“Vumelani Kucinisela Kucedzele Umsebenti Wako”

1, 2. (a) Yini lesingayifundza endleleni Gideyoni nemadvodza akhe langu-300 labacinisela ngayo? (Buka sitfombe lesisekucaleni kwalesihloko.) (b) Ngekusho kwaLukha 21:19, kungani kubalulekile kucinisela?

CABANGA ngemphi lematima lebeyiliwa ngemasotja aka-Israyeli labekaholwa Sikhulu lesinguGideyoni. Lemphi abeyilwa netitsa tawo. Gideyoni nemadvodza akhe bagijimisa emaMidiyani nalabo lebebawasekela busuku bonkhe, sigaba lesingemakhilomitha langu-32. LiBhayibheli nalisitjela lokwenteka ngemuva kwaloko, litsi: ‘Gideyoni nemadvodza akhe langu-300, nome abesadziniwe, kodvwa achubeka acosha emaMidiyani, aze ewelela ngesheya kwemfula iJordane.’ Bebasengakaphumeleli kulemphi, futsi bekusafanele balwe nemasotja langu-15 000. Besekuphele iminyaka leminyenti titsa tema-Israyeli tiwacindzetela, kodvwa bekabeketela. Ngako-ke, Gideyoni nemadvodza akhe bachubeka batigijimisa futsi bagcine batincobile.​—Tikhulu 7:22; 8:4, 10, 28.

² Natsi lamuhla silwa imphi lematima futsi lesenta sidzinwe. Titsa tetfu nguSathane, live lakhe nesono lesikitsi. Labanye betfu sekuphele iminyaka leminyenti balwa naletitsa. Ngelusito lwaJehova, sincobe timphi letinyenti. Nobe kunjalo, sisengakayincobi imphi yekugcina. Ngaletinye tikhatsi singaphelelwa ngemandla ekulwa, nobe siphelelwe ngemandla ekulindzela kuphela kwalelive lelibi. Jesu wecwayisa kutsi ngesikhatsi semalanga ekugcina sitawulingwa kamatima futsi siphatfwe kabi. Kodvwa waphindze washo kutsi nasicinisela, singaphumelela. (Fundza Lukha 21:19.) Kuyini kucinisela? Yini letasisita kutsi sicinisele? Yini lesingayifundza kulabo labacinisela? Futsi ‘singakuvumela njani kucinisela kucedzele umsebenti wako’?​—Jakobe 1:4.

 3. Kuyini kucinisela?

³ EBhayibhelini, kucinisela kusho lokungetulu nje kwekubeketelela simo lesimatima. Kufaka ekhatsi indlela lesicabanga siphindze sitive ngayo ngetilingo lesibhekana nato. Kucinisela kuyasisita kutsi sibe nesibindzi, setsembeke futsi sibeketele. Lenye incwadzi itsi kucinisela kubuntfu lobusisitako kute sibe nelitsemba futsi singaphelelwa ngemandla nasilingwa. Kusisita kutsi sihlale sicinile ngisho nobe sibhekene netilingo letimatima. Kucinisela kusenta kutsi sitincobe tilingo futsi sinake kufinyelela imigomo yetfu hhayi buhlungu lesibhekana nabo.

 4. Kungani singatsi lutsandvo lusikhutsata kutsi acinisele?

⁴ Lutsandvo luyasisita kutsi sicinisele. (Fundza 1 Khorinte 13:4, 7.) Kutiphi tici? Kutsandza Jehova kuyasikhutsata kutsi sicinisele kunome ngutiphi tintfo lativumele kutsi tenteke. (Lukha 22:41, 42) Kutsandza bazalwane kuyasisita kutsi sicinisele njengobe banesono. (1 Phetro 4:8) Kutsandza labo lesishade nabo kuyasisita kutsi sibeketelele ‘lusizi’ lolutfolwa ngisho nangulabo labajabulile emishadweni yabo, futsi kusisita kutsi sicinise imishado yetfu.​—1 Khorinte 7:28.

 5. Kungani Jehova kumfanela kahle kutsi kube nguye losisitako kute sicinisele?

⁵ Cela Jehova akuphe emandla. Jehova ‘nguNkulunkulu losisita kutsi sicinisele nalosidvudvutako.’ (Roma 15:5) Nguye losati kahle simo setfu, indlela lesitiva ngayo nendlela lesikhule ngayo. Ngako ukwati kahle loko lesikudzingako kute sicinisele. LiBhayibheli litsi: “Wesutsisa kufisa kwabo bonkhe labamesabako, uyabeva nabakhalako, abasindzise.” (Tihlabelelo 145:19) Nkulunkulu utayiphendvula njani imithantazo yetfu yekucela emandla kute sicinisele?

