Ezra
3 Ngenyanga yesi-7,+ ngesikhatsi ema-Israyeli* sekasemadolobheni awo, ahlangana ndzawonye aba munye eJerusalema. 2 Jeshuwa+ indvodzana yaJehosadaki kanye nebaphristi lebebakanye naye, naZerubhabheli+ indvodzana yaSheyaltiyeli+ kanye nabomnakabo bacala kwakha li-al’thare laNkulunkulu wema-Israyeli, kuze bente imihlatjelo yekushiswa kulo njengobe nje bekubhaliwe eMtsetfweni waMosi,+ umuntfu waNkulunkulu weliciniso.
3 Bakha leli-al’thare endzaweni lebelakhiwe kuyo ngisho nobe bebesaba tive letibatungeletile,+ futsi bacala kwentela Jehova imihlatjelo yekushiswa kulo, lokuyimihlatjelo leshiswa ekuseni naleshiswa kusihlwa.+ 4 Babese benta uMkhosi Wemadlangala* njengobe bekubhaliwe eMtsetfweni,+ futsi lilanga ngalinye bebanikela linani lemihlatjelo yekushiswa lebelilindzelekile.+ 5 Ngemuva kwaloko benta iminikelo yekushiswa leyentiwa njalo,+ benta iminikelo yekwetfwasa kwenyanga+ neminikelo yato tonkhe tikhatsi temikhosi lengcwele+ yaJehova, kanye neyabo bonkhe bantfu lebebaletse iminikelo yekutitsandzela+ kuJehova. 6 Kusukela ngelilanga lekucala lenyanga yesi-7,+ bentela Jehova imihlatjelo yekushiswa nanobe besisengakabekwa sisekelo selithempeli laJehova.
7 Bakhipha imali babhadala bantfu labebacetula ematje+ netisebenti letinemakhono,+ futsi batsatsa kudla, tinatfo, nemafutsa bakunika bantfu baseSidoni nebaseThire ngobe bebabaletsele tingodvo temisedari ngelwandle kusuka eLebanoni kuya eJopha,+ njengobe nje Khuresi inkhosi yasePheresiya abebanikete imvume yekwenta kanjalo.+
8 Ngenyanga yesibili emnyakeni wesibili, ngemuva kwekutsi babuye endlini yaNkulunkulu weliciniso eJerusalema, Zerubhabheli indvodzana yaSheyaltiyeli, Jeshuwa indvodzana yaJehosadaki nabo bonkhe bomnakabo, nebaphristi nemaLevi kanye nabo bonkhe lebebabuya ekutfunjweni+ lebebete eJerusalema bacala lomsebenti wekwakha. Babeka emaLevi laneminyaka lengu-20 budzala kuya etulu kutsi acondzise lomsebenti wendlu yaJehova. 9 Ngako Jeshuwa nemadvodzana akhe nabomnakabo, naKhadmiyeli nemadvodzana akhe, labatitukulwane taJuda, bahlangana ndzawonye kuze bacondzise labo labebasebenta endlini yaNkulunkulu weliciniso, futsi bebakanye netitukulwane taHenadadi+ nemadvodzana ato netihlobo tato, lebetingemaLevi.
10 Ngesikhatsi labakhi sebacedzile kwakha sisekelo selithempeli laJehova,+ baphristi labebagcoke tingubo tebaphristi futsi baphetse emacilongo,+ kanye nemaLevi langemadvodzana a-Asafa, labephetse emasimbali,* bema badvumisa Jehova ngekuvumelana naloko lokwashiwo nguDavide iNkhosi yaka-Israyeli.+ 11 Bacala kuhlabela+ badvumisa Jehova futsi bambonga, baphindzaphindza lengoma ngekushiyana batsi: “Ngobe muhle; umusa* lawentele ema-Israyeli utawuhlala kuze kube phakadze.”+ Bonkhe bantfu babese bamemeta kakhulu badvumisa Jehova, ngobe sisekelo sendlu yaJehova besesibekiwe. 12 Linyenti lebaphristi, emaLevi kanye netinhloko tetindlu, lokungemadvodza lasakhulile labeyibonile lendlu yaNkulunkulu leyayikhona kucala,+ lakhala kakhulu nalibona sisekelo salendlu sibekwa, kantsi labanye labanyenti bamemeta kakhulu bajabulile.+ 13 Ngako bantfu abazange bakhone kwehlukanisa emkhatsini wemsindvo wekujabula nemsindvo wekukhala, ngobe labantfu bebamemeta kakhulu kangangekutsi lomsindvo bewuvakala nakhashane.