‘Ungumfati Lomuhle Sibili’

SARA wema emkhatsini welikamelo futsi wacalata yonkhe indzawo. Asewucabange ngalomfati waseMphumalanga Lesekhatsi, abenemehlo lamahle njengewelituba. Bekabonakala etfukile yini? Nangabe kunjalo, kumelula kucondza kutsi beketfuswe yini. Betitinyenti tintfo lebetenteka kulelikhaya. Yena nendvodza yakhe Abrahama bebanetikhatsi letinyenti letijabulisako kulo.a Lelikhaya bebalakhe bobabili.

Bebahlala e-Uri edolobheni lebelinjingile, ligcwele bantfu labanemakhono emsebentini wetandla kanye nalabatsengisako. Ngako nabo bebanjingile. Likhaya laSara belingagcini nje ngekuba yindzawo labeka kuyo tintfo lanato, kodvwa yena nemyeni wakhe bebake baba netikhatsi letijabulisako naletidvumatako. Kulelikhaya bebathantaze kanyenti kuNkulunkulu wabo labamtsandzako, Jehova. Ngako Sara bekanetizatfu letinyenti tekuyitsandza lendzawo.

Noma kunjalo, Sara bekatimisele kushiya tonkhe tintfo labekatetayele. Ngisho noma kungenteka bekacishe abe neminyaka lengu-60 budzala, bekatimisela kuhamba aye etindzaweni langatati futsi abeke kuphila kwakhe engotini njengoba bekete litsemba lekubuyela emuva. Yini leyabangela lolushintjo lolungaka emphilweni yaSara? Yini tsine lesingayifundza lamuhla esibonelweni sakhe sekukholwa?

Kungenteka Sara wakhulela e-Uri. Lamuhla lelidolobha selaba tindzala. Kepha ngesikhatsi saSara imikhumbi yebantfu labebatsengisa beyivame kubonakala emfuleni i-Yufrathe, itfwele tintfo letiligugu letibuya khashane tita kulelidolobha lelinjingile. Titaladi talelidolobha betivame kugcwala bantfu, imikhumbi incitisana kute itfole indzawo layingema khona futsi etimakethe kugcwele tintfo letitsengiswako. Ase ucabange Sara akhula kulelidolobha leliphitsitelako futsi bantfu labanyenti asabati ngemagama. Siyaciniseka kutsi nabo bebamkhumbula ngoba bekamuhle kakhulu. Ngetulu kwaloko, umndeni wakubo lomkhulu bewuhlala khona.

EBhayibhelini, Sara watiwa kakhulu ngekukholwa kwakhe lokukhulu kodvwa bekangakhonti nkulunkulu wenyeti lobekakhontwa bantfu base-Uri. Umbhoshongo walonkulunkulu bewumkhulu ubonakala kulo lonkhe lelidolobha. Kepha Sara bekakhonta Nkulunkulu weliciniso, Jehova. LiBhayibheli alisitjeli kutsi Sara waba njani nekukholwa kuJehova. Babe wakhe wake wakhonta titfombe. Ngemva kwesikhatsi, Sara washada na-Abrahama lobekamdzala kunaye ngeminyaka lelishumi.b (Genesisi 17:17) Abrahama wabese watiwa ngekutsi ngubabe “wabo bonkhe lababa nekukholwa.” (Roma 4:11) Umshado wabo bewucinile ngobe bebahloniphana, bakhulumisana kahle futsi batimisele kubambisana kuze balungise tinkinga letimatima. Ngetulu kwako konkhe, kutsandza kwabo Nkulunkulu kwabenta baba munye.

Sara bekamtsandza kakhulu umyeni wakhe futsi likhaya labo belise-Uri labekunetihlobo tabo khona. Noma kunjalo ngemuva kwesikhashana nje babhekana nesimo lesidvumatako. LiBhayibheli lisitjela kutsi “Sara abeyinyumba, ate bantfwana.” (Genesisi 11:30) Ngaleso sikhatsi, simo Sara bekabhekene naso sasimatima kakhulu ngenca yelisiko laleyo ndzawo. Noma kunjalo, Sara wahlala etsembekile kuNkulunkulu nakumyeni wakhe. Umshana wabo longuLoti lobekashonelwe nguyise wagcina sekayindvodzana yabo. Bachubeka bahlala ndzawonye kwaze kwaba ngulapho timo tishintja.

