“Ngavuka Njengenina Wesive Sema-Israyeli”

DEBHORA wawabuka onkhe emasotja lebekabutsene esicongweni seNtsaba iThabori. Kwamtsintsa inhlitiyo kubona lamasotja alapha ekuseni. Wanaka kakhulu sibindzi sawo nekukholwa kwendvuna yawo Bharaki. Sibindzi nekukholwa kwalamadvodza langu-10 000 kutawuvivinywa lamuhla. Libutfo labatawulwa nalo linesibhuku, futsi likhulu kunelabo. Baya kulemphi ngenca yesikhutsato labasitfola kuDebhora.

Asewucabange njengobe Debhora naBharaki beme esicongweni salentsaba nemoya awukatibeki phansi. INtsaba iThabori iphakeme ngemamitha langu-400 kantsi ifike ibeke esicongweni. Lendlela lentsaba leme ngayo yenta kutsi ukhone kusibona kahle sigodzi saseEsdraelon lesindlalekele ngaseningizimu-nshonalanga. Umfula iKhishoni ugeleta kulesigodzi, wengce ngaseNtsabeni iKhameli uze uyofika eLwandle Lolukhulu. Kungenteka emanti kulomfula bekashile ngalelo langa, kodvwa kunalokunye lobekumanyatela. Libutfo laSisera belisondzela lihlome ngetikhali letimanyatelako. Bekutintfo tekulwa imphi telikhetselo taSisera​—bekutincola temphi letingu-900, lokungenteka betilayishe emathuluzi ekuvuna ibhali. Sisera bekatimisele kubulala lelibutfo lema-Israyeli lebelingakahlomi kungatsi uvuna ibhali!

Debhora bekati kutsi Bharaki nelibutfo lakhe bebamele sicondziso lesivela kuye. Bekunguye yedvwa yini umfati kulemphi? Ucabanga kutsi bekativa njani ngendzima labekanayo kulemphi? Bekatibuta yini kutsi vele bakafunani emphini? Cha, bekangativa kanjalo! NguJehova lebekamtjele kutsi acale lemphi, bekamtjelile nekutsi lemphi beyitawucedvwa ngumfati. (Tikhulu 4:9) Yini lesingayifundza kuDebhora nalamadvodza lanasebindzi mayelana nekukholwa?

Nalicala kukhuluma ngaDebhora liBhayibheli limbita ngekutsi ‘ngumphrofethikati.’ Lendlela liBhayibheli lelimbita ngayo Debhora imenta abe ngumutfu longakavami kodvwa akusho kutsi abehlukile kulabanye bafati.a Debhora bekanalomunye umsebenti. Nangabe kunemibango esiveni sakubo bekayicatulula ngekutsi abatjele kutsi Jehova utsini ngalendzaba​—Tikhulu 4:4, 5.

Debhora abehlala ka-Efrayimu, indzawo lebeyinetintsaba kakhulu, lesemkhatsini wemadolobha lamabili, iBethel neRama. Bekavame kuhlala ngaphansi kwesihlahla selisundvu, atjele bantfu ngaloko bekushiwo nguJehova. Umsebenti wakhe bewumatima kakhulu kodvwa awuzange umcedze emandla. Lomsebenti wakhe bewubalulekile. Ngekuhamba kwesikhatsi wacamba ingoma lebeyikhuluma ngekungetsembeki kwesive sakubo lebeyitsi: “Bakhetsa bonkulunkulu labasha, kwefika imphi emasangweni.” (Tikhulu 5:8) Jehova wanikela ema-Israyeli etitseni tawo ngobe amshiya ayokhonta labanye bonkulunkulu. Ngenca yaloko babese babuswa yiNkhosi yaseKhanani, Jabini, leyabeka Sisera kutsi ababuse.