 6. Njengobe kwetsenjisiwe eBhayibhelini, Jehova angasenta njani kutsi sibe ‘nendlela yekuphuma’ nasibhekene netinkinga?

⁶ Nasicela Jehova kutsi asisite sikwati kucinisela, usetsembisa kutsi “utawukwenta nendlela yekuphuma.” (Fundza 1 Khorinte 10:13.) Ukwenta njani loko? Ngaletinye tikhatsi, angasisusa lesilingo lesibhekene naso. Kodvwa ngalokuvamile, utasiniketa emandla kute ‘sicinisele ngalokuphelele ngekubeketela nangenjabulo.’ (Kholose 1:11) Ngesizatfu sekutsi uyati kutsi sinesono, Jehova angeke avumele kutsi simo lesilukhuni lesibhekene naso sisente singetsembeki kuye.

 7. Fanekisa kutsi kungani sidzinga kufundza ngaNkulunkulu kute sicinisele.

⁷ Vumela Kufundza ngaNkulunkulu kucinise kukholwa kwakho. Kungani kubalulekile kufundza ngaNkulunkulu? Ase sifanekise: Kute umuntfu acance iNtsaba lokutsiwa yi-Everest, ngelilanga udzinga emandla laphindvwe ka-6 000. Lawa ngemandla lamakhulu kulawo umuntfu lawadzingako. Kute acinisele futsi afinyelele umgomo wakhe, umuntfu locanca lentsaba kufanele adle kudla lokutamnika emandla lamanyenti. Ngendlela lefanako, sidzinga kufundza kakhulu ngaNkulunkulu kute sicinisele futsi sifinyelele umgomo wetfu. Kufanele sitimisele kutinika sikhatsi sekuba nesifundvo lesitichubela sona nesekuya emihlanganweni. Kwenta loko kutasiniketa emandla lesiwadzingako kute sicinise kukholwa kwetfu.​—Johane 6:27.

8, 9. (a) Ngekusho kwaJobe 2:4, 5, yini lesuke yenteka nangabe sibhekene netilingo? (b) Nawubhekene netilingo, ngusiphi simo longasibona ngeliso lengcondvo?

⁸ Hlala wetsembekile kuNkulunkulu. Nangabe sibhekene netinkinga, kunalokunyenti lesisuke singakwati. Kwetsembeka kwetfu kuNkulunkulu kusuke kuvivinywa. Indlela lesenta ngayo nasilingwa iyakhombisa kutsi Jehova simtsatsa njengaloyo longuMbusi wendzawo yonkhe yini. Kungani sisho njalo? Sathane, sitsa saNkulunkulu lesiphikisana nekubusa kwakhe, wetfuka Jehova ngekutsi atsi bantfu bamkhonta ngenca yebugovu. Sathane watsi: “Umuntfu angalahlekelwa nguko konkhe lanako ngenca yemphilo yakhe.” Naku Sathane labese uyakhusho ngaJobe: “Kodvwa ase welule sandla sakho utsintse inyama yakhe nematsambo akhe, ubone kutsi angeke yini akwetfuke.” (Jobe 2:4, 5) Sewushintjile yini Sathane kusukela asho lamavi? Cha, akashintji! Ngemuva kweminyaka leminyenti Sathane acoshiwe ezulwini, wachubeka amangalela tinceku taNkulunkulu letetsembekile. (Sembulo 12:10) Ngisho nalamuhla, Sathane umangalela tikhonti taNkulunkulu ngekutsi timkhonta ngenca yetizatfu tebugovu. Ukufisa kakhulu kusibona singakusekeli kubusa kwaNkulunkulu futsi siyekela kumkhonta.

⁹ Nangabe ubhekene nesilingo, yetama kubona ngeliso lengcondvo nasi simo. Bona Sathane nemadimoni akhe baseluhlangotsini lolulodvwa. Bayakubukela kute babone kutsi utawenta njani njengobe ulingwa futsi batitjela kutsi utawuphelelwa ngemandla. Kulolunye luhlangotsi ubona Jehova, iNkhosi yetfu Jesu Khristu, labagcotjiwe lasebavusiwe kanye netinkhulungwane tetingilosi. Nabo bayabubona bumatima lobhekene nabo, kodvwa bayakukhutsata. Bayajabula nababona kutsi uyakhona kucinisela futsi uchubeka wetsembekile kuJehova. Ngemuva kwaloko uva livi laJehova litsi kuwe: “Ndvodzana yami, hlakanipha, khona ngitewujabula, ngitekwati kuphendvula nome ngabe ngubani longedzelelako.”​—Taga 27:11.

