Nangabe Kunelilunga Lemndeni Leligulako

1, 2. Sathane wayisebentisa njani inhlekelele kanye nekugula kute ente Jobe ayekele kuba cotfo kuNkulunkulu?

JOBE ungulomunye webantfu labebaphila ngekujabula emindenini yabo. LiBhayibheli litsi ‘abewendlula onkhe emadvodza asemphumalanga.’ Abenemadvodzana lasikhombisa nemadvodzakati lamatsatfu. Bantfwana bakhe sebabonkhe bebalishumi. Abenjingile, futsi anato tonkhe tintfo tekondla umndeni wakhe. Lokubaluleke kakhulu kutsi abehola emisebentini lehlobene nekukhonta Nkulunkulu, futsi abekukhatsalela kutsi bantfwana bakhe babe nebuhlobo lobuhle naJehova. Konkhe loku kwaholela ekutseni basondzelane njengemndeni futsi bajabule.​—Jobe 1:1-5.

² Sathane, lositsa lesikhulu saNkulunkulu Jehova, wasibona leso simo lesihle saJobe. Njengobe ngaso sonkhe sikhatsi afuna tindlela tekwenta tinceku taNkulunkulu tingabi cotfo kuye, Sathane wahlasela Jobe ngekucedza injabulo emndenini wakhe. “Wamhlasela ngematfumba labutfukako, kusukela ngaphansi kwelunyawo lwakhe kuze kuyewufika etulu elunweleni lwakhe.” Ngako-ke, Sathane abenelitsemba lekutsi utawusebentisa inhlekelele kanye nekugula kute abangele Jobe kutsi ayekele kuba cotfo kuNkulunkulu.​—Jobe 2:6, 7.

 3. Tatiyini timphawu tekugula kwaJobe?

³ LiBhayibheli alisitjeli ngeligama lesifo lesasiphetse Jobe. Nanobe kunjalo, liyasitjela ngetimphawu taso. Inyama yakhe yayigcwele timphetfu, kantsi sikhumba sakhe saba netincwencwe futsi sasincitsika. Umoya waJobe wawuneliphunga lelibi, futsi umtimba wakhe wawunuka phu. Bekafa buhlungu. (Jobe 7:5; 19:17; 30:17, 30) Asetinhlungwini, abehlala emlotseni, atenwaye ngelucetu lweludzengelo. (Jobe 2:8) Simo labekuso sasivisa buhlungu kakhulu.

 4. Yonkhe imindeni ihlangabetana nani etikhatsini letinyenti?

⁴ Yini lowawuyoyenta kube kwakunguwe lowawuphetfwe ngulesifo lesibuhlungu kanjena? Lamuhla, Sathane akatishayi ngekugula tinceku taNkulunkulu njengobe enta kuJobe. Nobe kunjalo, ngesizatfu sekutsi sinesono, kufanele sihlale sikulindzele kutsi ngaletinye tikhatsi emalunga emndeni atawugula. Nangetulu kwetinyatselo tekuvikela tifo lesingase sitisebentise, sonkhe siyangenwa tifo, nanobe bambalwa labangahlupheka ngendlela Jobe lahlupheka ngayo. Lapho kugula kuhlasela umndeni wetfu, kungaba yinsayeya lenkhulu. Asesibone kutsi liBhayibheli lingasisita njani kutsi sikhutsatelele lesitsa sebantfu lesihlale sikhona ngaso sonkhe sikhatsi.​—Umshumayeli 9:11; 2 Thimothi 3:16.

