Leli Lifa Letfu Lelivela KuNkulunkulu

 1. Yini Jehova layilondvolotile kute kuzuze bantfu?

JEHOVA, ‘Nkulunkulu longabhubhi lophila phakadze naphakadze,’ ulondvolote umlayeto wakhe lonika bantfu kuphila. Lomlayeto utawuhlale ukhona, ngobe “livi leNkhosi [Jehova] limile, kuyawudzimate kube phakadze.” (1 Phet. 1:23-25) Sijabula kakhulu ngekutsi Jehova usilondvolotele lokwatiswa lokubalulekile eVini lakhe liBhayibheli.

 2. Yini Nkulunkulu layilondvolote eVini lakhe kute isetjentiswe bantfu bakhe?

² EVini lakhe, Nkulunkulu ulondvolote libito latikhetsela lona kute lisetjentiswe bantfu bakhe. ImiBhalo icale ikhulume ‘ngaNkulunkulu Jehova nakusadalwa lizulu nemhlaba.’ (Gen. 2:4) Libito laNkulunkulu labhalwa ngalokusimangaliso tikhatsi letinyenti etibhelekeceni tematje lebetineMiyalo Lelishumi. Nasi sibonelo: Umyalo wekucala ucala ngekutsi: ‘NginguJehova Nkulunkulu wenu.’ (Eks. 20:1-17) Libito laNkulunkulu lichubeke likhona ngobe iNkhosi lenguMbusi Jehova ilondvolote liVi lakhe nelibito lakhe ngisho nobe Sathane enta imetamo yekulicedza.—Hla. 73:28.

 3. Ngisho nobe emaphutsa enkholo amanyenti, yini Nkulunkulu layilondvolotile?

³ Jehova uphindze walondvolota liciniso eVini lakhe. Ngisho nobe emaphutsa enkholo amanyenti emhlabeni wonkhe, siyajabula ngekutsi Nkulunkulu usinike kukhanya kwakhe neliciniso. (Fundza Tihlabelelo 43:3, 4.) Ngisho nobe bantfu labanyenti emhlabeni bahamba ebumnyameni, tsine sijabulela kuhamba ekukhanyeni lesikunikwa nguNkulunkulu.—1 Joh. 1:6, 7.

4, 5. Nguliphi lilungelo lelikhulu lesibe nalo kusukela ngemnyaka wa-1931?

⁴ Njengobe singemaKhristu, sinelifa leliligugu. I-Collins Cobuild English Dictionary itsi: “Lifa lelive lihlanganisa buntfu, imihambo nobe tindlela tekuphila talelo live lesekuphele iminyaka leminyenti tisetjentiswa futsi tendluliselwa kusuka kulesinye situkulwane kuya kulesinye.” Lifa letfu lelivela kuNkulunkulu lihlanganisa sibusiso sekuba nelwati lolungulonalona lweliVi laNkulunkulu nekulati kahle liciniso ngaye netinjongo takhe. Liphindze lifake ekhatsi nelilungelo lelibalulekile.

⁵ Lelo lungelo laba yincenye yalelifa letfu emhlanganweni lesaba nawo eColumbus, e-Ohio, eMelika, nga-1931. Emaphepheni eluhlelo lwemhlangano bekunetinhlavu letimbili temagama. Bantfu labanyenti etilalelini bebetama kucombela kutsi timelelani kantsi labanye bebacombela kahle. Betimelela libito letfu lelisha. Besisolo sibitwa ngekutsi siBafundzi beliBhayibheli, kodvwa semukela kubitwa ngekutsi siboFakazi BaJehova kulesincumo lesentiwa ngelisontfo laJuly 26, 1931. Bekujabulisa kakhulu kwemukela lelibito lelisekelwe eBhayibhelini. (Fundza Isaya 43:12.) Lomunye umzalwane utsi: “Angeke ngikukhohlwe kumemeta nekushaywa kwetandla lobekuvakala kuleyondzawo yemhlangano.” Kute labanye bantfu emhlabeni labebalifuna lelo bito, kodvwa Nkulunkulu usibusisile ngekulisebentisa kuleminyaka lengetulu kwa-80. Kulilungelo lelikhulu kuba boFakazi BaJehova!

