‘Jehova Nkulunkulu Wetfu Nguye Yedvwana LonguJehova’

1, 2. (a) Kungani emavi lakuDutheronomi 6:4 atiwa kakhulu? (b) Yini leyenta Mosi washo lamavi?

SEKWENDLULE iminyaka lengemakhulu emaJuda asebentisa emavi lakuDutheronomi 6:4, njengencenye yemthantazo wawo lokhetsekile. Lomthantazo ubitwa ngekutsi yiShema, lokuligama lekucala lesiHebheru kulelivesi. EmaJuda lamanyenti, enta lomthantazo onkhe malanga ekuseni nantsambama kute abonise kutinikela kwawo lokukhetsekile kuNkulunkulu.

² Lamavi ayincenye yenkhulumo yekugcina Mosi layetfula esiveni saka-Israyeli. Ngemnyaka wa-1473 ngaphambi kwekubakhona kwaKhristu, ema-Israyeli bekaseveni lakaMowabi, alungele kwewela uMfula iJordane, angene eVeni Lesetsembiso. (Dutheronomi 6:1) Mosi abehole lesive iminyaka lengu-40 futsi abefuna kutsi babe nesibindzi kute bamelane nebulukhuni lebebangahle babhekane nabo. Bekufanele betsembele kuNkulunkulu wabo Jehova, futsi betsembeke kuye. Ngako emavi aMosi ekwephetsa abakhutsata kutsi bente njalo. Nakacedza kubatjela iMitsetfo Lelishumi naleminye imitsetfo lebeyivela kuJehova, Mosi wabaniketa sikhumbuto lesinemandla lesitfolakala ku-Dutheronomi 6:4, 5, NW. (Fundza.)

 3. Ngumiphi imibuto lesitawucoca ngayo kulesihloko?

³ Ema-Israyeli bekati kutsi Jehova Nkulunkulu wawo ‘nguye yedvwana longuJehova.’ Ema-Israyeli letsembekile abekhonta Nkulunkulu munye, longuNkulunkulu wabokhokho bawo. Pho kungani Mosi awakhumbuta kutsi Jehova Nkulunkulu wawo ‘nguye yedvwana longuJehova’? Lelociniso lihlobana njani nekutsandza Nkulunkulu wetfu ngayo yonkhe inhlitiyo yetfu, ngawo wonkhe umphefumulo wetfu, nangawo onkhe emandla etfu? Emavi lakuDutheronomi 6:4, 5 asebenta njani kitsi lamuhla?

4, 5. (a) Itsini inchazelo yekucala yemavi latsi ‘nguye yedvwana longuJehova’? (b) Jehova wehluke njani kubonkulunkulu betive?

⁴ Kute lonjengaye. Emavi latsi ‘nguye yedvwana longuJehova’ asho kutsi kute lonjengaJehova, lokusho kutsi kute lolingana naye nobe lofana naye. Kungani Mosi asebentisa lamavi? Ngesikhatsi asho lamavi, abengakhulumeli inkholelo leliphutsa yamtsatfu amunye. Jehova unguMdali welizulu nemhlaba, futsi unguMbusi wako konkhe lokudaliwe. Nguye yedvwa longuNkulunkulu weliciniso futsi kute lomunye nkulunkulu lonjengaye. (2 Samuweli 7:22) Ngako emavi aMosi abekhumbuta ema-Israyeli kutsi kufanele akhonte Jehova kuphela. Bekungakafaneli alingise bantfu lebebawatungeletile, lebebakhonta bonkulunkulu labanyenti bemanga nabonkulunkulukati. Labo bantfu bebakholelwa kutsi bonkulunkulu babo bebangakwati kulawula tincenye letitsite temvelo.

⁵ Nasi sibonelo: Bantfu baseGibhithe bebakhonta nkulunkulu welilanga longu-Ra, nkulunkulukati wesibhakabhaka longu-Nut, nkulunkulu wemhlaba longu-Geb, nkulunkulu weNayile longu-Hapi futsi bebakhonta netilwane letinyenti. Jehova wabakhombisa kutsi mkhulu kunabo bonkhe labonkulunkulu ngesikhatsi atfumela Tishayo Letilishumi. Nkulunkulu lomkhulu webantfu baseKhenani bekunguBhali, futsi abengunkulunkulu wemanga bantfu baseKhenani lebebakholelwa kutsi nguye lowenta kuphila kwaba khona. Bebaphindze bakholelwe kutsi ungunkulunkulu wesibhakabhaka, wemvula nesangcotfo. Etindzaweni letinyenti, bantfu bebatsembela kuBhali kute abavikele. (Numeri 25:3) Ema-Israyeli bekufanele akhumbule kutsi Nkulunkulu wawo “unguNkulunkulu” weliciniso, wehlukile futsi ‘nguye yedvwana longuJehova.’​—Dutheronomi 4:35, 39.

