Hlala Ucotfo KuJehova!

 1. BoFakazi BaJehova labatsatfu lesesicoce ngabo kulesigaba bakhombisa njani kutsi bacotfo?

CABANGA nganaku lokwenteka kuBoFakazi BaJehova labatsatfu. (1) Intfombatanyana isesikolweni futsi thishela ucela bonkhe bafundzi kutsi babe khona nakugujwa liholidi lelitsite. Ngenhlonipho, lentfombatanyana icela kungabi khona ngobe iyati kutsi kugubha leliholidi akumjabulisi Nkulunkulu. (2) Umzalwane losemusha lonemahloni ushumayela emtini ngemuti. Uyabona kutsi emtini lolandzelako kuhlala lomunye webafundzi lobekahlekise ngaBoFakazi BaJehova, kodvwa akavumeli kwesaba kumvimbe kutsi achubeke ashumayela. (3) Indvodza isebenta matima kute yondle umndeni wayo, kodvwa ngalelinye lilanga umphatsi wayo uyicela kutsi yente intfo lembi noma lengekho emtsetfweni. Nanobe beyitawulahlekelwa ngumsebenti, lendvodza yachaza kutsi bekufanele yetsembeke futsi ilalele umtsetfo ngobe Nkulunkulu ufuna tinceku takhe tente njalo.—Rom. 13:1-4; Heb. 13:18.

 2. Ngumiphi imibuto lesitawucoca ngayo, futsi leni?

² Ngubuphi buntfu lobubonako kulaBoFakazi labatsatfu? Kungenteka uyabona kutsi banesindzi futsi betsembekile. Kodvwa lokubaluleke kakhulu kutsi bonkhe bakhombise kuba cotfo kuJehova. Ngenca yaloko, bonkhe abazange batephule timiso taNkulunkulu. Siyaciniseka kutsi Jehova uyajabula nangabe ngamunye wabo ahlala acotfo. Natsi sifuna kwenta Jehova ajabule. Ase sicoce ngemibuto letsi: Kusho kutsini kuba cotfo? Kubaluleke ngani kutsi sibe cotfo? Yini lesingayenta kute sihlale sicotfo kuletikhatsi letimatima?

 3. (a) Yini lesingayenta kute sikhombise kutsi sicotfo? (b) Ngutiphi tibonelo letingasisita sicondze kutsi kusho kutsini kuba cotfo?

³ Tinceku taNkulunkulu tikhombisa njani kutsi ticotfo kuye? Ngekutsi timtsandze ngalokujulile nangenhlitiyo yonkhe futsi umphumela waloko uba kutsi tente loko Nkulunkulu lakufunako. Cabanga ngendlela belisetjentiswa ngayo ligama lelitsi bucotfo nakubhalwa liBhayibheli. EBhayibhelini, ligama lelihunyushwe ngekutsi bucotfo lisho intfo lephelele nalengenasici. Nasi sibonelo, ema-Israyeli bekenta umhlatjelo ngetilwane kuJehova futsi uMtsetfo bewutsi kufanele anikele ngetilwane letingenasici.b (Lev. 22:21, 22) Bantfu baNkulunkulu bebangakavumeleki kunikela ngesilwane lebesite umlente, indlebe nobe liso futsi bekungakafaneli banikele ngesilwane lebesigula. Bekubalulekile kuJehova kutsi lesilwane sibe ngulesiphilile futsi sibe bete sici. (Mal. 1:6-9) Loku kusenta sicondze kutsi kungani Jehova afuna sitinikele kuye ngalokuphelele. Nangabe sitsenga, ngeke sitsenge sitselo lesibolile, incwadzi ledzabukile nobe lithuluzi lelingasebenti, kodvwa sitawutsenga lokukahle. Ngendlela lefanako, Jehova ufuna simtsandze ngalokujulile futsi setsembeke ngalokuphelele kuye.

 4. (a) Kungani umuntfu lonesono angakhona kuhlala acotfo? (b) Ngekusho kweTihlabelelo 103:12-14, yini Jehova layilindzele kitsi?

⁴ Kufanele yini sicabange kutsi kudzingeka sibe bete sono kute sihlale sicotfo? Ngenca yekutsi senta emaphutsa lamanyenti, kungenteka sitive singemukeleki kuJehova. Ase sicoce ngetizatfu letimbili letisenta singacabangi kutsi kufanele sibe bete sono kute sibe cotfo. Kwekucala, Jehova akanaki kakhulu emaphutsa etfu. LiBhayibheli litsi: “Kube wena, Simakadze, bewusibalela tono tetfu, ngubani labengaphunyula, angalahlwa?” (Hla. 130:3) Uyati kutsi sinesono futsi ukulungele kusitsetselela. (Hla. 86:5) Kwesibili, akalindzeli kutsi sente lokungetulu kwemandla etfu. (Fundza Tihlabelelo 103:12-14.) Yini lokufanele siyente kute sikhone kuhlala setsembeke ngalokuphelele?

