Indlela Logcoka Ngayo Iyamkhatimulisa Yini Nkulunkulu?

1, 2. Kungani BoFakazi BaJehova bagcoka ngesizotsa? (Buka sitfombe lesisekucaleni kwalesihloko.)

LIPHEPHANDZABA lesi-Dutch nalibika ngemhlangano webaholi benkholo latsi: “Labanyenti bagcoka ngendlela lengakazitsi, ikakhulukati nakushisa. Kepha akusinjalo ngaBoFakazi BaJehova nabahlangene. . . . Emadvodza nebafana bembatsa libhantji nathayi, kantsi emantfombatana nabomake bagcoka tiketi letindze . . . ngendlela lekahle.” BoFakazi BaJehova batiwa ‘ngekutihlobisa ngetingubo letilungiswe kahle, ngekuzitsa nangekuvutfwa . . . ngendlela lefanele labasikati labatsi bahlonipha Nkulunkulu.’ (1 Thim. 2:9, 10) Umphostoli Pawula bekakhuluma ngebesifazane, kodvwa leseluleko siyasebenta nasemadvodzeni langemaKhristu.

² Indlela lesigcoka ngayo ibaluleke kakhulu kitsi njengetinceku taJehova, nakuNkulunkulu wetfu lesimkhontako. (Gen. 3:21) Loko lokushiwo liBhayibheli ngendlela lesigcoka ngayo futsi sitilungise ngayo kubufakazi bekutsi uMbusi weNdalo Yonkhe ufuna tinceku takhe tigcoke ngesizotsa. Ngako indlela lesigcoka futsi sitilungise ngayo akukafanele incunywe nguloko lesikutsandzako. Kufanele sicabange nangaloko lokujabulisa Jehova iNkhosi lenguMbusi.

 3. Yini lesiyifundzako kuloMtsetfo Nkulunkulu lawunika ema-Israyeli ngendlela yekugcoka?

³ Nasi sibonelo, uMtsetfo waNkulunkulu lobewubhalelwe ema-Israyeli bewuwavikela ekutiphatseni lokubi lobekwentiwa tive lebebakhelene nato. LoMtsetfo bewukhombisa kutsi Jehova uyatitondza timphahla letingabonisi umehluko emkhatsini wetimphahla talabadvuna nalabasikati​—loko lokuchazwa namuhla ngekutsi bantfu labagcoka ngendlela lengacondzakali kutsi bangubuphi bulili. (Fundza Dutheronomi 22:5.) Kulesicondziso saNkulunkulu lesimayelana nekugcoka, kuyacaca kutsi akajabuli ngetindlela tekugcoka letenta bantfu labadvuna babukeke njengalabasikati nome labasikati babukeke njengalabadvuna nome-ke kungacaci kutsi ngubani lomdvuna nome lomsikati.

 4. Yini lengasita emaKhristu kute ente tincumo letikahle endzabeni yekugcoka?

⁴ LiVi laNkulunkulu linetimiso letisita emaKhristu kutsi ente tincumo letikahle endzabeni yekugcoka. Akunandzaba kutsi bahlalaphi, lisiko labo linjani, nome simo selitulu sinjani. Asidzingi iminininngwane lesitjela lokwemukelekile nalokungemukeleki. Kunaloko, sicondziswa timiso teliBhayibheli letisisita sikhone kukhetsa. Nyalo sitococa ngetimiso teliBhayibheli letisisita sikhone kubona ‘intsandvo yaNkulunkulu, lenhle, leyemukelekako nalephelele’ nasikhetsa kwekugcoka.​—Rom. 12:1, 2.

5, 6. Indlela lesigcoka ngayo kufanele ibatsintse njani labanye?

⁵ Umphostoli Pawula wagcizelela simiso lesibalulekile lesitfolakala ku-2 Khorinte 6:4. (Fundza.) Indlela lesibukeka ngayo isho lokunyenti ngatsi. Bantfu labanyenti bakha umbono lotsite nababona “lingaphandle lemuntfu.” (1 Sam. 16:7) Njengobe sitinceku taNkulunkulu siyati kutsi kugcoka akusiko nje kugcoka loko lesikutsandzako. Letimiso lesitifundza eVini laNkulunkulu kufanele tisente singatigcoki timphahla letikala umtimba, letikhombisa umtimba nome letivusa inkhanuko. Loko kusho kungagcoki timphahla letiveta titfo temtimba. Akukafaneli bantfu labasibukako bangakhululeki nome babuke eceleni ngendlela lesigcoke ngayo.