6, 7. Itsini lenye inchazelo yeligama lelitsi “yedvwana,” futsi Jehova ukubonise njani kutsi nguye “yedvwana”?

⁶ Akashintjashintji futsi ucotfo. Ligama lelitsi “yedvwana”emavini latsi ‘nguye yedvwana longuJehova’ liphindze lisho kutsi injongo netento takhe singatetsemba. Jehova Nkulunkulu akakehlukani ekhatsi futsi akasuye umuntfu longeke umcondze kutsi unjani. Uhlala etsembekile, akashintjashintji, ucotfo futsi uneliciniso. Cabanga ngaloku: Wetsembisa Abrahama kutsi situkulwane sakhe sitawuhlala eVeni Lesetsembiso. Jehova waphindze wenta timangaliso letinyenti kute agcine lesetsembiso. Nobe besekuphele iminyaka lengu-430 ente leso setsembiso, injongo yaJehova beyisolo ingakashintji.​—Genesisi 12:1, 2, 7; Eksodusi 12:40, 41.

⁷ Ngemuva kwemakhulu eminyaka, Jehova wabita ema-Israyeli ngabofakazi bakhe futsi watsi kuwo: “Mine Nginguye. Ngaphambi kwami kute nkulunkulu lowake wabunjwa, futsi kute loyawubuye abe khona emvakwami.” Jehova waphindze wakwenta kwacaca kutsi injongo yakhe ngeke ishintje, ngesikhatsi atsi: “Solomane Nginguye.” (Isaya 43:10, 13; 44:6; 48:12) Lilungelo lelikhulu ema-Israyeli laba nalo kukhonta Nkulunkulu longashintjashintji nalohlala etsembekile. Natsi sinelilungelo lelifanako lamuhla.​—Malakhi 3:6; Jakobe 1:17.

8, 9. (a) Jehova ulindzeleni kubakhulekeli bakhe? (b) Jesu wakugcizelela njani kubaluleka kwemavi aMosi?

⁸ Mosi wakhumbuta ema-Israyeli kutsi indlela Jehova lawatsandza ngayo nalawanakekela ngayo ngeke ishintje. Futsi Jehova abelindzele kutsi nawo atinikele kuye kuphela futsi amtsandze ngenhlitiyo yonkhe, ngemphefumulo wonkhe nangemandla awo onkhe. Batali bekufanele bafundzise bantfwababo ngaJehova sonkhe sikhatsi, kute bakwati kukhonta Jehova kuphela.​—Dutheronomi 6:6-9.

⁹ Jehova akayishintji injongo yakhe, ngako angeke akushintje naloko lakulindzele kubakhulekeli bakhe beliciniso. Nangabe sifuna Jehova ajabule ngendlela lesimkhonta ngayo, kufanele sitinikele kuye kuphela futsi simtsandze ngayo yonkhe inhlitiyo yetfu, ngayo yonkhe ingcondvo yetfu, nangawo onkhe emandla etfu. Jesu watsi lona ngumyalo lobaluleke kakhulu. (Fundza Makho 12:28-31.) Asesifundze ngekutsi singabonisa njani ngetento tetfu kutsi siyakholelwa kutsi ‘Jehova Nkulunkulu wetfu nguye yedvwana longuJehova.’

10, 11. (a) Sikusho ngamuphi umcondvo kutsi sikhonta Jehova kuphela? (b) Labasha labangemaHebheru bakhombisa njani kutsi batinikele kuJehova kuphela?

¹⁰ Jehova nguye yedvwa longuNkulunkulu wetfu. Sitinikela kuye kuphela nangabe sikhonta yena yedvwa. Asibakhonti labanye bonkulunkulu nobe sifake imibono lengemanga netento letingahambisani nekukhonta kweliciniso nangabe sikhonta Jehova. Akasuye nje kuphela nkulunkulu longetulu kwalabanye bonkulunkulu nobe lonemandla kunabo. Kodvwa nguye Nkulunkulu weliciniso. Kumele sikhonte Jehova kuphela.​—Fundza Sembulo 4:11.

¹¹ Encwadzini yaDanyela, sifundza ngemaHebheru lasemasha boDanyela, Hananiya, Mishayeli kanye na-Azariya. Bakhombisa kutsi batinikele kuphela kuJehova ngekwala kudla lokudla lobekubonakala kungcolile kubakhulekeli baJehova. Bangani baDanyela labatsatfu bala kuguca phambi kwesitfombe seligolide saNebukhadnezari. Kubo, Jehova beketa kucala. Bebatsembeke ngalokuphelele kuye.​—Danyela 2:1–3:30.