 5. Kungani tinceku taJehova kufanele timtsandze kute tibe cotfo?

⁵ Tinceku taJehova kufanele timtsandze kute tibe cotfo. Kufanele sitsandze Nkulunkulu ngenhlitiyo yetfu yonkhe futsi sitinikele kuye ngalokuphelele. Nangabe sitawuchubeka simtsandza ngisho nobe sivivinywa, loko kutawusho kutsi sicotfo. (1 Khr. 28:9; Mat. 22:37) Ase siphindze sicabange ngalaBoFakazi BaJehova labatsatfu lesicoce ngabo ekucaleni kwalesihloko. Yini leyabenta bahlala betsembekile? Lentfombatanyana beyingafuni yini kujabula esikolweni, lomzalwane losemusha bekafuna kuhlazeka yini noma lomzalwane bekafuna kulahlekelwa ngumsebenti yini? Cha. Esikhundleni saloko bayati kutsi Jehova unetimiso letilungile futsi bahlala banake kakhulu kwenta loko lokumjabulisako. Kuto tonkhe tincumo labatentako babeka Jehova kucala ngobe bayamtsandza. Nabenta loko basuke bakhombisa kutsi bacotfo.

 6. (a) Kubaluleke ngani kutsi sonkhe sihlale sicotfo? (b) Bo-Adamu na-Eva behluleka njani kukhombisa kutsi betsembekile?

⁶ Kubaluleke ngani kutsi sonkhe sihlale sicotfo? Sidzinga kuba cotfo ngobe Sathane wabekela Jehova insayeya futsi wenta lokufanako nakitsi lamuhla. Ensimini yase-Edeni lengilosi levukelako yatigucula yaba nguSathane nobe “Umphikisi.” Yahlambalata Jehova ngekutsi itsi Jehova unguMbusi lomubi, lonebugovu futsi longaketsembeki. Kuyadzabukisa kutsi bo-Adamu na-Eva basekela Sathane bavukela Jehova. (Gen. 3:1-6) Njengobe bebahlala ensimini yase-Edeni, bebanematfuba lamanyenti ekucinisa buhlobo babo naJehova. Kodvwa ngesikhatsi Sathane abalinga bebangamtsandzi ngalokujulile Jehova futsi loko kusenta sitibute: Lutsandvo lungabenta yini bantfu bahlale betsembekile kuJehova? Ngalamanye emavi, bantfu bangakhona yini kukhombisa kutsi betsembekile kuNkulunkulu? Kwaphakama umbuto lofanako nasendzabeni yaJobe.

 7. Ngekusho kwemBhalo waJobe 1:8-11, Jehova wativa njani ngekuba cotfo kwaJobe? Sathane bekativa njani ngekutsi Jobe bekacotfo?

⁷ Jobe waphila ngesikhatsi ema-Israyeli aseGibhithe. Kute umuntfu lobekacotfo njengaye. Naye bekanesono njengatsi, ngako bekawenta emaphutsa. Nanobe kunjalo, Jehova bekamtsandza Jobe ngenca yekutsi bekacotfo. Kungenteka kutsi nakusaphila Jobe Sathane besekavele acalile kwetfuka Jehova ngekutsi bantfu ngeke babe cotfo kuye. Ngako Jehova wasebentisa Jobe kute akhombise kutsi Sathane ungumcambimanga. Kuko konkhe kuphila kwakhe, Jobe wakhombisa kutsi Sathane ungumcambimanga! Sathane bekafuna kutsi Jehova amvumele avivinye bucotfo baJobe. Jehova bekametsemba umngani wakhe Jobe, ngako wamvumela Sathane kutsi amvivinye.—Fundza Jobe 1:8-11.

 8. Sathane wamhlasela njani Jobe?

⁸ Sathane unelunya futsi ungumbulali. Wabangela kutsi Jobe alahlekelwe ngito tonkhe tintfo labenato, umcebo, tisebenti futsi wona lidvumela lakhe. Wahlasela umndeni wakhe futsi wabulala bantfwana bakhe labalishumi. Waphindze wahlasela Jobe ngekumbangela kutsi abe nesifo lesibuhlungu, waba nematfumba wonkhe umtimba. Umfati waJobe bekakhatsateke kakhulu futsi aselusizini kangangekutsi watjela Jobe kutsi aketfuke Nkulunkulu futsi afe. Jobe besekafisa kufa, kodvwa wachubeka acotfo kuJehova. Sathane wabese wetama kusebentisa lenye indlela kute ahlasele Jobe. Wasebentisa bangani baJobe labatsatfu. Lamadvodza bekahlale avakashela Jobe, kodvwa akazange amdvudvute, kunaloko bekanelunya futsi amsola. Bekamtjela kutsi nguNkulunkulu lobekambangela kuhlupheka futsi bekangenandzaba nebucotfo bakhe. Aphindze atsi Jobe bekahlupheka ngenca yekutsi abengumuntfu longakalungi!—Jobe 1:13-22; 2:7-11; 15:4, 5; 22:3-6; 25:4-6.