 6. Lifa letfu lelivela kuNkulunkulu lifaka ekhatsi kuphi kwatiswa lokuliciniso?

⁶ Lifa letfu lelivela kuNkulunkulu lifaka ekhatsi kwatiswa lokunyenti lokuliciniso nalokubalulekile kwasendvulo. Cabanga nga-Abrahama, Isaka naJakobe. Kungenteka kutsi lamadvodza asendvulo nemindeni yawo abecoca ngekutsi angamjabulisa njani Jehova. Akusimangalisi-ke kutsi Josefa wakubalekela kutiphatsa kabi ngekwelicasi kute ‘angoni kuNkulunkulu.’ (Gen. 39:7-9) Indlela yekuphila yemaKhristu, beyendluliselwa kulabanye ngekubatjela ngemlomo nobe ngekubeka sibonelo. Lokunye kwaloko bekungemaphuzu lamayelana neSidlo seNkhosi Sakusihlwa, leso umphostoli Pawula lasendlulisela emabandleni ebuKhristu. (1 Khor. 11:2, 23) Lamuhla, imininingwane lesiyidzingako kute sikhonte Nkulunkulu ‘ngemoya nangeliciniso’ ibhalwe eVini lakhe. (Fundza Johane 4:23, 24.) LiBhayibheli libhalelwe kukhanyisela bonkhe bantfu, kodvwa tsine njengetinceku taJehova silijabulela kakhulu.

 7. Lifa letfu lifaka ekhatsi siphi setsembiso lesitsintsa inhlitiyo?

⁷ Lenye incenye yalelifa letfu ifaka ekhatsi lokunye kulandzisa lokusandza kushicilelwa lokukhombisa kutsi ‘Jehova ungakitsi.’ (Hla. 118:7) Loko kusenta sitive silondzekile, ngisho nobe sishushiswa. Lokunye lokutsintsa inhlitiyo kwalelifa letfu lelikhulako ngulesetsembiso: “‘Kute sikhali lesilolelwa kulwa nawe lesiyawuphumelela, uyakuyicitsa yonkhe inkhulumo lekubeka licala. Leli lifa letinceku taSimakadze, loku ngukona kutivikela kwami,’ kusho Simakadze.” (Isa. 54:17) Kute nasinye sikhali saSathane lesingakhona kusibhubhisa.

 8. Yini lesitawucoca ngayo kulesihloko nakulesilandzelako?

⁸ Sathane wente umetamo wekucedza liVi laNkulunkulu, kwenta libito laJehova lingatiwa nekufihla liciniso. Nobe kunjalo, angeke amehlule Jehova lokhonile kuyivimbela lemetamo. Kulesihloko nakulesilandzelako, sitawubona kutsi (1) Nkulunkulu ulilondvolote njani liVi lakhe; (2) Jehova wente njani kute alondvolote libito lakhe; nekutsi (3) Babe wetfu wasezulwini unguMtfombo neMlondvoloti weliciniso lesilijabulelako njani.

9-11. Ngutiphi tibonelo letikhombisa kutsi liBhayibheli lilondvolotiwe ngisho nobe lihlaselwa?

⁹ Jehova ulivikele liVi lakhe ngisho nobe bekunemetamo yekulicedza. I-Enciclopedia Cattolica (Catholic Encyclopedia) itsi: “Nga-1229, iKomidi ye-Toulouse yawalela emalunga elisontfo langekho etikhundleni kutsi awasebentise [emaBhayibheli aletinye tilwimi] ngesizatfu semphi nema-Albigenses nema-Waldenses . . . Umhlangano lowabanjwa nga-1234 eTarragona, eSpain lowacondziswa nguJames I wakhipha umtsetfo lofanako. . . . IRoman See yangenela kwekucala kulendzaba nga-1559, ngesikhatsi i-Index yaPaul wesine ingakuvumeli kushicilelwa nekuba nemaBhayibheli aletinye tilwimi ngaphandle kwemvume yeLihhovisi Lelingcwele.”