 5. Emalunga emndeni avame kutiva njani nangabe kunekugula kwesikhashana ekhaya?

⁵ Kuphatamiseka kwendlela yekuphila levamile, nobe ngabe kubangelwe yini, kumatima ngaso sonkhe sikhatsi, futsi loku kuba liciniso nangabe kuphatamiseka kubangelwa kugula lokungapheli. Ngisho nekugula kwesikhashana kudzinga kutivumelanisa netimo letitsite, kubonelelana, nekutidzela. Kungase kudzingeke kutsi emalunga emndeni langaguli abindze kute loyo logulako atewukhona kuphumula. Kungase futsi kudzingeke adzele tintfo letitsite. Nobe kunjalo, emakhayeni lamanyenti ngisho nebantfwana labancane bayamhawukela umntfwana wakubo logulako nobe umtali, nobe ngaletinye tikhatsi kungase kudzingeke bakhunjutwe kutsi bamcabangele. (Kholose 3:12) Nangabe kugula kukwesikhashana, ngalokuvamile umndeni usuke ukulungele kwenta loko lokudzingekile. Nangaphandle kwaloko, ngulelo nalelo lunga lemndeni lingafisa kucatjangelwa ngendlela lefananako nalo naligula.​—Matewu 7:12.

 6. Emalunga emndeni avame kuphatseka njani nangabe lilunga lemndeni liphetfwe sifo lesimatima nalesingapheli?

⁶ Kutsiwani nangabe kugula kubucayi kakhulu futsi kuphatamiseka kukukhulu futsi kutsatsa sikhatsi? Asesibekise: Kutsiwani nangabe lilunga lemndeni likhubatekile ngesizatfu sesifo sekufa luhlangotsi, sifo lokutsiwa yi-Alzheimer, nobe lichwaliswe ngulesinye sifo? Nobe kutsiwani nangabe lilunga lemndeni lihlushwa sifo sengcondvo njenge-schizophrenia? Kwekucala nje siyadzabuka​—lokusivisa buhlungu kubona umuntfu lesimtsandzako agula kakhulu. Nobe kunjalo, kudzabuka kungase kulandzelwe ngulokunye. Njengobe kugula kwemuntfu loyedvwa kuwatsintsa kakhulu emalunga emndeni futsi kunciphisa inkhululeko yawo, angase ative acansuka. Bangase batibute nangumbuto: “Kungani loku kwenteka kimi?”

 7. Umfati waJobe watsintseka njani ngekugula kwendvodza yakhe, futsi yini labesayikhohliwe?

⁷ Kungenteka nemfati waJobe naye waba nemicabango lenjalo. Khumbula kutsi besekavele afelwe bantfwana. Njengobe leto tentakalo letihlasimulisako tenteka, akungabateki kutsi kancane kancane wativa adideka. Ekugcineni, ngesikhatsi abona indvodza yakhe leyayike yaba ngumcemane futsi inemandla ihlushwa sifo lesibuhlungu nalesenyanyekako, wabonakala asakhohlwe sici lesibalulekile lesasingetulu kwato tonkhe tinsizi​—lokubuhlobo yena nendvodza yakhe labebanabo naNkulunkulu. LiBhayibheli litsi: “UmkaJobe wakhuluma kuJobe, watsi: ‘Namanje solomane usabambelele yini kulokwetsembeka kwakho? Yetfuka loNkulunkulu wakho, ufe lokungenani!’”​—Jobe 2:9.

 8. Nangabe lilunga lemndeni ligula kakhulu, ngumuphi umbhalo lotawusita lamanye emalunga emndeni kutsi abe nembono lofanele?

⁸ Bantfu labanyenti bayakhatsateka, bate bakwate, nangabe kuphila kwabo kushintjwa kugula kwalomunye umuntfu. Nakuleso simo futsi, umKhristu locabangako ngesimo kufanele asheshe abone kutsi loko kumvulela ematfuba ekuveta kutsi lutsandvo lwakhe lucotfo kangakanani. Lutsandvo lweliciniso “luyabeketela, lumnene . . . alutifuneli kwalo . . . Lubeketelela tintfo tonkhe, lukholwa tintfo tonkhe, lwetsemba tintfo tonkhe, lukhutsatelela tintfo tonkhe.” (1 Khorinte 13:4-7) Kunekutsi sivumele imicabango lemibi isibuse, kubalulekile kutsi sente konkhe lokusemandleni etfu kute siyilawule.​—Taga 3:21.