Ema-Israyeli nakeva ligama laSisera bekavele achachatele kuhle kwemhlanga usemantini. Inkholo nemasiko aseKhanani bekamabi kakhulu kangangekutsi bekunikelwa ngebantfwana futsi nemathempeli akhona abegcwele tingwadla. Sewungabona-ke kutsi bekunjani kubuswa nguSisera kanye nelibutfo lakhe. Ingoma yaDebhora isikhombisa kutsi bantfu besebasaba nekuhambahamba futsi etindzaweni letisemaphandleni besekukhala libhungane. (Tikhulu 5:6, 7) Cabanga nje kutsi kuphila besekumatima kanganani, bantfu besebabhaca emahlatsini nasetintsabeni ngenca yekutsi abakaphephi, besebesaba ngisho nekulima, nekuhamba emigwacweni lemikhulu. Besebahlala emadolobheni labiyelwe ngelubondza ngobe bebasaba kutsi nabangake nje baphume batawuhlaselwa, bamukwe bantfwababo, nebafati babo badlwengulwe.b

Ema-Israyeli aphila lempilo yekwesaba iminyaka lengu-20 kwaze kwaba ngulapho Jehova abona kutsi labantfu bakhe lebebangalaleli sebatimisele kuphendvuka noma kwaze kwaba ngulapho Debhora ‘avuka njengenina wesive sema-Israyeli.’ LiBhayibheli alichazi kutsi Debhora bekanabo bantfwana kodvwa lenkhulumo isitjela kutsi bekadlala indzima yekuba ngumake wema-Israyeli. Jehova bekanikete Debhora indzima yekuvikela ema-Israyeli njengamake nakavikela bantfwabakhe. Jehova watjela Debhora kutsi acele Bharaki indvodza lenesibindzi futsi lebeyisikhulu kutsi iyokulwa naSisera aphindze ayinikete ticondziso.​—Tikhulu 4:3, 6, 7; 5:7.

Jehova watsi kuDebhora ‘akahambe aye eNtsabeni iThabori.’ Bharaki bekufanele atsatse emadzodva langu-10 000 etindlini letimbili taka-Israyeli akhe libutfo lakhe. Debhora wabatjela kutsi Jehova abetsembise kutsi bebatalincoba lelibutfo lebelinemandla laSisera lebelihlome ngetincola talo letingu-900. Kwammangalisa loko Bharaki ngobe ema-Israyeli bekete emadvodza laceceshelwe imphi ete ngisho netikhali tekulwa. Kodvwa nobe kunjalo Bharaki wavuma kuyokulwa yingci nje nangabe Debhora atawukhuphuka nabo.​—Tikhulu 4:6-8; 5:6-8.

Labanye bantfu bacabanga kutsi Bharaki bekete kukholwa ngobe wacela kuhamba naDebhora kodvwa akusinjalo, kube bekaligwala ngabe wacela Nkulunkulu kutsi amnikete tikhali letinyenti. Ngenca yekutsi bekakholwa, Bharaki wabona kutsi kuba khona kwalomphrofethikati waJehova bekutawubacinisa. (Hebheru 11:32, 33) Jehova wasiva sicelo saBharaki, kungako avuma kutsi Debhora ahambe naye kulemphi. Jehova waphindze waphefumulela Debhora kutsi aphrofethe kutsi ludvumo belungeke luye endvodzeni kodvwa lemphi beyitawucedvwa ngumfati. (Tikhulu 4:9) Nkulunkulu washo kutsi Sisera bekatawubulawa ngumfati.

Nalamuhla solo bafati baphatfwa kabi futsi bayahlukunyetwa. Akukavami kutsi baphatfwe ngendlela Nkulunkulu lafuna baphatfwe ngayo. Kodvwa kuNkulunkulu kungakhatsaliseki kutsi uyindvodza nobe ungumfati ubalulekile. (Roma 2:11; Galathiya 3:28) Lendlela Jehova laphatsa ngayo Debhora isifundzisa kutsi Jehova uyababusisa bafati aphindze abanikete nemisebenti lebalulekile kukhombisa kutsi uyabatsandza futsi uyabetsemba. Kufanele singawukophi lomkhuba lomubi wekuphatsa kabi bantfu labasikati lovamile kulelive.