12. Nangabe sitinikele kuJehova kuphela, yini lokufanele siyicaphele?

¹² Jehova kufanele ete kucala ekuphileni kwetfu. Nangabe sifuna kukhonta Jehova kuphela, kufanele sicaphele kutsi letinye tintfo atitsatsi sikhundla sakhe kitsi. Kungaba ngutiphi leto tintfo? Emitsetfweni Lelishumi, Jehova watsi bantfu bakhe akukafaneli bakhonte labanye bonkulunkulu. Akukafaneli bente nome ngabe ngutiphi tento letibonisa kukhonta titfombe. (Dutheronomi 5:6-10) Lamuhla tinyenti tinhlobo tekukhonta titfombe futsi letinye tato kungaba matima kutibona. Kodvwa Jehova akakushintji loko lakulindzele kitsi. Solo ‘unguye yedvwana longuJehova.’ Ngako asesibone kutsi lamuhla singakugwema njani kukhonta titfombe.

13. Yini lesingahle siyitsandze kakhulu kwendlula Jehova?

¹³ KuKholose 3:5 (fundza), sifundza ngetintfo letingona bungani betfu lobukhetsekile naJehova. Siyabona kutsi bukhali buhlotjaniswa nekukhonta titfombe. Kanjani? Nangabe sinesifiso lesikhulu ngentfo letsite, njengekuba nemali lenyenti nobe tintfo tekutijabulisa, loko kungalawula kuphila kwetfu njengankulunkulu lonemandla. Tonkhe letono letichazwe kuKholose 3:5 tihlobene nebukhali, lokuluhlobo lwekukhonta titfombe. Ngako, nasinesifiso lesikhulu sekuba naletintfo, singacala kutitsandza kwendlula indlela lesitsandza ngayo Nkulunkulu. Bese, Jehova akasabi ‘nguye yedvwana longuJehova’ kitsi. Asifuni kutsi kwenteke intfo lenjalo.

14. Ngusiphi secwayiso umphostoli Johane lasiniketa mayelana nekutsandza Nkulunkulu?

¹⁴ Umphostoli Johane wagcizelela intfo lefanako. Wecwayisa ngekutsi nangabe umuntfu atsandza tintfo letiseveni, “lutsandvo lwaBabe alukho kuye.” Letintfo tingaba “sifiso senyama, sifiso semehlo kanye nekugabisa ngetintfo umuntfu lanato.” (1 Johane 2:15, 16) Ngako, kudzingeka sitihlole njalo kuze sibone kutsi sitsandza lelive yini nobe cha. Singase sitfole kutsi sesicala kutsandza indlela yekutijabulisa yalelive, bantfu belive, kanye nedlela letsite yekugcoka nekutilungisa kwalelive. Nobe singafuna “tintfo letinkhulu” ngekuphishanekela imfundvo lephakeme. (Jeremiya 45:4, 5) Live lelisha selisemnyango. Ngako kudzingeka siwakhumbule emavi lanemandla aMosi! Nangabe sikucondza kutsi ‘Jehova Nkulunkulu wetfu nguye yedvwana longuJehova,’ futsi sikukholelwa mbamba loko, sitawutinikela kuye kuphela bese simkhonta ngendlela lafuna ngayo.​—Hebheru 12:28, 29.

15. Kungani Pawula akhumbuta emaKhristu kutsi Nkulunkulu ‘nguye yedvwa longuJehova’?

¹⁵ Emavi latsi ‘nguye yedvwana longuJehova’ asisita sicondze kutsi Jehova usita tinceku takhe kutsi tibe nebunye futsi tibe nenjongo lefanako ekuphileni. Ebandleni lebuKhristu lekucala bekunemaJuda, emaGriki, emaRoma kanye nebantfu baletinye tive. Bebakhuliswe ngetindlela letingafani, banemasiko langafani futsi bebatsandza tintfo letingafani. Ngenca yaloko, bekumatima ngalabanye kutsi balandzele indlela lensha yekukhonta nobe bashiye imikhuba yabo yakadzeni. Ngako kwadzingeka kutsi Pawula abakhumbute kutsi emaKhristu anaNkulunkulu munye longuJehova.​—Fundza 1 Khorinte 8:5, 6.

16, 17. (a) Ngusiphi siphrofetho lesigcwalisekako lamuhla, futsi sinamuphi umphumela? (b) Yini lengahle ilimate bunye betfu?