Abrahama waya kuSara afile yinjabulo. Abengakukholelwa loko bekusandza kwenteka. Nkulunkulu labamkhontako bekasandza kukhuluma naye asebentisa ingilosi! Asewumcabange nje Sara ngemehlo akhe lamahle abuka umyeni wakhe ngenjabulo ambuta atsi: “Utsiteni kuwe? Ngicela ungitjele!” Abrahama wacale wahlala phasi wetama kukhumbula, wase umtjela loko Jehova lakushito: “Phuma eveni lakini nasetihlotjeni takho, uye eveni lengitakukhombisa lona.” (Imisebenti 7:2, 3) Ngemuva kwaloko, babese bacala kucabangisisa ngalesabelo Jehova labebanika sona. Besekufanele bashiye imphilo yabo lentofontofo bayophila njengebafokati! Bekatawutsini Sara? Asingabati kutsi Abrahama wambukisisa alangatelela kuva kutsi utawutsini. Abetawuvuma yini vele kumsekela kulolushintjo lolungaka lobelutawenteka ekuphileni kwabo?

Lesimo Sara labhekana naso singabonakala simangalisa. Singase sicabange, ‘Uyati Nkulunkulu akazange sekangicele noma acele lengishade naye kutsi sente intfo lefana nalena.’ Noma kunjalo, sonkhe kuyenteka sibhekane nesimo lesifanako futsi kudzingeke sikhetse. Siphila eveni lelitsandza umcebo futsi lingasenta siphishekele bunjinga, silwele kuphila lokuntofontofo kanye nekuvikeleka. Noma kunjalo, liBhayibheli lisikhutsata kutsi sente tintfo letiphatselene naNkulunkulu kanye nekumjabulisa kute kucala ekuphileni kwetfu. (Matewu 6:33) Nasicabangisisa ngaloko lokwentiwa nguSara, singase sitibute, ‘Yini lengitayikhetsa ekuphileni kwami?’

Njengobe Sara apakisha timphahla tabo, wabhekana nebumatima bekukhetsa lebebatawuhamba nako naloko lebebatakushiya. Njengobe bese batawuba bafokati, bebatawutsatsa tintfo labebatatidzinga nalebetingakhona kwetfwalwa ngemakamela netimbongolo. Asingabati kutsi timphahla tabo letinyenti bekufanele batitsengise noma batiphe labanye. Bebatawushiya imphilo lenhle lekulelidolobha lelinetimakethe letidvutane labebatsenga khona kudla lokutinhlavu, inyama, titselo, timphahla kanye naletinye tintfo labebatidzinga nalabebatitsandza.

Kungenteka bekusolo kumatima kuSara kutsi ashiye likhaya lakhe. Nangabe belinjengemiti leminyenti yase-Uri, kuyacaca kutsi Sara walahlekelwa kakhulu. Bacwaningi batfole kutsi letinye taletindlu betinemakamelo langu-12, imitfombo yemanti lahlobile kanye nemaphayiphi laletsa emanti endlini. Ngisho nelikhaya leliphasi beliba neluphahla lolucinile, lubondza, kanye nesivalo lesikhiywako. Lithende belingabavikela ngendlela lefanako yini etigebengwini? Belingakhona yini kubavikela etilwaneni lebetivamile etindzaweni lokukhulunywa ngato eBhayibhelini, letifaka ekhatsi emabhubesi, tingwe, emabhele kanye netimphisi?

Umndeni wabo-ke? Bobani Sara labetabashiya? Umyalo waNkulunkulu lobewutsi “phuma eveni lakini nasetihlotjeni takho” bewungabonakala umatima kakhulu kuye. Kungenteka lomfati lobekanemusa neluvelo bekanetihlobo letinyenti labesondzelene nato futsi labengayuze aphindze atibone. Letihlobo betifaka ekhatsi bosisi, bobhuti, bomzala, bomshana bo-anti kanye nabomalume. Noma kunjalo, ngesibindzi Sara wachubeka alungiselela loluhambo lilanga ngelilanga.