 9. Ngusiphi sicinisekiso lesingasita imindeni nangabe kunelilunga leligula kamatima?

⁹ Yini lengentiwa emndenini lonelilunga leligula kamatima, kute kulondvolotwe buhlobo babo naJehova kanye nenhlalakahle yawo? Kuliciniso, sifo ngasinye sidzinga kunakekelwa kanye nekwelashwa lokucondzene naso, futsi angeke kufaneleke kutsi kulencwadzi sikhutsate nobe ngutiphi tinchubo tekwelapha nobe tekunakekela umuntfu logulako ekhaya. Nobe kunjalo, Jehova ‘uyabaphakamisa bonkhe labatfotjisiwe.’ (Tihlabelelo 145:14) INkhosi Davide yabhala: “Ubusisiwe umuntfu lonakekela lobutsakatsaka, Simakadze uyawumsindzisa ngelilanga lekuhlupheka. Simakadze uyawumlondvolotela imphilo yakhe. . . . Simakadze uyawumcinisa nakagula, amphilise nakubo bonkhe butsakatsaka bakhe.” (Tihlabelelo 41:1-3) Jehova uyativikela tinceku takhe, avikele buhlobo bato naye, ngisho nobe tivivinywa emoyeni ngetulu kwemandla ato. (2 Khorinte 4:7) Emalunga emndeni lamanyenti lagulelwa kamatima emakhaya awo aye avumelana nemavi emhlabeli latsi: “Simakadze, kuhlupheka kwami kumatima, ngihlumelelise ngelivi lakho.”​—Tihlabelelo 119:107.

10, 11. (a) Yini lebalulekile kute umndeni ukukhutsatelele ngemphumelelo kugula? (b) Lomunye make wakukhutsatelela njani kugula kwendvodza yakhe?

¹⁰ Saga seliBhayibheli sitsi: “Umoya wemuntfu umenta akubeketelele kugula; kodvwa umoya lodzabukile ngubani longawubeketelela?” (Taga 18:14) Lusizi lungawuphatamisa umoya wemndeni kanye ‘nemoya wemuntfu,’ kodvwa “ingcondvo lenekuthula iletsa imphilo emtimbeni.” (Taga 14:30) Kutsi umndeni ukubeketelela ngemphumelelo nobe cha kugula lokumatima, ngelizinga lelikhulu kuya ngesimo sengcondvo, nobe umoya wemalunga awo.​—Catsanisa neTaga 17:22.

¹¹ Lomunye make longumKhristu kwadzinga abeketelele kubona indvodza yakhe igogwa sifo sekufa luhlangotsi ngemuva nje kweminyaka lesitfupha bashadile. Utsi: “Indvodza yami yayingasakwati kukhuluma kahle, futsi kwaba matima kakhulu kucoca nayo. Kucindzeteleka kwengcondvo kwekutama kucondza loko labetama kukusho kwakukukhulu kakhulu.” Asewuphindze ucabange nje ngebuhlungu kanye nekukhatsateka lendvodza leyayikuva. Yini labayenta? Nanobe bebahlala khashane nelibandla lebuKhristu, lodzadze wenta konkhe lokusemandleni akhe kute agcine buhlobo bakhe naJehova bucinile ngekuhambisana nekwatiswa lokusha kwenhlangano kanye nekudla kwakamoya lokufika njalo ngabomagazini, Sicongosekulindza ne-“Phaphama!” Loku kwamniketa emandla ekunakekela indvodza yakhe kwate kwaba sekushoneni kwayo ngemuva kweminyaka lemine.

12. Njengobe sibona endzabeni yaJobe, nguyiphi incenye lefezwa ngumuntfu logulako ngaletinye tikhatsi?

¹² Endzabeni yaJobe, kwakunguye yena labehlupheka, lowahlala acinile. Naku lakubuta umfati wakhe: “Kantsi sesitakwemukela lokuhle kodvwa yini kuNkulunkulu, singasakwemukeli lokubuhlungu nalokubi?” (Jobe 2:10) Akumangalisi kutsi kungani umfundzi Jakobe acaphuna Jobe njengesibonelo lesihamba embili sekubeketela nekukhutsatela! KuJakobe 5:11 siyafundza: “Nake neva ngekukhutsatela kwaJobe, niyati-ke nekutsi iNkhosi yaletsa siphetfo sini kuye; ngobe iNkhosi inebubele nesihawu lesikhulu.” Kuyafanana nalamuhla, etimeni letinyenti kuba nesibindzi nobe kucina kwemalunga emndeni kuye kwasita nalabanye emndenini kutsi nabo bahlale banembono locondzile.