⁶ Nangabe sihlobile, sigcoke kahle futsi sitilungise kahle, bantfu batasihlonipha njengobe sitinceku taJehova iNkhosi lenguMbusi. Loko kungabenta bamtsandze Nkulunkulu lesimkhontako. Ngetulu kwaloko, timphahla tetfu letifanelekako titayimelela kahle inhlangano yaJehova. Umphumela waloko kutsi labanye bangawulalela umlayeto losindzisa kuphila lesibatjela wona.

7, 8. Kunini lapho kubaluleke kakhulu khona kugcoka kahle?

⁷ Indlela lesigcoka ngayo kufanele idvumise Nkulunkulu wetfu longcwele, bazalwane betfu nabodzadze kanye nalabo lesibashumayelako. Kufanele sigcoke ngendlela lemmelela kahle Jehova kanye nemlayeto lesiwushumayelako. (Rom. 13:8-10) Kubalulekile kutsi sigcoke ngendlela lefanako nasenta imisebenti yebuKhristu, njengekuya emihlanganweni yelibandla nome emsebentini wekushumayela. Kufanele sigcoke ‘ngendlela lefanele [bantfu] labatsi bahlonipha Nkulunkulu.’ (1 Thim. 2:10) Liciniso, indlela yekugcoka iya ngendzawo lesikuyo. Ngako, emhlabeni wonkhe tikhonti taJehova tiyawanaka emasiko endzawo kute labanye bangakhubeki.

⁸ Fundza 1 Khorinte 10:31. Nasiya emihlanganweni yesigodzi kanye neyesifundza, indlela yetfu yekugcoka kufanele ihlonipheke, ingalandzeli indlela yekugcoka levame kulelive lisiphila kulo. Kufanele sigcoke ngendlela lehloniphekile nasifika nome sihamba ehhotela, ngesikhatsi sekutijabulisa ngaphambi kwekucala kwemhlangano nalapho sewuphelile. Loko kutasenta singabi nemahloni ekutibita ngaBoFakazi BaJehova, futsi ngeke sesabe kushumayela nakuvela litfuba lekwenta njalo.

9, 10. Kungani umBhalo waFiliphi 2:4 kufanele usisite endzabeni yekugcoka?

⁹ Fundza Filiphi 2:4. Kubaluleke ngani kutsi emaKhristu anake kutsi indlela lagcoka ngayo ibatsintsa njani labanye ebandleni? Sizatfu saloko kutsi tinceku taNkulunkulu tetama kamatima kusebentisa seluleko seliBhayibheli lesitsi; “Bulalani emalunga emitimba yenu asemhlabeni, ekwenteni budlundlulu, kungcola, inkhanuko.” (Khol. 3:2, 5) Asifuni kutsi kube matima ngalamanye emaKhristu kulandzela leso seluleko. Bazalwane nabodzadze labebangatiphatsi kahle kutelicasi kungenteka basachubeka nekulwisana netilingo. (1 Khor. 6:9, 10) Ngako asifuni kukwenta kube matima loko.

¹⁰ Nasihlangene nebazalwane betfu nabodzadze, indlela lesigcoke ngayo kufanele yente libandla libeyindzawo yekutiphatsa lokuhlantekile. Loko sikwenta nasemihlanganweni yelibandla nome kuletinye tindzawo. Sinenkhululeko yekukhetsa kutsi sigcokani. Nome kunjalo, sonkhe kufanele sigcoke ngendlela letawenta kube melula kutsi labanye bahlale bahlantekile futsi bagcine timiso taNkulunkulu ngendlela labacabanga ngayo, labakhuluma ngayo kanye nalabatiphatsa ngayo. (1 Phet. 1:15, 16) Lutsandvo sibili “alutiphatsi ngendlela lehlazisako, alutifuneli kwalo.”​—1 Khor. 13:4, 5.