Ngetulu kwaletinkinga, Sara wacedza kupakisha futsi abesakulungele kuhamba ngelilanga lebelibekiwe. Thera lobekangubabe wabo bekatawuhamba nabo ngisho noma bekaneminyaka lecishe ibe ngu-200 budzala. (Genesisi 11:31) Asingabati kutsi Sara bekanemsebenti lomkhulu wekunakekela lomtali wakhe losakhulile. NaLoti wahlanganyela nabo ekulaleleni Jehova futsi ‘besuka eveni lemaKhaledi.’​—Imisebenti 7:4.

Bacale baya eHarani indzawo lengemakhilomita langu-960 kusuka enyakatfo lesenshonalanga, bahamba ngendlela leya eYufrathe. Bahlala sikhatsi lesitsite eHarani. Kungenteka Thera babe wabo bese agula angasakhoni kuchubeka neluhambo. Bahlala lapho waze wafa asaneminyaka lengu-205 budzala. Ngaphambi kwekutsi bachubeke neluhambo, Jehova waphindze wakhuluma na-Abrahama wamtjela kutsi akasuke kulendzawo aye endzaweni latamkhombisa yona. Kodvwa manje waphindze wametsembisa intfo lejabulisako watsi: “Ngitakwenta ube sive lesikhulu.” (Genesisi 12:2-4) Nabesuka eHarani Abrahama bekaneminyaka lengu-75 budzala kantsi Sara abena-65 futsi bebete bantfwana. Abrahama abetawuba njani sive lesikhulu? Abetawutsatsa lomunye umfati yini? Kungenteka loko bekumkhatsata Sara ngoba kutsatsa sitsembu bekungumkhuba lovamile ngaleso sikhatsi.

Besuka eHarani bachubeka neluhambo lwabo. Naka kutsi nyalo bese bahamba nabobani. Umndeni wa-Abrahama wahamba netintfo lebewutitfolile kanye nebantfu. Bekubobani labantfu? Lendzaba isitjela kutsi bahamba “netisebenti labesebatitfole eHarani.” (Genesisi 12:5) Asingabati kutsi Abrahama naSara bebakhuluma ngaJehova kubantfu labebatimisele kubalalela. Kungako emaJuda asendvulo abetsi labantfu lokukhulunywa ngabo kulelivesi bafaka ekhatsi bantfu lababese bahlanganyela na-Abrahama naSara ekukhonteni Jehova. Nangabe kunjalo, asingabati kutsi kukholwa lokucinile kwaSara kwenta bantfu bamlalela nakakhuluma nabo ngaNkulunkulu wakhe nangelitsemba lanalo. Kubaluleke kakhulu kutsi sicabangisise ngaloku, ngobe esikhatsini lesiphila kuso kukholwa nelitsemba sekuyimvelakancane. Ungabacocela yini labanye ngetintfo letijabulisako lotifundze eBhayibhelini?

Nasebewele iYufrathe cishe ngaNisan 14, 1943 B.C.E., babese baya eningizimu kulelive Jehova labekabetsembise lona. (Eksodusi 12:40, 41) Ase ucabange Sara acalata yonkhe indzawo amangaliswa ngulobuhle bayo kanye nesimo sayo selitulu lesihle. Eceleni kwetihlahla teMore letidvutane neShekhemu, Jehova waphindze watibonakalisa ku-Abrahama watsi: “Lelive ngiyawulinika titukulwane takho.” Leligama lelitsi “titukulwane” belisho lukhulu ku-Abrahama! Siyaciniseka kutsi lamenta wakhumbula ensimini yase-Edeni lapho Jehova abiketela khona kutsi ngalelinye lilanga bekutawuba nentalo lebeyitawubhubhisa Sathane. Jehova abesavele amtjelile Abrahama kutsi bonkhe bantfu emhlabeni bebatawubusiswa ngalentalo yakhe.​—Genesisi 3:15; 12:2, 3, 6, 7.

Loko bekungasho kutsi umndeni wakhe besewungeke ubhekane netinkinga letikulomhlaba. Kwaba nendlala eveni laseKhenani, ngako Abrahama watsatsa umndeni wakhe waya nawo eGibhithe. Noma kunjalo wabona kutsi kunengoti letsite kuleyo ndzawo. Ngako wakhuluma naSara watsi: “Ngiyakwati kutsi ungumfati lomuhle, nalobukekako. EmaGibhithe atawutsi angakubona atsi: ‘Ngumkakhe lo,’ bese ayangibulala, wena angakubulali. Ngako-ke ubotsi ungudzadzewetfu, khona kutangihambela kahle ngisindze ngenca yakho.” (Genesisi 12:10-13) Yini leyenta Abrahama wenta lesicelo lesingakavami?