13. Ngukuphi kuticatsanisa lokungakafaneli kwentiwe ngumndeni logulelwa kamatima?

¹³ Bantfu labanyenti lokuye kwadzingeka bakhutsatelele kugula ekhaya bayavuma kutsi ekucaleni kuvamile kutsi kube matima ngemalunga emndeni kutsi emukele simo. Baveta nekutsi indlela umuntfu latsatsa ngayo simo ibaluleke kakhulu. Kwenta lushintjo nekulungisa indlela yekuphila yemndeni kungase kube matima ekucaleni. Kodvwa nangabe umuntfu awenta mbamba umetamo, angakhona kutivumelanisa nesimo lesisha. Nasenta loko, kubalulekile kutsi singaticatsanisi nalabanye labangagulelwa, sicabange kutsi bona baphila kahle kunatsi. Empeleni, kute lowatiko kutsi labanye bantfu bahlushwa ngutiphi tinkinga. Onkhe emaKhristu atfola sikhutsato kunankha emavi aJesu: “Wotani kimi, nine nonkhe lenikhatsele nalenisindvwa yimitfwalo, ngitaniphumuta.”​—Matewu 11:28.

14. Tingabekwa njani tintfo letita kucala?

¹⁴ Nawugulelwa kamatima, umndeni utawube wenta kahle kukhumbula lamavi laphefumulelwe: “Nangabe kunebeluleki labanyenti [tinhloso] tiyaphumelela.” (Taga 15:22) Emalunga emndeni angahlangana yini kute acoce ngesimo lesibangelwe ngulokugula? Kutawuba kuhle kutsi ente njalo ngekucale athandaze bese afuna sicondziso eVini laNkulunkulu. (Tihlabelelo 25:4) Yini labangacoca ngayo? Bangacoca ngetindlela tekwelapha, tikweleti lokufanele batibhadale, kanye netincumo lokufanele tentiwe ngumndeni, njengekutsi ngubani lotawuba ngumnakekeli loyinhloko? Umndeni ungasifaka njani sandla kute usite? Emalungiselelo lentiwe angalitsintsa njani lilunga ngalinye lemndeni? Tinganakekelwa njani tidzingo takamoya kanye naletinye talona longumnakekeli loyinhloko?

15. Nguluphi lusito Jehova laluniketa imindeni legulelwa kamatima?

¹⁵ Kuthandaza ngebucotfo sicele sicondziso saJehova, kuzindla ngeliVi lakhe, kanye nekusebentisa loko lokushiwo liBhayibheli ngekutimisela, kuholela etibusisweni letingetulu kwaloko lesikulindzele. Lesifo lesiphetse lilunga lemndeni singase singabi ncono. Kodvwa kwetsembela kuJehova kuholela emiphumeleni lemihle ngisho nobe sikusiphi simo. (Tihlabelelo 55:22) Umhlabeli wabhala: “Simakadze wangisekela ngemusa wakhe, ngabuye ngema futsi. Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.”—Tihlabelelo 94:18, 19; fundza neTihlabelelo 63:6-8.

16, 17. Ngutiphi tintfo lokungacocwa ngato nebantfwana labancane mayelana nesifo lesiphetse lomunye umntfwana?

¹⁶ Kugula lokumatima kungabangela bantfwana tinkinga emndenini. Ngako-ke, kubalulekile kutsi batali basite bantfwana bacondze tidzingo lesetivelile futsi babatjele naloko labangakwenta kute basite. Nangabe lona logulako kungumntfwana, laba labanye bantfwana kufanele basitwe kute bacondze kutsi njengobe kunakwa kakhulu lona logulako akusho kutsi bona abasatsandvwa. Kunekutsi batali bavumele emagcubu nobe inzondo yakheke, kufanele basite laba labanye bantfwana kutsi babe nebuhlobo lobusedvute kulomunye nalomunye futsi babe neluvelo lolumsulwa njengobe baba nesandla ekulungiseni lesimo lesibangele lokugula.

