Jesu Unemandla Kunemadimoni

UYAKHUMBULA kutsi yini leyabangela lenye yetingilosi taNkulunkulu kutsi ibe nguSathane Develi?— Kwaba sifiso sayo sebugovu sekufuna kukhontwa, lesabangela kutsi ihlubuke kuNkulunkulu. Letinye tingilosi tamlandzela yini Sathane?— Yebo tamlandzela. LiBhayibheli litibita ngekutsi ‘tingilosi taSathane’ nobe ngemadimoni.​—Sembulo 12:9.

Letingilosi letimbi nobe emadimoni tiyakholwa yini kuNkulunkulu?— LiBhayibheli litsi ‘emadimoni ayakholwa kutsi Nkulunkulu ukhona.’ (Jakobe 2:19) Kodvwa nyalo ayesaba. Loku kubangelwa kwati kutsi Nkulunkulu utawabhubhisa ngetento tawo letimbi latentile. Yini lena lembi leyentiwa nguletingilosi?—

LiBhayibheli litsi leto tingilosi tashiya indzawo yato ezulwini teta emhlabeni kuze tiphile njengebantfu. Loko takwenta ngobe betifuna kuya ecansini nalabasikati labahle labasemhlabeni. (Genesisi 6:1, 2; Juda 6) Kusho kutsini kuya ecansini?—

Kuya ecansini ngulapho indvodza nemfati basondzelana ngendlela lekhetsekile. Ngemuva kwaloko, kungase kukhule umntfwana esiswini samake. Kodvwa akukafaneli kutsi tingilosi tiye ecansini. Nkulunkulu ufuna kutsi ecansini kuye kuphela bantfu labashadene. Ngaleyo ndlela, nangabe umntfwana atalwa, indvodza nemfati bangakhona kumnakekela.

Ngesikhatsi tingilosi titsatsa imitimba yebantfu, futsi tiya ecansini nebantfu labasikati labasemhlabeni, bantfwana letabatala bakhula baba tidlakela. Letidlakela betinebudlova futsi tilimata bantfu. Ngenca yaloko, Nkulunkulu waletsa zamcolo kuze abhubhise letidlakela nabo bonkhe bantfu lababi. Kodvwa watjela Nowa kutsi akhe umkhumbi nobe sikebhe lesikhulu kuze kusindze bantfu labambalwa lebebenta tintfo letinhle. UMfundzisi Lomuhle Kakhulu watsi loko lokwenteka ngaZamcolo kubalulekile kutsi sikukhumbule.​—Genesisi 6:3, 4, 13, 14; Lukha 17:26, 27.

Ngesikhatsi kufika Zamcolo, yini leyentiwa nguletingilosi letimbi?— Tayekela kusebentisa imitimba yebantfu, tabuyela ezulwini. Kodvwa besetingakavumeleki kuchubeka titingilosi taNkulunkulu, ngako taba tingilosi taSathane nobe emadimoni. Kwentekani kulabantfwana baletingilosi lebebatidlakela?— Bafa kuZamcolo. Nalabanye bantfu labangamlalelanga Nkulunkulu bafa.

Kusukela ngesikhatsi saZamcolo, Nkulunkulu akasawavumeli lamadimoni kutsi abe nemitimba yebantfu. Nanobe singeke siwabone ngemehlo emadimoni, kodvwa solo ayachubeka abangela kutsi bantfu bente tintfo letimbi kakhulu. Enta kube nebubi kwendlula sikhatsi lesendlulile. Loko kubangelwa kutsi acoshwa ezulwini ajikijelwa emhlabeni.

Yini lebangela kutsi singawaboni emadimoni?— Kungobe angumoya. Kodvwa singaciniseka kutsi akhona. LiBhayibheli litsi Sathane ‘udukisa umhlaba wonkhe,’ futsi emadimoni akhe ayamsita kuloku.​—Sembulo 12:9, 12.

Develi kanye nemadimoni akhe bangasidukisa yini natsi futsi basikhohlise?— Yebo bangakwenta loko nasingakanaki. Kute sizatfu sekutsi sesabe. UMfundzisi Lomuhle Kakhulu watsi: ‘Develi ute emandla kimi.’ Nasitigcina sisondzele kuNkulunkulu, utasivikela kuDeveli nasemadimonini akhe.​—Johane 14:30.