¹⁰ Ngetulu kwekuhlaselwa lokwehlukehlukene kweliBhayibheli, lichubeke lilondvolotiwe. Ngemnyaka wabo-1382, John Wycliffe nebangani bakhe bashicilela liBhayibheli lekucala lebelihunyushelwe esiNgisini. Lomunye umhumushi weliBhayibheli bekunguWilliam Tyndale, lowabulawa nga-1536. Kubikwa kutsi ngesikhatsi aboshelwe esigodvweni, wamemeta watsi: “Nkhosi, vula emehlo enkhosi yaseNgilandi.” Ngemuva kwaloko bamkhama futsi bamshisa.

¹¹ LiBhayibheli lisindzile ngisho nobe beliphikiswa. Nasi sibonelo: Nga-1535 kwaba nelihumusho lesiNgisi laMiles Coverdale. Coverdale wasebentisa indlela yaTyndale “yeliThestamende Lelisha” “neliThestamende Lelidzala” kusukela kuGenesisi kuya kuTikhronike. Wahumusha letinye tincenye temiBhalo kusuka elulwimini lwesiLatin naseBhayibhelini laMartin Luther lesiJalimane. Lamuhla, siyajabula ngekuba ne-New World Translation of the Holy Scriptures ngobe icacile, yetsembekile emibhalweni yeliBhayibheli futsi ilusito emsebentini wetfu wekushumayela. Siyajabula ngekutsi kute emandla emadimoni nobe ebantfu langenta kutsi liVi laJehova lingalondvolotwa.

12. Nguyiphi indzima i-New World Translation lebe nayo ekulondvoloteni libito laNkulunkulu?

¹² Nkulunkulu Jehova wente kutsi libito lakhe lilondvolotwe eVini lakhe. I-New World Translation idlale indzima lebalulekile kulendzaba. Esetfulweni, ikomidi yebahumushi bayo labatinikele yabhala loku: “Intfo lebaluleke kakhulu ngalelihumusho kubuyiselwa kwelibito laNkulunkulu endzaweni yalo lefanele emibhalweni yesiNgisi. Loku kwentiwe ngekusebentisa indlela leyemukelekile yekubhala lelibito ngesiNgisi letsi ‘Jehovah’ tikhatsi letingu-6 973 emiBhalweni yesiHebheru netikhatsi letingu-237 emiBhalweni yemaKhristu yesiGriki.” Nyalo i-New World Translation itfolakala iphelele nobe iyincenye ngetilwimi letingetulu kwa-116, futsi kushicilelwe emakhophi ayo langetulu kwa-178 545 862.

13. Yini leyenta sitsi bantfu bebalati libito laNkulunkulu kusukela ekudalweni kwabo?

¹³ Bantfu bebalati libito laNkulunkulu kusukela ekudalweni kwabo. Bo-Adamu na-Eva bebalati, futsi bebati kahle kutsi libitwa njani. Ngesikhatsi Hhamu akhombisa kungamhloniphi babe wakhe ngemuva kwaZamcolo, Nowa watsi: “Akadvunyiswe [Jehova], iNkhosi, Nkulunkulu waShemi; Khenani [indvodzana yaHhamu] akabe sigcili saShemi.” (Gen. 4:1; 9:26) Nkulunkulu watsi: ‘NginguJehova; lelo libito lami! Inkhatimulo yami ngingeke ngiyinike lomunye.’ Nkulunkulu waphindze watsi: ‘NginguJehova, futsi kute lomunye, ngaphandle kwami kute Nkulunkulu.’ (Isa. 42:8; 45:5) Jehova wente libito lakhe lalondvolotwa futsi walenta latiwa bantfu emhlabeni wonkhe. Kulilungelo lelikhulu kusebentisa libito laJehova nekumkhonta njengaboFakazi bakhe. Ecinisweni, simemeta kakhulu sitsi: “Asibetsele sishaye tandla egameni laNkulunkulu wetfu.”—Hla. 20:5.