¹⁷ Bantfwana labancane bayashesha kuva nangabe batali babo babachazela kahle kunalapho babachazela tintfo letinyenti nobe babatjele imininingwane leyinkimbinkimbi lemayelana netindlela tekwelapha. Ngako-ke, bangamane nje babachazele kutsi lelilunga lemndeni leligulako likusiphi simo. Nangabe labantfwana labangaguli babona kutsi kugula kuvimbela bantfu labagulako kutsi bangakwati kutentela tintfo bona labatitsatsela phansi, nakanjani batawuba ‘nelutsandvo lwebuzalwane’ futsi babe ‘nebubele.’​—1 Phetro 3:8.

18. Bantfwana labakhulile bangasitwa njani kute bacondze tinkinga letibangelwe kugula, futsi loku kungabazuzisa njani?

¹⁸ Bantfwana labakhulile kufanele basitwe kute bacaphele kutsi kunesimo lesimatima futsi sidzinga onkhe emalunga emndeni atidzele. Ngesizatfu sekutsi batali kufanele babhadale bodokotela kanye netikweleti tekwelapha, angeke basakwati kunakekela laba labanye bantfwana ngendlela labebangatsandza kwenta ngayo. Labantfwana batawutfukutsela yini futsi bative shengatsi bagodlelwe lokutsite? Nobe batawusicondza lesimo futsi batimisele kutidzela? Lokunyenti kutawuya ngendlela lokucocwa ngayo ngalesimo kanye nemoya lokhona emndenini. Kuliciniso kutsi emindenini leminyenti kugula kwelilunga lawo kuye kwasita ekucecesheni bantfwana kutsi balalele seluleko saPawula lesitsi: “Ningenti lutfo ngembango nangeludvumo lwelive, kepha ngekutfobeka nishaye kungatsi labanye bakhulu kunani. Ngulowo nalowo anganakekeli kwakhe yedvwa, kepha anakekele nekwalabanye.”​—Filiphi 2:3, 4.

19, 20. (a) Ngumuphi umtfwalo tinhloko temindeni letinawo nangabe kugula lilunga lemndeni? (b) LiBhayibheli litiniketa njani ticondziso tekumelana nekugula, nanobe lingasiyo incwadzi yetekwelapha?

¹⁹ EmaKhristu lanekulinganisela awatali tindlela tekwalapha nangabe nje tingashayisani nemtsetfo waNkulunkulu. Nangabe lilunga lemndeni ligula, aba nenkhabunkhabu yekufuna lusito lwekwelapha lesifo lesiphetse lona logulako. Nanobe kunjalo, kunetindlela tekwelapha letiphikisanako lokufanele aticabangele. Ngetulu kwaloko, eminyakeni leyengcile kwavela tifo letinsha kanye nekukhubateka lokutsite, futsi kute netindlela tekwelapha linyenti laletifo. Ngisho nangaletinye tikhatsi akusimelula nekutfola kutsi umuntfu uphetfwe ngusiphi sifo. Ngako-ke, yini umKhristu lokufanele ayente?

²⁰ Nanobe nje lomunye umbhali weliBhayibheli abengudokotela, futsi nemphostoli Pawula aniketa umngani wakhe Thimothi seluleko lesilusito sekwelapha, liBhayibheli alisiyo incwadzi yetekwelapha, kodvwa lisicondziso sendlela yekutiphatsa kanye nesakamoya. (Kholose 4:14; 1 Thimothi 5:23) Nanobe kunjalo, nakutiwa etindzabeni tekwelapha, tinhloko temindeni letingemaKhristu tenta tincumo letiveta kulinganisela. Mhlawumbe tingakubona kukuhle kutsi titfole imibono yabodokotela labanyenti. (Catsanisa neTaga 18:17.) Titawulifunela lusito loluncono kakhulu lilunga lemndeni leligulako, futsi linyenti lato lifuna lusito kubodokotela labavamile. Letinye tikhululeka kakhudlwana natisebentisa letinye tindlela tekwelapha. Nalesi sincumo lokufanele umuntfu atentele sona. Nanobe kunjalo, nakacatulula tinkinga letimayelana netekwelapha, emaKhristu avumela ‘liVi laNkulunkulu libe sibane etinyaweni tawo, futsi libe kukhanya endleleni yawo.’ (Tihlabelelo 119:105) Achubeka alandzela ticondziso teliBhayibheli. (Isaya 55:8, 9) Ngekwenta njalo, ayatibalekela tindlela tekwelapha letifaka ekhatsi kusebentelana nemimoya, futsi awakwemukeli kwelashwa lokumelene netimiso teliBhayibheli.​—Tihlabelelo 36:9; Imisebenti 15:28, 29; Sembulo 21:8.