 9. Yini Jobe langazange ayente ngisho noma abebhekene netinkinga?

⁹ Yini Jobe layenta ngetinkinga labebhekene nato? Naye bekanesono, ngako wabekhuta kamatima badvudvuti bemanga futsi washo emavi labekhombisa kutsi ukhulume angakacabangi. Wanaka kakhulu kulunga kwakhe kwendlula kulunga kwaNkulunkulu. (Jobe 6:3; 13:4, 5; 32:2; 34:5) Jobe akazange amshiye Jehova ngisho noma abebhekene nebumatima. Akazange awakholelwe emanga labekhulunywa bangani bakhe. Watsi: “Ngingeke ngivume kutsi loko lenikushoko kuliciniso, ngiyawuze ngife ngingakehlukani nebucotfo bami.” (Jobe 27:5) Lamavi akhombisa kutsi Jobe bekatimisele kuhlala atsembekile ngisho noma kwentekani futsi natsi kufanele sente lokufanako.

10. Asitsintsa njani emanga Sathane lawakhuluma ngaJobe?

¹⁰ Sathane usibekela njani insayeya. Ngumaphi emanga Sathane lawakhulumako ngetinceku taNkulunkulu futsi akutsintsa njani? Sathane utsi awumtsandzi Jehova futsi utawuyekela kumkhonta. Uphindze atsi angeke uhlale ucotfo. (Jobe 2:4, 5; Semb. 12:10) Asingabati kutsi loko kukuvisa buhlungu kakhulu? Nanobe kunjalo, cabanga ngaloku: Jehova ukwetsemba kakhulu kangangekutsi uvumela Sathane kutsi avivinye bucotfo bakho. Uyaciniseka kutsi utawuba cotfo kute ukhombise kutsi Sathane ungumcambimanga futsi Jehova wetsembisa kukusita kute uhlale ucotfo. (Heb. 13:6) Kulilungelo lelihle kakhulu kwetsenjwa nguMbusi wendalo yonkhe! Uyabona yini kutsi kubaluleke ngani kutsi sihlale sicotfo? Nangabe sicotfo sikhombisa kutsi Sathane ungumcambimanga futsi sisuke singcwelisa ligama laJehova kanye nendlela yakhe yekubusa. Yini lesingayenta kute sihlale sicotfo?

11. Yini lesingayifundza kuJobe?

¹¹ Sathane ubahlasela kakhulu bantfu baNkulunkulu “kulamalanga ekugcina” lagcwele tinkinga. (2 Thim. 3:1) Yini lesingayenta kute sihlale sicotfo ngisho nome siphila kuletikhatsi letimatima? Kunyenti lesingakufundza kulokwenteka kuJobe. Kusesele sikhatsi lesidze ngaphambi kwekutsi avivinywe, Jobe bekanemlandvo lomuhle wekuba cotfo. Ase sicoce ngetifundvo letintsatfu lesingatifundza kuye mayelana nekutsi yini lesingayenta kute sihlale sicotfo.

12. Ngekusho kwemBhalo waJobe 26:7, 8, 14, yini leyenta Jobe kutsi amhloniphe Nkulunkulu? (b) Yini lengasisita kutsi natsi simesabe Nkulunkulu?

¹² Jobe bekamtsandza kakhulu Nkulunkulu futsi bekamesaba. Jobe bekatinika sikhatsi sekucabangisisa ngendalo yaNkulunkulu lemangalisako. (Fundza Jobe 26:7, 8, 14.) Ngisho nome betitincane tintfo labetati ngendalo yaNkulunkulu, Jobe wamangala nakacabanga ngemhlaba, sibhakabhaka, emafu kanye nekudvuma kwelitulu. Bekawatsandza emavi lavela kuNkulunkulu. Mayelana nemavi aNkulunkulu Jobe watsi: “Emavi emlomo wakhe ngiwente aba ligugu.” (Jobe 23:12) Jobe bekajabula ngaJehova futsi amhlonipha ngalokujulile. Bekamtsandza Babe wakhe futsi afuna kumjabulisa. Loko kwabangela Jobe kutsi atimisele kakhulu kuhlala acotfo. Natsi kufanele sente lokufanako. Kunyenti kakhulu lesikwatiko ngendalo yaJehova lemangalisako kwendlula loko lebekwatiwa bantfu bangesikhatsi saJobe. LiBhayibheli liphindze lisisite simati Jehova. Tonkhe tintfo lesitifundzako tisenta simesabe Nkulunkulu. Sitamtsandza kakhulu Jehova futsi sitamlalela nangabe simesaba futsi simhlonipha. Loko kutawusenta sitimisele kuhlala sicotfo.—Jobe 28:28.

