Kunyenti lesingakutfola ngekutadisha liBhayibheli, kodvwa angeke kube melula ngaso sonkhe sikhatsi. Ngaletinye tikhatsi, ungahle utibute kutsi utawukhona yini kuchubeka nekutadisha liBhayibheli. Kungani kufanele wente imetamo kuze uchubeke? Yini lengakusita uchubeke ngisho nobe kumatima?

1. Kubaluleke ngani kutadisha liBhayibheli?

“Livi laNkulunkulu liyaphila, linemandla.” (KumaHebheru 4:12) LiBhayibheli libalulekile ngobe liveta loko Nkulunkulu lakucabangako nendlela lativa ngayo ngawe. Alikusiti utfole lwati nje kuphela, kodvwa liphindze likusite utfole kuhlakanipha sibili nelitsemba. Lokubaluleke nakakhulu kutsi liBhayibheli likusita kutsi ube ngumngani waJehova. Nawulitadisha usuke uvumela emandla alo kutsi ente kuphila kwakho kube ncono.

2. Kubaluleke ngani kubona bumcoka beliciniso leliseBhayibhelini?

Emaciniso laseBhayibhelini afana nemcebo loligugu. Kungako liBhayibheli lisikhutsata kutsi ‘sitsenge liciniso, futsi singacali silitsengise.’ (Taga 23:23) Nasihlale sikhumbula kubaluleka kweliciniso leliseBhayibhelini, sitatimisela kuchubeka silitadisha, ngisho nobe sihlangabetana netinkinga.—Fundza Taga 2:4, 5.

3. Jehova angakusita njani kuze uchubeke utadisha liBhayibheli?

NjengeMdali wakho lonemandla neMngani, Jehova ufuna kukusita ufundze ngaye. Angakunika “sifiso nemandla ekwenta intsandvo yakhe.” (Fundza KubaseFiliphi 2:13.) Ngako, angakusita nakwenteka udzinga sikhutsato sekutadisha nekwenta loko lokufundzile. Angaphindze akunikete emandla lengetiwe kuze umelane netinkinga nobe kuphikiswa. Thantaza njalo kuJehova umcele akusite uchubeke nekutadisha liBhayibheli.—1 KubaseThesalonika 5:17.

CHUBEKA UFUNISISA

4. Yenta kutadisha kwakho liBhayibheli kute kucala

Ngaletinye tikhatsi siba matasa kakhulu kangangekutsi size sibe bete sikhatsi lesenele sekufundza liBhayibheli. Singasitwa yini? Fundza KubaseFiliphi 1:10, bese nicoca ngalemibuto:

• Ucabanga kutsi ngutiphi letinye ‘tintfo letibaluleke kakhulu’ ekuphileni?

• Ungakwenta njani kutadisha kwakho liBhayibheli kute kucala?

1. Nawucala ngekugcwalisa libhakede ngemhlabatsi, bese ufaka ematje, lamatje angeke enele onkhe kulelibhakede

2. Nawufaka lamatje kucala, kutawuba nesikhala lesenele sekutsi ufake cishe wonkhe lomhlabatsi. Ngendlela lefanako, nawenta ‘tintfo letibaluleke kakhulu’ tite kucala ekuphileni kwakho, utawuba nesikhatsi lesenele sekwenta tintfo letimcoka, uphindze ube nesikhatsi sekwenta naletinye tintfo

Kutadisha liBhayibheli kwenetisa sidzingo setfu sekufuna kufundza ngaNkulunkulu, lokusidzingo sekumati nekumkhonta. Fundza Matewu 5:3, bese nicoca ngalombuto:

• Sizuza njani nasenta kufundza kwetfu liBhayibheli kute kucala?

5. Beketela ngisho nobe uphikiswa

I-VIDEO: Watfola Umvuzo Ngenca Yekubeketela (5:22)

• Kule-video, yini leyentiwa bangani kanye nemndeni waFrancesco nakabatjela ngaloko lebekakufundza?

• Ngumuphi umvuzo lawutfola ngenca yekubeketela?

Fundza 2 KuThimothi 2:24, 25, bese nicoca ngalemibuto:

• Umndeni kanye nebangani bakho bativa njani ngaloko lokufundzako?

• Ngekusho kwalamavesi, yini longayenta nangabe kukhona longajabuli ngekutsi ufundza liBhayibheli? Leni?

6. Yetsembela kuJehova kuze akusite

I-VIDEO: Jehova Uyasisita Sente Lushintjo (3:56)

• Kule-video, nguluphi lushintjo Jim lalwenta kuze ajabulise Jehova?

• Lesibonelo sakhe sikukhutsata njani?