21, 22. Lomunye wesifazane wasisebentisa njani seluleko seliBhayibheli, futsi sincumo lasenta sabonakala njani sisihle esimeni labekabukene naso?

²¹ Asewucabange nganasi simo sewesifazane losemusha wase-Asia. Ngemuva kwekufundza liBhayibheli naboFakazi sikhashana, wabeleka umntfwana wentfombatana lobekanesisindvo lesingemagremu langu-1 470, singakefiki sikhatsi sakhe lesifanele. Lona wesifazane weva buhlungu ngesikhatsi dokotela amtjela kutsi lomntfwana abetawukhubateka engcondvweni futsi abengeke akwati nekuhamba. Wamtjela kutsi amyise endzaweni yebantfwana labakhubatekile. Indvodza yakhe beyingati kutsi bekufanele bente njani. Ngako-ke, bekufanele aye kubani?

²² Utsi: “Ngikhumbula ngifundza kutsi ‘bantfwana balifa leliphuma kuSimakadze, basibusiso lesivela kuye.’” (Tihlabelelo 127:3) Wakhetsa kulitsatsa ‘lelifa’ aye nalo ekhaya kute ayewulinakekela. Ekucaleni bekumatima, kodvwa ngelusito lwebangani labangemaKhristu labasebandleni lelisedvute laboFakazi baJehova, lowesifazane wakwati kunika lomntfwana lusito lolukhetsekile loludzingekako. Ngesikhatsi lomntfwana sekaneminyaka lengu-12 budzala, wacala kuya emihlanganweni eHholweni leMbuso futsi abekujabulela kuba ndzawonye nalabanye bantfwana. Lomake utsi: “Ngiyajabula kutsi timiso teliBhayibheli tingisite ngakwati kwenta lokulungile. LiBhayibheli lingisite ngalondvolota nembeza lomuhle embikwaNkulunkulu Jehova, hhayi kutsi ngitisole kuphila kwami konkhe.”

23. Nguyiphi indvudvuto liBhayibheli leliyiniketa labo labagulako kanye nalabo lababanakekelako?

²³ Kugula angeke kusihluphe kute kube phakadze. Umphrofethi Isaya usitjela ngesikhatsi labo ‘labahlala emhlabeni bangeke batsi: “Ngiyagula.”’ (Isaya 33:24) Lesetsembiso sitawugcwaliseka eveni lelisha lelisondzela ngekushesha. Njengobe singakefiki lesikhatsi, kufanele siphile nako kugula kanye nekufa. Lokujabulisako kutsi liVi laNkulunkulu lisinika ticondziso kanye nelusito. Imitsetfo leyinhloko yekutiphatsa liBhayibheli lelisinika yona itawuhlala njalo, futsi iyayendlula imibono leshintjako yebantfu labanesono. Ngako-ke, umuntfu lohlakaniphile uvumelana nemhlabeli lowabhala: “Imfundziso yaSimakadze iphelele, ihlumelelisa umphefumulo; bufakazi baSimakadze buliciniso, buyabahlakaniphisa labete lwati. . . . Tincumo tetehlulelo taSimakadze tiliciniso, tilunge tonkhe. . . . Lowo lotigcinako unemvuzo lomkhulu.”​—Tihlabelelo 19:7, 9, 11.