11, 12. Ngukuphi kucabanga lokuhlakaniphile lokufanele sibe nako ngaloko lesitokugcoka?

¹¹ Tinceku taNkulunkulu natikhetsa kwekugcoka, tiyacabanga kutsi “yonkhe intfo leyentekako inesikhatsi sayo.” (Shu. 3:1, 17) Simo selitulu lesingafani kanye nekushintjashintja kwetikhatsi kwenta kutsi nendlela yekugcoka ishintjashintje. Kunjalo nangetimo tekuphila. Kodvwa, timiso taJehova atishintjashintji njengesimo selitulu.​—Mal. 3:6.

¹² Etindzaweni letishisako, kumatima kukhetsa kutsi nguyiphi indlela lehloniphekile yekugcoka nalebonisa kucabanga lokuhle. Bazalwane betfu nabodzadze bayajabula nasingatigcoki timphahla letikala umtimba nome letiveta umtimba. (Jobe 31:1) Nalapho siselwandle nome kuletinye tindzawo tekubhukusha, timphahla tetfu tekubhukusha kufanele tihlonipheke. (Taga 11:2, 20) Nakuba labanyenti kulelive bagcoka timphahla letiveta umtimba, tsine kufanele sikhatseteke ngekudvumisa Jehova longuNkulunkulu longcwele nalesimtsandzako.

13. Seluleko lesiku-1 Khorinte 10:32, 33 singasisita njani kute sikhetse kahle kwekugcoka?

¹³ Kunalesinye simiso lesibalulekile lesingasisita kute sikhone kukhetsa timphahla letihloniphekile. Nguleso lesitsintsa bonembeza balanye, kungakhatsaliseki kutsi sikholwa nabo nome cha. (Fundza 1 Khorinte 10:32, 33.) Kufanele sicabangisise ngetimphahla letingakhuba labanye. Pawula wabhala watsi; “Nguloyo naloyo kitsi akajabulise makhelwane wakhe ngetintfo letinhle futsi amakhe. NaKhristu akatijabulisanga yena.” (Rom. 15:2, 3) Jesu abecabanga ngekusita labanye kucala, loko bekubalulekile ekwenteni intsandvo yaNkulunkulu. Ngako, sitatiyekela timphahla nome tindlela tekugcoka lesititsandzako letingenta bantfu lesibashumayelako bangatinaki tindzaba letimnandzi.

14. Batali bangabacecesha njani bantfwana babo kutsi badvumise Nkulunkulu ngendlela yabo yekugcoka?

¹⁴ Batali labangemaKhristu kufanele bafundzise bantfwana babo kusebentisa timiso letiseBhayibhelini. Loko kufaka ekhatsi kutsi batali kanye nebantfwana babo betame kujabulisa inhlitiyo yaNkulunkulu ngendlela labagcoka baphindze batilungise ngayo. (Taga 22:6; 27:11) Batali bangacecesha bantfwana babo kutsi bahloniphe Nkulunkulu labamkhontako ngekuba sibonelo lesihle kubantfwana babo, babatsandze futsi babanikete ticondziso letakhako. Kuhle nangabe batali bafundzisa bantfwana babo kutsi bangatitfolaphi timphahla letikahle. Hhayi nje timphahla labatitsandzako kodvwa letitabasita balimelele kahle lilungelo labo lekukhonta Jehova Nkulunkulu.

15. Yini lengasisita sikhetse ngekuhlakanipha endzabeni yekugcoka?

¹⁵ LiVi laNkulunkulu lineticondziso letikahle letingasisita sikhone kwenta tincumo letihlakaniphile letidvumisa Nkulunkulu. Nanobe kunjalo, siyatikhetsela lesifuna kukugcoka. Tintfo lesititsandzako atifanani, njengobe netimo tetfu temnotfo tingalingani. Nome kunjalo, timphahla tetfu kufanele tihlale tihlobile, tilungiswe kahle, tifaneleka futsi tibe nguletemukelekile endzaweni lesikuyo.