Kubalulekile kwati tintfo letimbi emadimoni latawetama kusentisa tona. Asewucabange ngato. Ngutiphi tintfo letimbi emadimoni latenta nawafika emhlabeni?— Asengakefiki Zamcolo, aya ecansini nebantfu labasikati lokuyintfo lokungakafaneli tingilosi tiyente. Lamuhla emadimoni ayajabula nawabona bantfu bangawuhloniphi umtsetfo waNkulunkulu lomayelana nekuya ecansini. Asengikubute: Bobani labavumelekile kuya ecansini?— Bantfu labashadene kuphela.

Lamuhla labanye bantfwana bebafana nebemantfombatana baya ecansini, kodvwa loko akukafaneli bakwente. LiBhayibheli likhuluma ‘ngesitfo salomdvuna sangasese’ nobe ligwayi lagogo. (Levithikhusi 15:1-3, NW.) Sitfo sangasese semuntfu lomsikati kutsiwa yintfombi. Jehova wadala letitfo kute tisetjentiselwe injongo lekhetsekile lejatjulelwa kuphela bantfu labashadile. Kuyawajabulisa emadimoni kubona bantfu benta tintfo letingafunwa nguJehova. Sibonelo saloko kutsi emadimoni ayajabula nawabona umfana nentfombatana babambana ligwayi lagogo nobe intfombi. Wena uyafuna yini kujabulisa emadimoni?—

Kunalenye intfo emadimoni layitsandzako kodvwa Jehova langayitsandzi. Uyayati yini lentfo?— Budlova. (Tihlabelelo 11:5) Budlova busho kuphatsa kabi labanye bantfu kanye nekubalimata. Khumbula kutsi nguloko lokwentiwa nguletidlakela lebetingemadvodzana emadimoni.

Emadimoni atsandza nekwetfusa bantfu. Ngaletinye tikhatsi atenta bantfu labafile. Angase alingise ngisho nemavi abo. Ngekwenta njalo, emadimoni enta bantfu bakholwe kutsi bantfu labafile bayaphila futsi bayakwati kukhuluma nebantfu labaphilako. Emadimoni abangela kutsi bantfu labanyenti bakholwe etipokweni.

Ngako, kufanele sigadze kuze Sathane nemadimoni akhe bangasiyengi. LiBhayibheli lisecwayisa ngekutsi: ‘Sathane utenta ingilosi lelungile, futsi netinceku takhe tenta lokufanako.’ (2 Khorinte 11:14, 15) Kodvwa ecinisweni emadimoni atingilosi letimbi. Ase sibone kutsi angetama njani kusenta sibe njengawo.

Bantfu batifundzaphi tintfo letinyenti letimayelana nebudlova, kuya ecansini lokungakafaneli, tidalwa letingumoya kanye netipoko?— Abatifundzi yini ngekubukela tinhlelo letitsite letiku-TV nakuma-movie, nobe ngekudlala imidlalo leku-computer nakuma-video, ngekungena ku-Internet nangekufundza tincwadzi temahlaya? Kwenta letintfo kusenta sisondzelane naNkulunkulu yini nobe kusenta sisondzelane naDeveli kanye nemadimoni akhe? Wena ucabangani?—

Ngubani lofuna silalele futsi sibuke tintfo letimbi?— NguSathane nemadimoni akhe. Ngako yini lokufanele siyente?— Kufanele sifundze, silalele futsi sibukele tintfo letisisitako naletisenta sikwati kukhonta Jehova. Ucabanga kutsi ngutiphi letinye taletintfo letinhle lesingatenta?—

Nasenta tintfo letinhle, kute sizatfu sekutsi siwesabe emadimoni. Jesu unemandla kunawo futsi ayamesaba. Ngalelinye lilanga emadimoni amemeta Jesu atsi: “Utele kutesibhubhisa yini?” (Makho 1:24) Utativa njani nakufika sikhatsi sekutsi Jesu abhubhise Sathane nemadimoni akhe?— Kwanyalo, singaciniseka ngekutsi Jesu utasivikela emadimonini nangabe sichubeka sidvutane naye kanye naBabe wakhe wasezulwini.