Fundza KumaHebheru 11:6, bese nicoca ngalemibuto:

• Yini Jehova latayentela labo “labamfuna ngekutimisela,” lokusho labo labetama kamatima kutsi bamati futsi bamjabulise?

• Loku kukutjelani ngendlela Jehova lativa ngayo nakakubona wenta imetamo yekutadisha liBhayibheli?

LOKO LESICOCE NGAKO

Ngisho nobe kungesimelula, kutadisha liBhayibheli kungakusita ujabulele kuphila kuze kube phakadze. Chubeka wetsembele kuJehova futsi utakuniketa umvuzo.

Yini Loyifundzile?

• Yini leyenta emaciniso eliBhayibheli abe ligugu kuwe?

• Ungaciniseka njani ngetintfo letibaluleke kakhulu?

• Kungani kufanele ucele Jehova kutsi akusite uchubeke utadisha liBhayibheli?

LOKUNYE LONGAKUHLOLA

Fundza ngetindlela letine letisite bantfu labanyenti kutsi basisebentise kahle sikhatsi sabo.

“Indlela Yokusebenzisa Isikhathi Sakho Ngokuhlakanipha” (Phaphama! yaFebruary 2014, letfolakala ngesiZulu)

Naka indlela Jehova lasita ngayo lomunye make, lobekanendvodza lebeyingayijabuleli imetamo yakhe yekujabulisa Nkulunkulu.

Jehova Uyasicinisa Kute Setfwale Imitfwalo Yetfu (5:05)

Buka kutsi lenye indvodza yasitakala njani ngekubeketela kwemfati wayo.

Ngatsi Asengililinge Liciniso (6:30)

Ngaletinye tikhatsi BoFakazi BaJehova basolwa ngekutsi behlukanisa imindeni. Kuliciniso yini loko?

“BoFakazi BaJehova Behlukanisa Imindeni Yini Nobe Bayisita Kutsi Icine?” (Sihloko lesiku-internet)

Sonkhe kufanele sente tincumo. Letinye taletincumo tingaba timbi nobe tibe tinhle, futsi tiyabutsintsa nebuhlobo betfu naJehova. Sibonelo saloko kutsi kungadzingeka sente sincumo sekutsi sitawuhlala kuphi, singayitfola njani imali lesiyidzingako, nekutsi sitawushada yini. Nasenta tincumo letikahle sitawujabula futsi sijabulise naJehova.

1. LiBhayibheli lingakusita njani kutsi wente tincumo letikahle?

Ngaphambi kwekutsi wente sincumo, thantaza kuJehova umcele akusite futsi uhlole loko lakushoko eBhayibhelini ngaleyondzaba. (Fundza Taga 2:3-6.) Kuletinye timo, Jehova uniketa umtsetfo locondzile. Nangabe kunjalo, sincumo lesihle longasenta kutsi uwulalele.

Ungenta njani nangabe kute umtsetfo locondzile eBhayibhelini lokutjela loko lokufanele ukwente? Jehova utawuchubeka akucondzisa “endleleni lokufanele uhambe ngayo.” (Isaya 48:17) Kanjani? Angasebentisa timiso letitakucondzisa. Timiso teliBhayibheli tingemaciniso lasisekelo laveta indlela Nkulunkulu lacabanga ngayo nendlela lativa ngayo. Sihlale sitfola indlela Nkulunkulu lativa ngayo ngesimo lesitsite nasifundza indzaba leseBhayibhelini. Nasicondza indlela Jehova lativa ngayo, sitawenta tincumo letitamjabulisa.

2. Yini lokufanele ucabange ngayo ngaphambi kwekwenta sincumo?

LiBhayibheli litsi: “Lohlakaniphile uyacabangisisa ngako konkhe lakwentako.” (Taga 14:15) Loku kusho kutsi ngaphambi kwekutsi sente sincumo, kufanele sitinike sikhatsi sekucabangisisa ngaloko lesitakukhetsa. Njengobe ucabangisisa ngesincumo ngasinye, tibute: ‘Ngutiphi timiso teliBhayibheli lengingatisebentisa? Ngusiphi sincumo lesitangenta ngibe nekuthula kwengcondvo? Sincumo sami sitabatsintsa njani labanye? Lokubaluleke nakakhulu kutsi sitamjabulisa yini Jehova?’—Dutheronomi 32:29.

Jehova unelilungelo lekusitjela lokulungile nalokungakalungi. Nasiyati kahle imitsetfo netimiso takhe futsi sitimisela kutilandzela, sisuke sicecesha bonembeza betfu. Nembeza indlela lesitiva ngayo nasenta lokulungile nobe lokungakalungi. (KubaseRoma 2:14, 15) Nembeza loceceshwe kahle utasisita sente tincumo letikahle.