10. Ungamlingisa njani Jesu ngekunaka umvuzo lotawutfola ngenca yekucinisela?

¹⁰ Naka umvuzo lotawutfola. Asesitsi uhamba luhambo loludze. Endleleni lotayihamba, utawungena ngephansi kwelibhuloho lelidze. Ngekhatsi kulelibhuloho kumnyama tsu! Kodvwa uyati kutsi njengobe uchubeka uhamba uya ngasekupheleni kwalo, utawuphindze ukubone kukhanya. Kuphila singakufananisa naloluhambo. Kungenteka ungase ubhekane netinkinga letimatima, futsi tingase tikucedze emandla. Ngisho naJesu imbala kungenteka wativa ngaleyondlela. Ngesikhatsi abetselwa elugodvweni, wahlazeka futsi abeva buhlungu lobukhulu. Kungenteka lesi kwaba sikhatsi lesaba matima kakhulu ekuphileni kwakhe. Yini leyamsita wacinisela? LiBhayibheli litsi wabuka ‘injabulo lebeyibekwe embikwakhe.’ (Hebheru 12:2, 3) Jesu wanaka umvuzo lebekatawutfola ngenca yekucinisela. Lobekubalulekile kuye kutsi abetawuba nencenye ekungcweliseni ligama laNkulunkulu nasekusekeleni lilungelo lakhe lekubusa. Bekati kutsi lesilingo sesikhashana nekutsi umvuzo latawutfola ezulwini waphakadze. Lamuhla tilingo lesibhekana nato tingasicedza emandla futsi tisivise buhlungu, kodvwa kufanele sikhumbule kutsi tesikhashana.

11. Kungani kufanele sicabange ngaloko lokwenteka ‘kulabo labacinisela’?

¹¹ Akudzingeki sicinisele sisodvwa. Kute akhutsate emaKhristu kutsi acinisele nakabhekene netilingo letinyenti letivela kuSathane, umphostoli Phetro wawatjela watsi: “Kodvwa melanani naye, nicine ekukholweni, nati kutsi bonkhe bazalwane emhlabeni babeketelela kuhlupheka lokufanako.” (1 Phetro 5:9) Lokwenteke ‘kulabo labacinisele’ kusifundzisa kutsi singahlala njani sinekukholwa, kusicinisekise kutsi singaphumelela, kuphindze kusikhumbute kutsi nasetsembekile sitawutfola umvuzo. (Jakobe 5:11) Ase sikhulume ngetibonelo letimbalwa.^[1]​—Fundza kwatiswa lokusekugcineni.

12. Sifundzani esibonelweni semakherubhi labekagadze e-Edeni?

¹² Emakherubhi tingilosi letisesigabeni lesisetulu. Ngemuva kwekuba bo-Adamu na-Eva sebonile, Jehova waniketa lamanye emakherubi umsebenti lomusha lobekufanele awente emhlabeni. Lomsebenti bowehluke kakhulu kulowo labekawenta ezulwini. Sibonelo sawo singasifundzisa kutsi singacinisela njani nangabe siniketwa umsebenti lomatima. LiBhayibheli litsi Jehova wabeka “ngasemphumalanga nensimi yase-Edeni  . .  . emakherubhi kanye nenkemba lenelilangabi lephendvuphendvukako ilindze indlela leya esihlahleni sekuphila.”^[2] (Fundza kwatiswa lokusekugcineni.) (Genesisi 3:24) LiBhayibheli alisho kutsi lamakherubhi akhonona nobe atibona abalulekile ngenca yalomsebenti wawo lomusha. Lomsebenti awuzange uwadzine nobe uwacedze emandla. Esikhundleni saloko, ahlala kulomsebenti wawo kwadzimate kwaba ngulapho sekawucedzile, mhlawumbe ngesikhatsi saZamcolo, lowaba khona ngemuva kweminyaka lengu-1 600.

13. Jobe wakhona njani kubeketelela tilingo labhekana nato?

¹³ Indvodza letsembekile Jobe. Ngaletinye tikhatsi ungase uve buhlungu ngesizatfu sekutsi umngani nobe lilunga lemndeni wakho lisho intfo lengakuphatsi kahle. Kungenteka ugula kamatima nobe mhlawumbe uyahlupheka ngesizatfu sekutsi washonelwa ngumuntfu lotsite lomtsandzako. Ngisho nobe yini leyentekako, ungayitfola indvudvuto esibonelweni saJobe. (Jobe 1:18, 19; 2:7, 9; 19:1-3) Jobe bekangati kutsi kungani ahlupheka kangaka, kodvwa akazange aphele emandla. Yini leyamsita wacinisela? Kwekucala abetsandza Jehova futsi bekesaba kumjabhisa. (Jobe 1:1) Jobe abefuna kujabulisa Nkulunkulu etikhatsini letimnandzi nasetikhatsini letimatima. Ngetulu kwaloko Jehova wamsita kutsi abone emandla aKhe ngekutsi amtjele ngaletinye tetintfo letimangalisako latidala. Loko kwenta Jobe waciniseka kakhulu kutsi Jehova utaticedza letilingo ngesikhatsi lesifanele. (Jobe 42:1, 2) Nguloko kanye lokwenteka. Jehova “wamenta wanjinga futsi; wanjinga ngalokuphindvwe kabili kunakucala.” Jobe “wafa asamdzala, asakhulile ngeminyaka.”​—Jobe 42:10, 17.

