Kubase-Efesu

2 Ngetulu kwaloko, Nkulunkulu waniphilisa ngisho nobe benifile ngenca yetiphambeko netono tenu,+ 2 lenake nahamba kuto ngekuvumelana nendlela yalelive,+ nangekuvumelana nembusi lonemandla ekucondzisa umoya,+ futsi nyalo lomoya+ usebenta kubantfu labangalaleli. 3 Njengalabantfu, sonkhe sake satiphatsa ngekuvumelana netifiso tenyama yetfu,+ senta lokufiswa yinyama nengcondvo yetfu,+ futsi ngekwemvelo besibantfwana labafanelwe lulaka+ njengabo bonkhe labanye. 4 Kodvwa ngenca yekutsi Nkulunkulu unesihawu lesikhulu,+ nangenca yelutsandvo lolukhulu lasitsandze ngalo,+ 5 usente saphila kanye naKhristu nanobe besifile ngenca yetiphambeko+⁠—nine nisindzisiwe ngenca yemusa lomkhulu waNkulunkulu 6 futsi usivuse kanye kanye, wasihlalisa kanye kanye etindzaweni tasezulwini simunye naKhristu Jesu,+ 7 kuze kutsi eveni* lelitako asikhombise kuphuphuma kwemusa wakhe lomkhulu nakasentela lokuhle tsine lesisebunyeni naKhristu Jesu.

8 Ngalomusa lomkhulu waNkulunkulu nisindzisiwe ngesizatfu sekukholwa;+ futsi loku akusingenca yenu, kodvwa kusipho saNkulunkulu. 9 Akusingenca yemisebenti,+ kuze kube bete umuntfu loba nesizatfu sekutigabatisa. 10 Tsine sadalwa+ nguNkulunkulu; sadalwa simunye naKhristu Jesu+ kuze sente imisebenti lemihle, leyo Nkulunkulu layihlela kusengaphambili kutsi siyente.

11 Nine lenibantfu betive ngekutalwa, khumbulani kutsi labo labasoke enyameni, lokuyintfo leyentiwa bantfu, bake banibita ngekutsi nibantfu labangakasoki. 12 Ngaleso sikhatsi beningamati Khristu, benehlukanisiwe nesive saka-Israyeli, beningahlanganyeli etivumelwaneni tesetsembiso,+ futsi benihlala eveni nibe nite litsemba, ningamati naNkulunkulu.+ 13 Nine lenake naba khashane naNkulunkulu senisebunyeni naKhristu Jesu, futsi senisedvute naNkulunkulu ngengati yaKhristu. 14 Ngobe Khristu ukuthula kwetfu,+ wente lamacembu lamabili aba munye+ futsi wabhidlita nelubondza lebeluwehlukanisile.+ 15 Ngenyama yakhe wacedza lobutsa, lokusho kutsi wacedza uMtsetfo lebewunemiyalo neticondziso, kuze ente lamacembu lamabili abe ngumuntfu munye lomusha ebunyeni naye+ futsi akhe kuthula; 16 nekutsi ente lamacembu lamabili abuyisane ngalokuphelele naNkulunkulu emtimbeni munye ngelugodvo*+ yena labetselwa kulo, ngobe wabucedza lobutsa+ ngemtimba wakhe. 17 Wefika futsi wamemetela tindzaba letimnandzi tekuthula kini nine lebenikhashane naNkulunkulu, nekuthula kulabo labasedvute naNkulunkulu, 18 ngobe ngaye, tsine lesingemacembu lamabili sinenkhululeko yekuya kuBabe ngemoya munye.

19 Ngako anisesibo bafokati netihambi,+ kodvwa senitakhamuti+ letikanye nalabangcwele, nemalunga endlu yaNkulunkulu,+ 20 futsi nakhiwe etikwesisekelo sebaphostoli nebaphrofethi,+ kantsi Khristu Jesu yena ulitje lekusimisa lelisisekelo.+ 21 Ebunyeni naye, sonkhe lesakhiwo lesihlanganiswe kanye kanye ngekuvumelana,+ siyakhula sibe lithempeli lelingcwele laJehova.*+ 22 Njengobe nisebunyeni naye, nani nakhiwa kanyekanye kuze nibe yindzawo Nkulunkulu latawuhlala kuyo ngemoya.+