13, 14.(a) Umbhalo Jobe 31:1 utsi Jobe wakhombisa njani kutsi uyamlalela Nkulunkulu? (b) Singasilingisa njani sibonelo saJobe?

¹³ Jobe bekacotfo ngobe bekalalela. Jobe bekati kutsi bekufanele alalele Jehova kute akhone kuba cotfo. Sifiso setfu sekuhlale sicotfo siyakhula nangabe silalela Jehova. Jobe bekenta konkhe lokusemandleni akhe kute alalele Nkulunkulu. Sibonelo saloko kutsi bekayinaka indlela labekatiphatsa ngayo nakanebantfu besifazane. (Fundza Jobe 31:1.) Njengobe bekashadile, bekati kutsi akukafaneli ambuke ngenkhanuko umuntfu wesifazane langakashadi naye. Live lesiphila kulo lamuhla ligcwele tilingo tekutiphatsa kabi ngekwelicasi. Sitamlingisa yini Jobe ngekutsi singabanaki ngendlela lengakafaneli bantfu lesingakashadi nabo? Kufanele sikubalekele kubuka titfombe letikhombisa kungcola. (Mat. 5:28) Nangabe onkhe malanga sitifundzisa kutibamba, sitawukhona kuhlala sicotfo.

¹⁴ Jobe wakhombisa kutsi uyamlalela Nkulunkulu ngekutsi angawutsandzi umcebo. Bekati kutsi kusono lesikhulu kutsi etsembele etintfweni labenato futsi loko bekutamenta atfole sijeziso lesimatima. (Jobe 31:24, 25, 28) Lamuhla, bantfu balelive bawutsandza kakhulu umcebo. Sitawukhona kuhlale sicotfo nangabe silwela kuba nembono lofanele mayelana nemali kanye netintfo talelive njengobe liBhayibheli lisiyala.—Taga 30:8, 9; Mat. 6:19-21.

15. (a) Ngumuphi umvuzo Jobe lebekatsemba kutsi utawutfola? (b) Kungani kungasisita kuhlale siwukhumbula umvuzo Jehova latsembisa kusinika wona?

¹⁵ Jobe wakhona kuba cotfo ngenca yekutsi beketsemba kutsi Jehova utamnika umvuzo. Bekaciniseka kutsi Jehova unendzaba nebucotfo bakhe. (Jobe 31:6) Ngisho nome bekavivinywa, Jobe bekangangabati kutsi Jehova utamniketa umvuzo. Siyaciniseka kutsi loko kwamsita kakhulu kutsi ahlale acotfo. Kwetsembeka kwaJobe kwamjabulisa kakhulu Jehova futsi wamniketa umvuzo ngisho noma abengumuntfu lonesono. (Jobe 42:12-17; Jak. 5:11) Jobe utawutfola umvuzo lomkhulu kakhulu esikhatsini lesitako. Umetsemba kakhulu yini Jehova kutsi utakuniketa umvuzo ngenca yebucotfo bakho? Nkulunkulu wetfu akakashintji. (Mal. 3:6) Nangabe sikhumbula kutsi Jehova uyajabula ngekwetsembeka kwetfu, singaba nelitsemba lelihle ngelikusasa.—1 Thes. 5:8, 9.

16. Yini lokufanele sitimisele kuyenta?

¹⁶ Ngako, timisele kuhlale ucotfo njalo. Ngaletinye tikhatsi ungahle ucabange kutsi nguwe wedvwa lowetama kugcina bucotfo, kodvwa awusiwedvwa. Emhlabeni wonkhe, kunetigidzi tebantfu baNkulunkulu labahlala bacotfo. Uyincenye yenhlangano lenebazalwane nabodzadze labahlala bacotfo ngisho nome basongelwa ngekufa. (Heb. 11:36-38; 12:1) Shengatsi sonkhe singatimisela kuhlale sicotfo njengobe kwenta Jobe lowatsi: “Ngiyawuze ngife ngingakehlukani nebucotfo bami.” Shengatsi Jehova angadvunyiswa phakadze ngenca yebucotfo betfu!