¹⁶ Kutsiwani ngelibandla lebuKhristu lamuhla? Umphrofethi Isaya watsi “ngemalanga ekugcina” bantfu bato tonkhe tive bebatawuhlangana ndzawonye kuze bakhonte Jehova. Bebatawutsi: “Utasifundzisa tindlela takhe, khona sitewuhamba emikhondvweni yakhe.” (Isaya 2:2, 3) Siyajabula kubona kutsi lesiphrofetho siyagcwaliseka lamuhla! Bazalwanebetfu nabodzadze basuka etindzaweni letingafani, bakhuluma tilwimi letingafani futsi banemasiko langafani. Kodvwa simunye ekukhonteni kwetfu Jehova. Nobe kunjalo, ngesizatfu sekutsi asifanani, ngaletinye tikhatsi asiboni ngaso linye.

¹⁷ Utiva njani ngebazalwanebetfu nabodzadze labanemasiko langafani? Lulwimi lwabo, indlela labagcoka ngayo, indlela labenta ngayo tintfo kanye nekudla labakudlako kungahle kwehluke kakhulu kuloko wena lokwetayele. Uyabagwema yini labo bantfu bese ucitsa sikhatsi lesinyenti nalabo labenta tintfo ngendlela lefana neyakho? Utiva njani ngemadvodza lamadzala lasendzaweni yakini lamancane kunawe ngeminyaka nobe eluhlanga nemasiko langafani newakho? Nangabe singakacapheli, singavumela lokungafani kwetfu kutsi kusiphazamise futsi kulimate bunye betfu.

18, 19. (a) Ngusiphi seluleko lesitfolakala ku-Efesu 4:1-3? (b) Yini lesingayenta kute sisite libandla lihlale linebunye?

¹⁸ Singasigwema njani simo lesinjengalesi? Pawula waniketa emaKhristu ase-Efesu seluleko lesisebentisekako. I-Efesu bekulidolobha lelinjingile lebelinebantfu labakhuliswe ngetindlela letinyenti letingafani. (Fundza Efesu 4:1-3.) Pawula wakhuluma ngebuntfu lobufaka ekhatsi kutfobeka, umoya lomuhle, kubeketela kanye nelutsandvo. Lobuntfu bufana nensika lecinile leyenta kutsi indlu ichubeke imile. Kodvwa kute indlu ihlale isesimeni lesikahle, kudzingeka kutikhandla. Pawula bekafuna emaKhristu ase-Efesu asebente ngekutimisela kute ‘agcine bunye bemoya.’

¹⁹ Sonkhe kufanele sente konkhe lokusemandleni etfu kute sigcine libandla linebunye. Singakwenta njani loko? Kwekucala, kudzingeka sitfutfukise futsi sikhombise buntfu Pawula lakhuluma ngabo lobufaka ekhatsi kutfobeka, umoya lomuhle, kubeketela kanye nelutsandvo. Kwesibili, kudzingeka sisebente ngekutimisela kute sitfutfukise ‘sibopho sekuthula.’ Kungevani lokutsite kufana nelufa loluncane kulobunye betfu; ngako kudzingeka sitimisele kute silungise lokungevani kuze sichubeke sinekuthula futsi sinebunye emkhatsini wetfu.

20. Singakhombisa njani kutsi siyacondza kutsi ‘Jehova Nkulunkulu wetfu nguye yedvwana longuJehova’?

²⁰ ‘Jehova Nkulunkulu wetfu nguye yedvwana longuJehova.’ Lamavi lawa anemandla kakhulu! Leso sikhumbuto sacinisa ema-Israyeli kutsi abeketelele bumatima ngesikhatsi angena futsi ancoba liVe Lesetsembiso. Lamavi angasicinisa natsi kute sikhone kubeketela ngesikhatsi sekuhlupheka lokukhulu futsi singene ePharadisi lelitako. Shengatsi singachubeka sitinikela kuJehova kuphela. Kudzingeka simtsandze futsi simkhonte ngenhlitiyo yetfu yonkhe, ingcondvo yetfu yonkhe, nangemandla etfu onkhe, futsi kudzingeka sisebente ngekutimisela kute sigcine kuthula nebunye nebazalwane betfu. Nangabe sichubeka senta letintfo, Jesu utasehlulela njengetimvu futsi sitakubona kugcwaliseka kwemavi akhe latsi: “Kotani nine lenibusiswe nguBabe, nitewudla lifa leMbuso lenalilungiselelwa kusukela kwasekelwa umhlaba.”​—Matewu 25:34.