko, Jesu uyalihlonipha ligunya laNkulunkulu lelinelutsandvo. Watsi: “Ngiyamtsandza Babe.” (Johane 14:31) Jesu bekangeke ative ngaleyo ndlela kube Jehova bekanelukhahlo.

⁷ Ngisho nobe indvodza iyinhloko yemfati wayo, liBhayibheli liyitjela kutsi imhloniphe. (1 Phetro 3:7) Indvodza ingakwenta njani loko? Kufanele icabangele tidzingo temfati wayo futsi itihloniphe tintfo latitsandzako. LiBhayibheli litsi: “Madvodza, chubekani nitsandza bafati benu njengobe nje naKhristu alitsandza libandla futsi watinikela ngenca yalo.” (Efesu 5:25) Jesu waze wanikela ngekuphila kwakhe ngenca yebalandzeli bakhe. Nangabe indvodza iyinhloko lenelutsandvo njengaJesu, kutawuba melula ngemfati wayo kutsi ayitsandze futsi ahloniphe tincumo tayo.​—Fundza Thithusi 2:3-5.

 8. Kufanele sitive njani ngebazalwane betfu nabodzadze?

⁸ Lamuhla, tigidzi tebantfu emhlabeni wonkhe tikhonta Jehova. Letigidzi tibazalwane nabodzadzewetfu. Kufanele sitive njani ngabo? LiBhayibheli litsi: “Asenteni lokuhle kubo bonkhe, ikakhulukati kulabo labahlobene natsi ekukholweni.” (Galathiya 6:10; fundza Roma 12:10.) Umphostoli Phetro watsi ‘kulalela liciniso’ kufanele kuholele ‘elutsandvweni lwebuzalwane.’ Waphindze watjela emaKhristu lakanye nawo watsi: “Ngetulu kwako konkhe, tsandzanani ngelutsandvo lolukhulu.”​—1 Phetro 1:22; 4:8.

9, 10. Kungani bantfu baNkulunkulu banebunye?

⁹ Inhlangano yetfu lesemhlabeni wonkhe yehluke kakhulu. Ngani? Ngobe sinelutsandvo lolukhulu nalolucotfo ngebazalwane betfu nabodzadze. Lokubaluleke kakhulu kutsi njengobe sitsandza Jehova futsi silalela imiyalo yakhe, usisekela ngemandla akhe lamakhulu, lokungumoya longcwele. Umoya longcwele usisita kutsi sibe nebunye beliciniso nebazalwane betfu emhlabeni wonkhe.​—Fundza 1 Johane 4:20, 21.

¹⁰ Pawula wagcizela sidzingo sekutsi emaKhristu atsandzane ngalesikhatsi abhala atsi: “Gcokani luvelo, umusa, kutfobeka, umoya lophansi, nekubeketela. Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye. Njengobe Jehova anitsetselele ngekukhululeka, nani yentani kanjalo. Kodvwa ngetulu kwato tonkhe letintfo, gcokani lutsandvo ngobe lusibopho lesiphelele sebunye.” (Kholose 3:12-14) Sibonga kakhulu kutsi lutsandvo “lusibopho lesiphelele sebunye” lobukhona emkhatsini wetfu ngisho nobe sivela kuphi!

11. Ibonakala ngani inhlangano yaNkulunkulu?

¹¹ Lutsandvo sibili nebunye betinceku taJehova kubenta babonakale kutsi basenkholweni yeliciniso. Jesu watsi: “Nangabe nitsandzana, bonkhe batawukwati kutsi nibafundzi bami.” (Johane 13:34, 35) Nemphotsoli Johane wabhala watsi: “Bantfwana baNkulunkulu nebantfwana baDeveli babonakala ngaloku: Nobe ngubani longakwenti lokulungile akaveli kuNkulunkulu, kunjalo nangaloyo longamtsandzi umnakabo. Ngobe ngulona umlayeto lenawuva kusukela ekucaleni, kutsi kufanele sitsandzane.” (1 Johane 3:10, 11) Lutsandvo nebunye lwenta BoFakazi BaJehova babonakale kutsi babalandzeli beliciniso baKhristu, nekutsi basetjentiswa nguNkulunkulu kute bashumayele tindzaba letimnandzi teMbuso emhlabeni wonkhe.​—Matewu 24:14.