CHUBEKA UFUNISISA

3. Vumela liBhayibheli kutsi likucondzise

I-VIDEO: Vumela Timiso TeliBhayibheli Tikucondzise (5:54)

• Iyini inkhululeko yekutikhetsela?

• Jehova wasinikelani inkhululeko yekutikhetsela?

• Yini lasinikete yona lesisita sente tincumo letikahle?

Kuze utfole sibonelo sesimiso lesiseBhayibhelini, fundza Kubase-Efesu 5:15, 16, bese nicoca ngekutsi ‘ungasisebentisa njani sikhatsi sakho’ kuze . . .

• ulifundze njalo liBhayibheli.

• ube ngumlingani wemshado, umtali, indvodzana nobe indvodzakati lekahle.

• ube khona emihlanganweni yelibandla.

4. Cecesha nembeza wakho kuze wente tincumo letikahle

I-VIDEO: “Londvolota Nembeza Lomuhle” (5:13)

• Kule-video, yini lodzadze layentile kuze aceceshe nembeza wakhe futsi ente sincumo lebesitawujabulisa Jehova?

Kungani kungakafaneli sicele labanye kutsi basentele tincumo? Fundza KumaHebheru 5:14, bese nicoca ngalemibuto:

• Ngisho kungabonakala kumelula kucela labanye kutsi basentele tincumo, yini lokufanele sitikhetsele yona?

• Yini lengakusita uceceshe nembeza wakho futsi wente tincumo letikahle?

5. Hlonipha bonembeza balabanye

Bantfu ngeke bente tincumo letifanako. Singakhombisa njani kutsi siyabahlonipha bonembeza balabanye? Cabanga nganati timo letimbili:

Simo sekucala: Dzadze lotsandza i-makeup utfutsela ebandleni lelinabodzadze labangayitsandzi i-makeup.

Fundza KubaseRoma 15:1 na-1 KubaseKhorinte 10:23, 24, bese nicoca ngalomibuto:

• Ngekwaloko lokushiwo ngulamavesi, ngusiphi sincumo lesingatsatfwa ngulodzadze? Yini lotayenta nawunemuntfu lonanembeza longamvumeli kutsi ente intfo letsite, kantsi wena nembeza wakho uyakuvumela kutsi uyente?

Simo sesibili: Umzalwane uyati kutsi liBhayibheli alisho kutsi kubi kunatsa tjwala, kodvwa ukhetsa kungabunatsi. Umenywa emcimbini lapho abona khona labanye bazalwane banatsa tjwala.

Fundza Umshumayeli 7:16 na-KubaseRoma 14:1, 10, bese nicoca ngalomibuto:

• Ngekwaloko lokushiwo ngulamavesi, ngusiphi sincumo lesingatsatfwa ngulomzalwane? Yini lotayenta nawubona umuntfu enta intfo wena nembeza wakho longakuvumeli kutsi uyente?

Ngutiphi tinyatselo letiholela ekwenteni tincumo letikahle?

1. Cela Jehova akusite wente sincumo.—Jakobe 1:5.

2. Yenta lucwaningo eBhayibhelini nasetincwadzini letisekelwe kulo kuze utfole timiso longatisebentisa. Ungaphindze ukhulume nemaKhristu lavutsiwe.

3. Cabanga ngemphumela sincumo sakho lesingaba nawo kunembeza wakho kanye nakubonembeza balabanye.

LOKO LESICOCE NGAKO

Senta tincumo letinhle nasitfola indlela Jehova lativa ngayo ngendzaba letsite sibese sicabanga ngekutsi loko lesikwentako kutabasita yini labanye nobe kutawubalimata.

Yini Loyifundzile?

• Ungatenta njani tincumo letijabulisa Jehova?

• Ungamcecesha njani nembeza wakho?

• Ungakhombisa njani kutsi uyabahlonipha bonembeza balabanye?

LOKUNYE LONGAKUHLOLA

Ungatenta njani tincumo leticinisa buhlobo bakho naNkulunkulu?

“Yenta Tincumo Letijabulisa Nkulunkulu” (Sicongosekulindza, sa-April 1, 2011)

Fundza lokunyenti ngendlela Jehova lasiniketa ngayo seluleko.

Jehova Ucondzisa Bantfu Bakhe (9:50)

Buka kutsi yini leyasita lenye indvodza kutsi yente sincumo lesimatima.

Jehova Usicinisekisa Ngako Konkhe Lokuhle (5:46)

Fundza indlela longamjabulisa ngayo Jehova ngisho nobe angakasiniki umtsetfo locondzile mayelana naloko lokufanele sikwente.

“Ingabe Ngaso Sonke Isikhathi Udinga Umyalo WeBhayibheli?” (Sicongosekulidza, saDecember 1, 2003, lesitfolakala ngesiZulu)