14. Ngaphandle kwaseBhayibhelini, libito laNkulunkulu lingatfolakala kuphi?

¹⁴ Libito laNkulunkulu aliveli eBhayibhelini kuphela. Cabanga ngesibhelekece seLitje lakaMowabi, lesitfolakala eDhiban (Dibon), lengemakhilomitha langu-21 emphumalanga yeLwandle Lolufile. Kulesibhelekece kukhulunywa ngeNkhosi Omri yaka-Israyeli, kuphindze kukhulunywe ngekuhlasela kweNkhosi Mesha yakaMowabi, ihlasela ema-Israyeli. (1 Khos. 16:28; 2 Khos. 1:1; 3:4, 5) Lesibhelekece seLitje lakaMowabi sibalulekile ngobe libito laNkulunkulu liyavela kuso, libhalwe nge-Tetragrammaton. I-Tetragrammaton iphindze ivele kanyenti ngesiLachish, kuletincetu teludzengelo letatfolakala ka-Israyeli.

15. Iyini i-Septuagint, futsi yaba khona njani?

¹⁵ Bahumushi beliBhayibheli bakucala babanencenye ekulondvoloteni libito laNkulunkulu. Ngemuva kwekutfunjelwa eBhabhulona kusukela nga-607 B.C.E. kuya ku-537 B.C.E., emaJuda lamanyenti awazange abuyele kaJuda naka-Israyeli. Ngelikhulu lesitsatfu B.C.E., emaJuda lamanyenti abesahlala e-Alexandria naseGibhithe futsi adzinga lihumusho lesiGriki lemiBhalo yesiHebheru, njengobe ngaleso sikhatsi lulwimi lwemhlaba kwakusiGriki. Kubhalwa kwalelihumusho kwaphela ngelikhulu lesibili B.C.E., futsi latiwa ngekutsi yi-Septuagint. Lamanye emakhophi alo analo libito lelitsi Jehova libhalwe ngesiHebheru.

16. Niketa sibonelo sekusetjentiswa kwelibito laNkulunkulu encwadzini leyashicilelwa kwekucala ngemnyaka wa-1640.

¹⁶ Libito laNkulunkulu liyatfolakala nakuBay Psalm Book, leyincwadzi yekucala leyashicilelwa emaveni aseMelika labengephansi kweNgilandi. Luhlelo lwayo lwekucala (lolwashicilelwa nga-1640) luhlanganisa Tihlabelelo letahunyushwa tisuselwa elulwimini lwesiHebheru tabhalwa ngesiNgisi sangaleso sikhatsi. Isebentisa libito laNkulunkulu etindzaweni letifanana neTihlabelelo 1:1, 2, lapho itsi ‘umuntfu lobusisiwe’ akahambi ngeteluleko talababi kodvwa ‘kujabula kwakhe kusemtsetfweni waJehova.’ Kute utfole kwatiswa lokwengetiwe ngelibito laNkulunkulu, fundza incwajana letsi “Igama Laphezulu Eliyohlala Phakade,” ngesiZulu.

17, 18. (a) Ungalichaza njani ligama lelitsi ‘liciniso’? (b) Lihlanganisani ‘liciniso leliVangeli’?

¹⁷ Sijabulela kukhonta ‘Jehova, Nkulunkulu lowetsembekile.’ (Hla. 31:5) I-Collins Cobuild English Dictionary itsi: “Liciniso ngentfo letsite lihlanganisa yonkhe imininingwane ngayo, hhayi tintfo leticatjangwako ngayo.” NgesiHebheru seliBhayibheli, ligama lelihunyushwe ngekutsi “liciniso” lisho intfo leliciniso, leyetsenjwako, leyetsembekile nobe lenemininingwane lecondzile. Ligama lesiGriki lelitsi “liciniso” lisho loko lokuhambisana nemaciniso nobe intfo lelungile.