12, 13. Yini emalunga ‘esicumbi lesikhulu’ layentako lamuhla, futsi yini latayijabulela ngekushesha?

¹² Tinceku letinyenti taJehova lamuhla tiyincenye ‘yesicumbi lesikhulu’ lesivela etindzaweni letehlukahlukene emhlabeni wonkhe futsi tiyawusekela uMbuso. Lesicumbi lesikhulu “ngulabo labaphume ekuhluphekeni lokukhulu, labahlante tingubo tabo batenta taba mhlophe engatini yeliWundlu” ngekukhombisa kukholwa emhlatjelweni loyinhlawulo waJesu. Emalunga ‘esicumbi lesikhulu’ ayamtsandza Jehova neNdvodzana yakhe futsi amkhonta “busuku nemini.”—Sembulo 7:9, 14, 15.

¹³ Ngekushesha, Nkulunkulu utawubhubhisa lelive lelibi ngesikhatsi ‘sekuhlupheka lokukhulu.’ (Matewu 24:21; fundza Jeremiya 25:32, 33.) Kodvwa Jehova utawubavikela bantfu bakhe futsi abaholele eveni lelisha ngobe uyabatsandza. Eminyakeni lecishe ibengu-2 000 leyendlulile, wetsembisa kutsi “utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona.” Ukubuke ngalabovu yini kuphila ePharadisi ngesikhatsi bubi, kuhlupheka kanye nekufa sekuphelile?​—Sembulo 21:4.

14. Sesandze kangakanani sicumbi lesikhulu?

¹⁴ Ngasekucaleni kwemalanga ekugcina nga-1914, bekunetinkulungwane letimbalwa tetinceku taNkulunkulu. Lichutjwa lutsandvo ngabomakhelwane nangenca yelusito lwemoya longcwele waNkulunkulu, lelicembu lelincane lebazalwane nabodzadze labagcotjiwe lashumayela tindzaba letimnandzi teMbuso ngisho nobe libhekene nebumatima. Ube yini umphumela? Lamuhla kubutselwe ndzawonye sicumbi lesikhulu sebantfu labanelitsemba lekuphila emhlabeni kuze kube phakadze. KunaBoFakazi labangaba ngu-8 000 000 emabandleni langetulu kwa-115 400 emhlabeni wonkhe, futsi lenombolo iyachubeka ikhula. Sibonelo saloko kutsi bangetulu kwa-275 500 BoFakazi lababhajatiswe emnyakeni wanga-2014. Ngekwesilinganiso, bantfu labangu-5 300 bayabhajatiswa liviki ngalinye.

15. Nguyiphi indlela bantfu labanyenti labeva ngayo tindzaba letimnandzi lamuhla?

¹⁵ Kujabulisa kakhulu kubona kutsi bantfu labanyenti sebevile ngetindzaba letimnandzi teMbuso. Lamuhla, tincwadzi tetfu titfolakala ngetilwimi letingetulu kwa-700. Sicongosekulindza singumagazini lohantjiswa kakhulu emhlabeni wonkhe. Ngenyanga kushicilelwa emakhophi langetulu kwa-52 000 000 ngetilwimi letingu-247. Incwadzi lesichuba ngayo tifundvo teliBhayibheli letsi Lifundzisani Mbambambamba LiBhayibheli? ihunyushelwe etilwimini letingetulu kwa-250. Kute kube ngunyalo, sekushicelelwe emakhophi langetulu kwa-200 000 000.

16. Kungani inhlangano yaJehova ichubeka ikhula?

¹⁶ Inhlangano yetfu iyachubeka ikhula ngobe sinekukholwa kuNkulunkulu futsi sitsatsa liBhayibheli njengeliVi lakhe leliphefumulelwe. (1 Thesalonika 2:13) Siyachubeka sijabulela sibusiso saJehova ngetulu kwekutondwa nekuphikiswa nguSathane.​—2 Khorinte 4:4.

17, 18. Jehova ulindzele kutsi sitive njani ngalabo labangamkhonti?