Bharaki wahamba wayofuna emadvodza lengu-10 000 lanesibindzi sekumelana nelibutfo laSisera lelesabekako. Njengobe bekahola lelibutfo aya nalo eNtsabeni iThabhori, Bharaki bekajabula ngobe bebanemuntfu lobekabacinisa. LiBhayibheli litsi: “Debhora wahamba kanye nabo.” (Tikhulu 4:10) Cabanga ngekutsi lamasotja akhutsateka kanjani ngesikhatsi abona lomfati lonesibindzi akhuphuka nabo futsi lobekatimisele kudzela kuphila kwakhe ngenca yekutsi bekakholwa kutsi Jehova utawubasita.

Nakeva Sisera kutsi ema-Israyeli alungisa libutfo lemphi, wasukumela etulu. Emakhosi lamanyenti aseKhenani ahlanganisa emabutfo awo nalelibutfo laJabini, lokungenteka kutsi bebatsembe yena. Kwazizitela umhlaba ngesikhatsi lelibutfo lelikhulu laSisera lita litewuhlasela. LamaKhenani bekacabanga kutsi atawukhwela atehlele kulelibutfo lema-Israyeli lelincane.​—Tikhulu 4:12, 13; 5:19.

Bebatawenta njani boBharaki naDebhora njengobe lelibutfo lisondzela? Kube bebatawuchubeka basentsabeni iThabhori, loko bekungabasita kakhulu ngobe lelibutfo lemaKhenani belingeke likhone kuya lentsabeni ngesizatfu sekutsi belihamba ngetincola, kuze lilwe kahle belidzinga indzawo lebekile. Bharaki bekatimisele kulwa lemphi alandzela ticondziso taJehova, ngako wamela Debhora kutsi amnikete ticondziso. Ngako sefika sikhatsi sekutsi Debhora akhulume. Wase utsi: “Sukuma uhambe, lamuhla ngilo lilanga lapho Simakadze anikela Sisera esandleni sakho. Simakadze akahambi embikwakho yini?” Ngako Bharaki wehla eNtsabeni iThabori alandzelwa ngemadvodza lati-10 000.”​—Tikhulu 4:14.c

Libutfo lema-Israyeli lehla entsabeni laya lapho kubeke khona, lahlangabeta letingwazi taSisera. Wabasita yini Jehova njengobe Debhora bekaphrofethile? Ngekushesha “umhlaba watamatama, emazulu acitsa.” Emabutfo aSisera asangana. Lasho liyitsela! Lamanti bekehla ngatsi acitfwa ngemabhakede, ngekushesha nje umhlaba besewumanti. Kunekutsi letincola tibe lusito taba ngumsebenti. Tabhajwa tangakhoni nekutsi nyisi.​—Tikhulu 4:14, 15; 5:4.

Lemvula ayizange imphazamise Bharaki nelibutfo lakhe. Bebati kutsi yindlela yaJehova yekubasita. Bavele balidvumela lelibutfo lemaKhenani futsi kute labamshiya aphila kulelibutfo laSisera. Umfula iKhishoni wakhukhulela tonkhe letidvumbu eLwandle Lolukhulu.​—Tikhulu 4:16; 5:21.

Lamuhla tikhonti taJehova atiyi emphini. Nanobe kunjalo, nalamuhla bantfu baNkulunkulu basemphini, balwela kugcina bucotfo babo. (Matewu 26:52; 2 Khorinte 10:4) Nangabe silalela Nkulunkulu sisuke sikhombisa kutsi seseluhlangotsini lwakhe. Siyasidzinga sibindzi, ngobe bonkhe labaseluhlangotsini lwaNkulunkulu lamuhla bangase bahlangabetane nebumatima. Jehova solo akashintji, nalamuhla solo uyabavikela labo labafana naDebhora, naBharaki kanye nemasotja aka-Israyeli lebekametsemba futsi akholwa kuYe.