14. Ngekusho kwa-2 Khorinte 1:6, kucinisela kwaPawula kwabasita njani labanye?

¹⁴ Umphostoli Pawula. Ungulomunye walababhekene nekuphikiswa nobe kuphatfwa kabi yini? Ungulomunye walabadzala belibandla yini nobe umbonisi wesigodzi lotiva ucindzetelwe ngumsebenti lomnyenti lonawo? Nangabe ukuleso simo, sibonelo saPawula singakusita. Pawula waphatfwa kabuhlungu, futsi abehlala akhatsatekile ngebazalwane bakhe lebebasemabandleni. (2 Khorinte 11:23-29) Kodvwa akazange aphelelwe ngemandla, futsi sibonelo sakhe sakhutsata labanye. (Fundza 2 Khorinte 1:6.) Kucinisela kwakho nako kungase kukhutsate labanye kutsi bacinisele.

15, 16. (a) Ngumuphi “umsebenti” lokufanele kucinisela kuwucedzele? (b) Niketa tibonelo tendlela ‘lesingavumela ngayo kucinisela kucedzele umsebenti wako.’

¹⁵ Umfundzi Jakobe waphefumulelwa kutsi abhale atsi: “Kodvwa vumelani kucinisela kucedzele umsebenti wako, kuze nitewuphelela, niphile kuto tonkhe tintfo, ningesweli lutfo.” (Jakobe 1:4) Kucinisela kungawucedzela njani “umsebenti” wako? Nasilingwa singase sicaphele kutsi sidzinga kubeketela kakhundlwana, sikhombise kubonga nobe sibe nelutsandvo. Njengobe sibeketelela tilingo, sitawufundza kububonisa kakhudlwana lobuntfu, futsi ngaleyo ndlela sitawuba ngemaKhristu lavutsiwe.

¹⁶ Ngesizatfu sekutsi kubeketela kungasenta sibe ngemaKhristu lavutsiwe, ngeke sifune kwephula umtsetfo waJehova kute nje sitewuncoba kulingwa. Nasi sibonelo: Nangabe uhlushwa yimicabango lengcolile, ungavumi kungena esilingweni! Cela Jehova kutsi akusite kute ulwisane nalemicabango lemibi. Unelilunga lemndeni lelikuphikisako yini? Ungaphelelwa ngemandla! Timisele kuchubeka ukhonta Jehova. Umphumela waloko kutawuba kutsi umetsembe kakhulu Jehova. Khumbula: Kute semukeleke kuNkulunkulu kufanele sicinisele.​—Roma 5:3-5; Jakobe 1:12.

17, 18. (a) Fanekisa kutsi kubaluleke ngani kucinisela kuze kube sekupheleni. (b) Njengobe sisondzela ekupheleni, yini lesiciniseka ngayo?

¹⁷ Kufanele sicinisele kuze kube sekugcineni, hhayi nje sikhashana. Cabanga ngemkhumbi locwilako. Kute basidze labawugibele kufanele babhukushe baze bayewufika elusentseni. Umuntfu lophelelwa ngemandla nakacala kubhukusha angacwila. Ngendlela lefanako, nemuntfu lophelelwa ngemandla nasekusele kancane ayewufika elusentseni naye angacwila. Nasifuna kuphila eveni lelisha kudzingeka sichubeke sicinisela. Shengatsi singaba nesimo sengcondvo lesifana nesemphostoli Pawula lowatsi “asipheli emandla.”​—2 Khorinte 4:1, 16.

¹⁸ NjengaPawula, siciniseka kakhulu kutsi Jehova utasisita sicinisele kudzimate kube ngusekupheleni. Pawula wabhala watsi: “Siphumelela ngalokuphelele ngenca yaloyo lowasitsandza. Ngobe ngiyaciniseka kutsi ngisho nekufa, kuphila, tingilosi, babusi, tintfo letikhona nyalo naleto letitako, emandla, kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo lwaNkulunkulu lolukuKhristu Jesu iNkhosi yetfu.” (Roma 8:37-39) Kuliciniso kutsi ngaletinye tikhatsi sitawuphelelwa ngemandla. Kodwa shengatsi singalingisa Gideyoni nemadvodza akhe. Badzinwa kodvwa abazange baphelelwe ngemandla. ‘Bachubeka nekubacosha’!​—Tikhulu 8:4.