¹⁸ Jehova ulondvolote liciniso ngaye futsi wente lololwati lwatfolakala kitsi futsi luyachubeka lukhula. (2 Joh. 1, 2) Indlela lesilicondza ngayo liciniso ichubeka ikhanya ngobe “indlela yalabalungile ifanana nekukhanya kwentsatsakusa, lokuya ngekuya kuze kube ngusemini.” (Taga 4:18) Ngako-ke, sivumelana naJesu lowathantaza kuNkulunkulu watsi: “Livi lakho liliciniso.” (Joh. 17:17) LiVi laNkulunkulu ‘lineliciniso leliVangeli’ lelifaka ekhatsi tonkhe timfundziso tebuKhristu. (Gal. 2:14) Letinye taletimfundziso tihlanganisa liciniso ngelibito laJehova, bukhosi bakhe, umhlatjelo wenhlawulo waJesu, luvuko neMbuso. Nyalo asesicoce ngekutsi Nkulunkulu ulilondvolote njani liciniso ngisho nobe Sathane etame kulifihla.

19, 20. Abengubani Nimrodi, futsi nguliphi lisu lelehluleka ngesikhatsi sakhe?

¹⁹ Ngemuva kwaZamcolo, kwaba nesisho lesitsi: “NjengaNimrodi umtingeli labenemandla embikwaSimakadze.” (Gen. 10:9) Njengobe abengumphikisi waNkulunkulu Jehova, kufana nekutsi Nimrodi abekhonta Sathane futsi afana nebaphikisi Jesu latsi ngabo: “Nine nibeyihlo Sathane. Nitsandza kwenta tinkhanuko teyihlo. Yena . . . akemi ecinisweni.”—Joh. 8:44.

²⁰ Indzawo lebeyibuswa nguNimrodi beyihlanganisa iBhabheli nalamanye emadolobha labesemkhatsini weThigrisi nemifula yeYufrathe. (Gen. 10:10) Kungenteka kutsi kwakhiwa kweBhabheli nembhoshongo wayo bekucondziswa nguye nakucalwa nga-2269 B.C.E. Ngalokuphambene nenjongo yaJehova yekutsi bantfu bagcwale emhlabeni wonkhe, labo labebakha lombhoshongo batsi: “Wotani, sitakhele lidolobha, nembhoshongo lotawufikela ezulwini, sitentele ligama, sitekwatiwa, khona singetiwulahlekelana sisakateke nemhlaba wonkhe.” Kodvwa lelo lisu labo laphelela ebaleni ngesikhatsi Nkulunkulu ‘asanganisa lulwimi lwemhlaba wonkhe’ futsi abahlakata labo bantfu. (Gen. 11:1-4, 8, 9) Nangabe Sathane abecabanga kutsi wenta lisu lekucala inkholo letsite yebantfu labatawukhonta yena, lelisu lakhe lehluleka. Kuwo wonkhe umlandvo webantfu, kukhonta Jehova kuyachubeka futsi kuba kunyenti lilanga nelilanga.

21, 22. (a) Yini leyente kutsi inkholo yemanga ingabi yingoti ekukhonteni kweliciniso? (b) Yini lesitawucoca ngayo esihlokweni lesilandzelako?

²¹ Inkholo yemanga ayikaze ibe yingoti ekukhonteni kweliciniso. Yini lebangela sisho njalo? Kungobe uMfundzisi wetfu Lomkhulu ulilondvolotile liVi lakhe, wenta bantfu balati libito lakhe futsi ube nguMtfombo weliciniso. (Isa. 30:20, 21) Kukhonta Nkulunkulu ngekuvumelana neliciniso kusiletsela injabulo. Kodvwa kute sikwati kukwenta loko kudzingeka sikholelwe kuloko lokuliciniso, setsembele ngalokuphelele kuJehova futsi silandzele sicondziso semoya wakhe longcwele.

²² Esihlokweni lesilandzelako sitawuhlola indlela letinye timfundziso temanga letikhule ngayo. Sitawubona kutsi natiletfwa ekukhanyeni kwemiBhalo tivele tehluleke. Ngetulu kwaloko, sitawubona kutsi Jehova, uMlondvoloti weliciniso usibusise njani ngetimfundziso letiliciniso lesitijabulelako njengelifa letfu lelivela kuye.