Lesinye sitsa sabo saphunyuka, lokubi nakakhulu kutsi bekunguSisera. Sisera lobekasitsa lesikhulu sebantfu baNkulunkulu watsi tinyawo ngetfwale. Washiya onkhe emabutfo akhe ngemuva, waphuma emkhatsini wemasotja aka-Israyeli kuze atfole indzawo lebeyomile. Ngemuva kwaloko wafuna tihlobo takhe letisedvute. Bekasolo abila ngemagonso esaba kutsi emasotja aka-Israyeli atambamba, ngako wase ubalekela emathendeni aHebere, lobekangumKheni lobekatehlukanise nebantfu bakubo kute akhe bungani neNkhosi Jabini.​—Tikhulu 4:11, 17.

Sisera wefika labekuhlala khona Hebere, afile kudzinwa. Ngalesikhatsi afika, Hebere bekangekho, bekunemkakhe Jayeli. Sisera bekacabanga kutsi Jayeli utamphatsa kahle ngobe indvodza yakhe beyingumngani weNkhosi Jabini. Bekangacabangi kutsi Jayeli angaba yingoti. Kodvwa bekangamati kahle! Jayeli bekakubone konkhe kucindzeteleka kwebantfu baNkulunkulu, kungenteka watsi nali litfuba. Bekatibuta kutsi amsite yini noma avele acedze ngalesitsa sebantfu bakubo. Bekatawenta njani? Umfati bekangambulala njani lomuntfu lonemandla lobekasalwe timphi letinyenti?

Jayeli bekufanele asheshe. Kwekucala wamlungiselela indzawo yekulala. Sisera watjela Jayeli kutsi nangabe kwenteka kuba nemuntfu lomfunako angacali asho kutsi ukhona. Ngako Jayeli wambonya ngengubo futsi nakacela emanti wamniketa lubisi. Sisera walala watsi saka! Jayeli wesuka watsatsa sikhonkhwane selithende kanye nesandvo, wanyonyoba waya ngasenhloko yaSisera. Nyalo besekufanele acedze ngalesitsa saJehova. Kube bekangaciniseki ngaloko lebekafuna kukwenta bekangase abe sengotini. Kungenteka wacabanga ngekuhlupheka kwebantfu baNkulunkulu lobesekutsetse iminyaka leminyenti. Kungenteka futsi wacabanga ngekutsi leli litfuba lekulwela Jehova. LiBhayibheli alisitjeli kutsi bekacabangani. Lesikwatiko nje kutsi Sisera wabulawa.​—Tikhulu 4:18-21; 5:24-27.

Ekugcineni wafika Bharaki afuna sitsa sakhe. Watsi Jayeli nakamkhombisa sidvumbu saSisera lesibetselwe ngesikhonkwane wavele wabona kutsi siphrofetho saDebhora sigcwalisekile. Sisera ubulewe ngumfati! Bantfu balamuhla labaphikisako nalabagcekako bambita ngawo onkhe emagama lamabi Jayeli, kodvwa Debhora naBharaki bebati kutsi loku kwenteka kuze kugcwaliseke siphrofetho. Ingoma labayicamba idvumisa Jayeli ngesibindzi sakhe itsi: “Akabusiswe kakhulu kunabo bonkhe labasikati.” (Tikhulu 4:22; 5:24) Debhora bekanesimo sengcondvo lesihle , akazange amdlele umona Jayeli. Intfo lebeyimcoka kuye kutsi livi laNkulunkulu ligcwalisekile.

Ngenca yekutsi besekufe Sisera, bukhosi baJabini baphelelwa ngemandla ekugcilata bantfu baNkulunkulu. Bantfu baJehova baphumula kugcilatwa bantfu baseKhanani. Kwalandzela iminyaka lengu-40 yekuthula. (Tikhulu 4:24; 5:31) Cabanga ngemvuzo lowatfolwa nguDebhora, Bharakhi naJayeli ngenca yekukholwa kuJehova! Nangabe sitawulingisa Debhora, sikholwe, sikhombise kutsi siseluhlangotsini lwaJehova siphindze sikhutsate labanye kutsi bente njalo, Jehova utasisita kutsi sincobe nobe ngabe nguyiphi imphi lesibhekene nayo.