16. Kungani kubalulekile kutsi sente imetamo yekufuna timphahla letifanelekako?

¹⁶ Kufanele sivume kutsi akusimelula ngaso sonkhe sikhatsi kwenta tincumo letinengcondvo, naleticatjangwe kahle. Titolo letinyenti titsengisa timphahla letingafaneleki, ngako kungatsatsa sikhatsi nemetamo kufunisisa tiketi, emaloko nemahembe abomake nome emasudu kanye nemabhuluko emadvodza lakahle. Ngako, labo lesikhonta nabo batayinaka futsi bayijabulele imetamo yetfu yekufuna timphahla letifanelekako. Sitativa senetisekile ngekutsi siletse ludvumo kuBabe wetfu wasezulwini ngendlela lesigcoka ngayo.

17. Ngutiphi timo letingakhombisa kutsi umzalwane uyafaneleka yini kuba nesilevu noma cha?

¹⁷ Kutsiwani ngebazalwane labayekela silevu sigcwale buso? UMtsetfo waMosi bewutsi emadvodza kufanele abenetilevu. Nome kunjalo, emaKhristu awekho ngephansi kweMtsetfo waMosi futsi awakaphoceleki kutsi awugcine. (Lev. 19:27; 21:5; Gal. 3:24, 25) Kulamanye emasiko kuvumelekile kutsi silevu sihhulwe futsi silungiswe kahle ngendlela lehloniphekile, lokuyintfo lengeke ibaphatamise labanye ekulaleleni umlayeto weMbuso. Ecinisweni, labanye bazalwane labanemalungelo latsite banato tilevu. Nome kunjalo, labanye bazalwane bangakhetsa kutihhula tilevu tabo. (1 Khor. 8:9, 13; 10:32) Kulamanye emasiko nome tindzawo, tilevu atikavumeleki futsi atemukeleki kuBoFakazi BaJehova. Kubanesilevu kungabangela kutsi umzalwane lonaso angaletsi ludvumo kuNkulunkulu ngendlela lagcoka aphindze atilungise ngayo kanye nekutsi angafakazelwa kahle.​—Rom. 15:1-3; 1 Thim. 3:2, 7.

18, 19. UmBhalo waMikha 6:8 ungasisita njani kutsi sigcoke ngendlela lejabulisa Nkulunkulu?

¹⁸ Siyambonga Jehova ngekungasiniketi imitsetfo lenemininingwane leminyenti lemayelana nekugcoka kanye nekutilungisa. Kunaloko, usivumele kutsi sisebentise inkhululeko yekutikhetsela siphindze sente tincumo letinengcondvo letisekelwe etimisweni teliBhayibheli. Ngako-ke, ngendlela lesigcoka siphindze sitilungise ngayo, singakhombisa kutsi sifuna ‘kuhamba naNkulunkulu ngesizotsa.’​—Mik. 6:8.

¹⁹ Siyati kutsi Jehova ungcwele futsi timiso takhe tingasicondzisa ekuphileni. Nangabe sifuna kuba nesizotsa futsi sitfobeke, sitawuphila ngetimiso takhe. Kuba nesizotsa kufaka ekhatsi kuhlonipha imibono kanye nendlela labativa ngayo labanye. Ngako, ‘sihamba naNkulunkulu ngesizotsa’ ngekwenta kuphila kwetfu kuvumelane netimiso takhe futsi siyihloniphe indlela labanye labativa ngayo.

20. Indlela lesigcoka siphindze sitilungise ngayo kufanele ibatsintse njani labanye?

²⁰ Indlela lesikhetsa ngayo kwekugcoka kufanele yente labasibukile babone kutsi sitinceku taJehova. Bazalwane betfu nabodzadze kanye nabobonkhe bantfu kufanele babone kutsi siyakufanelekela kumelela Nkulunkulu wetfu lolungile. Unetindlela letiphakeme tekuphila futsi siyajabula uma sitikhandla kuze sitifinyelele. Kufanele sibabonge bazalwane betfu nabodzadze labatilungisa baphindze batiphatse ngendlela lekahle. Kutiphatsa lokunjalo kudvonsela labo labanetinhlitiyo leticotfo kutsi balalele umlayeto weliBhayibheli losindzisa kuphila naloletsa ludvumo nenjabulo kuJehova. Kwenta tincumo letihlakaniphile endzabeni yekugcoka kutawuletsa ludvumo kuLoyo ‘lowembetse ludvumo nebukhosi.’​—Hla. 104:1, 2.