Abrahama abengasilo ligwala noma umcambimanga njengobe kusho labanye labaphikisako. Ecinisweni vele Sara bekangudzadzewabo ngobe bebanababe munye. Ngako Abrahama abenesizatfu lesiphatsekako sekwenta lesicelo. Abrahama naSara bebati kutsi kute lobekubaluleke kakhulu kwengca injongo yaNkulunkulu lemayelana nentalo lekhetsekile, ngako kuphepha kwa-Abrahama bekuyintfo lebaluleke kakhulu. Ngetulu kwaloko, bacwaningi bayakufakazela kutsi emadvodza lanemandla aseGibhithe abengamtsatsa ngenkhani umfati walenye indvodza futsi ayibulale. Ngako Abrahama wenta ngekuhlakanipha futsi naSara watitfoba wabambisana nesincumo semyeni wakhe.

Kwabonakala kutsi lentfo Abrahama labeyesaba beyiliciniso ngoba tindvuna taFaro takhangwa buhle baSara—lobekuyintfo lengakavami kumuntfu longangaye. Letindvuna tahamba tayobikela Faro futsi wase utsi lomfati akalandvwe! Ase ucabange nje ngebuhlungu Abrahama labuva noma kwesaba Sara labenako. Noma kunjalo, kubonakala ngatsi akazange aphatfwe njengesigcila, kepha waphatsiswa kwesimenywa lesibalulekile. Kungenteka Faro besekahlele kumtsatsa abe ngumkakhe futsi wamgabisela ngemnotfo wakhe wase ukhuluma “nemnakabo” longu-Abrahama mayelana nekumtsatsa amente umfati.​—Genesisi 12:14-16.

Ase ucabange ngaSara nakasefasitelweni lalesigodlo abuka live laseGibhithe. Wativa njani nakaphindze aba sendlini lenetindvonga, kanye neluphahla futsi aletselwa tibiliboco tekudla? Watsatseka yini ngalemphilo lentofontofo mhlawumbe lencono kakhulu kunalena labeyiphila ngesikhatsi ase-Uri? Cabanga nje kutsi Sathane abetawujabula kanganani kube Sara wakhetsa kumlahla Abrahama futsi abe ngumfati waFaro! Kepha Sara akazange ayente intfo lenjalo. Wetsembeka kumyeni wakhe, emshadweni wabo kanye nakuNkulunkulu wakhe. Shengatsi bonkhe bantfu labashadile kulelive leligcwele kutiphatsa lokubi bangalingisa lesibonelo lesihle sekwetsembeka! Ungamlingisa yini Sara ngekwetsembeka kubantfu lobatsandzako nakubangani bakho?

Jehova wafaka sandla ekuvikeleni lomfati lotsandzekako, ngekutfumela tinhlupho kuFaro nemndeni wakhe. Watsi Faro nakeva kutsi Sara ngumka-Abrahama, wambuyisela emuva kumyeni wakhe wase ucela wonkhe umndeni wakhe kutsi uhambe eGibhithe. (Genesisi 12:17-20) Abrahama wajabula kakhulu ngekutsi aphindze atfole umkakhe! Khumbula kutsi abetsite kuye: “Ngiyakwati kutsi ungumfati lomuhle, nalobukekako.” Kepha Abrahama bekabone buhle bangekhatsi—lobuncono kakhulu kunekubukeka kwangephandle. Sara bekanenhlitiyo lenhle, lokuyintfo leligugu kuJehova. (1 Phetro 3:1-5) Lobo buhle sonkhe lesingabuhlakulela. Nasibeka tintfo letimayelana naNkulunkulu kucala ekuphileni kwetfu, setama kucocela labanye ngaNkulunkulu futsi silalela imitsetfo yakhe lemayelana nekutiphatsa nasibhekene netilingo, sitawukhona kulingisa kukholwa kwaSara.