¹⁷ Bantfu bawutsatsa ngetindlela letehlukahlukene umsebenti wetfu wekushumayela. Labanye bayasilalela kantsi labanye abasilaleli. Jehova ufuna sitive njani ngalabo labangamkhonti? Ngisho nobe bantfu bativa njani ngaloko lesikushumayelako, silandzela umyalo lotfolakala eBhayibhelini. Utsi: “Ngaso sonkhe sikhatsi, emavi enu akabe nemusa, futsi avangwe ngeluswayi, kuze niyati indlela yekuphendvula umuntfu ngamunye.” (Kholose 4:6) Nobe kunini lapho sivikela tinkholelo tetfu, sifuna kukwenta loko “ngemoya lomuhle nangenhlonipho lenkhulu” ngobe siyabatsandza bomakhelwane betfu.​—1 Phetro 3:15.

¹⁸ Ngisho nobe bantfu basitfukutselela futsi bangafuni kutsi sibashumayele, sikhombisa kutsi siyabatsandza bomakhelwane betfu futsi silingisa sibonelo saJesu. Jesu “naketfukwa akazange aphindzisele ngekwetfuka. Nangesikhatsi ahlushwa akazange asongele.” Esikhundleni saloko wetsembela kuJehova. (1 Phetro 2:23) Ngako ngaso sonkhe sikhatsi, sibonisa kutfobeka futsi sigcina lomyalo lotsi: “Ningaphindziseli lokubi ngalokubi, nobe kwetfukwa ngekwetfuka. Esikhundleni saloko busisani.”​—1 Phetro 3:8, 9.

19. Kufanele sitiphatse njani titsa tetfu?

¹⁹ Kutfobeka kusisita kutsi silalele umyalo lobalulekile lowashiwo nguJesu. Wachaza watsi: “Niyati kutsi kwatsiwa: ‘Kufanele utsandze makhelwane wakho futsi utondze sitsa sakho.’ Kodvwa ngitsi, chubekani nitsandza titsa tenu futsi nithantazele labo labaniphatsa kabi, kute nitewutiveta ningemadvodzana eYihlo losezulwini, ngobe yena wenta lilanga liphumele bantfu lababi nalabahle, aphindze ente imvula inele bantfu labalungile nalabangakalungi.” (Matewu 5:43-45) Njengetikhonti taNkulunkulu, kufanele sitsandze titsa tetfu ngisho nobe tisiphatsa kabi.

20. Sati njani kutsi lutsandvo ngaNkulunkulu nangabomakhelwane betfu lutawugcwala umhlaba wonkhe? (Buka sitfombe lesisekucaleni kwalesihloko.)

²⁰ Ngaso sonkhe sikhatsi kufanele sikhombise kutsi siyamtsandza Jehova nabomakhelwane betfu. Ngisho nobe bantfu basiphikisa nasibashumayela, siyabasita nangabe badzinga lusito. Umphostoli Pawula wabhala watsi: “Akubete lutfo lenilukweleta umuntfu, ngaphandle kwekutsandzana, ngobe loyo lotsandza lomunye umuntfu usuke alalela uMtsetfo. Ngobe imitsetfo letsi: ‘Ungaphingi, ungabulali, ungebi, ungahahi,’ nanobe ngumiphi leminye, ihlanganiswe nganankha emavi: ‘Kufanele utsandze makhelwane wakho njengobe utitsandza wena.’ Lutsandvo alukwenti lokubi kumakhelwane; ngako lutsandvo lukugcwaliseka kweMtsetfo.” (Roma 13:8-10) Kulelive lelehlukene ekhatsi, lelinebudlova kanye nebubi lelibuswa nguSathane, tinceku taNkulunkulu tiyachubeka tikhombisa lutsandvo ngabomakhelwane bato. (1 Johane 5:19) Ngemuva kwekutsi Jehova sekabhubhise Sathane, emadimoni akhe kanye nalelive lelibi, lutsandvo lutawugcwala emhlabeni wonkhe. Leso kutawuba sibusiso lesikhulu emhlabeni lapho bonkhe bantfu batsandza Jehova nabomakhelwane babo.